శ్రీ సాయి హారతి శతకము
(ఆ.వె.)
1*(ప్రారంభము)
శ్రీలు జిందు భావ చిత్రమై నీభక్తి
చిత్తశాంతి గూర్చు – చిత్ర పటము
చూపుజాలు బ్రతుకు శుభ శోభితంబగు!
స్వస్తి హారతి గొను సాయి బాబ!
2*
కమ్మనైనవాక్కు కరుణామృతపు జల్లు
భక్తిభావపూర్ణ బ్రహ్మ ముదము!
ఆత్మదేల్చి చూపు అద్భుతమార్గము!
స్వస్తి హారతి గొను సాయి బాబ!
3*
మనసు మాట క్రియల మంచియనెడు
పుణ్య కర్మ ధర్మ సూత్ర మర్మబోధ-
సాగు సభలు నీదు సంస్థాన సేవలు!
స్వస్తి హారతి గొను సాయి బాబ!
4*
ధన్య దర్శనంబు ద్వారకామాయిని
నింబవృక్షమూల నిండు దీప్తి-
దీనజనుల దివ్య దీపకాంతివి నీవు!
స్వస్తి హారతి గొను సాయి బాబ!
5*
ఆర్త జనుల పాలి ఆత్మ బాంధవ! జన్మ
సార్థకముగ సేవ సాగు జనుల-
భక్తి నియమ నిష్ఠ భద్రత సమకూర్చు!
స్వస్తి హారతి గొను సాయి బాబ!
6*
సకలమిచ్చు భక్తి సామ్రాజ్య నేతవు
దీనజనుల కామధేనువీవు!
నయజయంబు గూర్చి నడిపించు ముందుకు!
స్వస్తి హారతి గొను సాయి బాబ!
7*
నాణ్యమైన బుద్ది నడవడి దీపించ-
నీతి బోధ భూతహితవుగాగ-
వర్తమాన భక్తి వర్తన సరిదిద్ధు!
స్వస్తి హారతి గొను సాయి బాబ!
8*
రాజు పేదయైన రాగి బైరాగైన-
నవ్వగలుగు బ్రతుకె దివ్యమగును!
బహ్మ ముదముగలుగు భక్తిని సాగించు!
స్వస్తి హారతి గొను సాయి బాబ!
9*
జిమ్మెదారి వగుచు జీవకారుణ్యపు-
దారిసాగి ధర్మ ధాతవగుచు!
అణచినావు నాటి ఆకలిమంటలన్
స్వస్తి హారతి గొను సాయి బాబ!
10*
శక్తులన్ని ప్రేమ శక్తిరూపముదాల్చె
ద్వారకమయి యయ్యె దైవకొలువు!
వెంట నడిచి బ్రోచు వేల్పులవేల్పువు
స్వస్తి హారతి గొను సాయి బాబ!
11*
యోగియైన యుద్ధ యోధుడైనను భక్తి
నేకపంక్తి నిలుచు లోక జనుడె
కొరు శాంతి సుఖము చేరు ముక్తిపదము!
స్వస్తి హారతిగొను సాయిబాబ!
12*
భక్తిమార్గమందు పండిత పామరుల్
సంయమనము గలిగి సాగమేలు!
సాగకున్న భక్తి సగపాలు వృధయౌను!
స్వస్తి హారతిగొను సాయిబాబ!
13*
భక్తి గుడిసె వాసి భవననివాసియు
దైవభిక్షగోరు దాసులనగ-
డంబమణగ నాత్మ బింబంబు దోచును!
స్వస్తి హారతిగొను సాయిబాబ!
14*
దీన రక్ష నీదు దీక్షగా కొనసాగె!
బ్రహ్మవైన భక్తి బాటసారి!
భిక్షమెత్తి జీవరక్ష చేపట్టేవు!
స్వస్తి హారతి గొను సాయి బాబ!
15*
మహిమ జూపి చెడును మరలించు సన్మార్గ-
గమనుజేసి బ్రోచు కర్మయోగి!
భూతహితవె నోము పూజగా సల్పేవు!
స్వస్తి హారతి గొను సాయి బాబ!
16*
సంఘ రుజలు మాన్పు సంస్కరణాత్మక-
భక్తి విధుల నొక్కబాట నడిపి-
భువిపరోపకార పుణ్యకోశము నింపు!
