సఖ్యభక్తి శతకము
(తే.గీ.)
1*(ప్రారంభము)
శ్రీ తిరుమలేశు కృపచేత చిత్తవృత్తి
దాసదాసాన దాసత్వ దారి సాగె!
సత్యదేవుని వరజన్మ సత్ఫలముగ-
తిరుణహరి సఖ్యభక్తి యాత్మీయ సూక్తి!
2*
తేట తెలఁగాణ బాషావిశేషమేమొ?
తరచి చూడగ, సంస్కృత తత్సమంబు!
తద్భవంబులే గ్రామ్యముల్ తత్వగతులు!
తిరుణహరి సఖ్యభక్తి యాత్మీయ సూక్తి!
3*
చిన్ననాడుదయించిన చిగురుటూహ-
ప్రణయమై దాస్యభక్తికి పాదుగాగ-
పరిణతిని జెంది తాత్విక ప్రణవమయ్యె!
తిరుణహరి సఖ్యభక్తి యాత్మీయ సూక్తి!
4*
మంచి చెడు విచక్షణ దేల్చె మానవతయు-
మైత్రి భావంబు మొలకెత్తె, మనసు శుద్ధి
సామి భక్తి, జనకు బోధ సాగె బుద్ధి!
తిరుణహరి సఖ్యభక్తి యాత్మీయ సూక్తి!
5*
కృష్ణ మైత్రి – కుచేలుని తృష్ణదీర్చె!
కృష్ణ మైత్రి, పార్థుని కృషి ఫలించె!
మధుర భక్తి, మీరాబాయి మార్గమయ్యె!
తిరుణహరి సఖ్యభక్తి యాత్మీయ సూక్తి!
6*
మైత్రిచేత,శత్రత్వంబు మాయు, పుడమి-
శత్రు మిత్రుగా మార్చుట సాధ్య పడును-
సాధ్య పడకున్న-కలిగించు సత్ఫలంబు!
తిరుణహరి సఖ్యభక్తి యాత్మీయ సూక్తి!
7*
క్రొత్త కలతచే, మైత్రికి గోడబెట్టి
మిత్ర నిందకు బూనడు మిత్రుడెపుడు!
కర్ణ దుర్యోధనుల మైత్రి గాంచె కీర్తి!
తిరుణహరి సఖ్యభక్తి యాత్మీయ సూక్తి!
8*
మనసు తలవంచు మైత్రికి మనుజులందు
మాయ వీడగా వాస్తవ మార్గ మొదవు
యెంచి మాటాడి యత్నింప – మంచి గలుగు!
తిరుణహరి సఖ్యభక్తి యాత్మీయ సూక్తి!
9*
మంచి చేదోడు వాదోడు మానవులకు!
తాను బోయినా మిగిలేది ధరను కీర్తి!
మైత్రి గలిగిన చోటనే మంచి వెలయు!
తిరుణహరి సఖ్యభక్తి యాత్మీయ సూక్తి!
10*
మంచి చేయూతగా సాగు మైత్రి మేలు!
చెడుగు మైత్రి- తత్కాలికం చేదుబ్రతుకు!
కొంచమైన గుభాళించు మంచి మైత్రి!
తిరుణహరి సఖ్యభక్తి యాత్మీయ సూక్తి!
11*
జన్మపోయినా మిగిలేది జగతి కీర్తి!
మనము పోయినా, మిగిలేది మంచిపేరు!
మంచి మైత్రి సాగిన ధర్మమలరు జగతి!
తిరుణహరి సఖ్యభక్తి యాత్మీయ సూక్తి!
12*
మంచి యోచన చేగల్గు మంచి మనసు!
మంచి మనసు నినదించు మంచిమాట!
మంచి మనసు, మాటయు గల్గ మైత్రి వెలయు!
తిరుణహరి సఖ్యభక్తి యాత్మీయ సూక్తి!
13*
మంచియోచనచేగల్గు మంచి కర్మ!
మంచి కర్మ సాధన – ధర్మమార్గమగును!
ధర్మమార్గమె – ఇహపర తారకంబు!
తిరుణహరి సఖ్యభక్తి యాత్మీయ సూక్తి!
