శ్రీశ్రీశ్రీ సత్యదేవ శతకము
(తే.గీ.)
1*(తే. గీతులు)
శ్రీరమాపతి! మాగతి నీవె యనుచు-
విశ్వసించియుంటిమి, భువి’విశ్వరూప!
చిత్తగింపుము-మామొర చిద్విలాస!
సహన సత్వంబు సమకూర్చు సత్యదేవ!
2*
నీప్రసాద మహిమ చేత నిఖిల ఫలము
శ్రేయమగుబాట జీవించు చేతనంబు నిచ్చి రక్షించు పుడమిని నిత్య సేవ్య!
సహన సత్వంబు సమకూర్చు సత్యదేవ!
3*
నీదు వ్రతమాచరింపగ నిష్ఠ నొసగు!
సారసాక్ష నారదనుత! సమతధాత!
సాగె శతక లహరి పద్య సాహితిగను-
సహన సత్వంబు సమకూర్చు సత్యదేవ!
4*ఆ. వె.
శ్రీరమేశ! నీదు కరుణాకటాక్షమే
ఆర్తులగని నిత్యమాదుకొనగ
నీప్రసాద మహిమనేమని వర్ణింతు-
సహన సత్వ మొసగు సత్యదేవ!
5*
సూర్య రశ్మిచేత చుక్కవెల్గులమించె-
చందమామ గురిసె చంద్రికలను
నీదు దయయు గలుగ నిత్య సంతోషముల్
సహన సత్వ మొసగు సత్యదేవ!
6*
నీదు భక్తియాత్మ నిజతత్వమూహింప
నిండుగుండె వెలుగు దండి గుణము
బుద్ధి సూర్య రశ్మి-వృద్ధి సౌష్ఠవ సిద్ధి!
సహన సత్వ మొసగు సత్యదేవ!
7*
క్షేత్ర సామి! జన్మ సేద్యంబు నీలీల
చెలగు తాత్వికంబు చేతనాంశ!
జఢతమాని ప్రకృతి జలధరించును చాల!
సహనసత్వమొసగు సత్యదేవ!
8*
జలమునీవె-పంట జవసత్వములు నీవె!
పంచభూత ప్రకృతి పాత్ర జన్మ-
విత్తి నూర్చు పుణ్య విత్తంబు నీసొమ్ము!
సహన సత్వ మొసగు సత్యదేవ!
9*తే.గీ.
స్వార్థ రహిత భక్తిని గొల్చు సత్యవ్రతుల-
మెచ్చి, భారంబు మోసేవు! మేలుగూర్చి-
బ్రోవ వచ్చేవు-ఇచ్చేవు మోక్ష పదము!
సహన సత్వంబు సమకూర్చు సత్యదేవ!
10*
స్వార్థ గుణ పరిత్యాగంబు, సత్య వ్రతము
ఆత్మ సంతృప్తి నిడు పరమాత్మ – నేడు
తపము కన్న దానమె మిన్న-తరచి చూడ!
సహన సత్వంబు సమకూర్చు సత్యదేవ!
11*
మాటకును సత్యమే ప్రాణమంద్రు, లేఖ-
సాగు ప్రాణము వ్రాయసగాని వ్రాలుఁ
సత్యమును లేక నమ్మిక సాగునెట్లు?
సహన సత్వంబు సమకూర్చు సత్యదేవ!
12*
పుడమి సత్యమహింసచే పుష్టినొందు,
బ్రతుకు హింసకాశ్రయమైన, పతనమొందు
తత్వమెరుగ పౌరాణిక సత్యమిదియె!
సహన సత్వంబు సమకూర్చు సత్యదేవ!
13*ఆ. వె.
నీతి కష్టమయ్యె! నిర్వేద పడి, నీతి-
పరులు, నీరుగారి బ్రతుకు నీడ్వ-
నీ పరీక్ష భక్తినోప శక్తిని గూర్చు!
సహన సత్వమొసగు సత్యదేవ!
14*
వేషబాషగొప్ప,వేయేల?నీతియు-చులకనయ్యె,జగతి చోద్యముగను- సాగె,నేడు నీతి శాస్త్రమాపదలందె!
సహన సత్వమొసగు సత్యదేవ!
15*
కలుష పరిసరాల కల్తివస్తుల సంత,
నకిలిదేది-దెలియ నాణ్యమేది?
చూడగానె దెల్పు సూత్రసూచకులేరి?