స్వస్తి హారతి గొను సాయి బాబ!
17*
గీతపరిధిలోనె కీర్తిధనార్జన
ధనము దానమనకె ధన్యజన్ము
నియమ నిష్ఠ భక్తి నీతి లక్ష్మణరేఖ?
స్వస్తి హారతి గొను సాయి బాబ!
18*
స్వాస్థ్య విధుల సాగు సంజీవరాయుడ!
చిత్త భక్తి మాయ జీల్చు కత్తి-
ధారగాగ గీత తాత్పర్యమందించు!
స్వస్తి హారతి గొను సాయి బాబ!
19*
భరత సిరులు పరుల పాలైన వేళలో
జాతినైక్యభావ జాగృతముగ-
పుట్టి బోధగురులు గట్టిమేల్జేసిరి!
స్వస్తి హారతి గొను సాయి బాబ!
20*
ధరణి వీరబ్రహ్మ దాసకబీరులు
నీదు భావజములు నివ్వటిలగ
భక్తిబాటవేయ-బాబాజి తోడ్పడె
స్వస్తి హారతి గొను సాయి బాబ!
21*
ధరణి సద్గురుడవు-దైవస్వరూపుడ-
సత్యవచన! దివ్య సంయమీంద్ర!
జీవసిరులు షిరిడి దివ్యమై దీపించె!
స్వస్తి హారతి గొను సాయి బాబ!
22*
ధర్మవిధుల మార్గ దర్శకా! ద్వారకా
మాయినాథ! శరణు మాన్య చరిత!
నీదునాజ్ఞ ప్రకృతి నిర్వాకముల్ సాగె!
స్వస్తి హారతి గొను సాయి బాబ!
23*
చింత మరచి భక్తి చింతనామృతపాన-
మత్తచిత్తులైరి-మర్మమెఱిగి-
పుణ్యవిత్త సిరుల పూరింప సాగిరి!
స్వస్తి హారతి గొను సాయి బాబ!
24*
కర్మ ఫలద! పాప కర్మ దగ్ధము జేసి
యిష్టదైవరూపు నెత్తి వచ్చి-
భక్త జనుల బ్రోచు బ్రహ్మచారివి నీవు!
స్వస్తి హారతి గొను సాయి బాబ!
25*
భక్త వరద! నహము బాపగా నిరతంబు-
ధునిని గాల్చు దేవ దురితదూర!
దానవతను వంచి మానవతను పెంచు!
స్వస్తి హారతి గొను సాయి బాబ!
26*
కార్య క్రమము నిత్య కైంకర్యములు సాగె
నాడు నేడు నీదు నామ మహిమ!
మెప్పు భజన సాగె ముప్పూట హారతి!
స్వస్తి హారతి గొను సాయి బాబ!
27*
భక్తిగరిమ వెంట భారతీయ సమైక్య-
భావదీప్తి కీర్తి బాహుటెత్తె!
నాడు నేడు భవిత నాణ్యమౌ యోచనల్
స్వస్తి హారతి గొను సాయి బాబ!
28*
పుణ్య ఫలమె బ్రతుకు పూర్ణత్వమును గూర్చు-
పూజ ఫలము వెంట పుణ్యమొప్పు-
పుణ్యపూర్వకముగ పుడమి మానవజన్మ!
స్వస్తి హారతి గొను సాయి బాబ!
29*
కష్ట సుఖములందు కాన్కలివ్వగ మ్రొక్కి-
ముడుపు గట్టి మ్రొక్కి ముట్టజెప్పి-
మాటనిల్పుకొన్న మదితృప్తి కరమగు!
స్వస్తి హారతి గొను సాయి బాబ!
30*
వివిధ దేశ శాంతి విశ్వరూపమె కదా
విశ్వశాంతి యనగ-విస్తరించు
బుద్ధి జీవి మనిషి భూరిబాధ్యత మ్రోయు!
స్వస్తి హారతి గొను సాయి బాబ!
31*
స్త్రోత్రపాఠముగను సూక్తిముక్తావళి
నీతి ధర్మ బాట నిల్పు శక్తి
విశ్వశాంతి పూర్ణ విశ్వాసమందించు!
