శ్రీ షిరిడి సాయీశ నీరాజన శతకము
(తే.గీ.)
1*
శ్రీ షిరిడివాస! నిఖిలేశ! చిద్విలాస!
సకల ధర్మ సమన్వయ సద్విచార!
విశ్వ శాంతిప్రబోధక విబుధ వినుత!
రామ సాయీశ నీకు నీరాజనాలు!
2*
సత్య వాక్పరిపాలన చక్రవర్తి!
సామ్య ధర్మ ప్రచారక! సమతయోగి!
నిత్య భజన కీర్తన ప్రియ నిర్మలాంగ!
రామ సాయీశ నీకు నీరాజనాలు!
3*
అవని మానవ రూపావతార మూర్తి!
మానవాదర్శ జీవన మార్గ దర్శి!
కామిత ఫలదాయక! మురారి కంబుకంఠ!
రామ సాయీశ నీకు నీరాజనాలు!
4*
జన్మ జంజాటములు మాయ జనిత జగతి
కలిమి లేముల సత్యముల్ కలయె భవిత!
ప్రాప్త మైనంతలోతృప్తి పరమ సుఖము!
రామ సాయీశ నీకు నీరాజనాలు!
5*
కలిమి లేములశాశ్వతం కలుగు తొలగు!
ప్రేమ నిచ్చి పొందిన పుణ్య పెన్నిధెసగు!
దైవ సన్నిధి శరణన్న దక్కు ఫలము!
రామ సాయీశ నీకు నీరాజనాలు!
6*
తరతరాల జీవన కేళి తారుమారు!
పాతకొత్త కలయిక ప్ర పంచ సంత!
పెద్ధవారిమాటలె దారి సద్దిమూట!
రామ సాయీశ నీకు నీరాజనాలు!
7*
పితరుల ననుకరింతురు పిల్లలెల్ల-
పెద్దలై పిల్లలకుదెల్పు పెక్కు నుడులు-
తాత మనుమల ముచ్చటల్ తరతరాల!
రామ సాయీశ నీకు నీరాజనాలు!
8*
తరతరాల చరిత్రలు తరచి చూడ-
కలుగు కావడి కుండలు కలిమి లేమి!
ఆపదల మ్రొక్కు సంపద నాదమరుపు!
రామ సాయీశ నీకు నీరాజనాలు!
9*
లేమి నాటికష్టార్జితం లెక్కతెగదు!
కలిగి యున్న దీరదు మూట గట్టి దాచు!
మనిషి పైశున్యమున సౌఖ్యమనక బ్రతుకు!
రామ సాయీశ నీకు నీరాజనాలు!
10*
ఆకలికి దిండి వేదన కౌషదంబు-
ధ్యానమున మనోవ్యాధులు దరుగు, సైన్సు-
భక్తి దారుల నారోగ్య భాగ్యమొదవు!
రామ సాయీశ నీకు నీరాజనాలు!
11*
విజ్ఞ-మూఢ మానవులుంద్రు విశ్వమందు
ముదము బొందు వాడికె గల్గు ముక్తి పదము
మొదట భక్తి మార్గ ఫలము ముదము- ముక్తి!
రామ సాయీశ నీకు నీరాజనాలు!
12*
తప్పు లెన్నుటే తమపని – తనదు పనుల
ఎదుటి తప్పన్న నొప్పేది లేదటంచు
వాదులాటకు దిగు వారి వరుస వింత!
రామ సాయీశ నీకు నీరాజనాలు!
13*
తప్పు దెల్పి దిద్దిన వారు తగిన గురులు
నొప్పు మార్గ సూచన జేయుటొప్పు నెపుడు
సద్విమర్శ లాభముగూర్చు చదువులందు!
రామ సాయీశ నీకు నీరాజనాలు!
14*
తప్పు,పొరబాటు దోషము తదితరాల-
నేరముగ జూడ చదువులో నేమి ఫలము!
ఏమి సాధింత్రు సోమరి గాములగుచు!
రామ సాయీశ నీకు నీరాజనాలు!
15*
తప్పుహేళన జేయరు గొప్పవారు
దెప్పుటేతప్ప తమయొప్పు జెప్పలేని
అథమ దృష్టికానదు తత్వ మార్మికంబు!
రామ సాయీశ నీకు నీరాజనాలు!
