రుధిరదానం శతకము-2
(తే.గీ.)
1*
శ్రీలువెలయించు జనదానవీర మహిమ-
వృత్తియు ప్రావృత్తి-సౌష్టవవృద్ధి గూర్ప-
భరతమాత ఋణము దీర్చు చరిత గరిమ!
తిరుణహరిమాట భరతజాతీయబాట!
2*
సాటి సాహితీ ప్రియులార! సదయులార!
సహచరానుచర సుహృత సభ్యులార!
నమ్మకమునిచ్చి దీవింప నయము జయము!
తిరుణహరిమాట భరతజాతీయబాట!
3*
జనులు పురుషార్థ సాధకుల్ జననిభరత-
మాత, జీవనమార్గ విధాతగాగ!
మేలు దేశవిదేశాల మేటి చరిత!
తిరుణహరిమాట భరతజాతీయబాట!
4*
అక్షరాస్యత,లక్షసమస్యలకును-
తెలివి కలిమి మించు తెరువు దోచు!
విద్య గోరంత-తెలుగింట- వెలుగు కొండ!
తిరుణహరిమాట భరతజాతీయబాట!
5*
మఱ్ఱి విత్తనమునదాగు మాను నూహ-
జేయు మనుజుండు జీవాళి శ్రేష్ఠుడనగ-
దానవీరమునొప్పగా ధాతయయ్యె!
తిరుణహరిమాట భరతజాతీయబాట!
6*
జీవులన్నిట,బుద్ధి విశేషమొప్ప-
బుద్ధి జీవియయ్యె , మిగత భూతహితవు-
ధర్మ సూక్ష్మదర్శిని – సత్యదర్శియయ్యె!
తిరుణహరిమాట భరతజాతీయబాట!
7*
త్యాగ మూర్తులు భారత తాత్వికాళి!
ధర్మమూర్తులు, పుడమి నాధ్యాత్మికులును!
ముందుచూపు సంస్కృతి గూర్చి- మునులు జనిరి!
తిరుణహరిమాట భరతజాతీయబాట!
8*
ఋషుల సంస్కృతియు పురాణ పురుష నీతి-
యిష్టపూర్తి దానములిడు నిష్ఠగూర్చె!
దానధర్మమే బ్రతుకు విధానమయ్యె!
తిరుణహరిమాట భరతజాతీయబాట!
9*
విశ్వ శ్రేష్ఠులు భారత విద్యగురులు!
జీవ శ్రేష్ఠత గాపాడు దివ్యకృతుల-
పుణ్య సంచితార్థముగొను స్ఫూర్తి నిడిరి!
తిరుణహరిమాట భరతజాతీయబాట!
10*
బాధ్యత బరువు-బ్రతుకున పరువు బరువు!
భారతీయ పురాణాల భాగ్య గరిమ!
విద్య వినయ విధేయత-విధిగ బరువు!
తిరుణహరిమాట భరతజాతీయబాట!
11*
తరతరాల మీగడ సాంప్రదాయమైన,
మంచి సంస్కృతి పేరట పెంచు విధము-
సర్వ జనుల సుఖముగోరు సహనమొసగె!
తిరుణహరిమాట భరతజాతీయబాట!
12*
తరచ నాత్మ తత్వము తారతమ్యముడిగి-
గమ్యమొకటిజేయగ-విశ్వగమన గతుల-
తరతరాల సాహితియు ధాతలను బొగడె!
తిరుణహరిమాట భరతజాతీయబాట!
13*
ప్రజలు రాజులై స్వయముగా ప్రభువులగుచు-
సాగు పాలనలో ప్రజాస్వామ్యమొప్ప-
పాలకులు పాలితులుగాగ ఫలము గనిరి!
తిరుణహరిమాట భరతజాతీయబాట!
14*
ప్రజలె ప్రభువులై దాతలై ప్రజలమేలు
గోరువారైరి, పరులకు తోడుపడగ-
వివిధ దానంబులనుజేయు విధము గలిగె!
తిరుణహరిమాట భరతజాతీయబాట!
15*
అన్న పూర్ణ భారత కీర్తి గొన్న పేరు-
దాన విశ్వరూపమునెత్తె ధన్యమనుచు!
దేశ దేశాల కాదర్శ దేశమయ్యె!
తిరుణహరిమాట భరతజాతీయబాట!