స్వస్తి హారతి గొను సాయి బాబ!
32*
నీదు వాక్కువెడలు నినదించు భక్తుల-
సూక్తి నిధులు విషయ సూచి జేరు-
గ్రంధపుటల పఠన కలిమాయదొలగించు!
స్వస్తి హారతి గొను సాయి బాబ!
33*
ఆపదలను మ్రొక్కి సంపద మరుపుల
సంసృతిబడి యీదు జనులు భక్తి-
తీరుబడిగ పరుగుదీయుచు దర్శింత్రు!
స్వస్తి హారతి గొను సాయి బాబ!
34*
సజ్జనాళివెంట సద్భావనాయాత్ర
షిరిడి జేర భక్తి సిరుల పంట!
మనిషమనిషి గలుపు మంచి పుణ్యము వెంట!
స్వస్తి హారతి గొను సాయి బాబ!
35*
స్వేచ్ఛ భక్తి బాట సేవింప సంతృప్తి
కోర్కె దీర నిన్ను గొలిచి మ్రొక్కి-
సంతసింప యాత్ర సంతబేరముసాగు!
స్వస్తి హారతి గొను సాయి బాబ!
36*
ధరణి మానవత్వ దైవత్వముల మధ్య-
వారధిగను సాగు భక్తి గలుగ
మానవాళి సేవ మాధవ సేవయే!
స్వస్తి హారతి గొను సాయి బాబ!
37*
బ్రహ్మ ముదమె నీదు భక్తిమార్గఫలము
దుష్టచింతనంబు దూరమగును!
శాంతి సుఖము-బ్రతుకు సంతృప్తి నొసగును!
స్వస్తి హారతి గొను సాయి బాబ!
38*
పిలుచు పేర బదులు పల్కుదైవము నీవు
తలచు రూపురేఖ దర్శనంబు!
గతపు యాది వెక్తిగతమైన విన్నపం
స్వస్తి హారతి గొను సాయి బాబ!
39*
దరణి దానవతయు దైవత్వముల మధ్య-
మానవతయు సాగు మనిషి యిచ్ఛ-
ఎంచు కొన్న ధరిని పంచుకొన్న ఫలంబు!
స్వస్తి హారతి గొను సాయి బాబ!
40*
ధర్మ నిలయమైన దైవంబు నీవుగా
చేవజేయువారి చేవ నీవె!
సేదదీర్ప దరికి చేదుకొందువు నీవె!
స్వస్తి హారతి గొను సాయి బాబ!
41*
సకల జీవసేవ సామిసేవగ దల్చి
సాగువారు కలిని సాగుటెల్ల-
నేలవిడిచీ సాము నేర్పున జేయుటే
స్వస్తి హారతి గొను సాయి బాబ!
42*
నిష్ఠజేయుతపము నిర్గుణోపాసన-
సాగు పూజవిధుల సగుణ భక్తి-
నాత్మతత్వమరయ నానంద బ్రహ్మమే.
స్వస్తి హారతి గొను సాయి బాబ!
43*
ధార్మిక సభసాగు దారక మాయిని
వ్యక్తపరచు నట్టి వ్యక్తి శాంతి-
విశ్వ రూపగతిని విశ్వశాంతిగ చర్ఛ!
స్వస్తి హారతి గొను సాయి బాబ!
44*
సంకటములకిక్క సంసారజీవనం
సంద్రసమమె ధైర్య సాహసముల
నీదవలయు భక్తి నిష్ఠ చేయూతగా
స్వస్తి హారతి గొను సాయి బాబ!
45*
కీర్తి ధనము నిచ్చు గీతోక్తి నిస్వార్థ-
గుణముగల్గె నేని గుణకమగును-
పుణ్య ధనము-మోక్ష పూర్వకసాధనం
స్వస్తి హారతి గొను సాయి బాబ!
46*
నీతి ధర్మయుక్త గీతోక్తి నీబోధ-
విశ్వరూపమెత్తె-విధుల సాగి-
విస్తరించె జనుల విశ్వాస పాత్రమై!
స్వస్తి హారతి గొను సాయి బాబ!
