శ్రీ శ్రీశైలవాస శతకము
1*
శ్రీ పరబ్రహ్మ! పరమాత్మ! చిన్మయేశ!
శ్రీహరి ప్రియహృదయేశ! సిరులదాత!
శ్రీవిరించి పూజితపాద! శివనగేశ!
వామదేవ! శ్రీశైలనివాస! ఈశ!
2*
ఏదియౌనన్న కాదన్న నేదినిజమొ?
ఏదియనుకున్న జరిగేది-ఏదొయదియె-
నీదు నాననతి కదలించు నిహము పరము!
వామదేవ! శ్రీశైలనివాస! ఈశ!
3*
గౌరి శంకర-కైలాస గంగ వరద!
కాలగమన గమ్య గరళ కంఠ!
చంద్ర శేఖర కరుణా సాంద్ర! సదయ!
వామదేవ! శ్రీశైలనివాస! ఈశ!
4*
ఆగమవినుత!నటరాజ!నాగభూష!
పరమపావన గాత్ర! ప్రమదనాథ!
నందివాహన! సచ్చిదానంద మూర్తి!
వామదేవ! శ్రీశైలనివాస! ఈశ!
5*
పాలనేత్ర!నీలగళ కపాల మాలి!
జలధి గంభీర! భువి బోల శంకరుండ!
సాంబ! విశ్వమానవధర్మ కర్మసాక్షి!
వామదేవ! శ్రీశైలనివాస! ఈశ!
6*
యోగి యోగేశ్వరేశ్వరా యోగనాథ!
కాల కాలేశ్వరేశ్వరా-కాలరుద్ర!
శివ! శివా సకలేశ్వర! శ్రీద! శుభద!
వామదేవ! శ్రీశైలనివాస! ఈశ!
7*
అగ్రిమ!సురేంద్రపూజిత! అగ్ని నేత్ర!
అచ్యుతార్చిత! అనిమేశ! అనుపమేమ!
అపర! అపశోక! అభిగమ్య! అమరవినుత!
వామదేవ! శ్రీశైలనివాస! ఈశ!
8*
ఉమసతీశ!విశ్వేశ!ఉరగహార!
ఉర్వి భక్త భృంగ! దనుజ గర్వభంగ!
కామభంజన! సజ్జనోంకార దీప!
వామదేవ! శ్రీశైలనివాస! ఈశ!
9*
మల్లికార్జున! మహదేవ! మహితశూలి!
భక్తి దాత జగత్ప్రాణ శక్తి దాత!
రాజరాజేశ! ఎముడాల పూజ్య చరిత!
వామదేవ! శ్రీశైలనివాస! ఈశ!
10*
ఓదననొసగి వేదనబాపు ఓషదొసగి!
కూర్చుమోర్పునేర్పును మదికూర్మిపేర్మి!
స్వాస్థ్య జీవన సరణని సాకు మమ్ము!
వామదేవ! శ్రీశైలనివాస! ఈశ!
11*
దుష్ట దక్ష క్రతు ధ్వంసి- శిష్ట రక్ష-
లోకకల్యాణ కారక! లోకనాథ!
జీవకారుణ్య గుణధామ! దివ్య తేజ!
వామదేవ! శ్రీశైలనివాస! ఈశ!
12*
గిరిశ!గిరిధన్వ!గిరివాస!గౌరినాథ!
క్రూరదానవ సంహార! కువలయేశ?
చంద్రశేఖర! శంకర! శర్వ! భర్గ!
వామదేవ! శ్రీశైలనివాస! ఈశ!
13*
నీళ్లు మారేడు దళములు నీదుపూజ-
ద్రవ్యములు-నిచ్చి దలచు నరులు-
తగిన నైవేద్యమిడుదురు-తలొకరుచిని-
వామదేవ! శ్రీశైలనివాస! ఈశ!
14*
ఆత్మ బంధు నీనిరాడంబరత్వ-
అర్చనలు-సేవలును సాగు ఆలయముల-
నొక్కపొద్దులు నీచుట్టు నొనరు భక్తి!