16*
స్వార్థ రహితమై నరజన్మ సార్థకముగ-
భక్తి విశ్వరూపమునెత్తె-శక్తి యుక్తి-
సాధు సజ్జన సన్మార్గ సరణి సాగె!
తిరుణహరిమాట భరతజాతీయబాట!
17*
దానవులయందు గల్గిరి దాతలనగ-
మానవులయందు దాత సామాన్య గతిని
గలుగవలెనన్న తపనయు గలిగె నాడె!
తిరుణహరిమాట భరతజాతీయబాట!
18*
ధరణి దానవ దాతలు దైవదారి
దానగుణ గణ్యతయు గల్గి తరలిపోవ-
బలియు ప్రహ్లాద పౌత్రుడై బలము గూర్చె!
తిరుణహరిమాట భరతజాతీయబాట!
19*
దాన కర్ణుడు ధాతయై దనరెననియు-
శిబియు, రంతిదేవుడు దానచిత్తులనియు-
కథల నీతులే-సాహితీ కదలసాగె!
తిరుణహరిమాట భరతజాతీయబాట!
20*
నరులు, భల్లూకములు వానరులు గూడి-
రామదండు సాగె! హనుమ రామబంటు!
గాగ నిస్వార్థ సేవయే గణనకెక్కె!
తిరుణహరిమాట భరతజాతీయబాట!
21*
కీర్తి కరమయ్యె రామసుగ్రీవ మైత్రి!
ఉడుత భక్తి రాముడు మెచ్చె నుర్వి పొగడ!
నీతియాదర్శ మానవ రీతి నెగడె!
తిరుణహరిమాట భరతజాతీయబాట!
22*
ఎన్ని జీవులు ఏకమై, ఎలుగునెత్తి-
ఆర్చి కేకేయగా, లంక-అదరిపడదె!
ఐకమత్య మైహిక నీతియైన శక్తి!
తిరుణహరిమాట భరతజాతీయబాట!
23*
నరులునేకమై కదలిన నలరు శక్తి!
రక్త బంధమ్ము వెలయు శ్రీరామ రక్ష!
నయము, అరచేర స్వర్గమ్మునందు జగతి!
తిరుణహరిమాట భరతజాతీయబాట!
24*
భారతీయ సమైక్యత భావపూర్ణ –
ఫలము రామాయణము-దైవ బలము గూర్ప-
జనకుటుంబ జీవన సిరి జగతి కీర్తి!
తిరుణహరిమాట భరతజాతీయబాట!
25*
అందరొకటిగా సమస్యల చందమెరిగి-
రక్త బంధులై-ధాతలై- రామనీతి-
రాహ సాగిన వైరసుల్ రయముజెందు!
తిరుణహరిమాట భరతజాతీయబాట!
26*
రుజ వినూత్నమే-ఔషదరూఢిలేదు!
టీక రాలేదు జాగ్రతే టాకెఎయ్డ్సు!
మూలకణచికిత్స-బహుఖర్చు-మొలకదశయె!
తిరుణహరిమాట భరతజాతీయబాట!
27*
జగతి వణికించు వైరసుల్ జాగృతంబు!
తప్పదిక విశ్వనర సఖ్యతొప్పవలయు!
అనగననగ భారత నీతి మనుగడొసగు!
తిరుణహరిమాట భరతజాతీయబాట!
28*
కనగ దృశ్యాంతరములందు కల్తిసాగె!
వినగ భావాంతరములందు విసుగునెసగె!
అఖిల భారతైక్యత రీతి సుఖముగూర్చు!
తిరుణహరిమాట భరతజాతీయబాట!
29*
కల్తి వంగడమ్ములు గల్గె-కలతవడియు-
రైతు సంగతి దీనమై రక్త – చెమట-
పుడమిదడసె నిధానమై పులకరించె!
తిరుణహరిమాట భరతజాతీయబాట!
30*
కల్తి వింగడంబన రక్త కలుషమొకటి-
మార్పిడుల రోగి కేర్పడె మరణభీతి!
జనుల వణికించె నవినీతి జగతియందు!
తిరుణహరిమాట భరతజాతీయబాట!
31*
జరుగు ఘోర ప్రమాదాల జమలె గాని-
ప్రగతి పట్టిక ఖర్చులే ఫలములేని-
గతియె, ట్రాపికు స్వేచ్ఛకు కట్టడేది?