14*
మంచి సాగుట కష్టము-మాట నిలుప-
మనుజు జీవనమార్గంబు-మంచి పరిధి-
కష్టమైనను-మైత్రిచే యిష్టమగును!
తిరుణహరి సఖ్యభక్తి యాత్మీయ సూక్తి!
15*
మంచి చెడులెంచి సన్మైత్రి మానవాళి –
చెడును వర్జింపకున్నను చెడును-బ్రతుకు!
మంచినార్జింప సన్మైత్రి మలుపు ద్రిప్పు!
తిరుణహరి సఖ్యభక్తి యాత్మీయ సూక్తి!
16*
చెడ్డ మిత్రుడు, తనకు తాజేరి-వెళ్ళు!
మంచి మిత్రుడు మది పరీక్షించి మొదట-
నెమ్మదిగ మైత్రి సాగించు నమ్మకమున!
తిరుణహరి సఖ్యభక్తి యాత్మీయ సూక్తి!
17*
మంచి’ప్రాణవాయువుబోలు-మలినములను
అగ్ని శుద్ధిగా మండించి – ఆత్మ జూపు!
ఆత్మ పరమాత్మ సంబంధయాత్ర మంచి!
తిరుణహరి సఖ్యభక్తి యాత్మీయ సూక్తి!
18*
మంచి కథసాగు బ్రతుకుగా- మాధవుండు
మంచి వారిని రక్షింప – వంచకులను,
వంచగా బుట్టి మంచి జూపించి గాచు!
తిరుణహరి సఖ్యభక్తి యాత్మీయ సూక్తి!
19*
మంచియే,మాధవుని మైత్రి, మనుజ నీతి
మాధవుని మైత్రిచే వెల్గు, మానవతగ!
మానవత, పరస్పరమైత్రి-మనగ జెల్లు!
తిరుణహరి సఖ్యభక్తి యాత్మీయ సూక్తి!
20*
మంచి లేనియాచారముల్ – మాయమగును
మంచిలేని విచారముల్ మైత్రిగనవు!
మంచి బూనిన, చరితార్థమగును-బ్రతుకు!
తిరుణహరి సఖ్యభక్తి యాత్మీయ సూక్తి!
21*
మంచి దివ్వెకిందనె చెడ్డ పొంచియున్న
చెడ్డ క్రీనీడ కిందనె చేరి మాయ-
తెరలలో దాగు మంచియు తరతరాలు!
తిరుణహరి సఖ్యభక్తి యాత్మీయ సూక్తి!
22*
మంచి యోచన, మేధస్సు-మహిని బ్రతుకు
తృప్తి గూర్చును-బ్రతుకు సంతృప్తి వెంట
మంచి త్రికరణ శుద్ధికి మార్గమగును!
తిరుణహరి సఖ్యభక్తి యాత్మీయ సూక్తి!
23*
మంచి బాటలో, ఘటియించు మైత్రిమాట
మైత్రి బాటలో నర్తించు మంచి మనసు!
విస్తరించు విశ్వాసమే విశ్వమైత్రి!
తిరుణహరి సఖ్యభక్తి యాత్మీయ సూక్తి!
24*
మంచి సంపాదనకు జన్మ సంచితార్థ-
పుణ్య ఫలము జతపడును, పూని సాగు-
యోగసాధన, తత్ఫలయోగ్యు జేయు!
తిరుణహరి సఖ్యభక్తి యాత్మీయ సూక్తి!
25*
పుణ్యమనగ ముక్తినిగొను పూర్ణ ధనము!
దాని సాధింప కరుణాత్మక విశుద్ధి!
మంచి పుణ్యము-చెడుపాపమగును పుడమి-
తిరుణహరి సఖ్యభక్తి యాత్మీయ సూక్తి!
26*
భువి పరోపకారము గూర్చు భూత హితవు-
సత్యమై, పుణ్యమై, మంచి సాగు విధము!
ధర్మమైజెల్లు, కలియందు, ధాత తపసి!
తిరుణహరి సఖ్యభక్తి యాత్మీయ సూక్తి!
27*
దానమే కలియుగమందు, తపసుగాగ-
మునిపురాణ నీతియు ధర్మ మూలకముగ-
నీతి శాస్త్రంబు హితవయ్యె నీ ధరిత్రి!
తిరుణహరి సఖ్యభక్తి యాత్మీయ సూక్తి!