వామదేవ! శ్రీశైలనివాస! ఈశ!
15*
ఎంత తృప్తియో-నెమ్మది నెంత నిష్ఠ-
పూర్ణ విశ్వాసగుణ దీక్ష! పులకరింత!
జన్న జన్మ భారము దిగి జవము గలుగు!
వామదేవ! శ్రీశైలనివాస! ఈశ!
16*
మార్పు కాలానుగుణ తీర్పు మహిని నేదె!
మంచికొఱవడితె-చెడుగు మార్గ గతులు!
పళ్ళమొక్కముండ్లునుజేయు- పళ్ళరక్ష!
వామదేవ! శ్రీశైలనివాస! ఈశ!
17*
గతము మేలగు-వచ్చెడు కాలఘటన-
తెలియరానిది-ఈక్షణం దేల్చ సులువు!
జరుగనున్నదే జరుగును జగతి నెపుడు!
వామదేవ! శ్రీశైలనివాస! ఈశ!
18*
చెడ్డ విషసమమగునర చేష్టలందు-
కర్మజెఱచు కార్య కర్త జెఱచు-
క్రియల దౌష్ట్యమై ధరనపకీర్తిబెంచు!
వామదేవ! శ్రీశైలనివాస! ఈశ!
19*
చెత్త వాదాలను- వివాద విత్త గడన-
సేయు దారియు కంటకం-చేప్పలేని-
విషమ సామస్యలకు నిధి-విధము దోచు!
వామదేవ! శ్రీశైలనివాస! ఈశ!
20*
ఈప్సితార్థద!ఈశాన! నిత్య భక్తి-
దోవ నిశ్చల-తత్వంబు దోచునట్లు-
సాగ జేయుమానందాబ్ధి! సామి శరణు!
వామదేవ! శ్రీశైలనివాస! ఈశ!
21*
సత్యము-నహింస సిద్ధాంత సాధనముల
గాంచె సంయమన విధుల గాంధియిజము!
స్వేచ్ఛ స్వాతంత్య్ర దేశమైజెందెకీర్తి!
వామదేవ! శ్రీశైలనివాస! ఈశ!
22*
నిరశన వ్రతమును మౌనదీక్ష నిరత తపము
గదియు గదిమార్చినట్లుగ కదిలె ఖైది-
సహనమేదెచ్చె కొండంత సంతసంబు!
వామదేవ! శ్రీశైలనివాస! ఈశ!
23*
ద్విశతి పరపాలనాపీడ దీనబతుకు
బానిసలు భారతీయులై భారముగను-
కాలముదొరలించిరి, తమగలుమ లందె!
వామదేవ! శ్రీశైలనివాస! ఈశ!
24*
ఇనుప కండరములునుక్కు యెదలుగలిగి
భక్తి శ్రద్ధలు దృఢదీక్ష భద్రగతుల-
కలుగు నవమానములుసైచి-కదలినారు!
వామదేవ! శ్రీశైలనివాస! ఈశ!
25*
మిగుల శిథిల నిర్ధన రాజ్యమిచ్చి పరులు
వెనకకొదిగిరి-నడిరాత్రి వెలిగె రవియు!
కవియుగాంచికీర్తింగా కలతదొలగె!
వామదేవ! శ్రీశైలనివాస! ఈశ!
26*
స్వేచ్ఛ-స్వాతంత్య్ర సప్తతి సేమపూర్వ
కముగ పలుకరించె-కరొన-కాటుదాక!
టీక కొఱకువేచియు చూచె-నేకభిగిన!
వామదేవ! శ్రీశైలనివాస! ఈశ!
27*
మారి నష్టంబు కష్టమై మానవాళి
కట్టడినిసాగె నీభక్తి కట్టడట్లు- నిష్ఠ నొసగియు-శుచి శుభ్ర నీతి నడుపు!
వామదేవ! శ్రీశైలనివాస! ఈశ!