తిరుణహరిమాట భరతజాతీయబాట!
32*
కల్తి కాలుష్యములు బాహ్య చల్తియగుచు-
రక్తమును జేరు కాలంబు రానెవచ్చె!
పట్టి పట్టని విషతిండి పుట్టిముంచు!
తిరుణహరిమాట భరతజాతీయబాట!
33*
కలియుగాన దానము నాటి కథల తపసు-
ధాత తాపసియనునుడి దలప వలయు!
వసుధ పుణ్యమే రెండింట వచ్చు ఫలము!
తిరుణహరిమాట భరతజాతీయబాట!
34*
రుధిర ధాతయే, అలనాటి ఋషిగ నెఱిగి-
దానమే యజ్ఞముగ రక్త దానమొసగి-
రక్షణకు బూనుటే జన్మ రహిత ముక్తి!
తిరుణహరిమాట భరతజాతీయబాట!
35*
ఆదుకోవలె రుధిరార్థి నాదరమున-
దానగుణమిచ్చు విద్య సాధనముగాగ-
ధాతయే తాపసిగమారు ధరణియందు!
తిరుణహరిమాట భరతజాతీయబాట!
36*
లోటుగూర్చని దానము లోకమందు-
రక్త దానమే-దైవమే రక్తధాత!
ఖర్చులేనట్టి కీర్తిని గాంచు జగతి!
తిరుణహరిమాట భరతజాతీయబాట!
37*
హాయి పౌష్ఠికాహార విహార సుఖము!
రధిర సంద్రంబులు ప్పొంగు రుజువు జూపి-
వైద్యనారాయణుల్ దెల్ప-వలదు శంక!
తిరుణహరిమాట భరతజాతీయబాట!
38*
హాయి – కొలది విరామంబు శాయశక్తి-
రుధిరమత్పత్తియగు సుధానిధిగ వెలయు!
విధియు బాధ్యత నెరవేర్చు విధము తృప్తి!
తిరుణహరిమాట భరతజాతీయబాట!
39*
పాతనీరు వరదరాగ పాతమగుచు-
మత్తడినిదుంకు! వెనువెంట క్రొత్తనీరు-
నిండునట్లుగ-రక్తంబు నిండుచుండు!
తిరుణహరిమాట భరతజాతీయబాట!
40*
ఇచ్చు వారికి, తృటిలోనె వచ్చిపోవు-
నీరసము, దల్ప వలదింక-నీకునేను-
నాకు నీవన్న భావన నయము గూర్చు!
తిరుణహరిమాట భరతజాతీయబాట!
41*
రక్షకుడు ధాత! రుధిర సురక్షితనిధి-
సాక్షముగలేదు, పిదపరియాక్షనేమి!
లేనిపోనియపోహల నెన్నవలదు!
తిరుణహరిమాట భరతజాతీయబాట!
42*
పల్లె పట్టణ ప్రజసాగు పయనగతుల-
గాయపడు, వారి జూడగా డాయువారు-
గ్రూపుగల్సిన రక్తమున్ గూర్చవచ్చు!
తిరుణహరిమాట భరతజాతీయబాట!
43*
ధాత రప్పించు సమయంబు-దారి దూర-
పయనమైయున్న వేగిర పడియు రక్త-
బంధువులు ముందడుగిడగ బ్రతుకు నిలుచు!
తిరుణహరిమాట భరతజాతీయబాట!
44*
ల్యాబు లైసెన్సు గల బాంకులందు దొరకు-
రక్తమెక్కించగా జాగరతయుగాగ-
సులభ సూత్ర రుధిరదాన సుధయు గురియు!
తిరుణహరిమాట భరతజాతీయబాట!
45*
వివిధ సేవలు-క్లబ్బులు వెలయ జేయు-
సంస్థలెన్నియో, శిబిరాల సాధనములు!
దీక్షగా రక్త నిధిగూర్చు దిక్కుసాగె!
తిరుణహరిమాట భరతజాతీయబాట!
46*
భువి పరోపకారము, పుణ్యపూర్వకమగు
భూతహితవు సత్యముగాగ-పూని సేవ-
జేయు ధాతలుండిరి భారతీయ గరిమ!
తిరుణహరిమాట భరతజాతీయబాట!
47*
వ్యక్తి నిత్యావసరవస్తువయ్యె-రక్త-
ధాత చిరునామ చిట్టాల వ్రాతసాగె!