16*
బాష వయ్యాకరణ చంద భావ గరిమ
కవన శ్రమ జేయు కృతి యందె కవులకీర్తి!
వట్టి చేతల గలుగునే గట్టిమేలు!
రామ సాయీశ నీకు నీరాజనాలు!
17*
ఊర్థ్వ దృష్టిప్రధానము నుత్తములకు!
అథమ దృష్టి యహంకారి విధము జగతి
నుభయులకు సమదృష్టియే శుభకరంబు!
రామ సాయీశ నీకు నీరాజనాలు!
18*
పుడమి నూహవస్తువు రూప గడన ధనము
పెరిగి విరుగును భూధనం పెరుగబోదు!
పట్టుకొనిపోరు మట్టిని గిట్టువారు!
రామ సాయీశ నీకు నీరాజనాలు!
19*
పుట్టి గిట్టు వారలు తలల్ గొట్టుకొనుచు
ఏమి గొంపోరు మహరాజులెచటగలరు?
కాల వస్తు ప్రదర్శన శాల సాక్షి!
రామ సాయీశ నీకు నీరాజనాలు!
20*
ఏమి గొనిపోయె సామ్రాట్టులేరి భువిని-
వారి పేరైన నిలిచెనే వసుధ – చరిత
మంచి చెడు సాగు పలుజన్మ మార్గములను!
రామ సాయీశ నీకు నీరాజనాలు!
21*
అనుభవింపక దప్పని – అవని కర్మ-
కాల తీర్పు ననుసరించు కడకు జేర్చు!
కీర్తి యపకీర్తి చారిత్ర స్ఫూర్తి మెఱయ!
రామ సాయీశ నీకు నీరాజనాలు!
22*
కర్మయోగి పరంతప ధర్మమైన-
హింస వద్దన్న బుద్ధ ప్రశంసయైన-
కాలమొకతీరు గడపెడు కర్మ దశలె!
రామ సాయీశ నీకు నీరాజనాలు!
23*
ధర్మ మిరుసుగా కాలంబు కదలు – చక్ర
గతిని కర్మ ఫలంబును గలుగు – దాని
దైవమునకు నర్పింప గీతార్థ బోధ!
రామ సాయీశ నీకు నీరాజనాలు!
24*
ధ్యానమున కర్మ దగ్ధమౌ దారి భక్తి
దిన దిన దహనమగునదే దేహ మనగ-
దైవ భాగమాత్మయు శాశ్వతముగ మిగులు!
రామ సాయీశ నీకు నీరాజనాలు!
25*
యోగములు చేత గాకున్న భోగి గాక
భక్తి శరణాగతిని వేడు చందమందు
కర్మ ఫలసమర్పణ పుణ్య కలిమి గూర్చు!
రామ సాయీశ నీకు నీరాజనాలు!
26*
నరుని బ్రతుకెల్ల కృష్ణార్పణంబు గాగ
భక్తి పూజాధికములన్ని బలమొసంగు!
కర్మ ఫలసమర్పణ ముక్తి గలుగు చుండు!
రామ సాయీశ నీకు నీరాజనాలు!
27*
ఒకరి మంచి మరొకరికి నొనర చెడుగు!
నేటి మంచి రేపటిచెడు నెంచు విధము-
భావ ప్రాధాన్య మదివేరు బ్రతుకు విధుల!
రామ సాయీశ నీకు నీరాజనాలు!
28*
ధర్మ మార్గాన దైవంబు దనరు చుండు
దైవమును దల్పకున్నను ధరణియందు-
మళ్ళి మొదటికి వచ్చేది మనిషి జన్మ!
రామ సాయీశ నీకు నీరాజనాలు!
29*
ధర జయాపజయములెల్ల దైవవశమె!
కట్టుబాటున మది నిల్ప గలుగు దాక
ఆత్మ పరమాత్మ దాగుడుమూతలాట!
రామ సాయీశ నీకు నీరాజనాలు!
30*
కూడు గూడు గుడ్డలకేళి కూర్మి పేర్మి
గూడి విడిపోవు నాత్మ వైకుంఠపాళి!
పాపమే మిక్కుటముగాగ పాము మ్రింగు!
రామ సాయీశ నీకు నీరాజనాలు!
31*
బ్రతుకు పరతంత్రమున సాగు భక్తి లేదు
భక్తి లేకముక్తియు లేదు పాపపుణ్య-
గతుల సమకూర్చు కార్యముల్ గలవుపెక్కు!