28*
సంద్రగర్భంబు శోధించి చవవులకొఱకు
గెలికి- వైరసార్జించియు- కిమ్మనకను-
చూచు లవణాసురులబాధ- చోద్యమాయె! !
వామదేవ! శ్రీశైలనివాస! ఈశ!
29*
కరడు గట్టిన భావజ కావరాలు
దుర్దురాక్రమణ-స్వార్థ దుగ్ధ విడక-
ఐక్యరాజ్య సమితివిధి నధిగమించె!
వామదేవ! శ్రీశైలనివాస! ఈశ!
30*
మేరు గిధన్వ-త్రిపురారి! మేలుగూర్ప-
దయను నారాయణాస్త్ర ధారివగుచు-
భగ్నమొనరించు కారోన బాధమాన్పు!
వామదేవ! శ్రీశైలనివాస! ఈశ!
31* మొక్కుబడి దీరు నీచక్కి మోదమెసగు-
మరుపు వరమగు గతమెల్ల మాయగలియు
ఏకముగనాత్మ మురిసేటి ముగ్ధ భక్తి!
వామదేవ! శ్రీశైలనివాస! ఈశ!
32*
ఏట కోటంచ యాత్రలు నూటనొక్క
నారికేలసమర్పణ నడవి వంట-
తోటవిడిది సహృదయంపు-పోటిబాట!
వామదేవ! శ్రీశైలనివాస! ఈశ!
33*
కోరి శేషాద్రి వెంకన్న గొలిచి- నిండు
భక్తి భద్రాద్రి రామయ్య భజనసల్పి-
పొంగు భక్తబృందము పొసగుయాత్ర!
వామదేవ! శ్రీశైలనివాస! ఈశ!
34*
మనుజు జీవనసంబంధ మార్గ ములను-
చిత్తశుద్ధి పూర్వక నిష్ఠ చెలగునట్లు-
సహజ శాంతినిగూర్చు సత్సంగ బోధ!
వామదేవ! శ్రీశైలనివాస! ఈశ!
35*
లుబ్ధ తత్వంబులిహలోక లబ్ధిదలచు-
భక్తి వితరణ పరలోక పరమ సుఖము!
సుంత గుదరదు-రెంటికీ వింత- ఇదియె!
వామదేవ! శ్రీశైలనివాస! ఈశ!
36*
ఆదుకొనుమయ్య ఆర్థిక మాంద్య మాపి-చేదుకొనవయ్య ఈతిని చేవనొసగి-
పంట పండించి ఇంటింటి బతుకు నిల్పు!
వామదేవ! శ్రీశైలనివాస! ఈశ!
37*
ఆకలినినిదీర్చి కరువుననాదరించి-సాదుకొనుమయ్య! సంసృతి సంస్కృతులను-
కట్టడిని నిల్పి-కారోన కలత బాపు!
వామదేవ! శ్రీశైలనివాస! ఈశ!
38*
చేరి సరిహద్ధు జొరబడి-చేటొనర్చి-
రెచ్చగొట్టిముట్టడి కొండ ముచ్ఛు బుద్ధి-
బరిదెగింపుల భరతమ్ము బట్టనిమ్ము!
వామదేవ! శ్రీశైలనివాస! ఈశ!
39*
జాగలోటు జనాభయు చాలబరువె!
గిల్లి గజ్జ చర్చిత మేది? కీలకాంశ- సాధనములేవి? హుళ్ళక్కి-శస్త్ర పటిమ!
వామదేవ! శ్రీశైలనివాస! ఈశ!
40*
తానె శాశ్వత ప్రభవుగా తపన మొదట-
పిదప దుడుకుదురాక్రమ విధపు వాదు-
భూగృహాలుగట్టుకు నుండు బుద్ధి పటిమ!
వామదేవ! శ్రీశైలనివాస! ఈశ!
