వాసుదేవశతకము-2
(ఆ.వె.)
1*(ప్రారంభము)
శ్రీశ! మురళి లోల! చిత్రంబు నీలీల!
నికషలందు భక్తు నిలిపి, కీర్తి
వెలయ దరియుజేర్చి, వేడ్కసాగింతువు!
వావిలాల వాస వాసుదేవ!
2*
ఊరి సొమ్ము నీవు! ఉమ్మడియాస్తిగా
నీదు మందిరంబు నిచ్చు శాంతి
ఉత్సవాన నేట ఊరటబొందేము!
వావిలాలవాస వాసుదేవ!
3*
శక్తి యుక్తి భుక్తి, సాధన లౌకికమ్
సాగుచుండె, జన్మసాగుదాక!
భక్తి సాధన గన పారలౌకికమగున్
వావిలాలవాస వాసుదేవ!
4*
తరతరాల వన్నె తరగని దేవళమ్
గ్రామ మధ్యమందు కాంతులీను, నిత్యనూత్నశోభ నిచ్చునీ గోపురమ్
వావిలాలవాస వాసుదేవ!
5*
గొడుగులేల? వేణుగోపాల నీవుండ,
ఎండ, వాన, చలియు, నెంత?వలయు
కోర్కెదీర్ప వెంట గోవింద నీయండ!
వావిలాలవాస వాసుదేవ!
6*
ప్రజలు మెచ్చ ఖాది ప్రహరీని నిర్మించె
నాడె, నేడు నిధులునడిగి పొంది
పురజనంబు వసతి పునరుద్ధరించిరి!
వావిలాలవాస వాసుదేవ!
7*
వరుస భజనలు శనివారసాయంత్రముల్
సాగె, ఖాదిరామ సదన పోటి
కల్గె భక్తినిష్ఠ వెల్గెవేదాంతముల్
వావిలాలవాస వాసుదేవ!
8*
దక్షిణాన నీవు దాపు గా ప్రాపుగా
ఉత్తరాన హరుడునుండె, జనుల
యిచ్ఛ భక్తి భావమింపుగూర్పగహెచ్చె!
వావిలాలవాస వాసుదేవ!
*
9*
ఇష్టమైన గోకులాష్టమి శివరాత్రి
యుత్సవములు సాగె నూరువాడ
లెల్ల దీపపంక్తి, వెల్గుల నవరాత్రి
వావిలాలవాస వాసుదేవ!
*
10*
కలిగె బతుకుదెరువు ఖాదిరాముని దయ
ఖద్దరు పరిశ్రమ వికాసమందె!
వాయు పుత్రు రక్ష వాసిగాంచిరి జనుల్
వావిలాలవాస వాసుదేవ!
11* పర్వదినము, పరగ ప్రజలు నూరేగించి
విఘ్నరాజు నంపు వేడ్కలందు
నూరువాడ నిండు నూతనోత్సాహముల్
వావిలాలవాస వాసుదేవ!
12*
మొదట మారుతి గుడి, మోదంబు గూర్పగా
వెలసె రామునిగుడి వేడ్క మీర!
సాగె భజన, ప్రజకు సమకూరె సుఖశాంతి
వావిలాలవాస వాసుదేవ!
13*
కాలమైన, కానికాలమైనను వర్ష-
కాంక్షదీరె, పండె కలలపంట!
ఖాదిరామచంద్ర కళ్యాణ జాతరల్
వావిలాలవాస వాసుదేవ!
14*
సహనశీల గుణము, చదువు సంస్కారముల్
సజ్జనాళి మైత్రి, సత్యవ్రతము
కన్నవారు, గురులు, కాంక్షించు దీవెనల్
వావిలాలవాస వాసుదేవ!
15*
నిన్ను వీడి రాని, నిరతదర్శన కాంక్ష-
తల్లి దండ్రి జన్మ తరలు నిచ్ఛ!
తండ్రికి నెరవేరె – తల్లియు వెంటుండె!
వావిలాలవాస వాసుదేవ!