రక్తదాన దీక్ష జనసురక్షితముగ!
తిరుణహరిమాట భరతజాతీయబాట!
48*
కంటి దానదీక్షయు జీవ కాంతిరేఖ!
తదితరావయవములందు ధాత-నేడు
కిడ్ని ధాత శాశ్వతసత్కీర్తి గాంచె!
తిరుణహరిమాట భరతజాతీయబాట!
49*
జనన మరణాల రేటుల, జగతి తారు-
మారుగాసాగె-అధికజనాభ చేత-
ప్రభుత బూను ప్రణాలికల్ పట్టు సడలె!
తిరుణహరిమాట భరతజాతీయబాట!
50*
దేహమాసక్తి వీడి విదేహుడైన-
జనక మహరాజు వైదేహి జనకు కీర్తి!
కీర్తన సమకాలీన సంకేతమయ్యె!
తిరుణహరిమాట భరతజాతీయబాట!
51*
క్రొత్త వొరవడి-వైద్యాన క్రొత్త దారి-
క్రొత్త దానపత్రము రక్త కొఱతదీర్చు!
ప్రాణధాతకు మరిలేదు పాత క్రొత్త!
తిరుణహరిమాట భరతజాతీయబాట!
52*
వెనక ముందాడ పనిలేదు, వెలితి పడక!
ఇష్ట పూర్తి రక్తమునిచ్చి హితవు జేయు-
క్రొత్త రక్తవృద్ధియు జర్గు-గొప్పమేలు!
తిరుణహరిమాట భరతజాతీయబాట!
53*
దైవ దీవెన తోడగు ధాతలకును-
ఆత్మ సంతృప్తియును-కల్గు దానఫలము!
పారలౌకిక భావనా పటిమబెంచు!
తిరుణహరిమాట భరతజాతీయబాట!
54*
రక్త దానమ్ముచే కీర్తి రాణకెక్కు!
బ్రతుకు మానవత్వము చే పరిమళించు!
ప్రాకటముగ ప్రజలుమెచ్చు-ప్రభుత మెచ్చు!
తిరుణహరిమాట భరతజాతీయబాట!
55*
రాజు పేదను ముడివేయు రక్తఝరులు-
కలిమి లేములనక రక్త కాల్వ సాగు!
శత్రు శత్రుత్వమును వీడి మిత్రుడగును!
తిరుణహరిమాట భరతజాతీయబాట!
56*
జన్మ భూమి ఋణము దీర్చు జాతి సేవ!
జాతి సేవలో ధాత విజేత గాగ-
రక్త ధాత సమాజ గౌరవముబొందు!
తిరుణహరిమాట భరతజాతీయబాట!
57*
రక్త గ్రూపులు ఏబివో రకరకాలు!
పాజిటవు నెగెటివు సరి పడిన రుధిర-
మార్పడియును సాగును వైద్య మార్గ మందు!
తిరుణహరిమాట భరతజాతీయబాట!
58*
ధరసురాసుర నరవానరముల-జంతు
జలచరులు భూచరులుభయ చరులు-పక్షి
తదితరాలను నాత్మయు నొక్క తాత్వికంబె!
తిరుణహరిమాట భరతజాతీయబాట!
59*
దీన రోగుల దీవెన దినదినంబు-
దైవదీవెన వలెఫలదంబునెఱిగి-
ధరణి ప్రఖ్యాతి గాంచిరి ధాతలంత!
తిరుణహరిమాట భరతజాతీయబాట!
60*
మేలు గుర్చు దోవన గల్గు మేలు తనకు!
కీడు లేనితీరున వచ్చు కీర్తి, తిరము!
దయయు దాక్షిణ్యమున నాత్మ దనరు సేవ!
తిరుణహరిమాట భరతజాతీయబాట!
61*
రాగి బైరాగి సంసారి రాజు పేద-
ప్రాణమెవ్వరిదైన సమానవిలువ!
ప్రాణ ధాతలై యెవరైన బ్రతుక మేలు!
తిరుణహరిమాట భరతజాతీయబాట!
62*
విద్య వైద్య సేద్యములందు వెలయువారు!
చదువు పదవులు లేకున్న పదిలమైన-
బ్రతుకు సుఖమునే గోరు ప్రాణ ప్రదులు!
తిరుణహరిమాట భరతజాతీయబాట!