41*
నూరసత్యాలు-జల్లగా నూరు చెలిమ-
బతుకు-మున్నూరు రుజలకు నతుకు-
వెసన ధూళిదుమారమే-వెసగ ముంచు!
వామదేవ! శ్రీశైలనివాస! ఈశ!
42*
రక్త పోటు మందుకు సైడె పెక్టు బాధ-
తారుమారగు- తెరపియూ తలొక తీరు-
పద్ధు కుదరక పోయెనా పెద్దఖర్చు!
వామదేవ! శ్రీశైలనివాస! ఈశ!
43*
బతికి నన్నాళ్ళు వైద్యసేవలకు దిరిగి-
చితికి నన్నాళ్ళు నార్థిక చిత్తు బొత్తు!
నిన్ను జేరుదాకను మదినిలువదెందు!
వామదేవ! శ్రీశైలనివాస! ఈశ!
44*
గోటి గాయాన-తగిలేది గొట్టు దెబ్బ-
రోతబుట్టించు బతుకు కరోన దిబ్బ!
కలిసి జీవింప టీకయే కలుగయుగాన-
వామదేవ! శ్రీశైలనివాస! ఈశ!
45*
కూడి సాగుపనులటీక గొప్ప మేలు-
బడియు విజ్ఞాన మటుబెట్టి బతుక మేలు!
పోవు ప్రాణంబు ముఖ్యము-పొసగ రక్ష!
వామదేవ! శ్రీశైలనివాస! ఈశ!
46*
భద్రమౌ భక్తి బాట-నిర్భయముగూర్చు-
టీక నిబ్బరమొసగు, మదికిని-విధులు-
సాగుదోవ ప్రశాంతిని జరుగు పనులు!
వామదేవ! శ్రీశైలనివాస! ఈశ!
47*
శాంతి గలుగక బతుకు విభ్రాంతి మయమె!
సందియము నడుగడుగున – జంపు మనుజు-
చిత్రవధగాగ-బతుకున సేమమేది?
వామదేవ! శ్రీశైలనివాస! ఈశ!
48*
కమ్మగాతింటె బతుకున కలలపంట-
పస్తు గడిపినా నారోగ్య భద్రతొసగు!
ప్రస్తుతిన్ నీదు నామాళి పఠనమేలు!
వామదేవ! శ్రీశైలనివాస! ఈశ!
49*
విద్య సేద్యాల సత్యమే విహితమనగ-
వైద్యమున పథ్యమె తగునివారణయ్యె!
పసరు వైద్యసాధన సాగె-పాత వింత!
వామదేవ! శ్రీశైలనివాస! ఈశ!
50*
ఏది ఏమైన మానవ వేదికలను-
సగటు ఆయువు సగమయ్యె! జననమరణ-
కాల చక్రంబు సవరించు-కరుణకిరణ!
వామదేవ! శ్రీశైలనివాస! ఈశ!
51*
నల్ల మల దివ్వె-క్షేత్రమై-నదియు కృష్ణ-కుడికిబారగ-నీభక్తి-కూడలయ్యె!
శ్రీనగము,తీర్థము-, జీవసిరులనొసగె!
వామదేవ! శ్రీశైలనివాస! ఈశ!
52*
శిఖర దర్శన మాత్రాన జీవి జన్మ-
రహిత ముక్తిగాంచె,జనులు పాహియనగ-
ఎంత వింత జీవన్ముక్తి యెదుట నిలిచె!
వామదేవ! శ్రీశైలనివాస! ఈశ!
53*
తారకాసుర బాధలు తాళలేక
పుడమి మొరబెట్టె-తగునట్టి పుత్రుగనగ-
అదియె గౌరికళ్యాణపునాదియయ్యె!
వామదేవ! శ్రీశైలనివాస! ఈశ!
54*
కామదహనము,పార్వతీ కామ్య ఫలము-
నీదు కళ్యాణ వైభవంనింపుగూర్చె!
కొమరు జననము భువిసదా-క్రూరహరము!
వామదేవ! శ్రీశైలనివాస! ఈశ!