28*
మంచి,చెడు శత్రు మిత్రులు సంచరింత్రు-
వంచకుడు, నిశాచరునట్లు వచ్చువాడు!
దినము వచ్చుమిత్రుడు బోలు దినకరుణ్ని!
తిరుణహరి సఖ్యభక్తి యాత్మీయ సూక్తి!
29*
స్వార్థమున మంచియే లేదు సాగు పనుల
వెలయు నిస్వార్థమే, మంచి వెలయు చోటు!
ప్రేమ భక్తి నిస్వార్థమే-పేరు కీర్తి!
తిరుణహరి సఖ్యభక్తి యాత్మీయ సూక్తి!
30*
మనసు నవనీతమై-పల్కు మాట, పనుల
తేట తెల్లమౌ త్యాగంబు బాట-మైత్రి-
సూర్య రశ్మిని సరిబోల్చు సూత్రమగును!
తిరుణహరి సఖ్యభక్తి యాత్మీయ సూక్తి!
31*
స్నేహమే నిత్య వేదిక-చేయు పనుల
దీన జనసేవ సాగిన దిక్కులందు!
వెల్గు పుణ్యాత్ములే భువి వేల్పు లనగ!
తిరుణహరి సఖ్యభక్తి యాత్మీయ సూక్తి!
32*
స్నేహ భావంబు చేకూర్చు నిహసుఖంబు!
భక్తి రూపమై కల్గించు పరసుఖంబు!
మైత్రినుద్ధరింపగ, దైవమవతరించు!
తిరుణహరి సఖ్యభక్తి యాత్మీయ సూక్తి!
33*
బ్రతుకు పోరాటమారాట – గతుకు బాట!
బలము గూర్చు మైత్రియు భక్తి భావ ఝరులు!
పారలౌకికంబులుగాగ పరిగణింప-
తిరుణహరి సఖ్యభక్తి యాత్మీయ సూక్తి!
34*
చేయు కృషి-మైత్రి చే మించు, చేవ గలుగు!
భక్తి వైరాగ్య సాధనా పటిమగలుగు!
మనసు నిల్పు నిశ్చింత సమత్వ దృష్టి!
తిరుణహరి సఖ్యభక్తి యాత్మీయ సూక్తి!
35*
దుష్ట చింతన విడనాడి, దురిత దూర-
శిష్ట సత్సంగమున బడి, ఇష్టమైత్రి-
కష్ట సాధన చేయనభీష్ట సిద్ధి!
తిరుణహరి సఖ్యభక్తి యాత్మీయ సూక్తి!
36*
బ్రతుకు ఝంజాటమునబడి-భ్రమరమట్లు-
మంచి మిత్ర సంపాదన మార్గమందు
మాయికుతోడ గెలువడమాయకుండు!
తిరుణహరి సఖ్యభక్తి యాత్మీయ సూక్తి!
37*
బాధ్యత,విధుల వీడదు ప్రాణ మైత్రి
కలిమి లేమి-నిమ్నోన్నతఁ గాంచ బోదు!
కల్మిడిగ కష్ట సుఖముల కలిసిఈదు!
తిరుణహరి సఖ్యభక్తి యాత్మీయ సూక్తి!
38*
కలిమి లేముల గలిగెడు, కలత సుడుల
శత్రు హేళన , గోలగా సాగు వేళ-
మంచి మిత్ర సంపాదన మార్గ హితము!
తిరుణహరి సఖ్యభక్తి యాత్మీయ సూక్తి!
39*
ఆపదల యందు’వీడదు ఆప్త మైత్రి!
పేద గొప్ప భావము లేక పెరిగి పోవు!
బాధలకు మైత్రియే మందు-భవిత విందు!
తిరుణహరి సఖ్యభక్తి యాత్మీయ సూక్తి!
40*
బ్రతుకు నవ్వుపువ్వుల దారి, బండి మైత్రి
సప్త రంగు సింగిడియట్లు సాగు చుండు!
ఏడ్పు నూర్పులు భరియించు నేడుగడగ!
తిరుణహరి సఖ్యభక్తి యాత్మీయ సూక్తి!