16*
మానవాళిరక్ష మార్గనిర్ధేశ్యంబు
నీదుగాధ బతుకునీదసుళువు
శ్రేష్ఠమానవతయు శ్రీనాథ నీబిక్ష!
వావిలాలవాస వాసుదేవ!
17*
ప్రాప్తిగలిగినంత తృప్తి పడగ నేర్పు
ఊరు సానుభూతినూరడించి
బతికి చెడిన ఇంటి బాధలు మరపించు!
వావిలాలవాస వాసుదేవ!
18*
పేరు పేరు నూరు పేరుల దశరూప
ధారివైన మూలదైవమీవె!
దండ గూర్చు పూలదారమొక్కటెకదా!
వావిలాలవాస వాసుదేవ!
19*
చెప్పజాలనన్ని చెట్టువిభాగముల్
తల్లివేరు చేత తళుకులీను
నీదు గుణమె వస్తునిగ్గుదేల్చును కదా!
వావిలాలవాస వాసుదేవ!
20*
శతసహస్రనామ సంకీర్తనల్ గుణ-
గణములెన్ను కథలు గలిగి వెలుగు
భాగవతము భక్తి భావప్రబంధము!
వావిలాలవాస వాసుదేవ!
21*
తృప్తిలేని జన్మ తూర్పార బట్టగా
తాలు వేరుబడగ తాల్మి యాత్మ!
తరచి చూడకున్న తరియింప సాధ్యమా!
వావిలాలవాస! వాసుదేవ!
22*
చీకటున్న వెలుగు చింతలో సంతసమ్
వెలయు ముళ్ళ పువ్వు విలువ దెలియు
బాధ లేనిది సుఖ భావంబు పుట్టునా?
వావిలాలవాస! వాసుదేవ!
23*
బ్రతుకు నీతి ధర్మ బద్ధమై గడచిన
రక్తి పిదప మది విరక్తి మెచ్చు!
భక్తి భద్రమగుచు – ముక్తిమార్గము దోచు
వావిలాలవాస! వాసుదేవ!
24*
సహజ తత్వశోభ సందడి మదినాత్మ
దివ్వె వెలుగు, వలయ దీప్తి యందు!
నీదు రూపు గాంచు నిజభక్తి మార్గమున్
వావిలాలవాస! వాసుదేవ!
25*
సహజ నిష్ఠగూర్చు సదనంబు నీగుడి
వెలుగు దివ్వె-మ్రోగు వేదవాక్కు!
భజన కీర్తన ఘన భక్తిని గలగించు!
వావిలాలవాస! వాసుదేవ!
26*
నిష్ఠ గలుగ నీదు నిర్గుణోపాసన
సాగు! మూర్తి పూజ సగుణ మనగ!
మూఢ భక్తి పల్లె మురియు కొల్పులు సాగు!
వావిలాలవాస వాసుదేవ!
27*
సామరస్యపూర్ణ సంసారవాహిణి
సాగు భక్తినావ సాధుజనుల-
రేయి భవలు ముక్తి రేవుజేర్చు విధులు!
వావిలాలవాస వాసుదేవ!
28*
మూఢ భక్తియాత్మ గూఢమెర్గుటకేగ
ఆత్మ దెలియ మాయలంతరించు!
మనసు నిల్పకున్న మరి యాత్మ దోచదు!
వావిలాలవాస వాసుదేవ!
29*
బలము వరముబొంది బ్రహ్మాదులు మునుపె
రక్తి పిదప భక్తి రాహగనిరి!
రక్తి తనువుముదము భక్తి బమ్మముదము!
వావిలాలవాస వాసుదేవ!
30*
భక్తి సహజదీక్ష బ్రహ్మంబునూహింత్రు
భ్రాంతి వీడి నిశ్చలాత్మ గాంచి
మనసు నిల్పు క్రియల మననంబు జేసేరు!
వావిలాలవాస వాసుదేవ!