55*
మల్లె పూపూజ నర్పించ-మాత జేరె-
తగుగ భ్రమరాంభికగ వచ్చె తనయులలర!
సాగె సంసృతి – సంస్కృతి – సాక్షి వీవె!
వామదేవ! శ్రీశైలనివాస! ఈశ!
56*
గణము లెగుర ప్రమదనాథ గణము పొగడ-
కొమర సామి వినాయకుల్ కొమరులందు-
పరగ మీప్రదక్షణ-గణపతిగ నిల్పె!
వామదేవ! శ్రీశైలనివాస! ఈశ!
57*
ముందె మీచుట్టు దిరిగెను మూషికంబు
వెంట దిరుగాడ-లోకాలు వేడుకొనగ-
నికష గెల్చెను-శిఖితేజి నిన్ను మొక్కె!
వామదేవ! శ్రీశైలనివాస! ఈశ!
58*
దివిని భువి శివగణపతి తేజమెసగె!
సాగె శివసైన్యమధినేత స్కంధుడలరె!
వరుస విజయాలె తమయింటి వాస్తవాలు!
వామదేవ! శ్రీశైలనివాస! ఈశ!
59*
భువిని మానవతాధర్మ బుద్ధి వెలసె!
సత్య ధర్మ ప్రవచనాలు నిత్యమయ్యె!
జనులు నీభక్తి చవిజూచు నిష్ఠ గలిగె!
వామదేవ! శ్రీశైలనివాస! ఈశ!
60*
మానవులు దానవులు భక్తి మహిమ గనిరి!
జీవి జీవిని నీయున్కి దివ్య దీప్తి- పుడమి నేకాత్మ భావమై పుణ్యమెసగె!
వామదేవ! శ్రీశైలనివాస! ఈశ!
61*
ఉదది ధరిసైకతపు లింగ మూర్తి గొలిచె-
హనుమ కాశిలింగముదెచ్చె గగనదారి-
రామ రక్షణ రామేశ్వరంబు వెలసె!
వామదేవ! శ్రీశైలనివాస! ఈశ!
62*
బ్రహ్మ హత్యదోషము దొల్గె-ప్రభుడు రామ
చంద్రుడు నయోధ్య-దరలె పుష్ఫకమునందు
భరతునగ్నిప్ర వేశంపు ఘట్టమాగె!
వామదేవ! శ్రీశైలనివాస! ఈశ!
63*
మాటదప్పని రామయ-మాట వినని
భరతు పట్టుదలయుసాగె బాధ్యతగను!
హనుమ సరిదిద్దు భారమై యలరె భక్తి!
వామదేవ! శ్రీశైలనివాస! ఈశ!
64*
ద్వాదశ జ్యోతి – లింగాలు-దనరు భరత-
ఖండమున పదునెన్మిది గలిగె-శక్తి
పీఠములు-జనభక్తి సంప్రీతినొసగె!
వామదేవ! శ్రీశైలనివాస! ఈశ!
65*
త్యాగమేనిండె-దానతపము సాగె
దాత తాపసిసమమయ్యె-ధరణి భరత-
సంస్కృతిని భక్తి యోగంబు చాలసుళువు!
వామదేవ! శ్రీశైలనివాస! ఈశ!
66*
స్వార్థ పూర్ణము కలిమాయ-ఆర్థికంబె
మించె రాజకీయ సమాజ మిగతగతుల-
పాతికయె మంచి చెడ్డముప్పాతికయ్యె!
వామదేవ! శ్రీశైలనివాస! ఈశ!
67*
ప్రజలె రాజులై కాలము పగను బట్టె-
పాలనయుమారెను-నమాయకాళి-
మంచి పుట్టినెక్కియు దైవీయ మార్గమరసె!
వామదేవ! శ్రీశైలనివాస! ఈశ!
68*
క్రూర శక్తులు కలిజేరి కోరసాచె!
మాయకుడు పొగడబడెను-మంచివాడు-
సగటు జీవశ్చవములాగ సాగుచుండె!