సహన సత్వమొసగు సత్యదేవ!
16*
విశ్వసింపకున్న విద్వేషమెదురగు-
రాజి పడని బ్రతుకు రాహ లేదు!
కానికాలవృష్టి-కరువులోనతివృష్టి!
సహన సత్వమొసగు సత్యదేవ!
17*తే.గీ.
మనసు పొరలందు నెలకొన్న మాయతెరలు
దాచు వర్తన, స్వార్థంబు, దయయులేని-
మాయికుని విశ్వసించు నమాయికుండు!
సహన సత్వంబు సమకూర్చు సత్యదేవ!
18*
కానికాలమందు కరువు కాటగలుపు-
మంచి వంచించి, కపటంబునెంచి సాగు-
మోసకారి-యమాయకు ముంచి పోవు!
సహన సత్వంబు సమకూర్చు సత్యదేవ!
19*ఆ. వె.
కానికాలమందు కరువు పడగలెత్తు
కరువు తోడ మోసకారి యెత్తు-
చెడగ గోడదెబ్బ-చెంపదెబ్బకుతోడు!
సహన సత్వమొసగు సత్యదేవ!
20*
రైతు-ఆశ కోర్కె రౌతుగా నురుకుల-
పరుగులెత్తు-కృషిని పంటనూర్చు!
గిట్టుబాటు ధరకు’గీపెట్టియరచును’
సహన సత్వమొసగు సత్యదేవ!
21*ఆ.వె
సోమరి నరులంత సోమకా సురులైరి
చదువులమ్ము సంత సాగు బడుల
ఫలము కాగితాల బలమువెంటనె సుమీ!
సహన సత్వమొగు సత్యదేవ!
22*ఆ. వె.
కొన్న చదువు నమ్ముకొన్న పదవి వేట
అమ్ముకొన్న చదువు సొమ్ము-అప్పు-
తీర్చు కొఱకు కష్టమోర్చ జీవనబాట!
సహన సత్వమొసగు సత్యదేవ!
23*ఆ. వె.
బ్రతుక లేక, నితరు బలిదానమును గోరు-
దుష్ట బుద్ధి నణచి శిష్టు జేసి-
వసుధ నిల్పి బ్రోచు-వామన మూర్తివీ
సహన సత్వమొసగు సత్యదేవ!
24*ఆ. వె.
కలిమి బలిమి వెంట, కనక కశ్యపులైరి!
నీదుపేరదోచు నీతి సాగె!
తెలివి కొలది బ్రతుకు నిలువు దోపిడియయ్యె!
సహన సత్వమొసగు సత్యదేవ!
25*తే.గీ.
అన్నపూర్ణ భారతమాత అన్యదేశి-
యనక తిండియు మర్యాదలన్నిగూర్చె!
సౌష్ఠవాభివృద్ధికి కీర్తి సాక్షి చరిత!
సహన సత్వంబు సమకూర్చు సత్యదేవ!
26*తే. గీ.
ప్రజలు చైతన్యవంతులై ప్రగతి బాట-
నడువ నేర్చుట, నీభక్తి నలరి పడవ-
నెక్కుట చరిత్ర, మేల్గూర్చె పెక్కు విధుల!
సహన సత్వంబు సమకూర్చు సత్యదేవ!
27*తే.గీ.
బ్రతుకు బరువుతో పాటుగా పరువు బరువు
దాన గుణమొప్ప మోసిరి, తాతలంత-
బాని సత్వంబు మరచి నీ భక్తిమనిరి!
సహన సత్వంబు సమకూర్చు సత్యదేవ!
28*తే.గీ.
పేరు కోసము స్వార్థంబు పెంపుమీర-
పోటి, పరువు కోసమె గెల్పు-నోటమిగను,
నేత పోరాటమారాటమే గణింప!
సహన సత్వంబు సమకూర్చు సత్యదేవ!
29*తే.గీ.
అన్నగత జీవులు నరులు, అన్నదాన-
ఫలము గొప్పదటన్న సద్భక్తి దారి-
అందరొక్కటై సాగింత్రు జన్మయాత్ర!
సహన సత్వంబు సమకూర్చు సత్యదేవ!
30*ఆ. వె.
ఖలుడమాయక నరు-కవ్వించి యూరకే
దు:ఖమందుముంచు, దుడుకు మూక!
కోర్కె దీర్చ – కొంప కొల్లేరు జేయును
సహన సత్వమొసగు సత్యదేవ!