31*
భక్తి ననుకరింప బాహ్య వేశములేల
లాభమేమి భక్తి లౌకికముల
పట్టు బడదు – నాత్మ గుట్టు దెలియుట మేలు!
వావిలాలవాస వాసుదేవ!
32*
పరమ పదమె పుడమి భక్తి ప్రయోజనమ్
లౌకికాన పుణ్య లభ్ది గలుగ
భక్తి యోగసిద్ధి పారలౌకిక దృష్టి
వావిలాలవాస వాసుదేవ!
33*
భక్తి రక్తి హృదయ భావపరంపరల్
శక్తి యుక్తి పుడమి సకలగతులు
నీదు దయయు లేక నిప్పచ్ఛరంబులే!
వావిలాలవాస వాసుదేవ!
34*
నీదు భక్తి గలుగ నిస్వార్థ గుణమొప్పు
రాజ పేద లొక్కరకపు టూహ
నిహము మరచి పరము నింక కాంక్షింతురు!
వావిలాలవాస వాసుదేవ!
35*
ప్రజలు పేద గొప్ప భావంబు విడనాడి
యాత్మ దృష్టి నేకయాత్రికులుగ
భక్తిదారి సామ్య భావంబు పొందేరు
వావిలాలవాస వాసుదేవ!
36*
స్వార్థబుద్ధి నిష్ఠ సాగింపనేరదు
నొనర తోటివారి నోర్వకుండు
నిజము నెఱుగుదాక నీభక్తి సాగదు?
వావిలాలవాస వాసుదేవ!
37*
జయవిజయులు మూడు జన్మలే దూరమై
తల్లడిల్లిరి శత్రు తత్వమునకు-
శాప హేతువెంత సాధించి వేదించె!
వావిలాలవాస వాసుదేవ!
*
38*
కనక కశ్యపు వరగర్వ కారణమెంత
బాధగూర్చె? కొడుకు బద్ధ శత్రు-
వయ్యె! నీదు మహిమ వాదించి హింసించె!
వావిలాలవాస వాసుదేవ!
39*
బ్రహ్మవంశ చంద్ర! భార్గవ రాముడా!
క్షాత్రతేజ రామచంద్ర! యదుకు-
లేశ, కృష్ణ నీదు లీల దెల్యగలేము!
వావిలాలవాస వాసుదేవ!
40*
దేశకాల పాత్ర తేజంబు వెలయించు
దేవదేవ! మరల నెందుబుట్టి
నేటియార్త జనుల నేరీతి గాచేవొ!
వావిలాలవాస వాసుదేవ!
41*
వైశ్యులందు గాంధి విశ్యశాంతి యహింస
సామ్యవాద బాట సాగె-సత్య-
ఆగ్రహంబు బూని – ఆర్జించెఫలితమ్ము
వావిలాలవాస వాసుదేవ!
42*
కులము మతము నాడు గూర్చె సమైక్యత
చీలికయ్యె నేడు చిత్తవృత్తి
లోపమేమిగల్గె? లోకుల నడవడిన్
వావిలాలవాస వాసుదేవ!
43*
బ్రతుకు దెరువు కొరకె భక్తి వేషము దాల్చి
విత్తమునకు బ్రహ్మ విద్య జెప్పి
భ్రాంతిసాగుయాత్ర శాంతి హుళక్కియే!
వావిలాలవాస వాసుదేవ!
44*
సమయమమ్మి డబ్బు సర్వస్వముగ జీవ
యాత్ర సాగు బ్రతుకు యాంత్రికంబు,
వాదపటిమ భక్తి సాధన స్వార్థమే!
వావిలాలవాస వాసుదేవ!
45*
నీతి ధర్మ విద్య నిస్తేజమై పొట్ట
కూటి విద్య లందు పోటి మీరె!
విత్త గడన నీతి విలువలు దిగజారె!
వావిలాలవాస వాసుదేవ!
46*
కలిగె కృతమునుండి కలిదాక పరిణామ
క్రమము మానవీయ కలిమి యాశ
పాశమయ్యె పుడమి పాపభీతియు దరిగె!
