శ్రీ యాదాద్రి నరసింహ శతకము
(తే.గీ.)
1*
శ్రీ రమానాథ! విశ్వేశ! చిత్ర సింహ!
సకల లోకాలు పాలించు శాంతమూర్తి!
కరుణ జూపియు మముబ్రోవు కంజనేత్ర!
స్వామి నరసింహ యాదాద్రి సదన శరణు!
2*
విశ్వరూప! విశ్వంభర! విష్ణుదేవ!
సర్వ సిద్దిప్రదాయక! స్తంభ జాయ!
ఆదరించి రక్షించు ప్రహ్లాదవరద!
స్వామి నరసింహ యాదాద్రి సదన శరణు!
3*
శ్రీ సుదర్శన నరహరి వాసుదేవ!
భక్తవత్సల పరబ్రహ్మ! పద్మనాభ!
వైద్యనారాయణా వేదవేద్య! శౌరి!
స్వామి నరసింహ యాదాద్రి సదన శరణు!
4*
దీనజనబాంధవా! హరిదివ్యతేజ!
నిఖిలభక్తజనరక్షక! నీరజాక్ష!
ధర్మమునునిల్పు శ్రీచక్ర దారి! విష్ణు!
స్వామి నరసింహ యాదాద్రి సదన శరణు!
5*
మంచి పుణ్యము, చెడుపాపమగును భువిని,
చెడునుదొలగించి దీనుల సేదదీర్చు!
భద్రతా భావమును గూర్చు రౌద్ర మూర్తి!
స్వామి నరసింహ యాదాద్రి సదన శరణు!
6*
నాటిదేవదానవయుద్ధ నాటకంబు –
మంచిచెడు పాత్ర లనుజర్గు మరొకపేర –
దర్శకుడ వీవె! తుద కాత్మ దారి ముక్తి!
స్వామి నరసింహ యాదాద్రి సదన శరణు!
7*
మంచివర్తన విలువేది? మానవాళి-
-చెడుసమర్థన కలికాల చేష్ట సాగె,
మంచి వాదన దారిద్య్ర మార్గమాయె!
స్వామి నరసింహ యాదాద్రి సదన శరణు!
8*
ధర్మ సంస్థాపక! దశావతారమూర్తి!
శిష్ట మైత్రి భక్తిని మెచ్చు, దుష్టవైరి!
భక్తియోగుల దరిజేర్చు ముక్తిదాత!
స్వామి నరసింహ యాదాద్రి సదన శరణు!
9*
బాల్యమునభక్తితోనెడ్ల బండి బాట,
వచ్చిగొలిచిరి తలిదండ్రి వారివెంట,
కొడవటంచకు ప్రతియేట గొలువ వస్తి!
స్వామి నరసింహ యాదాద్రి సదన శరణు!
10
బాల్య మేగినా కొలదినీభక్తిగుదిరె –
యువతమెదిలినాకొలదినీ యునికి దెలిసె!
ప్రేరణయుగూర్చె నీదివ్యప్రేమశక్తి!
స్వామి నరసింహ యాదాద్రి సదన శరణు!
11*
ఆత్మతత్వంబు దెల్పిమమ్మాదరిoచు!
అంతరాత్మలోనీరూపు నరయదెలుపు!
భక్తిదారిలో నానంద బ్రహ్మమొసగు!
స్వామి నరసింహ యాదాద్రి సదన శరణు![
12*
పశువునుండివేరగు ధర్మబాటనడిపి~
మంచిమర్యాద జీవితం మాకొసంగి-
మానవత్వంబుదీపింప మమ్ము బ్రోవు!
స్వామి నరసింహ యాదాద్రి సదన శరణు!
13*
నూత్నకణసృష్టిచే దొల్గుమృతకణాలు!
బాల్య యవ్వన జరలదేహాలుమారు ~
దేహములు, జన్మలీ యాత్మ గేహగతులు!
స్వామి నరసింహ యాదాద్రి సదన శరణు!
14*
కొడుకు తనశత్రు భక్తుడై కోరికొలువ!
గురులదూషించె కసిపుండు క్రూరుడయ్యె!