31*ఆ. వె
అక్రమ హామితో దురాక్రమణకుబూను
అపరపైడి నేత్రులు పరభూమి-
నాక్రమించిరి, వరహావతారుడ రమ్ము!
సహన సత్వమొసగు సత్యదేవ!
32*ఆ. వె.
చట్టము కలవారి చుట్టమైతే భక్తి
పట్టము గలవారి పట్టుగొమ్మ!
కనగ వినగ, నాటి కనక కశ్యపనీతి!
సహన సత్వమొసగు సత్యదేవ!
33*తే.గీ.
చదువు లక్ష్య సమస్యల చక్కజేయు
తగు పరిష్కారములుజూపు, తరచిచూడ!
దివ్వె గోరంత – కొండంత తేజమిచ్చు!
సహన సత్వంబు సమకూర్చు సత్యదేవ!
34*ఆ.వె.
నీతిలేక బ్రతుకు నిస్తేజమై-కూటి
విద్యవెంట లోభి విధుల తంట!
పంచుకొనెడు తిండి పచన దశను పోటి!
సహన సత్వమొసగు సత్యదేవ!
35*ఆ. వె.
పంచు గుణము భూప్రపంచాన మృగ్యమై
నేర్చు విద్య దోచు నేర్పుగలుగ-
దొంగ వెంట దొరయు దొడ్డిదారిని దూరె!
సహన సత్వమొసగు సత్యదేవ!
36*ఆ. వె.
ఒప్పు కోరు తప్పునొప్పుగా నెంతురు
కీడునెంచి మేలు క్రియల సాగు-
మనెడు నీతి వినరు’ మానవత’ గనరు!
సహన సత్వమొసగు సత్యదేవ!
37*ఆ. వె.
నరనరాల విషము, నరకమీ కలికాల
పుడమి కల్తి వస్తు పూర్ణ కథల-
సాక్షి నీవె! నీ పరీక్షలుపేక్షలే!
సహన సత్వమొసగు సత్యదేవ!
38*ఆ. వె.
లోపదారి వెంట లోకదాడిని బూని,
వివిధ పాత్రలందు వీలువెంట-
రాలు గాయి-పరశురామ ప్రీతిని జూపు!
సహన సత్వమొసగు సత్యదేవ!
39*ఆ. వె.
పడ్డవాడె మంచి-ప్రతిభ సాధించేను
అనుభవమ్ము గూర్చి అవని నిలుచు!
పడని చెడ్డ వాడు – పడితెలేవడు భువిన్
సహన సత్వమొసగు సత్యదేవ!
40*ఆ. వె.
కుంటినియురికించి, గూనినెత్తియు జూపి-
గ్రుడ్డి వెక్కిరించు, కుబ్జుమొట్టు-
మూగను వదిరించు-మూర్ఖ క్రీడలు సాగె!
సహన సత్వమొసగు సత్యదేవ!
41*తే. గీ.
బాధ గాధల నీదుచు, బాధ్యతలను
మోయు సంసారిక నీతి మొరటు గాగ
కట్టుబాటును మరచిన-కలదె నీతి?
సహన సత్వంబు సమకూర్చు సత్యదేవ!
42*తే. గీ.
అందరొక్కటై,యొక్కని-అణచుటేల?
ఒక్కడందరి బ్రతికించు యోధులేరి?
ఎందరొకటైతె నొక్కడు ఎదగ గలిగె!
సహన సత్వంబు సమకూర్చు సత్యదేవ!
43*తే. గీ.
చిత్త శుద్ధిని మేలైన సిరుల వృద్ధి,
దయయు దాక్షిణ్యమునుసాగు దారి జయము
పుడమి నిష్కామ కర్మంబు బూన, శాంతి!
సహన సత్వంబు సమకూర్చు సత్యదేవ!
44*తే. గీ.
ప్రతిభచే శ్రద్ధ – శ్రద్ధచే భక్తి వృద్ధి
పూను ధైర్యంబు కొనసాగు పుణ్యకర్మ!
నీతి నిస్వార్థమునుగూర్ప నిత్య శాంతి!
సహన సత్వంబు సమకూర్చు సత్యదేవ!
45*ఆ. వె.
కాలమొక్కతీరు గడపగా తాబేలు,
ముడుచుకొన్నయట్లు ముందు వెనక
ఫికరు లేని బ్రతుకె, ప్రీతి గూర్చును నేడు!