రామ సాయీశ నీకు నీరాజనాలు!
32*
యౌవనము బాలలకువింత యౌవనులకు
ముసలి తనమన్న మాటయే ముసుగు బొంత!
వృద్ధులకు బాల్య యౌవన పద్దు సమము!
రామ సాయీశ నీకు నీరాజనాలు!
33*
జన్మ బొక్కెన పున్నెంపు జలము దోడు-
గాక దురిత బురద దోడు – కలుగు ఫలము-
స్వర్గ నరకాలనెడు కాల చక్ర గతులు!
రామ సాయీశ నీకు నీరాజనాలు!
34*
కల్మి లేముల జీవితం కదలు చిత్ర
దశలలో పాత్ర ధారులే ధరణి నరులు!
శాశ్వతముగాదు జీవాత్మ శాశ్వతంబు!
రామ సాయీశ నీకు నీరాజనాలు!
35*
కష్ట సుఖములు జీవిత కలశ నిధులు
వెల్గు కర్పూర హారతి వింత బ్రతుకు!
శాశ్వతముగాని దానికై చావు భయము!
రామ సాయీశ నీకు నీరాజనాలు!
36*
దేహ దేవాలయము నాత్మ దేవునాంశ!
యోగులాత్మ బోల్తురు దైవ భాగమట్లు!
ఆత్మ పరమాత్మ వృత్తాలు నమరియుండు!
రామ సాయీశ నీకు నీరాజనాలు!
37*
దేహ గుడిప్రవేశింప దెలియునాత్మ-
ఆత్మ గుడిలోన పరమాత్మ నరయ వలయు!
దైవ దర్శనార్థము భక్తి దారి వెలసె!
రామ సాయీశ నీకు నీరాజనాలు!
38*
ఆత్మ పరమాత్మలద్వైత మందు నొకటె
ద్వైతమున వేరు వైశిష్ట్య దారి నొకటె!
ఆత్మ వృత్తాన పరమాత్మ నలరు విధము!
రామ సాయీశ నీకు నీరాజనాలు!
39*
తనువు లోనికి వీక్షించు తపనమేలు
అంతరాంతర శోధనల్ ఆత్మ తత్వ-
మెఱుక గాబోధ – నరజన్మ మేలు గూర్చు!
రామ సాయీశ నీకు నీరాజనాలు!
40*
దైవ బలము తోడగు భక్తి దనరు కొలది!
లక్ష్యమును మర్చి పోకుండ లభ్ధి కొఱకు-
సాధనలు యోగముల పేర సాగుచుండు!
రామ సాయీశ నీకు నీరాజనాలు!
41*
భక్తి యోగమే సుళువైన బాటగాగ
మనిషియాత్మ సాక్షాత్కారమంద వలయు!
అందు పరమాత్మ వెలుగొందు చందముండు!
రామ సాయీశ నీకు నీరాజనాలు!
42*
అంతరాంతరములనాత్మ వింతయునికి
మనసు మేధలకందని మర్మమిదియె!
జీవి జీవిలో పరమాత్మ దివ్య దీప్తి!
రామ సాయీశ నీకు నీరాజనాలు!
43*
బంధములు తొల్గుట విముక్తి – భక్తి బాట
నాత్మ పరమాత్మ లీనమౌ ననుట ముక్తి!
బ్రహ్మ ముదము జీవన్ముక్తి బాట సాగు!
రామ సాయీశ నీకు నీరాజనాలు!
44*
మనిషియాత్మ సాక్షాత్కారమందకున్న-
నూత్న విజ్ఞాన శాస్త్రమునుత్తదగును!
సైన్సు నాధ్యాత్మికము గల్సి సాగమేలు!
రామ సాయీశ నీకు నీరాజనాలు!
45*
కలిమి లేమిజన్మలమాట కడకునుంచి
సైన్సునిత్యావసరమందె సద్దు మణుగు
జీవికాధ్యాత్మికము సమదీవెనొసగు!
రామ సాయీశ నీకు నీరాజనాలు!
46*
సకల మార్గాలు ముక్తికి సాధనములు
విశ్వ – వివిధ ప్రయోగాలు విస్తరించె-
శోధనాధ్యాత్మికము సాగె బోధలందు!
రామ సాయీశ నీకు నీరాజనాలు!