పెక్కు శిక్షల హింసించె నొక్క కొడుకు!
స్వామి నరసింహ యాదాద్రి సదన శరణు!
15*
బాలప్రహ్లాదు హరిభక్తి బాపలేక –
క్రోధి కసిపుండు మిక్కిలి కోపగించె!
తననె పూజింప శాసించె తమరి గుడుల!
స్వామి నరసింహ యాదాద్రి సదన శరణు!
16*
నిఖిల లోకాలు గాలించె నిన్నుగనక –
విసిగి, వేసారె, నామాట వినుమటంచు,
పుత్ర వాత్సల్యమున తండ్రి బుజ్జగించె!
స్వామి నరసింహ యాదాద్రి సదన శరణు!
17*
కొడుకు మార్చగ, పలుమారునోపి జెప్పు-
తండ్రిమార్చగా తనయుని తత్వబోధ!
ఎవరిమాటలువారివే ఎవరువినరు!
స్వామి నరసింహ యాదాద్రి సదన శరణు!
18*
లేని హరికయి స్మరణేల? తనయ!
గురువుకే నామమునుబెట్ట గొప్పతనమ?
తండ్రిమాటపాటింపని తనయుడేల!
స్వామి నరసింహ యాదాద్రి సదన శరణు!
19*
శత్రు భక్తుడు పుత్రునిసైపలేక –
నంతకంతకు క్రోధంబు నధికమయ్యె!
తానె కడతేర్చగాబూనె తండ్రి కడకు!
స్వామి నరసింహ యాదాద్రి సదన శరణు!
20*
సోదరాంతకుడరియని క్రోధమొంది-
మన్నుమిన్నులు శోధించి, మడిసెననుచు-
మాటవినని పుత్రునిమార్చు బాటవెదికె!
స్వామి నరసింహ యాదాద్రి సదన శరణు!
21*
మాట పట్టింపులాత్మీయ బాట గనవు,
కపటి- వరగర్వి-కశిపుండు కఠినమతియు,
తనకు నవమానమనియెంచె, తనయు భక్తి!
స్వామి నరసింహ యాదాద్రి సదన శరణు!
22*
విధిగ తనపూజ బోధింప వినని వాని
లేకలేక గల్గిన సంతు నేకపుత్రు!
శత్రుసమునిగా నెంచెను శత్రు భక్తు!
స్వామి నరసింహ యాదాద్రి సదన శరణు!
23*
పైమెరుంగులకే భ్రమ పడెడువారు,
తేల్చి జెప్పినా లోగుట్టు దెలియ లేరు!
అహమె తమగొప్పగా నెంత్రు, అహరహంబు!
స్వామి నరసింహ యాదాద్రి సదన శరణు!
24*
భక్తి రహితుడై ప్రహ్లాదు బాధ పెట్టు,
వానియింట జన్మించి దైవాస్త్ర మట్లు-
నిత్యవేదన గలిగించె నీదు భక్తి!
స్వామి నరసింహ యాదాద్రి సదన శరణు!
25*
చెక్కు చెదరక బెదరక పెక్కు శిక్ష,
లోర్చు పుత్రు మార్చదగు నాలోచనొకటి,
గలుగ హరిజూపుమని యడ్గె కశిపుడపుడు!
స్వామి నరసింహ యాదాద్రి సదన శరణు!
26*
అంతటనునిండె హరియనంతనిలయు,
డిందుగలడందులేడను సందియంబు-
లేదు, హరిభక్తి యునులేక లేదు ముక్తి!
స్వామి నరసింహ యాదాద్రి సదన శరణు!
27*
ఎదురుపడి రాడు నీహరీ-వెదక వృధయె!
డింభకా హరిజూపు మీకంబమందు,
జూపకున్నజంపెదనని కోపగించె!
స్వామి నరసింహ యాదాద్రి సదన శరణు!
28*
బుద్ధి నశియింప నీతత్వ బోధ వినునె?
దాపు కంబంబు జూపగా దైత్యుడంత!
పెద్ధ గదమోదె, దిక్కులు పిక్కటిల్ల!
స్వామి నరసింహ యాదాద్రి సదన శరణు!