సహన సత్వమొసగు సత్యదేవ!
46*ఆ. వె.
బాల భవిత యనక బాధ్యత విడనాడి
అగ్నితొ చెలగాట మాడు బ్రతుకు-
చేయిగాలి రక్ష చేపట్టు విధమగు!
సహన సత్వమొసగు సత్యదేవ!
47*ఆ. వె.
స్వార్థ రహిత బుద్ధి – సంతాన ఘనవృద్ధి
చదువు సంసృతి యెద సమత బుద్ధి-
లేక బ్రతుక గలరె? రేపటి పౌరులు!
సహన సత్వమొసగు సత్యదేవ!
48*ఆ. వె.
మిగుల కీర్తి ధనము-మిగిలించు జనులేగ
మిగులునేది? కొండ యిసుక గాగ-
గృహము పేర కొండ గొప్పరూపము దాల్చు!
సహన సత్వమొసగు సత్యదేవ!
49*ఆ. వె.
వృత్తి పనులు బోయె, వృత్తి విద్యలుబోయె!
కైకిలయ్యె-నేటి కైటి బ్రతుకు!
పాత విద్య యవిటి పాత్ర చేతి దివిటి!
సహన సత్వమొసగు సత్యదేవ!
50*ఆ. వె.
ఊత బ్రతుకు దెరువు జూపని చదువులు
పోవు దోవ నీతి-పోవుటేల?
నేటి విద్య-వెంట- మేటియై ధరజెల్లు!
సహన సత్వమొసగు సత్యదేవ!
51*
చేతగానివేళ చేయూత నిచ్చెడు
వాడె, పోటిగెలువ వాదులాడు
బల్లిదుండు డబ్బుజల్లి యిద్ధరిమించు!
సహన సత్వమొసగు సత్యదేవ!
52*
దయయుమాని,డబ్బు దస్కంబు సమకూర్చు
కుర్చి పోటి కలిమి గూర్చు – తోటి
నిస్సహాయ జనుల తస్సదియ్యగ జూచు!
సహన సత్వమొసగు సత్యదేవ!
53*
కొంతయు వెనకేయు కొట్లాట సరిపోయె
పుణ్యకాలమేగె, పూని జనుల
కెంతొ-కొంత జేయు పంతంబు చల్లారె!
సహన సత్వమొసగు సత్యదేవ!
54*
మీదివారు వినరు, క్రిందివారుగనరు-
మధ్య వారిమేలు మిధ్యయనగ-
కొమ్ముపోటి కాళ్ళ-దుమ్మగు దూడలు!
సహన సత్వమొసగు సత్యదేవ!
55*
నింగి మిణుగురాట నేల వెలుగుమూట,
నడిమి తరగతి సరి నడక జూట!-
రాజకీయమొకటె రంగులీనెడు చోట!
సహన సత్వమొసగు సత్యదేవ!
56*
అవని బుట్టు జనులు ఆరుద్ర పురుగులై
కాలగతిని, సోకు గలిగి-నలిగి,
రంగు వెలయుదాక రాణించు సయ్యాట!
సహన సత్వమొసగు సత్యదేవ!
57*
ప్రజల మేలుగోరు ప్రభుతయే తొలిరక్ష-
ఆత్మరక్ష-పిదప నంతరంగ-
భక్తిమార్గమున పారలౌకిక రక్ష!
సహన సత్వమొసగు సత్యదేవ!
58*
ప్రభుత సేవకులను-ప్రైవేటుగా దిట్టు
కొలువు దొరికి నాక కొంటె బుద్ధి-
ప్రభుత మేలటంచు ప్రైవేటు దిట్టెను!
సహన సత్వమొసగు సత్యదేవ!
59*
వెనక రాజు-రంగు వెలసి బంటుగ మారె!
తెగిన మేలగు-బరిదెగిన కీడు!
వెనక గోతి-ముందు వెఱపించు నూతులు
సహన సత్వమొసగు సత్యదేవ!
60*
రాని మాతృబాష-‘రాబిటు టారుటా
యిస్సు’ -కళ్ళుమూసి లెస్స పిల్లి-
పాలుద్రాగుమాట-పరబాష మరఘోష!
సహన సత్వమొసగు సత్యదేవ!
61*
ఊసుబోక జదువు, ఉన్నత విద్యలో
మాతృబాషలొదిగె, మారు మూల!