వామదేవ! శ్రీశైలనివాస! ఈశ!
69*
జాతి సంస్కృతి కవచమై జగతి దరచె!
నీతి సంసృతి శాంతికై నిన్ను వెదకె!
ధర్మ మార్గ పరిధి భక్తి దారి వెలసె!
వామదేవ! శ్రీశైలనివాస! ఈశ!
70*
వేదమే నీతి బోధక వేదికయ్యె!
క్రియల పౌరాణిక నీతి కీర్తి గాంచె!
వ్యక్తి గతముగ స్వేచ్ఛ సద్భక్తి వెలసె!
వామదేవ! శ్రీశైలనివాస! ఈశ!
71*
తపము జేయు శంకరగురు తలను గోరె
క్షుద్ర శక్తి శిష్యుని నుతిముద్ర నృహరి-
వచ్చి వాని తల- ద్రుంచె-మెచ్చె గురుడు!
వామదేవ! శ్రీశైలనివాస! ఈశ!
72*
మొదట సాక్షి గణపతికి మోకరిల్లి-
ఇష్టకామేశ్వరికి మొక్కి-నిండు భక్తి
కదలి భ్రమరాంభికను గొలువ కలుగు ఫలము!
వామదేవ! శ్రీశైలనివాస! ఈశ!
73*
కరుణగను మల్లికార్జున కదనజయము
రాజలోకము గోరె! శివాజి దేవి-
చంద్రహాసము గొని కీర్తి సాంద్రుడయ్యె!
వామదేవ! శ్రీశైలనివాస! ఈశ!
74*
ధర్మ సంరక్షణకు బూనె! ధరణి దిరుగు
ధర్మధేనువు నడిపించు దారి సాగె!
పుణ్యమే నిధిగ చరిత పుటలు నిండె!
వామదేవ! శ్రీశైలనివాస! ఈశ!
75*
భరత కీర్తిహంసియు నింగి ప్రజ్వలింప-
చెడును చెండాడె! మంచికి చేవనొసగె!
శాంతిదాయక దైవీయ సాధనముల!
వామదేవ! శ్రీశైలనివాస! ఈశ!
76*
నడుచు చరితలో నీకృప-నయము జయము-
ముందు జాగరూకతయేగ-మందుమాకు!
లోక కళ్యాణమొనరించు లోకనాథ!
వామదేవ! శ్రీశైలనివాస! ఈశ!
77*
పళ్ళమొక్క గూల్చియు చుట్టు ముళ్ళు నాటి
పంట గాపాడుకొనలేక! పరితపించు-
భువి యభద్రతా భావన-బుగులు మాన్పు!
వామదేవ! శ్రీశైలనివాస! ఈశ!
78*
వమ్ము సేయుము పరకూటి కుమ్ములాట-
సొంత కష్టార్జితము పర సొమ్ముబాట-
తరచ వారువీరుగ శిక్ష తారుమారు!
వామదేవ! శ్రీశైలనివాస! ఈశ!
79*
చెడుగు వారించి సమదృష్టి చెలగనిమ్ము!
మంచితనము- పనులనాచరించనిమ్ము!
వెసన విషకాటు దప్పించి వెసను బ్రోవు!
వామదేవ! శ్రీశైలనివాస! ఈశ!
80*
ధనము లేక దానముజేయు దారి-వృధయె!
దాతగాక నిహపుణ్యంబు దరికిరాదు!
చిత్త శుద్ధిగల్గించి మదిభక్తి చేవనొసగు!
వామదేవ! శ్రీశైలనివాస! ఈశ!
81*
వెండి – కొండదేవర!చతుర్వేద మూర్తి!
భక్త జనపోషక! విశేష- వరద! సుఖము
శాంతియే నిత్య సంపద-కాంతిపదము!
వామదేవ! శ్రీశైలనివాస! ఈశ!