29*
ఒక్క పెట్టున స్తంభంబు ముక్కలయ్యె!
నురుముమెరుపుల లోకాలు నులికి పడగ-
నుర్వి నుద్భవించితివహో! ఉగ్రమూర్తి!
స్వామి నరసింహ యాదాద్రి సదన శరణు!
30*
ఘోర వరగర్వి, తనమది గోరినట్లు –
దునుమదగు రూపు దాల్చిన దురితదూర!
నీచు జీల్చి ప్రహ్లాదుని గాచి నావు!
స్వామి నరసింహ యాదాద్రి సదన శరణు!
31*
వేగ భీకరాద్భుతరూపు వెడలిరాగ,
పారజూచియు కశిపుండు పారిపోయె
పిరికి దరిమి జంపితివహోబిలముజొచ్చి
స్వామి నరసింహ యాదాద్రి సదన శరణు!
32*
బాలమొదలు బ్రహ్మాదులు భయముజెంద
నుగ్రరూపంబు గనలేక నుపశమింప
జేయప్రార్థింప లక్షివేంచేసె నంత!
స్వామి నరసింహ యాదాద్రి సదన శరణు!
33*
జీవశక్తివి-పరమేశ! దివ్యతేజ!
కనకనేత్రుడు కశిపుండు గనిరి ముక్తి,
పిదప నీ ద్వార పాలన విధిని గొనిరి!
స్వామి నరసింహ యాదాద్రి సదన శరణు!
34*
చావు దప్పించుకొనజూచె కావు మనక!
వరము కొలది రూపమునెత్తి, వానిద్రుంచి,
యుగ్రమూర్తివై తిరిగితో – ఉర్వినంత!
స్వామి నరసింహ యాదాద్రి సదన శరణు!
35*
శ్రీ మహాలక్ష్మి నరసింహ చిన్మయేశ!
సాదరమున వెలయగోరె యాదమునియు!
శాంతమూర్తివై నెలకొన్న సాధు హృదయ!
స్వామి నరసింహ యాదాద్రి సదన శరణు!
36*
పుట్టు ప్రతి జీవి – పుడమితాగిట్టుకొఱకె!
ఆత్మ గృహములీ దేహాలు నంతరించు!
రక్తి వీడినాత్మకె జన్మరహితముక్తి!
స్వామి నరసింహ యాదాద్రి సదన శరణు!
37*
ఖలుడు దైవమెట్లగు – పాపి కావరమున,
తనకె గుడిపూజలని చాటె తనయువిడక,
పెక్కు శిక్షలపాల్జేసె, కడకు మడిసె!
స్వామి నరసింహ యాదాద్రి సదన శరణు!
38*
మరణభయమొక్కటే వాని మనసు దొలిచె!
శత్రు శేషంబుగా పుత్రు జంపనెంచె,
కొడుకు కోసమైనను నిన్ను గొలువడాయె!
స్వామి నరసింహ యాదాద్రి సదన శరణు!
39*
చెడుగు దైత్యుల నిర్జించి చేటుబాపి,
మంచివారల మన్నించు మాధవుండ!
మానవ చికిత్సాభిమతమె మహిత భక్తి!
స్వామి నరసింహ యాదాద్రి సదన శరణు!
40*
వేడ్కగూర్తువు సద్భక్తి వేడుకొనగ,
వేదనలు బాపి బ్రోతువు సేద దీర్చి!
పంచనరసింహరూపుల ప్రాభవమున!
స్వామి నరసింహ యాదాద్రి సదన శరణు!
51*
నోట పల్కరింతయెగాని నొసట వెక్కి-
రింతయు స్ఫురించు కపటి రీతి మనిషి
వెనక దూషణలొకనాడు వెలుగుజూచు!
స్వామి నరసింహ యాదాద్రి సదన శరణు!
52*
పరుల దిట్టుటకలవాటు పడిననోరు
తిట్టు తనవారి నైనను స్థిమిత పడక
సంయమనములేకను సుఖశాంతి లేదు!
స్వామి నరసింహ యాదాద్రి సదన శరణు!