కుమ్ములాటసాగె – కూటి విద్యలగోల!
సహన సత్వమొసగు సత్యదేవ!
62*
సమయమమ్ము యాత్ర సాగె యాంత్రికముగా
బ్రతుకు దొమ్మియుద్ధ పటిమ వెంట-
కూడబెట్టు దిగులు-కూటి దిగులు మించె!
సహన సత్వమొసగు సత్యదేవ!
63*
కలిగె కృతమునుండి, కలిదాక, పరిణామ-
క్రమము, విజ్ఞతగను కథల దయయె!
విస్తరించె, మానవీయ విజ్ఞానమై!
సహన సత్వమొసగు సత్యదేవ!
64*
ప్రీతి , శుద్ధి గలుగు పిడికెడు మెతుకులు-
క్షుధితు నాల్క తృప్తి, సుధలు గురియు!
లవణమన్నమె, దిను-లక్షాధికారియు!
సహన సత్వమొసగు సత్యదేవ!
65*
మంచి బెంచు భక్తి మార్గంబు శాశ్వత
తృప్తి గూర్చు, లేశ ప్రాప్త ధనమె! మంచి మాట పనుల మానవీయత మదిన్
సహన సత్వమొసగు సత్యదేవ!
66*
ఆర్త జనులు మదిని యాపద మ్రొక్కులఁ
గోరుచుంద్రు, పుడమి క్రొత్తబ్రతుకు
సాగిపోవ మదిని సంపద మరుపులున్
సహన సత్వమొసగు సత్యదేవ!
67*
వరుస కథలయందు వ్రతమహిమ వినియు
శ్రద్ధ గలుగ నీ ప్రసాద మొంది
బ్రతుకు తేలికపడి బాధలు మరిచేరు
సహన సత్వమొసగు సత్యదేవ!
68*
మాట దప్పి వ్రతము మాని వాయిదా వేయు
భక్తజనులు సాగు బ్రతుకు బాట
విధిగవ్రతము జేయు నికషగల్పించేవు!
సహనసత్వమొసగు సత్యదేవ!
69*
భారతీయ దివ్య భావమాత్మీయతా!
వారసత్వగుణమె వసుధ జాతి
కౌతుకంబు విశ్వ కౌటుంబ దర్పణమ్
సహన సత్వమొసగు సత్యదేవ!
70*
నీతి ధర్మ పథము, నీస్తేజమగువేళ
రీతి నుద్ధరింప గీతమ్రోగె-
అవనినుద్ధరింప నవతరింతువునీవె!
సహన సత్వమొసగు సత్యదేవ!
71*
ఒప్పుకొనరు కలిని – తప్పు నొప్పుగనెంత్రు
గట్టిమేలును దల పెట్టలేరు
వ్రతములందు, మానవతయె దీపించదా!
సహన సత్వమొసగు సత్యదేవ!
72*
తప్పు దెలిసి మాయ దరచి యాత్మదెలిసి-
బ్రతుకు లోతు గన్న భక్తి నిలుచు!
భక్తి దారి యాత్మ ముక్తిమార్గము గాంచు!
సహన సత్వమొసగు సత్యదేవ!
73*
నీతి గుణమె పేద నిండుదనమగును
దయయె, ధనిక కీర్తి దనరు గుణము!
కలసి బ్రతుక సుఖము కలహింప కష్టమున్
సహన సత్వమొసగు సత్యదేవ!
74*
మనుజు మనుజు గలుపు, మాధవా! నీభక్తి-
నాత్మనేక భావమలరు వ్రతము-
తరిగి పోవ జేయు, తరతమ బేధముల్
సహన సత్వమొసగు సత్యదేవ!
75*
నీదు నోము నోచు నెలయె కార్తీకంబు
పున్నమిదినమందు పూజనోము!
నయము, జయము గూర్చు-నమ్మిన వారికిన్
సహన సత్వమొసగు సత్యదేవ!
________________
***రామకథ ప్రస్తుతి ఆటవెలదులు***
76*
రామ జననమయ్యె! రామాయణము సాగె
రామ నవమి పెళ్ళి రమ్యమయ్యె!
నాల్గు పాదములను నడయాడుధర్మమై
సహన సత్వమొసగు సత్యదేవ!
77*
రామ రాజ్యమందు రాజిల్లె ప్రకృతి
వత్సరాది రుచుల వసుధ బ్రతుకు!