41*
మింటి సూరీడు-మిహిరుడు మిత్రుడనగ
సూర్యు నంత పవిత్రుడు! సూత్రగతిని
సాగు సామాజికుల దండ సాహితముగ!
తిరుణహరి సఖ్యభక్తి యాత్మీయ సూక్తి!
42*
అరయ నవవిధ భక్తులు నలరు పుడమి!
సఖ్య భక్తినావను జన్మ సార్థకంబు!
ముక్తి తీరమ్మునకు సాగు ముందు దారి!
తిరుణహరి సఖ్యభక్తి యాత్మీయ సూక్తి!
43*
నిజము వచియింప, మైత్రియు నిగ్గు దేలు!
కీర్తిదాయకమగు మైత్రి క్రియలు రోజు
విహితమును గూర్చు భువి దానవీర మైత్రి!
తిరుణహరి సఖ్యభక్తి యాత్మీయ సూక్తి!
44*
నీతి నిర్ధారణకు మైత్రి నిలువ మేలు!
ఇచ్చి పుచ్చుకోగనుమైత్రి హెచ్చు-మిత్ర
దారి మరలించి వెనుదిర్గి తరలి వచ్చు!
తిరుణహరి సఖ్యభక్తి యాత్మీయ సూక్తి!
45*
పొగడ నుబ్బి తబ్బిబ్బుగా బోని మైత్రి-
తెగడ కూలబడని మైత్రి తేజమొందు!
మిత్ర కార్యమై సర్వత్ర మేలుగూర్చు!
తిరుణహరి సఖ్యభక్తి యాత్మీయ సూక్తి!
46*
మిత్రు కోసమై త్యాగము మిగుల జేయు
తప్పులుపొరబాట్లు తరచ వేరు!
మిత్ర గోప్యంబు దాచు, సుమిత్రుడెపుడు!
తిరుణహరి సఖ్యభక్తి యాత్మీయ సూక్తి!
47*
గొప్ప దనమేది – తనసొమ్ము కొంత నిడక!
మెత్తదనమేదగు, అమాయ కోత్తమంబు!
నీతి నిండుదనంబేది విలువ గనక!
తిరుణహరి సఖ్యభక్తి యాత్మీయ సూక్తి!
48*
మైత్రి గలచోట వెల్గును, మంచి మనసు!
మంచి భావాత్మకమె, సాగు- మనసు శుద్ధి!
శుద్ధి గొన్న మదియు, నాత్మ బుద్ధి వెలుగు!
తిరుణహరి సఖ్యభక్తి యాత్మీయ సూక్తి!
49*
మూడు పురుషార్థముల, మూలగూడు ధర్మ
మనెడు మాటకు నతికియు మనుజు నందు-
అర్థ కామ మోక్షముల్జన్మ-సార్థకములు!
తిరుణహరి సఖ్యభక్తి యాత్మీయ సూక్తి!
50*
మైత్రి సుఖశాంతి దాయక మార్గమందు-
ధర్మమేసాగు – మైత్రి విధాత వరము!
సత్య మార్గజీవుల వారసత్వ ధనము!
తిరుణహరి సఖ్యభక్తి యాత్మీయ సూక్తి!
51*
పుడమి జన్మ జన్మల పూర్వ పుణ్య ఫలము
భక్తి గామారు, నాధ్యాత్మికోక్తిమహిమ
మైత్రి-జాతిసమైక్యత, మానవతయు!
తిరుణహరి సఖ్యభక్తి యాత్మీయ సూక్తి!
52*
యెదను సద్భావముదయింప నెగడుమైత్రి!
వెలయు ధీ వివేకము గల్గ వెల్గు మైత్రి!
నిండు మనసు నిశ్చలమైన దండి మైత్రి!
తిరుణహరి సఖ్యభక్తి యాత్మీయ సూక్తి!
53*
దైవ ఘటన మానవ పాత్ర ధారి నటన-
జగతి నాటకమున-మాయ ఝరులు పొంగు!
ఆత్మ తత్వదీప్తిని మాయలంతరించు!
తిరుణహరి సఖ్యభక్తి యాత్మీయ సూక్తి!
54*
ఎవరికెవరు,తనకుతానె-వెలయునాత్మ!
తనువు గాక తనకుతానె దలచుటెల్ల
జన్మ తరియించు మార్గమే – జాగృతిగను!