47*
ప్రకృతిమాత భక్తి పర్యావరణ రక్ష
జీవ రక్షణ సమ జీవనముగ-
చేయు పూజ సుకృత చేతనత్వము నిచ్చు!
స్వస్తి హారతి గొను సాయి బాబ!
48*
అడవి పచ్చదనము నందించు సకలార్థ-
సాధకముగ ప్రగతి సాగుబాటు-
పరగ శుభ్రమైన పర్యావరణ రక్ష!
స్వస్తి హారతి గొను సాయి బాబ!
49*
శుద్ధి వెంట చిత్త శుద్ధియు శివపూజ-
ధాతకీర్తి గనిరి తాతలంత-
ప్రకృతి గొలిచి మనిరి పావనమూర్తులై
స్వస్తి హారతి గొను సాయి బాబ!
50*
భువిపరోపకారి పూర్ణ పుణ్యాత్ముని-
పలకరించు ప్రకృతి పులకరించు!
నింగిగురిసి పుడమి నిండుపాడియు పంట!
స్వస్తి హారతి గొను సాయి బాబ!
51*
పాపిగోరు సతత పరపీడనము భువి-
క్షణిక సుఖము ధర్మ కక్ష్య దాటి-
మరల మరల బుట్టి మడియు మానవవిధి!
స్వస్తి హారతి గొను సాయి బాబ!
52*
త్రికరణాల శుద్ధి తెల్సితెల్పగనేమి?
ఆచరించకున్న నయమదేమి?
ఆచరణల శుద్ధి ఆచార్య సత్కృప!
స్వస్తి హారతి గొను సాయి బాబ!
53*
నీదు భక్తి నియమ నిష్ఠలాచరనీయ-
విధులగూర్చు మేలు విస్తృతముగ-
జనులుధన్యులగుచు జన్మ తరింతురు!
స్వస్తి హారతి గొను సాయి బాబ!
54*
మనసునిల్ప నాత్మ మర్మంబు దెలియును
ఆత్మ నిశ్చలమున- బ్రహ్మముదము!
భ్రాంతిదొలగి బ్రతుకు శాంతి దాయకమగు!
స్వస్తి హారతి గొను సాయి బాబ!
55*
సుఖము గోరు జీవి సులభ జీవనకాంక్ష
బ్రతుకు కేళిసాగు బాధగలుగ-
గొప్పనష్టమనియు గొల్లెత్తిమొరలిడు!
స్వస్తి హారతి గొను సాయి బాబ!
56*
శాంతిలేక సర్వ సౌక్యంబులును వృధా
నీతిలేక శాంతి నిలుచు నెట్లు!
సులభమైనదారి సూచించు భక్తినే
స్వస్తి హారతి గొను సాయి బాబ!
57*
మొలకలెత్తు శాంతి మెలకువ నీబోధ
చెలగు రుజకు మందు చేదు గుళిక-
రోజుతీపి దిన్న రుగ్మత గలుగదా
స్వస్తి హారతి గొను సాయి బాబ!
58*
మనసు శుద్ధి నీతి మార్గాన నలవడు
నీతియౌషద మవినీతి రుజకు!
కర్మలందు మంచి గాంచ సార్థక జన్మ!
స్వస్తి హారతి గొను సాయి బాబ!
59*
కలుగు ధర్మయుక్త కామార్థ మోక్షముల్
ధర్మ రహితమైన దండగేను!
పుణ్యమనక నాల్గు పురుషార్థములువృధా
స్వస్తి హారతి గొను సాయి బాబ!
60*
స్వార్థ రహిత కర్మ సత్ఫలదాయకం
తేగ మగును- గీత – త్రిప్పి చదువ!
జన్మ రహిత ముక్తి జెందు పుణ్యాత్మకే!
స్వస్తి హారతి గొను సాయి బాబ!
61*
ఆప్తిజెందకుండ అతినివర్జించియు
ప్రాప్త లేశమునకు తృప్తినొందు-
విధము నీదు భక్తి విధులందు దీపించు!
స్వస్తి హారతి గొను సాయి బాబ!
62*
దోష రహిత దృష్టి దోవ మైత్రికి పుష్టి-
మైత్రి భక్తి నొక్కమార్గమగును!
సఖ్య భక్తిపరులు సాయుజ్యమందిరీ!