47*
దైవ భాగమాత్మగ సాగు తనువు మనసు
తాను గాదన్న వాస్తవ తత్వమాత్మ-
దృష్టి బలపడు సాధన నిష్ఠ వెలయు!
రామ సాయీశ నీకు నీరాజనాలు!
48*
భక్తి నవమార్గముల ముక్తి పథము సాగు!
పుడమి జన్మరాహిత్యమే పూర్ణ ముక్తి!
బ్రహ్మమోదంబు నానంద బ్రహ్మమంద్రు!
రామ సాయీశ నీకు నీరాజనాలు!
49*
చిన్న మెదడు గంధపుసైన్సు చిహ్నమైన
భౌతిక సుఖతోషమగు మతి బాటవేరు!
టక్కు టిక్కులకాత్మయు చిక్కదెపుడు!
రామ సాయీశ నీకు నీరాజనాలు!
50*
తగిన పరిసరాలను బట్టి తనువు బెరిగి
సిరుల లభ్ది సీతాకోక చిలుకలట్లు
రంగు పొంగు పల్కులసాగు రక్తిబాట!
రామ సాయీశ నీకు నీరాజనాలు!
51*
తనువు వైజ్ఞానికపు శుద్ధి – తాత్వికముగ
జ్ఞానమున చిత్తశుద్ధియు ధ్యాన గరిమ
నాత్మ సిద్ధియు పరమాత్మ నరయు బుద్ధి!
రామ సాయీశ నీకు నీరాజనాలు!
52*
ఎంత సాదించె నున్నదింకెంత సైన్సు-
నింక తోడుకోగను కొత్త నిధియదేమి?
సైన్సుకందని నిధులెన్నొ సాగు సృష్టి!
రామ సాయీశ నీకు నీరాజనాలు!
53*
సైన్సు నింగితజ్ఞానమై సత్యమెఱుగ
లభ్ది గలుగు నాధ్యాత్మిక లక్ష్య సిద్ధి-
చిక్కు ప్రశ్నల కాత్మయు జిక్కుపడదు!
రామ సాయీశ నీకు నీరాజనాలు!
54*
తనువు బోధన సమిష్టిగా తరచు సైన్సు-
వ్యక్తి గతముగా చిత్తము వ్యక్త పరచు!
చిత్త చాపల్యముననాత్మ చిక్క బోదు!
రామ సాయీశ నీకు నీరాజనాలు!
55*
అన్ని మరచి తానొక్కడే యున్నయట్లు-
తపముజేయ మనోయాన దారినాత్మ-
వృత్తమందున పరమాత్మ చిత్తగింపు!
రామ సాయీశ నీకు నీరాజనాలు!
56*
అట్టహాసాన గనలేనిదాత్మ రూపు-
దైవ దర్శనం బహిరంగదారి వృధయె!
స్వానుభవ సాధ్యమీక్రియల్ సాధువులకు!
రామ సాయీశ నీకు నీరాజనాలు!
57*
మనసు భక్తిమట్టుకు గట్టి మాయజీల్చి
నిర్వికల్ప స్థితిని మది నిల్పి గాంచ-
సైన్సు లబ్ధప్రయోజన సరణి సాగు!
రామ సాయీశ నీకు నీరాజనాలు!
58*
సాగు నాధ్యాత్మకాంశ ప్రయోగశాల
దేహమాత్మకు తొడుగు గా దేల్చు కొఱకు-
గీత బోధించె సద్యోగ క్రియలు దెలిపె!
రామ సాయీశ నీకు నీరాజనాలు!
59*
గురులు నూరేండ్ల క్రిందటే గురి కదిర్చి-
సైన్సు నాధ్యాత్మికము గల్పి సాగుమనిరి!
దేశ దేశాలకును కీర్తి తేజులైరి!
రామ సాయీశ నీకు నీరాజనాలు!
60*
దేహతత్వాన్ని కనుగొని దేవు నరసి-
అంతరంగ ప్రవేశమై యాత్మ రూప-
మనెడు దైవ భాగము గాంచి మనుట మేలు!
రామ సాయీశ నీకు నీరాజనాలు!
61*
మానసిక దేహ రుజమాన్పు మనుగడొసగు
కొంగు బంగారమై భక్తి కోర్కెదీర్చు!
దయయు దాక్షిణ్యమున జన్మ ధన్యమగును!