నెలవు సస్యములకు నెలమూడు వానలున్
సహన సత్వమొసగు సత్యదేవ!
78*
ఆలు మగలకెల్ల ఆదర్శమగు సీత-
రాములనగ నడవి రాజ్యమేలె!
తండ్రియాజ్ఞ తలను దాల్చి పద్నాల్గేండ్లు!
సహన సత్వమొసగు సత్యదేవ!
79*
నార చీర గట్టి, నాతివెంటను రాగ-
రాతినేల నడిచె, రాముడతని
యనుజ లక్ష్మణుండు ననుసరించియు వచ్చె!
సహన సత్వమొసగు సత్యదేవ!
80*
చుప్పనాతి,రాముజూచి సీతనురక్కి
వేయ దుమికె-సైగ జేయ లక్ష్మ-
ణుండు ‘ముక్కుజెవులు-ఖండించి పంపెను!
సహన సత్వమొసగు సత్యదేవ!
81*
ముక్కుగాయపడియు ముఖశోభ దరిగిన
శూర్పనఖయు యుద్ధ సూత్ర గతిగ
దరణిజ చెఱబట్ట, దశకంఠు పురిగొల్పె
సహన సత్వమొసగు సత్యదేవ!
82*
మాయలేడి చర్మమడిగెను, భూజాత-
రామబాణఘాతి రక్కసుండు
అవనిగూలియఱచె, హా లక్ష్మణాయని!
సహన సత్వమొసగు సత్యదేవ!
83*
సూత్రధారి హనుమ! సుగ్రీవుమైత్రికి!
తల్లిగాంచె లంక దగులబెట్టె!
రామరావణ రణ రచన గావించెను
సహన సత్వమొసగు సత్యదేవ!
84*
రాక్షసాళి మడిసె! రావణుండు మడిసె’
అగ్నిచేత పూజలందె సీత!
పుష్ఫకంబయోధ్యపురము జేరగ వచ్చె!
సహన సత్వమొసగు సత్యదేవ!
85*
కట్టె వారధి పడగొట్టె లంకాపతిఁ
దెచ్చెసీత జనుల హెచ్చె ముదము!
వసుధ ప్రకృతిశోభ వత్సరాదినిబోలె!
సహన సత్వమొసగు సత్యదేవ!
86*
సత్య వ్రతముదెల్పి సంస్కరించి జనుల-
గలుగు కోర్కెలిచ్చు కలపవృక్ష-
మైన బ్రహ్మ విష్ణు మహదేవుడవు నీవె!
సహన సత్వమొసగు సత్యదేవ!
87*
చూడముచ్చటైన సుందర రూపంబు
గనినచాలు తృప్తి గలుగుచుండు!
చుట్టు సకల మునులు సురలు ప్రస్తుతి జేయ!
సహన సత్వమొసగు సత్యదేవ!
88*
మాత వలెను గీత మరల మరల దెల్పి
జీవులన్నిటాత్మ దీప్తి జూపి!
సంశయంబు దీర్చు సంరక్షణయు జేసి-
సహన సత్వమొసగు సత్యదేవ!
89*
నయమొసంగు మంచి నైతిక విలువలు-మరలమరల బెంచి మనిషి జేసి-
కలిమిగూర్చి, సృష్టి కడదాక మన్నించు!
సహన సత్వమొసగు సత్యదేవ!
90*
ఇంట- రచ్చగెలుపు, తంటయ్యె బ్రతుకంత-
లోప చిద్రమె రిపులోక దారి!
నీదు భక్తి గలుగ, నిశ్చింత, భద్రత!
సహన సత్వమొసగు సత్యదేవ!
91*
ఎవరి తిండి వారికేర్పడె నీదయ-
బ్రతుకు దారి గలిగె, పరులతిండి-
దోచి తినగ, కలహ దొమ్మి సాగెను నేడు!
సహన సత్వమొసగు సత్యదేవ!
92*
భక్తి గలుగు కూడు, పట్టెడేదైనను-
చెత్తమేనుబెంచు, చెలగు భక్తి-
శుద్ధి గూర్చి, బుద్ధి వృద్ధి-నీదరిజేర్చు!
సహన సత్వమొసగు సత్యదేవ!
93*
అందరొకటె,ఈవి నందించు కృషియేది!
పంట వంటమాని తంటగూర్చు-
ఆస్తి గోల లేల? ఆత్మ శోధన గల్గ!