82*
ప్రభువు- కోరిక ప్రజమేలు-భక్తి ముక్తి-
కళ్ళుగోరునంధుడు కుంటి-కాళ్ళు గోరు-
మూగవక్తయై పేరొందు మురిపెమడుగు!
వామదేవ! శ్రీశైలనివాస! ఈశ!
83*
నేడు వైద్యనారారాయణు నికష -రుజగ
దేల్చు-నౌషద గుణమగు-దెప్పరిలగ-
దారి దొర్కు మరొక్కటి దగులు వరకు!
వామదేవ! శ్రీశైలనివాస! ఈశ!
84*
చిత్త భక్తి- స్వస్థత-తను శిథిలమాపి-
జీవ శక్తి నిండగ మది చేతనాత్మ-
వెలయ జేయుము-పరమేశ! వేల్పు-వేల్పు!
వామదేవ! శ్రీశైలనివాస! ఈశ!
85*
అల్లొ పతియె నయమాకస్మికాలయందు-
దీర్ఘ రుజకు నాయుర్వేద ధినుసు మందు-
కీలకౌషధాలు-కీలెరుగు వాతలె!
వామదేవ! శ్రీశైలనివాస! ఈశ!
86*
తెల్ప కష్టమె-చిటికేసి-దెగులుమాన్పు-
ప్రతిభ తిరుగబెట్టని రుజపట్ల-పొసగు-
దాని కై ధృవీకరణలు- దారిమూయు!
వామదేవ! శ్రీశైలనివాస! ఈశ!
87*
అంతదాక-తదితరముల్-సొంత ఖర్చు!
ప్రభుత ధనసాయమందని పద్దులగును!
కలుగు కలిమాయ కనువిప్పు-కలుష ప్రకృతి!
వామదేవ! శ్రీశైలనివాస! ఈశ!
88*
ఊపిరులనూది జీవాళి నుర్వివృద్ధి-
జేయు నదినీవె! సేవల చేవగూర్చి-
కలిమి బలిమి తెలివినిచ్చు-కర్తవీవె!
వామదేవ! శ్రీశైలనివాస! ఈశ!
89*
నీవు చేయించునదిజర్గు-నిక్కముగను-
జరుగనున్నదియె! భువి జరుగ కున్న-
నీవు మాన్పించునదిగాగ-నెంచు జగతి!
వామదేవ! శ్రీశైలనివాస! ఈశ!
90*
చీమ గుట్టిన నోర్చియు చిదురుకొనక-
దారికడ్డుదొల్గడు మాయదారి నరుడు-
పైగ వెనువెంట నలిపేయు పగను బొందు!
వామదేవ! శ్రీశైలనివాస! ఈశ!
91*
బాల్య యాదిగా నిల్చేవి పాలరుచులె!
పాడు రుచులజిక్కిన నాల్క పట్టు విడదు!
నీదు నామమే బహుతీపి నిక్కముగను!
వామదేవ! శ్రీశైలనివాస! ఈశ!
92*
పతన దశలోన కనువిప్పు ఫలమదేమి?
చింతన గుదిరితె-నీధ్యాస చిటికెలోనె-
కృపను బొందగా వీలగు-సఫల నిష్ఠ!
వామదేవ! శ్రీశైలనివాస! ఈశ!
93*
తప్పు దెలిసి పశ్చాత్తాప తప్తుడైతె-
గర్వమునుదొల్గు మదినిల్ప గల్గు నాత్మ-
భక్తి సాధన లీనమౌ-పట్టు దొరుకు!
వామదేవ! శ్రీశైలనివాస! ఈశ!
94*
కాల మాసన్నమైనంక కడకువచ్చు –
మరణ మెంతమంచిదొ వృద్ధ మాట దెలుపు!
మూట కై దూరమగు బంధు మూకలెల్ల!
వామదేవ! శ్రీశైలనివాస! ఈశ!
95*
దీర్ఘ రోగాల బారిన దిగను బడగ-
దీక్ష సాగదారోగ్యంబు దేలునపుడె-
పుణ్యమార్జించు కొనవీలు-పొసగు విధుల!