63*
మనిషి-మనిషినిగా జేయు మార్గమందు!
విద్య-మానవతయె విలువబెంచు!
దయయు దాక్షిణ్యముదయింప ధాతయగును!
తిరుణహరిమాట భరతజాతీయబాట!
64*
రక్త బేపారమే సాగరాదటన్న –
రక్తి కల్తి బేపారము రాక్షసంబె!
డబ్బు కక్కుర్తి జబ్బును డాయజేయు!
తిరుణహరిమాట భరతజాతీయబాట!
65*
మానవతగను స్వచ్ఛంద దానమహిమ!
దాన గుణమున్న నరజన్మ ధన్యమగును!
అవసరార్థము నిడు రక్తమధిక విలువ!
తిరుణహరిమాట భరతజాతీయబాట!
66*
రక్త సిరిగల్గ బ్రతుకున రంగు పొంగు!
రక్త బలమున్న జాతీయ శక్తి యుక్తి!
తిండి రక్షణ నిద్రయు నుండ మేలు!
తిరుణహరిమాట భరతజాతీయబాట!
67*
ఎట్టి వారైన కాలమ్ము ఏదియైన-
అవసరానికందిన వస్తువదియె విలువ!
చేయిగాలియాకునుబట్టు చేష్టలేల!
తిరుణహరిమాట భరతజాతీయబాట!
68*
సొత్తు నిచ్చినవారు విరోధు లైరి!
సొత్తు రికవరియగువారి సొమ్ము చేత-
నెత్తురిచ్చిన మరి ప్రాణ నేస్తమయ్యె!
తిరుణహరిమాట భరతజాతీయబాట!
69*
ఇతర ధాతల-మరచినా హితవు గూర్చు-
విధిని ధాతలుందురు గాన-వింతగాదు!
ప్రాణధాతను మరవదే ప్రాణియైన!
తిరుణహరిమాట భరతజాతీయబాట!
70*
రాదు లోటు జీవించియు రక్తమిడగ!
కాదు లోటు చని వెళ్ళియు కంటినిడగ!
వెలితి పూరింప దానముల్ వెలసె నంద్రు!
తిరుణహరిమాట భరతజాతీయబాట!
71*
అన్నదాత చెమటనోడ్చి – అహరహంబు-
బ్రతుకు కనుమల్పక రాత్రిఁ బగలుతాను-
కాపలనుగాచి కల్లాన గాంచు పంట!
తిరుణహరిమాట భరతజాతీయబాట!
72*
అన్నమే రక్తమై పారు – వెన్నమనసు
కరిగి రక్తదానముజేయ కదలివచ్చు!
అన్న దాత రక్తమునోడ్డ్చి యాదుకొనును!
తిరుణహరిమాట భరతజాతీయబాట!
73*
అసువులను బాసి జీవించు-అన్నదాత!
రాహ జీవించి రాణించు రక్తదాత!
చెల్లిపోయినా-కను ధాత కళ్ళవెలుగు!
తిరుణహరిమాట భరతజాతీయబాట!
74*
దాన తపమున వీడియు దరిద్ర చింత-
బరువు బాధ్యతలనిచెప్పి-పాటిదప్పి-
బ్రహ్మ రాతను నిందింప భావ్యమగునె!
తిరుణహరిమాట భరతజాతీయబాట!
75*
మలిన రక్తంబు నమ్ముట మానవలెను!
మలిన రక్తంబు నెక్కించు మాటవలదు!
మలిన సెక్సు జిక్కియు జచ్చు మది-విషంబు!
తిరుణహరిమాట భరతజాతీయబాట!
76*
పటిమ నైపుణ్యమే వైద్య ప్రగతి గాగ-
మలిన రక్తంబు వర్జించు మార్గముండు-
తగును సురక్షిత మార్పిడుల్ దనరు భువిని!
తిరుణహరిమాట భరతజాతీయబాట!
77*
భ్రమయు గల్గియు బ్రతుకుట- భయము గలుగు!
పరగ భయముచే నమ్మని ప్రజల మనసు
తెల్సినది గ్రుడ్డిగా నమ్ము నేదేనియొకటి!
తిరుణహరిమాట భరతజాతీయబాట!
78*
భక్తి శ్రద్ధలు గల్గిన ప్రజల మేధ-
భవభయదూరమైనట్లు, బ్రతుకు భ్రమయు!