వావిలాలవాస వాసుదేవ!
47*
నేను నాది నీవు నీదను తలపున
మనది మనము మాట మరచె నరుడు
బేధభావమెసగ ఖేదమ్ము నొందెను!
వావిలాలవాస వాసుదేవ!
48*
దురిత భీతి హింస దూరనీయని రీతి
నీతిమార్గమందు నిలుపరమ్ము!
విశ్వరూప గీత విశ్వాసమును గూర్చు!
వావిలాలవాస వాసుదేవ!
49*
బాష భావమెవరి బతుకున సొంతము
పంచభూత విశ్వ సంచయమున
శాస్త్రవిద్యలెవరి సాధన సంపద!
వావిలాలవాస వాసుదేవ!
50*
విరిగి పెరుగు విశ్వ విస్తార ప్రకృతిని
చేతన జఢమనెడు చెరిసగంబు
జరుగు సృష్టి నీదె! జగతిచేతన మీవె!
వావిలాలవాస వాసుదేవ!
51*
కరువు దీర్ప వివిధ క్రతువులు, బ్రతుకును
దరికిజేర్చ భక్తిదారి వెలసె!
బ్రమను దీర్ప నాత్మ బ్రహ్మమోదము గల్గె!
వావిలాలవాస వాసుదేవ!
52*
గరుడ గమన! కుబ్జ వరద! నారద నుత!
హింసమాన్ప రమ్ము కంసవైరి!
వేణుగానలోల! వినవేల మాగోల!
వావిలాలవాస వాసుదేవ!
53*
దానగుణము నిచ్చి ధరణినాకలి దీర్చి,
భక్తి నికష ముక్తి పథమొసంగి!
పున్నెపంట నూర్చు పురుషోత్త ముడవీవు!
వావిలాలవాస వాసుదేవ!
54*
మంచిజనుల బెంచి – వంచకులను వంచి
నీతివిలువ గాచు గీతగురుడ!
విశ్వరూపు జూపి – విశ్వాసమును గూర్చు!
వావిలాలవాస వాసుదేవ!
55*
కిల్బిషాత్ములు, కించిత బుద్ధులై
విశ్వరూపు గనక, విధుల – జనక!
కామ్యకర్మకేళి, కలహింపసాగిరి!
వావిలాలవాస వాసుదేవ!
*
56*
గీతవినక కామ్య కేళిదేలుచు, ఖేద
జలధి మునిగి మరల జన్మనెత్తి
సజ్జనాళి గేళి సల్పుచుందురు ఖలుల్
వావిలాలవాస వాసుదేవ!
*
57*
ఖలుడమాయకు గని కవ్వించు కిల్బిష
మాయతెరలు గమ్మి మనుగడంత
బురదజల్లుకొనెడు బుద్ధివీడకసాగు!
వావిలాలవాస వాసుదేవ!
*
58*
నటక భక్తి జూపి నవ్వించు కపటియై
సంచరించు మంచి సాగనీక
మాయికాళి వారి మార్చు భారము నీదె!
వావిలాలవాస వాసుదేవ!
59*
విశ్వమేక గృహమె విశ్వాసముదయింప
నీతి మార్గగతుల గీతసాగు!
గీతదాటు-బ్రహ్మగీతమార్చుము దేవ!
వావిలాలవాస వాసుదేవ!
60*
ఊసుబోక జనుల ఉసురుబోసుకొనెడు
కొంటెఖలుడు చాడికోరునమ్మి
నమ్ముకొన్నవారి నట్టేట ముంచేను!
వావిలాలవాస వాసుదేవ!
61*
జన్మబుద్బుదంబు జగతి మాయల బడి
వీడనట్టి కోర్కె వేడ్కలందు
దూరి క్రొత్తవింత దు:ఖంబు జెందేము!
వావిలాలవాస వాసుదేవ!
62*
దు:ఖ హేతు కోర్కె దునియావిహారముల్
బుద్ధనీతి మరచు యుద్ధనీతి
మెచ్చు వారు గట్టిమేలు దలంతురే!