రామ సాయీశ నీకు నీరాజనాలు!
62*
సేవ సమయపాలన భక్తి భావగరిమ-
శుచియు శుభ్రతలను చిత్త శుద్ధి సుఖము
శాంతి జీవనమెల్ల కాంతి మయము!
రామ సాయీశ నీకు నీరాజనాలు!
63*
మానసిక శరీర శ్రమ మార్గములను
సిరుల నార్జించి సద్భక్తి పరుల గలిసి
బరువు బాధ్యత లనుమోసి బ్రతుకు చుంద్రు!
రామ సాయీశ నీకు నీరాజనాలు!
64*
నిద్ర తిండి రక్షణ తోడు నీడ-దైవ
నిర్ణయానుసారము భక్తి నియమ నిష్ఠ
మానవత-నీతి ధర్మము మనుగడంత!
రామ సాయీశ నీకు నీరాజనాలు!
65*
అన్నియున్న నేదోలోపమదె సమస్య-
ఎందరున్నను వెదికేది ఎవరి కొఱకు?
అతడు పరమాత్మయని యంతరాత్మ మ్రోగు!
రామ సాయీశ నీకు నీరాజనాలు!
66*
ఉన్న లేనట్లే లేకున్న నున్న యట్లె-
దోచు వాదవివాదాల తో పనేమి?
అంతరాత్మ ఘోషించగా పంతమేల!
రామ సాయీశ నీకు నీరాజనాలు!
67*
బ్రతుకు తృప్తి-శాంతి సుఖము బాట భక్తి
పూర్ణ విశ్వాస భరితమై పున్నె గరిమ!
పడవ సాగించు ముక్తికి బ్రహ్మ ముదము!
రామ సాయీశ నీకు నీరాజనాలు!
68*
తనకువలె నందరిని జూచు తత్వబోధ
తగినయూరట గలిగించు తమరి చరిత!
ఉన్న లేకున్న బ్రతికించు నున్నతముగ!
రామ సాయీశ నీకు నీరాజనాలు!
69*
ధనము రాజుపేదల మార్చు ధరణి భక్తి
పాపి పుణ్యాత్మునిగజేసి పరమ పదము
జేర్చి జన్మరాహిత్యమున్ జేయు నికష!
రామ సాయీశ నీకు నీరాజనాలు!
70*
ఊహ చిత్రనిర్మాణ సమూహ జగతి
రూపమునుదాల్చు వస్తునిరూపణముగ
నాటి ఊహలే వస్తువుల్ నేటి ప్రగతి!
రామ సాయీశ నీకు నీరాజనాలు!
71*
వరుస వాదవివాదాలు వసుధ సాగు
వాని జోలి పట్టని భక్తి వలసినంత
ప్రేమశక్తిని పూరించి ప్రేరణొసగు!
రామ సాయీశ నీకు నీరాజనాలు!
72*
సకల శక్తుల ప్రేమయే సాగు చుండు
ముక్తి గోరువారంత ముముక్షువులుగ-
భక్తి నావలో పయనింప పరమ పదము!
రామ సాయీశ నీకు నీరాజనాలు!
73*
భోగి కిహసుఖమాసక్తి యోగియైన
పరమునందు సుఖించగా వరము గోరు
భక్తి యోగాన సుళువైన ప్రాప్తులివియు!
రామ సాయీశ నీకు నీరాజనాలు!
74*
నిత్య పారాయణము సాగె నీదు చరిత-
గ్రంధ నిధిగాగ దక్కెను కథల కూర్పు-
జన్మ ధన్యమొనర్చగా జగతి కాన్క!
రామ సాయీశ నీకు నీరాజనాలు!
75*
భక్తి బీజ సంక్షిప్తమై భావజములు
నియమ నిష్ఠల పఠియింప నిచ్చు ఫలము!
ధ్యాన గంభీరమై విస్త్రుతార్థమొసగు!
రామ సాయీశ నీకు నీరాజనాలు!
76*
పద్య చందంబు వాడుక బాష భావ
రచనలచ్చు తప్పులు దిద్దరాని గురులు
తప్పు బట్టగ వచ్చేరు తరుము కుంట!
రామ సాయీశ నీకు నీరాజనాలు!
77*
తాత వాడుక బాషయు ప్రాత కృతులు
పండితులు పామరులు మెచ్చు పల్లె పదము
భక్తి తత్వార్థ సంపదల్ వాసికెక్కె!