దూరమగు-మంచిదారి చేకూరు ఫలము!
తిరుణహరిమాట భరతజాతీయబాట!
79*
నరులు నైతిక విలువల నైజమెరిగి-
వారధిగ పాత క్రొత్తల దారి సాగి-
దాన గుణ ప్రచారము జేయ దనరు జాతి!
తిరుణహరిమాట భరతజాతీయబాట!
80*
ధర్మ మార్గంబు వివరించు దారి విద్య-
బ్రతుకు ఫలియించు తీరున ప్రతిఫలించు!
నీతియుక్తంబుగా సాగ-రీతి వెలయు!
తిరుణహరిమాట భరతజాతీయబాట!
81*
నిర్భయత్వముచే గల్గు నియమనిష్ఠ-
నిర్భయత్వంబు స్వాతంత్ర్య నియతి సాగు!
దేశజనులు ధాతలుగాగ తేజమొసగు!
తిరుణహరిమాట భరతజాతీయబాట!
82*
బ్రతుకు నిల్పు భద్రత దేశ ప్రభుతవంతు!
జాతి పరువు ప్రతిష్ఠయు ప్రజలవంతు!
బరువు బాధ్యతలుభయత్ర బరగు విధులు!
తిరుణహరిమాట భరతజాతీయబాట!
83*
నీతి గీత దాటగరాని రీతి గీత-
భారతీయ సంస్కృతినమ్ము బ్రహ్మవ్రాత!
ధర్మమునకు జయంబను ధరణి గీత!
తిరుణహరిమాట భరతజాతీయబాట!
84*
నైతిక విలువలు దాటేసి నడువనెంచు-
నడవడిని పొందనేర్చునే నయము జయము!
నైతికమె శాశ్వతమైన పునీత రీతి!
తిరుణహరిమాట భరతజాతీయబాట!
85*
అకషరాస్యత సంస్కృతికాది మెట్టు!
ఆత్మ తత్వంబు ముక్తికినాదిమెట్టు!
అంచెలంచెల నిచ్చెనల్ మంచిగుట్టు!
తిరుణహరిమాట భరతజాతీయబాట!
86*
బ్రతుకు సాంకేతికము వెంట పరుగులెత్తు!
నాడు నేడు రేపట నడయాడు ప్రగతి!
జనులు ధాతలైనప్పుడే జగతి సుఖము!
తిరుణహరిమాట భరతజాతీయబాట!
87*
నిత్యమవినీతి వర్జింప నీతివెలము!
నిత్య నీతిని సాగింప సత్య పథము!
సత్యమే భూతహితవు సాహిత్య ప్రగతి!
తిరుణహరిమాట భరతజాతీయబాట!
88*
నిఖిల దానాల సర్వత్ర నీతి నిష్ఠ-
మంచి చెడులెంచి సాగించు మనుగడంత!
గీత ననుసరించియు నిత్య కీర్తి గాంచు!
తిరుణహరిమాట భరతజాతీయబాట!
89*
ఏయ్డ్సు గర్జించె-దేశవిదేశములను-
మాట! మనదేశ మనరాష్ట్ర మనగ వినమె!
తెలుగు నీతిని నిరసించు తెగులదేల?
తిరుణహరిమాట భరతజాతీయబాట!
90*
మలిన రక్తమెక్కించిరి మాయ కల్తి-
మలిన సెక్సునిందయు మోయ మరణసమమె!
ననెడు రోగిభావన సాగె నాడు నేడు!
తిరుణహరిమాట భరతజాతీయబాట!
91*
మలిన రక్తసేకరణలు మనకుహాని-
వైద్య దుందుభి మ్రోగించె వైనమెరుగ-
మాట మనదేశ మనరాష్ట్ర మనదె రిస్కు!
తిరుణహరిమాట భరతజాతీయబాట!
92*
స్వార్థమును వీడ నుభయత్ర చాలమేలు!
కల్తి రక్తంబు వర్జింప గలుగ వలయు!
మనుజు దానవీరమె నిజ మగతనంబు!
తిరుణహరిమాట భరతజాతీయబాట!
93*
వలస సెక్సు, హైవేసెక్సు, వైరసెయ్డ్సు
ముద్దు ముచ్చట వ్యసనాలు! హద్దు మీరె-
రోడ్డు పైక్షత గాత్రుల రోదనములు!