స్వస్తి హారతి గొను సాయి బాబ!
63*
యోగములను భక్తి యోగంబు మేలగు-
విశ్వసింపగ నవ విధములుగను-
భక్తిబాట జూపె భాగవతమునాడె!
స్వస్తి హారతి గొను సాయి బాబ!
64*
సైన్సు విశ్వశాంతి సాగుబాటయె మేలు
భక్తి గలసి శాంతి ప్రదము గాగ-
విజ్ఞ ముగ్ధ గతుల విశ్వాసమైయొప్పు!
స్వస్తి హారతి గొను సాయి బాబ!
65*
సైన్సు నాత్మ తత్వ శాస్త్ర సంయోగము-
విడిగ భయమొసంగు-విధులగలసి-
నుభయ తారకముగ నభయంబు దయసేయు!
స్వస్తి హారతి గొను సాయి బాబ!
66*
ల్యాబు దశను మనసు లాస్యవిజ్ఞానము
అనుభవంబు దెలుపు-ఆత్మదృష్టి
వెలయు భక్తి బాట విజ్ఞాన తోటలో
స్వస్తి హారతి గొను సాయి బాబ!
67*
తమరి బోధలు వసుధైక కుటుంబపు
సూచనలుగ-ముందు చూపు గాగ-
నీదు చరిత శాంతి నిక్షేపమై తోచు!
స్వస్తి హారతి గొను సాయి బాబ!
68*
సత్య వ్రతమె సుగతి సాధన మార్గమై
భూతహితవె సత్య భూమికగును!
కరుణ వితరణాత్మ కకృషినీ షిరిడిలో
స్వస్తి హారతి గొను సాయి బాబ!
69*
నీదు బోధ భరత వేదవిజ్ఞానమే
సంఘజీవనంబు శాంతి మయము-
జేయుదారి భక్తి సేవలు కొనసాగు!
స్వస్తి హారతి గొను సాయి బాబ!
70*
దుష్ట చింతనంబు తుష్టి పుష్టి జెఱచె-
కల్తి వస్తు కలత గలుగు రుజల-
నిలువ రించు భక్తి నీతి నిజాయితీ!
స్వస్తి హారతి గొను సాయి బాబ!
71*
విస్తరించు మఱ్ఱి విత్తనంబును బోలు
షిరిడి మార్గ విధులు! మంచిబెంచు-
కార్యక్రమము జీవ కారుణ్య ముప్పొంగె!
స్వస్తి హారతి గొను సాయి బాబ!
72*
మతము సమ్మతంబు మానవధర్మమే
సద్గురూక్త సరణి సాగె – జన్మ-
శోకహరము భక్త లోకకళ్యాణము!
స్వస్తి హారతి గొను సాయి బాబ!
73*
లౌకికంపు సౌఖ్య లబ్ధి శాంతియుతము-
పారలౌకికముగ పరగముక్తి-
వ్యక్తి గతము గాగ వర్ధిల్లె సద్భక్తి!
స్వస్తి హారతి గొను సాయి బాబ!
74*
ప్రాకటముగ సాగె పరమత సహనంబు-
ధర్మమార్గమందె తరలు బ్రతుకు-
పుట్టు జీవి హక్కు పూర్ణ సౌఖ్యముశాంతి!
స్వస్తి హారతి గొను సాయి బాబ!
75*
చెడు నశించు నాత్మ చేతనత్వము గలుగ-
మంచి విస్తరించు మంచి నిలుప!
మూడుమూర్తుల నిను మూలశక్తిగ గాంచు!
స్వస్తి హారతి గొను సాయి బాబ!
76*
కఠిన కల్తి చల్తి కలుష తుఫానులు
ఉప్పెనేయు తూ. చ. దప్పకుండ!
ముప్పు మానవాళి తప్పిద ప్రతిఫలం
స్వస్తి హారతి గొను సాయి బాబ!
77*
జగతి సమత వెల్గె జన్మతరించగ-
యోగసాధన ప్రయోగ శాల!
ద్వారకమయి నీతి దారుఢ్యమును గూర్చె!
స్వస్తి హారతి గొను సాయి బాబ!
78*
నానసాబు బొందె నయమైన సంతతి!
నానపాటిలాత్మ నమ్మి మురిసె!