రామ సాయీశ నీకు నీరాజనాలు!
78*
భక్తి శతక సమర్పణ బాట లందు
నోర్పుతో కువిమర్శల నొచ్చుకొనక-
చెప్పితేబది శతకముల్ సేవ-భక్తి!
రామ సాయీశ నీకు నీరాజనాలు!
79*
చెఱుకు వంకరయైనను చెడదు తీపి
బాష గట్టిది గాకున్న భక్తి పరులు-
ఉందురభిమాన పఠితలు కొందరైన!
రామ సాయీశ నీకు నీరాజనాలు!
80*
భక్తి తోటమాండలికమై బాషమెఱయ-
తేట తెలఁగాణ తత్సమ బాట సాగె-
తరచి పండితావళియు సుతారమనగ!
రామ సాయీశ నీకు నీరాజనాలు!
81*
సర్వ లోక సమర్థుడ సద్గురుండ!
సర్వ దైవస్వరూపుడ! సకలవినుత!
సర్వ ధర్మ సంసేవిత! సంయమీంద్ర!
రామ సాయీశ నీకు నీరాజనాలు!
82*
సర్వ ధర్మ స్వరూపాయ! శాంతి ధాత!
సకల సిద్ధి సంకల్పాయ! సాత్వికాయ!
నాథనాథాయ! దురితవినాశకాయ!
రామ సాయీశ నీకు నీరాజనాలు!
83*
ద్వారకామాయి సదన – చైతన్యలింగ!
విశ్వ ప్రాణశక్తి విధాత విశ్వరూప!
విజ్ఞ మూఢ భక్తులనేలు విశ్వసాక్షి!
రామ సాయీశ నీకు నీరాజనాలు!
84*
పంచ భూతాత్మక పరమ పావనాంగ!
విశ్వ రూప! విరూపాక్ష! విఘ్నరాజ!
శక్తి రూప! దత్తాత్రేయ! సాధు హృదయ!
రామ సాయీశ నీకు నీరాజనాలు!
85*
భక్త జన పరిపాలక! పండరీశ!
మూల శక్తిస్వరూపుడ! ముక్తి ధాత!
రామ నరసింహ! మారుతి స్వామి శరణు!
రామ సాయీశ నీకు నీరాజనాలు!
86*
బాబమార్తాండు గనిన ఖండోబ రూప!
సకల సాధు స్వరూప! సత్సంగ దీప!
తారతమ్య వర్జిత భావ-తత్వవేత్త!
రామ సాయీశ నీకు నీరాజనాలు!
87*
స్వీయ ధర్మవిచక్షణే స్థిమిత మొసగు!
పరుల ధర్మ విమర్శలు భయముగూర్చు
సత్యవ్రత బోధ సాగిన సచ్చరిత్ర!
రామ సాయీశ నీకు నీరాజనాలు!
88*
ధర్మమాత్మ విమర్శతో తళుకులీను!
ఇతర జోక్యమంటని దారి నిమిడి యుండు
స్వీయ ధర్మ వర్తన కమనీయమగును!
రామ సాయీశ నీకు నీరాజనాలు!
89*
భక్త జన భార భృత్తువై భరత జాతి
నేక త్రాటిని నడువగా నేర్పినావు!
గట్టి మేలును గూర్చిన గరళ కంఠ!
రామ సాయీశ నీకు నీరాజనాలు!
90*
సాధు సజ్జన సన్నుత సమత యోగి!
నిండు విశ్వాసమును గూర్చు నీదు చరిత!
నీదు చూపు సోకిన గుండె నిబ్బరంబు!
రామ సాయీశ నీకు నీరాజనాలు!
91*
అద్దె గేయదేహము నాత్మ నలరు-దాని
తానుగా నెర్గు సాధనాధ్యాత్మకంబు!
సాగు నానంద వారాశి శాంతి సుఖము!
రామ సాయీశ నీకు నీరాజనాలు!
92*
సంత చూఢామణి షిరిడి సాగు జాత్ర!
ప్రాకటితము వాస్తవ భక్తి పరుల పాలి
భగవదవతార మూర్తివీ యుగమునందు!
రామ సాయీశ నీకు నీరాజనాలు!
93*
మనసు తనువు నైశ్వర్యము మనుగడంత
అర్పణముగ శరణాగతి నందు గురులు
ఛాత్రులొక్కటే తమతమ పాత్రలందు!