53*
ఋష్య శృంగ పుత్రుడు యాద ఋషియు బూని
మారుతినివేడె తగు గుట్ట మార్గమెరిగి
తపముచే నిన్ను మెప్పించె తనివిదీరె!
స్వామి నరసింహ యాదాద్రి సదన శరణు!
54*
యాదముని తపస్సుకు మెచ్చి సాదరమున
కోర్కె దీరగా వరమిచ్చి కొండపైన
వెలసియుంటివి ఇహలోకమేలుకొఱకు!
స్వామి నరసింహ యాదాద్రి సదన శరణు!
55*
యాదముని పేర యాదాద్రి యాదగిరిగ-
గుట్టగా నామ ప్రఖ్యాత గుడియు వెలిగె!
మూర్తియారాధనా క్షేత్రముగను నిలిచె!
స్వామి నరసింహ యాదాద్రి సదన శరణు!
56*
జ్వాల నర్సింహమూర్తిగా జనులు గొలువ
రెండు రాతిపల్కలమధ్య నుండునుగ్ర-
మూర్తిగానిన్ను పూజింత్రు రార్తజనులు!
స్వామినర్సింహ! యాదాద్రిసదన శరణు!
గీ*57
నవగిరీశ్వరా – శ్రీలక్ష్మి నారసింహ!
నిన్ను నమ్మినవారికి నిత్యయశము!
దుష్టశక్తులబాధలు దూర మగును!
స్వామి నరసింహ యాదాద్రి సదన శరణు!
గీ*58
ఉర్వి దుష్టుల ననచగా నుగ్రమూర్తి!
సాదుజనుల రక్షించు ప్రసన్న మూర్తి!
నయముజయమిచ్చు శ్రీలక్ష్మి నాథ బ్రోవు
స్వామి నరసింహయాదాద్రిసదన శరణు!
గీ*59
గంఢబేరుండ నర్సింహ! గావుమనుచు
దేవ దివ్యయోగానంద తేజ యనుచు
పంచమూర్తుల కీర్తింత్రు భక్తజనులు!
స్వామి నరసింహ యాదాద్రి సదన శరణు!
గీ*60
గురుడు భృగుని సద్బోధపై గురియుకుదుర,
చక్కగా సహస్రానీక చక్రవర్తి-
మొదట నినుజేరి పూజించె ముక్తినొందె!
స్వామి నరసింహ యాదాద్రి సదన శరణు!
61*
నిన్ను సేవింప కష్టముల్ నిమ్మలించు
నిన్ను నమ్మియు ధ్యానింప నిత్యశాంతి
స్వస్థతయు గూర్చు తీర్థ ప్రసాద మహిమ!
స్వామి నరసింహ యాదాద్రి సదన శరణు!
62*
ఎన్నిలీలలు మహిమలు యెన్నికథలు!
ఎంత సందడి-సంబరమెంతశోభ!
లెక్కకునుమించె భక్తుల మ్రొక్కుబడులు!
స్వామి నరసింహ యాదాద్రి సదన శరణు!
63*
మెట్లదారి శివాలయమెడమ వైపు
పార్వతీ రామలింగేశ ప్రభుడు వెలసె!
పుష్కరిణికెదురు పవనపుత్ర నెలవు!
స్వామి నరసింహ యాదాద్రి సదన శరణు!
64*
పవన పుత్రుడు నీక్షేత్ర పాలకునిగ
పాత క్రొత్త గుడులసాగు భక్తి భజన-
వెలుగు విద్యుత్తు దివ్వెలేవేళనైన!
స్వామి నరసింహ యాదాద్రి సదన శరణు!
65*
భక్త జనపక్ష పాతివై భద్రతొసగి-
దుష్ట బుద్ధుల రౌద్రివై దుడుకుమాన్పి-
దారిజూపించు పూర్ణావతారమూర్తి!
స్వామి నరసింహ యాదాద్రి సదన శరణు!
66*
శాపగ్రస్తులు నినుజేరి సన్నుతింప
ద్వారపాలకులనుబ్రోవ వారియిచ్ఛ
దెలిసి వరమిచ్చి బ్రోచిన దేవదేవ!