వావిలాలవాస వాసుదేవ!
63*
కలిమి లేములింత, కలియబడి పోరగా
కొండెగానిపోటు కొంత చేటు!
తరతరాల మధ్య తరగతి మిధ్యయే
వావిలాలవాస వాసుదేవ!
64*
సొమ్ము కొఱకు సాగు దొమ్మిపోరు బ్రతుకు
ధనము-హోద గొప్పతనముగాగ
డబ్బలేని బ్రతుకు డుబ్బుకు కొరగాదు!
వావిలాలవాస వాసుదేవ!
65*
విద్యలంగడిని విక్రయింపగ గొప్ప,
తెలివి మధ్య రాత్రి తెల్లవారె!
బ్రతుకు వేగమందె ప్రాణవాయువు దర్గె!
వావిలాలవాస వాసుదేవ!
66*
కులముబోయె,డబ్బు కూడిక ఖర్చులన్
గుణము బోయె, డబ్బు గణన సాగె!
మనసులేనివాడె మరియాద గెల్చెను!
వావిలాలవాస వాసుదేవ!
67*
నీతి లేనివాడు కోతికంటెను పాడు
రీతిలేని నీతి నేతిబీర!
పేరుగొప్ప బతుకు ఊరుదిబ్బగ మారె!
వావిలాలవాస వాసుదేవ!
*
68*
పాలు విరిగి పోవ పనికివచ్చును జున్ను
మనసు విరిగి పోగ-మనిషి శిలగ-
పనికివచ్చు, వెట్టి పనులందు యంత్రమై!
వావిలాలవాస వాసుదేవ!
*
69*
ధనమె మిన్న గుణము ధరలోన గనరాదు
దేనికోసమింత దేవులాట!
దుష్ట చింతన తుద దురితంబె వెన్నంటె!
వావిలాలవాస వాసుదేవ!
70*
ప్రాణమొకటె తీపి దానికోరి ధనము
మిగతవేవి? మిగిలె మిక్కిలిగను!
దోచు-దాచు ధనమె దోబూచులాడించె!
వావిలాలవాస వాసుదేవ!
71*
నిస్సహాయు కోర్టు నిందలో జిక్కించి
తరతరాలు దోచె తర్కపటిమ
మిగతవేవి? పుడమి మిక్కిలి మక్కువల్
వావిలాలవాస వాసుదేవ!
72*
మానసిక నికషకు, మార్కులు వేయగా
తర్క వాద పటిమ తస్సదియ్య!
కస్సు బుస్సు లాడు కంసమామలు జూడు!
వావిలాలవాస వాసుదేవ!
73*
మొదటె కోతి, కల్లు-ముల్లు నిప్పునబడె
తేలుకాటు బాధ, తెగువ మీరె-
నన్నరీతి ఖలుడు నడిపె యవ్వారముల్
వావిలాలవాస వాసుదేవ!
74*
తెగువ మేలగు బరిదెగిన కీడును గూర్చు!
తెలిసి దెలియని పని దెచ్చు ముప్పు!
తెంపి ముడువ కురుచ, తేపతేపకు మదిన్.
వావిలాలవాస వాసుదేవ!
75*
ఏమి వింత! కలిని ఏలుచుండె ధనము
నీతిమూలబడిన రీతులందు!
అమ్ముకోని దేది? అమ్మప్రేమయు దప్ప!
వావిలాలవాస వాసుదేవ!
76*
కల్మశాలపుట్ట కలికాలమున ధర
నొంటికాలిమీద గుంటు ధర్మ
ధేనువంద్రు, నడుచు ధర్మంబు పాతీకే!
వావిలాలవాస వాసుదేవ!
77*
కలికి రూప! పుడమి కలుషంబు హరియించు
తురగమెక్కి కలిని తరిమికొట్టి-
కఠినబుద్ధి మార్చి కరుణించు భక్తులన్
వావిలాలవాస వాసుదేవ!