తిరుణహరి సఖ్యభక్తి యాత్మీయ సూక్తి!
55*
ఎవరి కెవరు గారను, మాటలెల్ల, పార-
లౌకికము బాట నిహలోక లబ్ధి గూర్ప-
మైత్రి భావంబు ప్రీతిగా మనుగడెసగు!
తిరుణహరి సఖ్యభక్తి యాత్మీయ సూక్తి!
56*
చిత్త చాపల్యమున తత్వచింతనంబు
సాగ బోదు, నిశ్చల చిత్త సామ్యగతిని-
బ్రాంతి తొలగు కొలది-యాత్మభావసిద్ధి!
తిరుణహరి సఖ్యభక్తి యాత్మీయ సూక్తి!
57*
దైవ ఘటన యోగంబుల దారులెల్ల
నొకరికొకరున్న భావననొనర జేయు!
జగతి నాటకమును సాగు జరుగు చరిత!
తిరుణహరి సఖ్యభక్తి యాత్మీయ సూక్తి
58*
శత్రు శత్రుత్వమే చెడు, మిత్రుడైన-
చెడ్డ-మంచి భావము చేత చెరిపి వేయు!
మంచి మైత్రియే మనుజుని మంచి మార్పు!
తిరుణహరి సఖ్యభక్తి యాత్మీయ సూక్తి!
59*
భువి నజాత శత్రువనంగ భూరి మైత్రి!
పుడమి సంధింప ధర్మజు పూనికయ్యె!
దారి నడిపించె దైవంబు ధైర్యమొసగె!
తిరుణహరి సఖ్యభక్తి యాత్మీయ సూక్తి!
60*
అక్కరకువచ్చు బంధుత్వమవని వెలయ-
మైత్రి భావంబు భక్తిగా మార్పుజెందు!
మరపురాని కావ్యాలలో మధురమైత్రి!
తిరుణహరి సఖ్యభక్తి యాత్మీయ సూక్తి!
61*
మన పురాణేతి హాసాలమాట-మైత్రి!
తెఱపిలేని నీతికి వెండి తెరయె మైత్రి!
ఆత్మ పరమాత్మసంబంధ యాత్ర మైత్రి!
తిరుణహరి సఖ్యభక్తి యాత్మీయ సూక్తి!
62*
పాల వంటిది యలనాటి బాల్య మైత్రి!
హృదయ కుహరంపు ముద్రయాకృతిని బోలు!
పాలలో తోడు దైవీయ ప్రకృతి మైత్రి!
తిరుణహరి సఖ్యభక్తి యాత్మీయ సూక్తి!
63*
తోడు వీడని వెన్నమీగడయె మైత్రి!
విరిగి పోనిది పెరుగున వెన్న మైత్రి!
భక్తి బుణ్యాదిగా మైత్రి బలమునొందు!
తిరుణహరి సఖ్యభక్తి యాత్మీయ సూక్తి!
64*
వెన్న నవనీతమగు క్రొత్త వెన్న గలిపి
కాచి వడబోయగా నేతి కమ్మరుచుల-
పాత్ర పరిమళించే, రీతి పటిమ మైత్రి!
తిరుణహరి సఖ్యభక్తి యాత్మీయ సూక్తి!
65*
పాల మైత్రిని విరుచు పాపాల మైత్రి!
పుడమి నేతిగ రూపించు పుణ్య మైత్రి!
బ్రతుకు మంథానమొనరించు ప్రాణమైత్రి!
తిరుణహరి సఖ్యభక్తి యాత్మీయ సూక్తి!
66*
శత్రు కన్న ప్రమాదమే స్వార్థ మైత్రి!
ఇంటి గుట్టును చాటించు కొంటె మైత్రి!
మధ్య రాత్రి గడియదీయు మాయమైత్రి!
తిరుణహరి సఖ్యభక్తి యాత్మీయ సూక్తి!
67*
నీతియుతమైన మైత్రిదే నిండు దనము
నీతి రహిత మైత్రిని సాగు రీతి కీడు!
నీతి సహిత శాత్రవు చర్యలింక మేలు!
తిరుణహరి సఖ్యభక్తి యాత్మీయ సూక్తి!