తిరుణహరిమాట భరతజాతీయబాట!
94*
కలిని దానమే తపసైన-కల్తి దాన-
దోషమున గల్గుచుండును, రోగి బ్రతుక-
కలుష రహిత రక్తము పుణ్య కార్యక్రమము!
తిరుణహరిమాట భరతజాతీయబాట!
95*
రక్త బేపారి పైపెచ్చు రకము కొఱకు-
ప్రాణములు దీయు రక్తంబు-పరగ నమ్మి-
పైకమును గూర్చు కొనజూడ పాపమగును!
తిరుణహరిమాట భరతజాతీయబాట!
96*
ధరణి మానవ సేవ మాధవుని సేవ!
మంచి పూర్వక జీవన మార్గమందు!
నిండు పుణ్యమే ముక్తికి ఇంధనంబు!
తిరుణహరిమాట భరతజాతీయబాట!
97*
మాయకుని పోటి నెగులమాయకుండు!
డాబు దర్ఫంబు గల ధాత డాయలేడు!
నడుమ వాలంటరీ సేవ నలరు ఫలము!
తిరుణహరిమాట భరతజాతీయబాట!
98*
దానవినియోగమును గాని, దాతయాస్తి-
పాస్తి యెల్ల, దుర్వినియోగ ప్రాప్తియగును!
మొదట మేల్కొని పుణ్యంబు నొందవలయు!
తిరుణహరిమాట భరతజాతీయబాట!
99*
రోగి రోగమ్ము మాన్పియు, రోగిబ్రోచు-
శత్రు శత్రుత్వమును మార్చి మిత్రుజేయు-
నరు దయాపూర్ణ హృది పుణ్య నదిని బోలు!
తిరుణహరిమాట భరతజాతీయబాట!
100*
ఆత్మ కీజన్మలో దేహమద్దె గృహము!
కాలధర్మ గతిని దీని – ఖాళి జేసి-
వెళ్ళవలె, దేహ సౌందర్యమెల్ల వీడి!
తిరుణహరిమాట భరతజాతీయబాట!
101*
ధాత భువి సూర్యుడే, రశ్మి దానమిచ్చు-
రశ్మి ధాతయై దీపించు రక్తధాత!
ముదము, ఫలమొందు భవబంధ ముక్తి తుదకు!
తిరుణహరిమాట భరతజాతీయబాట!
102*
కలిమినుబ్బి-తబ్బిబ్బుగా కదలువేళ-
దాన ధర్మదారిని సాగి ధాతయైన-
ఇచ్చి పుచ్చుకొనెడు కీర్తి హెచ్చు భువిని!
తిరుణహరిమాట భరతజాతీయబాట!
103*
గొప్పదనమేది? తనసొమ్ము గోలుపోక-
మెత్తదనమేదమాయకమేగ పేరు!
తేగమే సామాజికశాంతి యోగహేతు!
తిరుణహరిమాట భరతజాతీయబాట!
104*
పెట్టి పుట్టిన ధాతదే పేరుకీర్తి!
దానఫలముగా పుణ్యంబు దనరు సిద్ధి!
ధాత నిస్వార్థమే ముక్తి దారి దీప్తి!
తిరుణహరిమాట భరతజాతీయబాట!
105*
విలువ గలిగిన వారిదే, వీరజన్మ! –
నీతి గలిగిన చేరువ నిత్యముదము!
పూర్వ పుణ్యంబుచే దాన గుణము గలుగు!
తిరుణహరిమాట భరతజాతీయబాట!
106*
దాన ధర్మంబు చే వెల్గు దాతగుణము!
వేయి నోళ్ళ వర్ణించినా వెలితియగును!
విశ్వ కౌటుంబయై పంచు విశ్వ ప్రేమ!
తిరుణహరిమాట భరతజాతీయబాట!
107*
నిన్న పాత రేపట క్రొత్త-నేటి వింత!
కాలమెంత మారిన హృదిజాలి దలచు-
గుణము మారదు భువి జాలి గుణుడె ధాత!
తిరుణహరిమాట భరతజాతీయబాట!
108*
శుభము-పుణ్యమార్గాలకు శుభము శుభము!
శుభము-రుధిరదాతలకెల్ల శుభయశంబు!
శుభము-శతక పాఠకులకు శ్రోతలకును!
తిరుణహరిమాట భరతజాతీయబాట!