సహన సత్వమొసగు సత్యదేవ!
94*
సిరులు గుల్కు పుణ్యశీలంబు గల్గెనా-
అందరొక్క బాటయందు సాగి-
బ్రతికి ధాతలగుచు, భక్తి నిన్ వేడరా!
సహన సత్వమొసగు సత్యదేవ!
95*
వాపు,బలుపు గనక-వర్థిల్లు బ్రతుకున
స్వార్థ గుణుడు, యీవి సాగనీక-
మాయికుడగు ముక్తి మార్గంబు వెదకునా?
సహన సత్వమొసగు సత్యదేవ!
96*
ఆత్మదారి, జీవులన్నియొక్కటే, చేయు-
చేతలందు-మమత చెలగు సమత!
సెక్కులరిజమైతె శ్రేష్ఠమీ నరజాతి!
సహన సత్వమొసగు సత్యదేవ!
97*
ఇల్లు పల్లె పట్నమెల్ల నాత్మీయతా-
భావముప్పతిల్లు భక్తి మహిమ!
నీది నాదియనని నిజబ్రహ్మ భావమే!
సహన సత్వమొసగు సత్యదేవ!
98*తే. గీ.
ఉన్న లేకున్నను, కలిగియున్నయంత
ఊరు నూరంత నీదీక్షనుండు వేళ-
వ్రతముసాగు కులము, మతభేదమును లేదు!
సహన సత్వంబు సమకూర్చు సత్యదేవ!
99*తే. గీ.
మనిషి కారోగ్య మహభాగ్యమాత్మ తృప్తి-
విజ్ఞ మానవ తేజమే విశ్వ శాంతి!
సామ్యవాదమెసగు-నీప్రసాద మహిమ!
సహన సత్వంబు సమకూర్చు సత్యదేవ!
100*
భక్తి పాలకుండను తోడు బ్రహ్మ విద్య!
పెరుగు మీగడ నీగీత నెరుగు దీక్ష!
బ్రతుకు నవనీతమగు – పుణ్యఫలము దోచు!
సహన సత్వంబు సమకూర్చు సత్యదేవ!
101*
బుద్ధి శుద్ధి వివేకంబు, భుక్తి విద్య
పారలౌకికార్థము భక్తి బ్రహ్మ విద్య!
జన్మ దరచు చుక్కానియై జగతి వెలసె!
సహన సత్వంబు సమకూర్చు సత్యదేవ!
102*
త్యాగమూర్తులై భారత తత్వ మునులు-
సంస్కృతిని, సంసృతిని భక్తి సాధనముగ-
యోగవంతంబు జేసిరి, యోగ్యతెసగ!
సహన సత్వంబు సమకూర్చు సత్యదేవ!
103*
తిరుణహరి వంశజుడ, పుణ్య తీర్థ సేవ-
తనివిదీరగా ననుగన్న తల్లిదండ్రి-
నోము నీనామ కరణంబు నోచియుంటి!
సహన సత్వంబు సమకూర్చు సత్యదేవ!
104*
చర్ఛ సదసద్వివేకులు చాలమెచ్చ-
సాగె శతకలహరియు నక్షత్రమాల
భాగ త్రయము నర్పించితి-వాసుదేవ!
సహన సత్వంబు సమకూర్చు సత్యదేవ!
105*
శ్రీ సభాపతి మన్నించె, చిత్తగింప!
వినుడు వినుడంచు వేడితి వినయమొప్ప!
సాటి గురులకు జనులకు-ఛాత్రులకును!
సహన సత్వంబు సమకూర్చు సత్యదేవ!
106*
శతక పఠన సమర్పణ సాగువేళ-
వేదికను వెల్గు సాహితి వేత్తలంత-
పొగడ, పాత్రికేయులు మెచ్చ గొనుము కృతిని!
సహన సత్వంబు సమకూర్చు సత్యదేవ!
107*
నిత్య సత్యమహింసయే నీదు వ్రతము!
మానవత నీప్రసాదమై మహిమ జూపు!
దానమే తపస్సుగ నీదు దారి సాగు!
సహన సత్వంబు సమకూర్చు సత్యదేవ!
108*
శుభము పఠనపాఠకులకు శ్రోతలకును-
శుభము సత్యవ్రతులకెల్ల, శుభము! శుభము!
శుభము భూతహితవు నేర్పు బోధకులకు!
సహన సత్వంబు సమకూర్చు సత్యదేవ!