బహువిధాల భక్తి పరులు కీర్తించిరీ!
స్వస్తి హారతి గొను సాయి బాబ!
79*
ఆంజనేయుడ!గణనాయక!శ్రీ దత్త!
మూలశక్తివి-త్రిమూర్తి రూప!
అతులిత మహిమాత్మ! ఆదిశక్తివి నీవె!
స్వస్తి హారతి గొను సాయి బాబ!
80*
కృష్ణ గీత కీర్తి తృష్ణ బాపగ-జీవ
సేవ-నీదు బోధ సేద దీర్చె!
దు:ఖహరణియయ్యె ధునివిభూతియె భువిన్
స్వస్తి హారతి గొను సాయి బాబ!
81*.
కరుణ కిరణ! జీవకారుణ్య గుణధామ!
బాధిత జనపాలి పట్టుగొమ్మ!
చమురు లేని దివ్వె చమకాత్మ గలిగించు!
స్వస్తి హారతి గొను సాయి బాబ!
82*
అహము వీడి గురులు హారతిచ్చియు మ్రొక్క-
ఘోల సామి శిష్య గోల మణిగె!
స్వార్థముడిగి భక్తి సామాన్యులెదిగిరి!
స్వస్తి హారతి గొను సాయి బాబ!
83*
నాన వలియు వాదు నందోడి పడిమ్రొక్కె-
గర్వముడిగి భక్తి గలిగి మనగ-
ఇనుమడించె కీర్తి హితవొంది తరియించె!
స్వస్తి హారతి గొను సాయి బాబ!
84*
ఉప్పునూతి నుండి గుప్పెతీయని నీరు-
రామ పెళ్ళి జరిగె రమ్య నవమి!
పర్వదినములందు ప్రజసంబరముబొందె!
స్వస్తి హారతి గొను సాయి బాబ!
85*
చర్ఛ సాగె పంతు చరిత రచనబూనె-
సాక్ష్యమయ్యె రాధ-శామ-సలహ!
గ్రంధము వెలుగొందె కలిదోష హరముగా
స్వస్తి హారతి గొను సాయి బాబ!
86*
సంప్రదింపు సలహ సందర్భ కథలతో
బూటి బాల గణప మాట సాగె!
దండి సమత మమత రెండు బల్లుల కథ!
స్వస్తి హారతి గొను సాయి బాబ!
87*
దనర వలయు నరులు దైవీయ గుణములే
సంపదలుగ బ్రతుకు నింపు సొంపు-
పుణ్య లబ్ధిగలుగ భువిజన్మ సార్థకం
స్వస్తి హారతి గొను సాయి బాబ!
88*
కల్ల నిజము దెలియు కలలు ఫలించగా
బ్రతుకు కడలి దాట-భక్తి నావ!
నావికుడవు ముక్తి నందించు సద్గురు!
స్వస్తి హారతి గొను సాయి బాబ!
89*
లబ్ధిగూర్చు భక్తి లౌకిక సుఖశాంతి-
పారలౌకికముగ ఫలము ముక్తి-
అభయహస్తమొసగు నుభయత్ర భద్రత!
స్వస్తి హారతి గొను సాయి బాబ!
90*
అహపు ధునిని గాల్చు – అనల స్వరూపుడ!
దోష రహిత దృష్టి దోవ భక్తి-
సహనయుక్త బ్రతుకు సాగించ వరమిమ్ము!
స్వస్తి హారతి గొను సాయి బాబ!
91*
దానగుణము నిచ్చి దాతలుగా దిద్ధి
ధరణి జీవ శ్రేష్ఠ బిరుదు నిలుపు-
కొనగ మరల మరల క్రోధాగ్ని చల్లార్చు!
స్వస్తి హారతి గొను సాయి బాబ!
92*
దైవ మాత్మ నిలిపి తాధ్యాని యైధ్యాన
నిష్ఠ సాగు జీవ శ్రేష్ఠ నరుడు
దమము దానము దయ తరచి పాటించాలి!
స్వస్తి హారతి గొను సాయి బాబ!
93*
చావడోత్సవంపు సందేశ పూర్వక
నియమబోధ నేడు నీసమాది-
వాక్కువెడలు ప్రజల వర్ధిల్లజేయగ!