68*
అవని తలిదండ్రి, గురుదేవు, డతిథి, యాత్ము-
లనగ వేల్పు లైదుగురును, దనరు పూజ-
కర్హులుగ భక్తి నర్పింప గలుగవలయు!
తిరుణహరి సఖ్యభక్తి యాత్మీయ సూక్తి!
69*
భక్తి చే మాధవుని సేవ బరగునట్లు-
మైత్రి చేత మానవ సేవ – మార్గముండు!
మనసు గల్గిన నడవడి మంచి బెంచు!
తిరుణహరి సఖ్యభక్తి యాత్మీయ సూక్తి!
70*
బుద్ధియు వివేక సంపద-భూత హితవు,
దయయు, దాక్షిణ్యపూరిత దారులందు-
మిత్రుడాకాశమణి మిత్రు మించి వెలుగు!
తిరుణహరి సఖ్యభక్తి యాత్మీయ సూక్తి!
71*
భారతీయ పురాణాల భక్తితోట!
ప్రేమ గాథలో మైత్రికే పెద్ధపీట!
భాగవతులందు గను సఖ్య భక్తి బాట!
తిరుణహరి సఖ్యభక్తి యాత్మీయ సూక్తి!
72*
మంచి పూదండ దారమై మైత్రి సాగు
దారి-ఉమ్మెత్త – పరమాత్మ దయనుబొందు!
గడ్డి పూవు గుడిని జేర గలుగు చూడ!
తిరుణహరి సఖ్యభక్తి యాత్మీయ సూక్తి!
73*
దురలవాటున గలిగేది దురిత మైత్రి!
దారిలోగల్గి ఖర్చగు, ధాత ధనము!
కలిమి కర్పూరమౌ కరుగు కడకు!
తిరుణహరి సఖ్యభక్తి యాత్మీయ సూక్తి!
74*
నిత్య సంతోషికెప్పుడు నిత్య సుఖమె!
అలక దీర్చు తాయిలమట్లు నలరు మైత్రి!
తలప తాత్కాలికమె, యాకతాయి మైత్రి!
తిరుణహరి సఖ్యభక్తి యాత్మీయ సూక్తి!
75*
గాయ పడురాలు గాయితా గాయపరచు!
ప్రేమ జూపడు, మైత్రిని పెంపు గనడు!
మనసు గాయంబు మార్చేది – మైత్రిభక్తి!
తిరుణహరి సఖ్యభక్తి యాత్మీయ సూక్తి!
76*
శోకమణచు నిష్కామమే లోకమందు
గీత సారాంశముగ మ్రోగె నీతి పథము!
సమతయోగ సాధన దాక సాగిపోయె!
తిరుణహరి సఖ్యభక్తి యాత్మీయ సూక్తి!
77*
అందరును జన్మబంధాల నలరు చున్న
భక్తినేకాత్మ దోచుట – వ్యక్తిగతము!
ఇష్టదైవమేకముగా, సమిష్టియాత్ర!
తిరుణహరి సఖ్యభక్తి యాత్మీయ సూక్తి!
78*
ఏది గౌతమ బుద్ధుని యెదను నాటి
యాత్ర సాగియు-జ్ఞానోదయంబుగూర్చె!
అదియె, నరులందు నేటికి కదలు కోర్కె!
తిరుణహరి సఖ్యభక్తి యాత్మీయ సూక్తి!
79*
కోర్కె హేతువు స్వార్థమే లోకమందు!
శోక హేతువు కోరిక, సొమ్ము మోజు!
హింస కైన బూనుటకదా! హీన చరిత!
తిరుణహరి సఖ్యభక్తి యాత్మీయ సూక్తి!
80*
బౌద్ధ మతదారి దైవమే బుద్ధుడయ్యె!
భూత దయ దెల్పె-జైనము పుడమి వెలసె!
హింస మాన్పించె-జీవుల హితవు గోరె!
తిరుణహరి సఖ్యభక్తి యాత్మీయ సూక్తి!
81*
నీతి గీతార్థ సారంబు రీతి బోధ
సాగె నిష్కామయోగాది సాధనముల
కాని తీరుకు భక్తియు కలిగి మనుట!
తిరుణహరి సఖ్యభక్తి యాత్మీయ సూక్తి!