స్వామి నరసింహ యాదాద్రి సదన శరణు!
67*
ఏడుజన్మలమైత్రియు యెడముగాగ
మూడుజన్మల శత్రుత్వమునువహింప
బుట్టి లోకకంటకులైరి పుడమి యందు
స్వామి నరసింహ యాదాద్రి సదన శరణు!
68*
శూర కనకాక్షు, కశిపుల క్రూరమతుల
ఘోర హింసాత్మకుల ద్రుంచి కోర్కె దీర్ప
సాధు సజ్జన లోకాలు సంతసించె
స్వామి నరసింహ యాదాద్రి సదన శరణు!
69*
ధరణి జుట్టివచ్చియు హింసదారిలోన
కడలిముంచెత్తగా, కనకాక్షు దునుమ –
వేగ నాది వరాహమై వెలసినావు!
స్వామి నరసింహ యాదాద్రి సదన శరణు!
70*
నీదు రూపు వీక్షింప, ప్రహ్లాదుడడగ
నట వరాహనృసింహుగా నవతరింప
తేజరిల్లె సింహాద్రియు దేవదేవ!
స్వామి నరసింహ యాదాద్రి సదన శరణు!
71*
విధులు బాధ్యతలును దెల్పి వినయమొప్ప
మనసుగల్గి జీవించాలి మానవాళి
గాక! నరరూప దైత్యులే కలియుగాన!
స్వామి నరసింహ యాదాద్రి సదన శరణు!
72*
రక్తి దుష్కృత బాటలో రయమొనర్చు
భక్తి సుకృత దాయక బాటనడుపు!
ముందు వెనక జన్మలపుణ్యమున్న ముక్తి!
స్వామి నరసింహ యాదాద్రి సదన శరణు!
73*
నవత వెఱ్ఱితలలు వేయు నడతలెల్ల-
భ్రాంతిగొల్పు, మది సుంతశాంతి నిడవు!
పాత పుత్తడి పెద్దల బాట పుడమి!
స్వామి నరసింహ యాదాద్రి సదన శరణు!
74*
జన్మ నిత్యముగాదిది జలధి బుడగ!
ఆత్మ శాశ్వతమౌ జన్మలధిగమించు!
సత్యవ్రతజీవనమె జేర్చు సద్గతులకు!
స్వామి నరసింహ యాదాద్రి సదన శరణు!
75*
తెల్ల బియ్యాల పిండితో తెగులు గలుగ-
తౌడు బలవర్థకౌషద దారిసాగె!
నాగరిక పథ్యమీనాటి నాటు సరుకు!
స్వామి నరసింహ యాదాద్రి సదన శరణు!
76*
తుష్టి పుష్టి గూర్చని తిండి నిష్ట పడుచు-
దోచు దాచు వారాడుదోబూచులాట!
సాగినంతకాలము సాగు సంత బ్రతుకు!
స్వామి నరసింహ యాదాద్రి సదన శరణు!
77*
భోగములు భువి మృగతృష్ణ బోలు రుచులు!
రోజురోజుకు రుజలు పురోగమించు!
భక్తియోగ పూర్వకమైన బ్రతుకు మేలు!
స్వామి నరసింహ యాదాద్రి సదన శరణు!
78*
సిరులు జేరు కొబ్బరి నీరు జేరునట్లు-
లేమి క్రిమిమింగినవెలగ సామెతగును!
ధరణి కష్టసుఖాలు
తాత్కాలికములు!
స్వామి నరసింహ యాదాద్రి సదన శరణు!
79*
అన్నిగావలె ననుకొన్న సున్న శాంతి!
పరగ నున్నంతలో తృప్తి పడుట మేలు!
భక్తి రహిత జీవన దారి భ్రాంతిమయము!
స్వామి నరసింహ యాదాద్రి సదన శరణు!
80*
తృప్తిమాటేది, సత్ఫలప్రాప్తిలేక?
సుఖముమాటేది, నీధ్యాన సుఖముగాక?
శాంతి మాటేది, భక్తి ప్రశాంతి గాక?
స్వామి నరసింహ యాదాద్రి సదన శరణు!