వామదేవ! శ్రీశైలనివాస! ఈశ!
96*
మంచి వైద్యమార్గ గతులె-మనుజుకందు-
బాటులోనుండు-యలవడు పథ్యవిధులు-
వైద్యమందు ధనాశయు – వ్యక్తిగతము!
వామదేవ! శ్రీశైలనివాస! ఈశ!
97*
మొదట మామూలు వారికి ముగ్ధ భక్తి
సాగును-సగుణో పాసనల్- చట్టపరిధి-
రక్ష శిక్షల న్యాయంపు రంగరింపు!
వామదేవ! శ్రీశైలనివాస! ఈశ!
98*
కాలగతినిల కలిమాయ కలుష ప్రకృతి-
సాను కూలవర్తన సాగు సమయమిదియె!
పరగ ప్రతికూలమైతెనే ప్రభలు రుజలు!
వామదేవ! శ్రీశైలనివాస! ఈశ!
99*
సాగు-అనుకూలమే ప్రేమ సమము మైత్రి-
ఒప్పుగాదిద్ది-తద్ధోష ముప్పు మాన్పు!
గాకశత్రువై- జాతినే గాసిజేయు!
వామదేవ! శ్రీశైలనివాస! ఈశ!
100*
ఎన్ని దెల్సి-దెల్పిన మాటనెవరువినరు-
మాటతోబాటు బాటయు మరొకటంద్రు-
జరుగ నున్నది పెను మార్పు-జగతి తీర్పు!
వామదేవ! శ్రీశైలనివాస! ఈశ!
101*(సంపూర్ణం)
నిత్య కృత్య యాతనసాగు నితర సాయ
మునకు నిరతమెదురుచూపు-ముదిమి గడచు
సంతు సేవలభించుటే స్వర్గమగును!
వామదేవ! శ్రీశైలనివాస! ఈశ!
102*
దుష్ట కోపంబు విడనాడ దుడుకు మనసు
నొప్పదదియేమొ? తిట్టులొప్పకుండు!
వలయు పదిపుట్ల సహనము, వాస్తవముగ!
వామదేవ! శ్రీశైలనివాస! ఈశ!
103*
త్రికరణ విశుద్ధి సాయమర్థించ వలయు-
గతమము గతమె ఈక్షణ బాధ గడపుకొఱకు
సిద్ధపడిదీవెనలువెట్ట సేవసాగు!
వామదేవ! శ్రీశైలనివాస! ఈశ!
104*
వృద్ధ సేవలు మెరగైన విధముదోచు-
నూత్న టెక్నాలజీసేవ నూటమేలు!
ఊరనూర యువతమారె-నుచిత సేవ!
వామదేవ! శ్రీశైలనివాస! ఈశ!
105*
వృద్ధ వికలాంగ సేవకై పెద్దమనసు
గలిగి- స్వచ్ఛంద సంస్థలు గాంచెకీర్తి-
యువత దాతృత్వమున జనభవిత మారె!
వామదేవ! శ్రీశైలనివాస! ఈశ!
106*
మంచి తొంబదితొమ్మిది మనుజ జతన-
మందు నొక్కశాతము నీదు మహిమ సాగు!
సదయ! సాగును సంపూర్ణ సత్ఫలంబు!
వామదేవ! శ్రీశైలనివాస! ఈశ!
107*
మంగళమనంగ పూజిత-లింగ! మల్లి
కార్జున! భ్రమరాంబిక కాంత! భక్త
వరద! లోకకంఠక హర! కరుణ కిరణ!
వామదేవ! శ్రీశైలనివాస! ఈశ!
108*
శుభము-పఠితలకు శ్రోత కభయ ప్రదము!
శుభము-జరపీడితులకెల్ల సుఖముశాంతి!
శుభము-స్వచ్ఛంద దాతకు-శుభము-శుభము!
వామదేవ! శ్రీశైలనివాస! ఈశ!