78*
విశ్వ రూపు జూడ విశ్వాస రహితమౌ
కడు జనాభ నిండె! కలినిబుట్టి
తగిన విధుల గీత తాత్పర్యమందించు!
వావిలాలవాస వాసుదేవ!
79*
నీతి బాటలింత నిష్టూరమాయని
నీరుగారు భక్తి నిష్ఠపరుల-
దారిమారునేమొ? దామోదరా బ్రోవు!
వావిలాలవాస వాసుదేవ!
80*
మంచి బరువు, చెడ్డ మరి తేలికేగాని,
సాగు మంచిఫలమె శాశ్వతంబు!
మంచి పేరు కీర్తి మార్గమే శ్రేష్ఠము!
వావిలాలవాస వాసుదేవ!
81*
చట్ట పరిధి కలిమి చట్రమేర్పడ, ప్రభుత
పట్టుగొమ్మ జేసి గుట్టుగాను
డబ్బు గూర్చు వారు పబ్బంబు గడిపేరు!
వావిలాలవాస వాసుదేవ!
82*
మంచి పేర చెడ్డ మరియాద బొందగా
సంఘ సేవకులది కొంగ జపమె!
చేష్టలుడిగియాడు చేపల వేటను!
వావిలాలవాస వాసుదేవ!
83*
ప్రీతిగొల్పు శుద్ధి, పిడికెడు మెతుకులు
క్షుధను దీర్చు, రుచియు సుధను మించు!
లక్షలున్న – తినగ లవణమన్నమె కదా!
వావిలాలవాస వాసుదేవ!
84*
బ్రతుకు మాయలందుఁబడి, ఎదురీదగా
నలసిసొలసి పోవు నరులు వేడ-
చేదుకొనగ భక్తి చేయూత నందించు!
వావిలాలవాస వాసుదేవ!
85*
జనన మరణ యాత్ర జన్మమంతయు జాత్ర
పుణ్య నిధిని గూర్చు పుడమి జన్మ!
వెడలు నాత్మ ముక్తి వెచ్ఛంబు పుణ్యమే!
వావిలాలవాస వాసుదేవ!
86*
అమ్మగూడ నేడు అంగడి వస్తువై
ప్రీతి గర్భమొసగ, బిడ్డ గనగ-
నద్దె గొనుచు బతుకు దిద్దునాగరికతల్
వావిలాలవాస వాసుదేవ!
87*
సంతు బెంచి, పెళ్ళి తంతు మార్కెటు పాట
వరుని క్రయము జేసి వధువునంపె!
వరుస వచ్చె చెడ్డ వార్తలే అత్తింట!
వావిలాలవాస వాసుదేవ!
88*
విత్తమూల జగతి వీరవిహారముల్
చదువు పదవులందు సాగె నీతి-
పదును దప్పి చేరె పాతలోహపు గదిన్!
వావిలాలవాస వాసుదేవ!
89*
ఉన్ననాటి బతుకు ఉత్సాహపూరితం
వెసనమంటుకొన్న వెసనశించు!
లోప గుణమె వైరి లోనికి దారియౌ!
వావిలాలవాస వాసుదేవ!
90*
రాచమాయికుండు రాకాసియైపోయె
నేడమాయికులనుఏడిపించె!
గోలబతుకు నూతి గోతుల నడుమాగె!
వావిలాలవాస వాసుదేవ!
91*
కులము మతము, మంచి గుర్తులు అలనాడు
ఐకమత్యనిధులు, నైతికములు
పారలౌకిక సుఖ ప్రాప్తి బుణ్యాదులున్
వావిలాలవాస వాసుదేవ!
92*
చేతలందు మంచి చెడ్డలుండగ, మంచి
ప్రీతి మరియు చెడ్డ భీతి గలిగి
బ్రతుకు దారి తృప్తి భావింప వీలగున్
వావిలాలవాస వాసుదేవ!
93*
పరశు రామప్రీతి పరగర్వ దహనమే
సాధు జనుల రక్ష సాగు దీక్ష!
బ్రహ్మ తేజమొప్పు, భార్గవ రాముడా!