81*
రాత్రిపగలమవాస్య పూర్ణమియుగల్గు!
దారి పుష్ఫ, కంటకమగు తారుమారు!
కాలమొకతీరు గడుపగా గలుగు వృద్ధి!
స్వామి నరసింహ యాదాద్రి సదన శరణు!
82*
చెడును వదలక మది నిన్ను చేరుటెట్లు?
ఆశ వీడక నాత్మనిన్నరయుటెట్లు?
చిత్తమెట్లు నిస్వార్థపు చిగురుతొడుగు?
స్వామి నరసింహ యాదాద్రి సదన శరణు!
83*
ప్రేరణయునీదె సర్వత్ర ప్రేమనీదె!
విశ్వప్రాణశక్తియునీవె! విధివినీవె!
శ్వాస నిశ్వాస భక్తివిశ్వాసమీవె!
స్వామి నరసింహ యాదాద్రి సదన శరణు!
84*
ఎన్నిమార్గాలు, గురుదేవులెందరిలను?
ఎన్నిబోధలు, తరియింప నెన్నిగతులు?
కలుగు నన్నియు జేర్చు నీగమ్యమునకు!
స్వామి నరసింహ యాదాద్రి సదన శరణు!
85*
చదువు సంస్కారములు గల్గి సాగుభక్తి!
మార్గ శోధన- బోధన-మార్పు-చేర్పు!
తీర్పు నీదగు తుద ముక్తి తీరమునకు!
స్వామి నరసింహ యాదాద్రి సదన శరణు!
86*
తాను మారి తదితరులు మార్చు క్రియలు
విశ్వసింతురు లోకులు విషయ చర్ఛ!
సత్యమేనీవుగా భక్తి సాగుచుండు!
స్వామి నరసింహ యాదాద్రి సదన శరణు!
87*
సందియము గల్గు సేవలు నిందితములు!
నమ్మకములేని భక్తియు నయము గాదు!
పుణ్యలబ్ధియే లోకుల పూజ-ఫలము!
స్వామి నరసింహ యాదాద్రి సదన శరణు!
88*
స్వార్థపరుల జీవితము నిరర్థకంబు!
పరువు నష్టము-పాపము-పరులసొమ్ము!
ధాతగాబ్రతికిన జన్మ ధన్యమగును!
స్వామి నరసింహ యాదాద్రి సదన శరణు!
89*
పూలు ఫలపత్రములు నీళ్ళు పూజనిధులు
తులసి తీర్థప్రసాదాలు తుష్టిపుష్టి,
స్వస్థతయుగూర్చు నీభక్తి శాంతిప్రదము!
స్వామి నరసింహ యాదాద్రి సదన శరణు!
90*
విశ్వసింపక దెలియదు విశ్వప్రేమ!
ప్రేమబంచుటే యుత్తమపేరు కీర్తి!
స్వార్థ రహితముగావలె స్వార్జితంబు!
స్వామి నరసింహ యాదాద్రి సదన శరణు!
91*
నిధులు నాస్తిపాస్తులు వృధా, నీదు భక్తి!
పూర్ణమాధ్యాత్మికంబులే పుణ్యనిధులు!
స్వార్థమునువీడితే దు:ఖసర్వముడుగు!
స్వామి నరసింహ యాదాద్రి సదన శరణు!
92*
భక్తిలేకున్న తదితరభక్తి సున్న!
సంతతిని తీర్చిదిద్దక చక్కబడదు!
కన్నవారి ప్రాప్తము జేసుకొన్నఫలము!
స్వామి నరసింహ యాదాద్రి సదన శరణు!
93*
సృష్టి ప్రేమమూలకవృద్ధి స్రష్ట వీవె!
ప్రేమ విశ్వరూపమె సృష్టి ప్రేరణొసగు!
ధనముకన్న నీధ్యాన సాధనము మేలు!
స్వామి నరసింహ యాదాద్రి సదన శరణు!
94*
దాచనేర్చినదాదిగా ధరణి నరులు,
దానమే తపమనుమాట దలపరైరి!
దోచువారలు నిన్నైన దోచువారె!