స్వస్తి హారతి గొను సాయి బాబ!
94*
ఇరువదవశతాబ్ధి ఇరువదేండ్లుగబోధ-
పిదప నీసమాది పిలుపు గలిగె-
చేరి భక్త జనులు చెవియొగ్గి వినుబోధ!
స్వస్తి హారతి గొను సాయి బాబ!
95*
బాధజెంద వలదు భద్రత గూర్చెద-
భారమంతనాదె భయము వీడి-
ఊరడిల్లుడనియె ఊరూర నీవాక్కు!
స్వస్తి హారతి గొను సాయి బాబ!
96*
ప్రకృతి యందె నీవు ప్రతిఫలింతువు -
సదా పంచభూతములుగ ప్రకట మగుచు-
జీవి జీవినాత్మ దివ్వెవై వెల్గేవు!
స్వస్తి హారతి గొను సాయి బాబ!
97*
అవని డాబు దర్పమాడంబరము మాని
మొరలు బెట్టుకొనెడు ముగ్ధ భక్తి-
పరుల మెచ్చి – కోరు వరమిచ్చి పంపేవు!
స్వస్తి హారతి గొను సాయి బాబ!
98*
బాధలోర్చి వచ్చు వారినోదార్చియు
తమసమాది నుండె తగుగబలికి-
శాంత పరచి బ్రోచు సద్గురుండవునీవు!
స్వస్తి హారతి గొను సాయి బాబ!
99*
చంద్ర సవిత నేత్ర! శతకంబు గైకొని
ఆదరించి బ్రోవు అజర భూజ!
వత్స వెంట గోవు వగుచు సంరక్షించు!
స్వస్తి హారతి గొను సాయి బాబ!
100*
రక్ష గలుగ రంధి రవ్వంతయునులేదు
దుష్ట శిక్ష నీదె దురిత దూర!
ధర్మ ధాత యిమ్ము దైవీయ గుణములన్
స్వస్తి హారతి గొను సాయి బాబ!
101*(సంపూర్ణం)
నాది నాదియనుటె నరకానబడుదారి
నేను నేనటన్న నేరదృష్టి-
మాది-మీది, వాదు? మనదనుటేమేలు!
స్వస్తి హారతి గొను సాయి బాబ!
102*
ధాత సద్గురుడవు దత్తరూప త్రికాలజ్ఞ-
సర్వలోక రక్ష-సచ్చిదాత్మ!
ద్వారకమయి నిలయ! దయగల దైవమా!
స్వస్తి హారతి గొను సాయి బాబ!
103*
సజ్జనాళి మైత్రి సద్గ్రంధ పఠనము
సుధలనూరు పండ్లు జూడ రెండె!
మిగత వన్నివిషము మితులకథలె!
స్వస్తి హారతి గొను సాయి బాబ!
104*
అవని నూత్న సైన్సునాధ్యాత్మికము పొత్తు-
గూర్చి పుణ్యధనము గూర్చ మేలు!
దొమ్మిసాగిన తుద దుమ్ము ధూళినిదూలు!
స్వస్తి హారతి గొను సాయి బాబ!
105*
సర్వ ధర్మ సమత – సద్భక్తి ననుభవ-
సైన్సు గలసి విశ్వశాంతిగూర్చు!
జనులమేలునెంచు జాగృతమొనరించు!
స్వస్తి హారతి గొను సాయి బాబ!
106*
కల్మశోల్భన విషయఘాతకముల చెఱ-
చేదుకొనుము పైకి సేదదీర్చు!
సుధను గురిసి పుడమి సుఖశాంతి నెలకొల్పు!
స్వస్తి హారతి గొను సాయి బాబ!
107*
సూక్ష్మమందె బంధమోక్షంబు నీవాక్కు-
శాంత భీకరగళ-సద్గురుండ!
నీదు శతక పఠన నిత్యజయము గూర్చు!
స్వస్తి హారతి గొను సాయి బాబ!
108*
శుభము నీదు భక్తి సుఖశాంతి దాయకం
శుభము నీదు చరిత సూక్తి-ముక్తి!
శుభము పాఠకులకు, శ్రోతలకు శుభము!
స్వస్తి హారతి గొను సాయి బాబ!