82*
సఖ్య భక్తి – భాగవతము వ్యాఖ్యసౌరు-
మంచి బెంచు పౌరాణిక వాంఛితమ్ము!
భిన్న ప్రాణుల నేకాత్మయున్న తీరు!
తిరుణహరి సఖ్యభక్తి యాత్మీయ సూక్తి!
83*
సఖ్య భక్త కుచేలుండు, సామి నెపుడు-
గుండె గుడిలోన నిల్పియు గుట్టుగాను
మైత్రి భావార్చనలు జేసె మరవకుండ!
తిరుణహరి సఖ్యభక్తి యాత్మీయ సూక్తి!
84*
భిన్నమగు వేషబాష విభిన్నగతులు-
భిన్న కులమత-గుడుల వి భిన్నవేల్పు
భిన్నముగ దోచు వాస్తవమెన్న నొకటె!
తిరుణహరి సఖ్యభక్తి యాత్మీయ సూక్తి!
85*
ప్రథమ ధర్మసాధనమగు పరగ తనువు
పిదప నితరసాధనముల ప్రీతిగొనును!
తరలి పోవలె దైవాజ్ఞ ధర్మ రక్ష!
తిరుణహరి సఖ్యభక్తి యాత్మీయ సూక్తి!
86*
తనువు ధర్మసాధనముగా, తగిన రీతి-
ఆత్మ శోధనయే భక్తియాత్ర బ్రతుకు
ధాతగా పుణ్యధనముతో తరలవలయు!
తిరుణహరి సఖ్యభక్తి యాత్మీయ సూక్తి!
87*
మైత్రి బ్రహ్మ, వైష్ణవ, శైవ మధ్వ మొదలు
వివిధ మత గురులేకమై విశ్వమాన-
వతను బోధజేయ సాగిరి-వసుధయందు!
తిరుణహరి సఖ్యభక్తి యాత్మీయ సూక్తి!
88*
ధర్మ సుస్థిరతయె కదా! దైవలీల!
ధర నవతరించి సాగించు ధర్మ రక్ష!
శరణు జొచ్చిన, పరమాత్మ కరుణజూపు!
తిరుణహరి సఖ్యభక్తి యాత్మీయ సూక్తి!
89*
ధర్మ వర్తనమే మెచ్చు దనజవైరి!
కర్మ ఫల సమర్పణజేయ కాంక్షదీర్చు!
తదితరాలకన్నను ఇదే తగిన దీక్ష!
తిరుణహరి సఖ్యభక్తి యాత్మీయ సూక్తి!
90*
సఖ్య భక్తియోగము సాగ, చాల సుళువు!
సమత యోగసాధన జన్మ సార్థకంబు!
భక్తి పారలౌకికమార్గ బ్రహ్మ ముదము!
తిరుణహరి సఖ్యభక్తి యాత్మీయ సూక్తి!
91*
మైత్రియలవోక సాగెడు మాట కాదు
భక్తి పైనపటారంపు బాటగాదు
జీవ శ్రేష్ఠమానవు జూపు దీప్తులివియె!
తిరుణహరి సఖ్యభక్తి యాత్మీయ సూక్తి!
92*
అంతులేనియాపేక్ష చే గంతు లేయ-
ధరణి సామ్రాట్టులకుతృప్తి దక్కలేదు!
ఆశ వీడి సామాన్యుడే యలరు తృప్తి!
తిరుణహరి సఖ్యభక్తి యాత్మీయ సూక్తి!
93*
మంచి మనసున్న నిహలోక మనుజు జన్మ
సార్థకము బొందు-మనసు నిస్వార్థమొప్ప-
పరుల కుపకార గుణరీతి పరువు కీర్తి!
తిరుణహరి సఖ్యభక్తి యాత్మీయ సూక్తి!
94*
మదికి నెమ్మది గలిగిన మైత్రి గలుగు!
అర్థి నవనీత హృదయాన నాప్త మైత్రి!
ప్రాణి హితవెంచి సాగిన ప్రాణ మైత్రి!
తిరుణహరి సఖ్యభక్తి యాత్మీయ సూక్తి!
95*
మనసు బోయిన పోకల మనిషిబోక-
మాటపై నిల్చి, సన్మార్గమందు నడచి
పనుల నుపకారియగుటయే పరువు కీర్తి!