స్వామి నరసింహ యాదాద్రి సదన శరణు!
95*
మొదట నీవుపాదంబును మోపినట్టి,
చోట పాతగుడినిగాంచి చోద్యపడుచు
మక్కువగ నిన్నుపూజించిమ్రొక్కుచుంద్రు
స్వామి నరసింహ యాదాద్రి సదన శరణు!
96*
పిదప విష్ణుకుండము ప్రీతి నందు-
స్నానమాచరింతురు పాప సర్వముడుగ
పూర్ణ బ్రతుకులారోగ్యమై పులకరింప!
స్వామి నరసింహ యాదాద్రి సదన శరణు!
97*
గుండమున విష్ణు చక్రంబునుండు కతన
నీటమునిగితే చాలు పునీతమనుచు-
నమ్ముచుందురు, నీభక్తి సమ్మతమున!
స్వామి నరసింహ యాదాద్రి సదన శరణు!
98*
వసతి గృహసముదాయముల్ వరుసనుండ-
అవసరవస్తు సంతలు-అతథి సేవ!
పరగ విద్య-వైద్యాది యేర్పాట్లుగలవు!
స్వామి నరసింహ యాదాద్రి సదన శరణు!
99*
సత్ర నిర్మాణములు నింక – సకలవసతి!
పరగ గుడివిస్తరణ సాగె ప్రభుత నిధుల!
పనులు పూరింప తగురీతి పథకరచన!
స్వామి నరసింహ యాదాద్రి సదన శరణు!
100*
చుట్టు గుడులు గుట్టలు భక్తిజూడదగిన
చోట ఫలపత్రపూజ పూదోటలుండె!
రాకపోక రవాణయే రాత్రి బవలు!
స్వామి నరసింహ యాదాద్రి సదన శరణు!
101*
మోదమిచ్చు జయంతి బ్రహ్మోత్సవాలు!
నిత్యకైంకర్యములు, భక్తి నియమనిష్ఠ!
మహిని వైకుంఠమై క్షేత్రమలరు చుండు!
స్వామి నరసింహ యాదాద్రి సదన శరణు!
102*
భక్తి పద్యంబువ్రాయుట భాగ్యగరిమ!
తీపి తెలుగు బోధించు తిరుణహరి ని,
సత్యనారాయణుడ దేవ! నిత్య సేవ్య!
స్వామి నరసింహ యాదాద్రి సదన శరణు!
103*
ముందె యర్పించితిననిభక్తి ముప్పదారు
వరుసనారు శతకములు వ్రాయుచుంటి!
విఘ్నదోషాదులెడబాపు విజిత దనుజ!
స్వామి నరసింహ యాదాద్రి సదన శరణు!
104*
చదువ కళ్ళకారోగ్యము మెదడు పదను
గలుగ గ్రంథప్రదర్శనల్ – ఘనతకెక్కె
భక్తి శతక కావ్యము చేత ప్రతిఫలించె!
స్వామి నరసింహ యాదాద్రి సదన శరణు!
105*
ప్రజలె రాజుపోషకులైరి – భక్తి శతక
కవిత వారికోసమె సాగె – భవిత వెలిగె!
వచ్చె డిజిటలచ్చులు ఖర్చులెచ్చె నేడు!
స్వామి నరసింహ యాదాద్రి సదన శరణు!
106*
కలుగు బాధలు వ్యాధులు కడకుద్రోసి
పోటి వాద వివాదాల పోరునణచి,
భక్తి నావలో దరిజేరు బ్రతుకు నొసగు!
స్వామి నరసింహ యాదాద్రి సదన శరణు!
107*
తప్పులు క్షమార్హము భక్తి నొప్పుకృతుల!
చెఱుకు వంకర బోయిన చెడదు తీపి!
అంకితము నీకె, నిరాటంకముగను!
స్వామి నరసింహ యాదాద్రి సదన శరణు!
108*
శుభము శతకపాఠకులకు సుఖము శాంతి!
శుభము సాధు సజ్జనులను నభయ ప్రదము!
శుభము భారత జాతికి – శుభము శుభము!
స్వామి నరసింహ యాదాద్రి సదన శరణు! **’