వావిలాలవాస వాసుదేవ!
94*
ఆదుకొనుము,వేగ నాదర్శమానవ
మూర్తి వగుచు ధర్మ ముద్ధరింప-
రమ్ము దయను జూపు రామచంద్రప్రభో!
వావిలాలవాస వాసుదేవ!
95*
తనువుతోడ బోవు తగలాటకాలపై
మోజు తగ్గదాయె! మోక్షమడుగ
తోచదాయె నాత్మ తో వెల్గు నీరూపు
వావిలాలవాస వాసుదేవ!
96*
విశ్వమిమిడిపోవు వివరంబు నీగీత
భక్తి ముక్తి గూర్చు, బ్రహ్మవిద్య!
జనులనోము పంట జన్మరాహిత్యము!
వావిలాలవాస వాసుదేవ!
*
97*
భారతీయ తత్వ భావమాధ్యాత్మిక-
సాంప్రదాయమయ్యె! వారసత్వ-
కౌతుకంబు విశ్వ కౌటుంబ జీవనమ్
వావిలాలవాస వాసుదేవ!
*
98*
పూర్వపరము జన్మ పుణ్యంబు సమకూర్చు
యోగములను భక్తి యోగమొకటె-
సులభమనియు మునులు సూచించి యుండిరి
వావిలాలవాస వాసుదేవ!
99*
పూర్వచరితకెక్కె పుణ్యోపకారముల్
మంచి-నీతిధర్మ-మానవతగ
సూక్ష్మమందు గలుగు మోక్ష విచారముల్
వావిలాలవాస వాసుదేవ!
100*
ఆత్మ తత్వ విజ్ఞతందరొక్కటిజేయు
జనన మరణమాత్మ జాగృతంబు!
గీతసూక్తులందు గీలించితివి తండ్రి!
వావిలాలవాస వాసుదేవ!
101*(సంపూర్ణం)
బ్రహ్మ సృష్టి తత్త్వ భావార్థ సంక్లిష్ట
వివరణంబు గీత విస్తరించె,
మాతవలెను, మరల-మరల దెల్పిన తీరు!
వావిలాలవాస వాసుదేవ!
102*
దేశ కాల పాత్రదేల్చివ్యవహరింప
గలుగు బుద్ధి యాత్మ గలుమ కడనె
నిల్చిపోవు-గీత నిర్ధేశ్యయోచన!
వావిలాలవాస వాసుదేవ!
103*
నీతి కట్టుబాటు రీతినాటిన మది
ముసురు సందియాలు విసురు ప్రశ్న!
పలు సమస్యలకును-పరుసవేదియె గీత!
వావిలాలవాస వాసుదేవ!
104*
కలుగు మేలు కీడు, కలిమిలేముల యందు
కీడునెంచి మేలు క్రియలు బూని,
నీదుభారమన్న నిఖిలంబు సమకూరు!
వావిలాలవాస వాసుదేవ!
105*
బ్రతుకు భక్తి వెంట పరపీడనములేని
పుణ్యమతుకు పడగ, ముందు, వెనక
జన్మఫలము ముక్తి జెందు నర్హతగూర్చు!
వావిలాలవాస వాసుదేవ!
106*
సకల కార్యములను సాగు దయాగుణ
సంచయంబు వెంట మంచి గలుగు!
మంచి గలుగ ముక్తి మార్గంబు దోచును.
వావిలాలవాస వాసుదేవ!
107*
నీదు పూజ చిత్త నిర్మలత్వము గూర్చు
నీదు భక్తి వెలుగు నిశ్చలాత్మ-
నీదు నమ్మకంబు నిఖిల సంతోషంబు!
వావిలాలవాస వాసుదేవ!
108*
శుభము శతక సూక్తి, శుభము లాభమునిచ్చు
భక్తి సుధను గ్రోల, బ్రహ్మముదము!
శుభము శ్రోతలకును, సుకృతార్థ ఫలమిచ్చు!
వావిలాలవాస వాసుదేవ!