రామ సాయీశ నీకు నీరాజనాలు!
94*
దురిత దు:ఖ హరము షిరిడి దూరభార-
మెంచి సాగు భక్తాళికి మేలు ఘనము!
కామ ధేనువై భక్తుల కాంక్ష లిడుము!
రామ సాయీశ నీకు నీరాజనాలు!
95*
ద్వారకామాయి లో తారతమ్య రహిత-
స్వాగతము భక్తులార్తులై శరణు వేడు-
వారికెల్ల ప్రవేశంబు వరుసగాను!
రామ సాయీశ నీకు నీరాజనాలు!
96*
అవతరింతువు భావించు దైవమగుచు
అప్రమత్తమై సమకూర్చు – అర్థియర్థ-
మార్గ దర్శకుడవు నీ సమాది నుండె!
రామ సాయీశ నీకు నీరాజనాలు!
97*
గతము వర్తమానము భవిత కాలసృష్టి
నేక కాలాన సవరించు నేర్పు తమది!
మాట మన్నన రక్ష సమాది నుండె!
రామ సాయీశ నీకు నీరాజనాలు!
98*
అలరు దేహ ప్రపంచాన నాత్మ భక్తి
పుణ్య మార్జించ దగుజన్మ బుట్టి గిట్టి-
తిరిగి నీలోన లీనమౌ తీర్పు ముక్తి!
రామ సాయీశ నీకు నీరాజనాలు!
99*
విశ్వ మానవ విశ్వాస విధుల ముక్తి
గలుగు కరుణాకటాక్ష వీక్షణము సోక
శత్రు భావన తొలగి సన్మైత్రి వెలయు!
రామ సాయీశ నీకు నీరాజనాలు!
100*
నీ సమాదికి చెవియొగ్గి నిన్ను నడుగు –
ప్రశ్నకు జవాబు నమ్మిన భక్తి కొలది
బుద్ధి మదినాత్మ నిశ్చల సిద్ధి గలుగు!
రామ సాయీశ నీకు నీరాజనాలు!
101*
తేలికైనంత దూరము తెలిసి బ్రతికి
భారమునునీదె యనిభక్తి బాట నడిచి
పెద్ధ బుద్ధిని జూపింప పేరుకీర్తి!
రామ సాయీశ నీకు నీరాజనాలు!
102*
భక్తి గొల్చిన వారిల్లు భద్రమయ్యె!
లేమి మాటరా బోనీదు ప్రేమ శక్తి-
యుక్తముగ సాగి పోగ సాయుజ్య ప్రాప్తి!
రామ సాయీశ నీకు నీరాజనాలు!
103*
ఆలయాన నందరు జేర నాదరించి
వ్యక్తి గతకోర్కె సద్భక్తి వరమొసంగి-
జన్మ తరియింప జేసేవు జాగృతొసగి!
రామ సాయీశ నీకు నీరాజనాలు!
104*
జీవి జీవిని నీవు! నీలోవసించు-
నన్ని జీవులు – సమదృష్టి నున్న మేలు-
గూర్చి నడిపింపజూతువు గుట్టు దెలిపి!
రామ సాయీశ నీకు నీరాజనాలు!
105*
కీర్తి మార్గ దర్శివిల ఫకీరు బాబ-
భావమే తథాస్తుగజేయు భక్త వరద!
చీమనుండి బ్రహ్మము దాక నీమహత్తు!
రామ సాయీశ నీకు నీరాజనాలు!
106*
తెలుగు సత్యనారాయణ తిరుణహరిని-
భక్త పరమాణువుగ శతక పద్య కృతిని-
పొంకముగ జేసితి నీకునంకితముగ!
రామ సాయీశ నీకు నీరాజనాలు!
107*
నీదు పదకొండు సూత్రాల నిష్ఠ యుక్త
భక్తి పాటింప ధర్మము పరిమళించు!
సమత మమత జీవనశాంతి సౌఖ్యమలరు!
రామ సాయీశ నీకు నీరాజనాలు!
108*
శుభము శతకాభిమానికి శుభప్రదంబు!
శుభము భక్తలోకానికి సుఖము శాంతి!
శుభము జాతిసమైక్యత శుభకరంబు!
రామ సాయీశ నీకు నీరాజనాలు!