తిరుణహరి సఖ్యభక్తి యాత్మీయ సూక్తి!
96*
వరద కోర్కెలుప్పెన వేయ బురద-శోక
రొచ్చు హెచ్చు భోగములను రోసి మనిషి-
సాగవలె, నిశ్చలమగు సు స్వాంతమొప్ప-
తిరుణహరి సఖ్యభక్తి యాత్మీయ సూక్తి!
97*
మిత్ర రశ్మిమూలమె, చంద్రు మించులెల్ల!
చంద్రికలవెల్గు పుడమిని జెందునట్లు-
మిత్ర మిత్రుండును తనకు మిత్రుడగును!
తిరుణహరి సఖ్యభక్తి యాత్మీయ సూక్తి!
98*
భువి చతుర్విధ పురుషార్థములను మదిని
దలపవలెను, ద్వంద్వాతీత దారి ధర్మ-
యుక్తముగ నర్థ కామముల్, ఉర్వి మేలు!
తిరుణహరి సఖ్యభక్తి యాత్మీయ సూక్తి!
99*
ఉప్పు లేని తిండియు, రసములూర నట్లు-
రుచియు పచిలేని, బ్రతుకులో రోజురోజు
మైత్రి భక్తి లేకను సాగు మార్గమేల?
తిరుణహరి సఖ్యభక్తి యాత్మీయ సూక్తి!
100*
ధర్మయుతమైన పురుషార్థ కర్మసాగు-
ధాత లై నరుల్, భక్తిని దనరు చుండ!
పుడమి నాకలోకము వలె పులకరించు!
తిరుణహరి సఖ్యభక్తి యాత్మీయ సూక్తి!
101*
బ్రతుకు నాపేక్ష – సాపేక్ష గతుల విషయ-
వాసన గల్గు, గత జన్మ వాంఛలవియె!
విషయ వాసన దొలగించు విష్ణు గీత!
తిరుణహరి సఖ్యభక్తి యాత్మీయ సూక్తి!
102*
ఆత్మ,బుద్ధి,వివేకంబు ననుసరించి-
మనసు నిశ్చలతయు గల్గు మాయదొలగు!
ప్రజ్వరిల్లునాత్మయు, తనువు ప్రమిదయందె!
తిరుణహరి సఖ్యభక్తి యాత్మీయ సూక్తి!
103*
భక్తిచే మైత్రి శుద్ధియు-శక్తి గలుగు
మైత్రి భక్తిసాగిన దైవమాత్మ నిలుచు!
ఆత్మ పరమాత్మ బంధంబునలరు ముక్తి!
తిరుణహరి సఖ్యభక్తి యాత్మీయ సూక్తి!
104*
భక్తి పాదపమే కదా! భారతంబు!
భాగవత వృక్ష బీజముల్, భక్తి పరులు-
మఱ్ఱి విత్తనమే బ్రహ్మ మహిమ సృష్టి!
తిరుణహరి సఖ్యభక్తి యాత్మీయ సూక్తి!
105*
అంతరాత్మ సాక్షాత్కారమైన చిత్త-
నేత్రమును విప్పి చూడగా నిత్య సత్య-
విశ్వ రూపంబు-గీతోక్తి విశ్వసించు!
తిరుణహరి సఖ్యభక్తి యాత్మీయ సూక్తి!
106*
నరుల గలుపు మైత్రియు, భక్తి-నాత్మలెల్ల
నేకమను భావబంధంబు నేర్పడంగ-
సూక్ష్మమై, స్థూలమై దోచు సూత్రధారి!
తిరుణహరి సఖ్యభక్తి యాత్మీయ సూక్తి!
107*
జన్మ తరియింపగా భక్తి సాధనంబు!
బ్రతుకు సాగింపగా మైత్రి బాట మేలు!
విశ్వ జీవన సుఖశాంతి విస్తరించు!
తిరుణహరి సఖ్యభక్తి యాత్మీయ సూక్తి!
108*
శుభము భక్తిసాహితి మిత్ర, శ్రోతలకును
శుభము శతక పాఠకులకు శుభము! శుభము!
శుభము అభిమానులకునెల్ల సుఖము, శాంతి!
తిరుణహరి సఖ్యభక్తి యాత్మీయ సూక్తి!