రుధిరదానం శతకము
(తే.గీ.)
1*(ప్రారంభము)
శ్రీలు గులుకు సేవాధర్మ చిత్తవృత్తి-
వృత్తినేకమై సౌష్ఠవ వృద్ధిగూర్చు!
దాన గుణముచే కడుపుణ్య ధనము వెలయు!
తిరుణహరి విను భువిదానవీర మహిమ!
2*
దానమె తపస్సు-కలియుగ ధాత తపసి-
పుడమి దానధర్మముగూర్చు-పుణ్యఫలము!
పుణ్యమార్జింప నరునిగా బుట్టు నాత్మ!
తిరుణహరి విను భువిదానవీర మహిమ!
3*
దేవ దానవులకు మధ్య తేజరిల్లు- మానవుడు దేవదేవుని మార్గగామి!
దైవ దానవతకు మధ్య మానవతయె!
తిరుణహరి విను భువిదానవీర మహిమ!
4*
ప్రేమమయులార! గురులార! పెద్దలార!
చదువు సంస్కారయుతులార! ఛాత్రులార!
వినియు వినిపించు నీతికోవిదులు మీరు!
తిరుణహరి విను భువిదానవీర మహిమ!
5*
మంచి యానోట నానోట సంచరించు!
అంతట వ్యాప్తమై చెడునంతరించు!
వినియు- వినిపింప, నైతిక విలువబెరుగు!
తిరుణహరి విను భువిదానవీర మహిమ!
6*
సూక్తి నిధులార! విజ్ఞాన సూర్యులార!
పురపుముఖులార! జనులార! పూజ్యులార!
మేటి సహచర-అనుచర, మిత్రులార!
తిరుణహరి విను భువిదానవీర మహిమ!
7*
మిమ్ము వేడెద నమ్మక మివ్వరండు!
తీరు నడిగెద మరియాద మీరకుండ!
నీతివిద్యలు వేరుగా నేర్వ వలెన..?
తిరుణహరి విను భువిదానవీర మహిమ!
8*
సాటి సాహిత్య ప్రియులార! సభ్యులార!
కీడు మేలెంచు ఘనపాత్రికేయులార!
చదువుతో నీతి జోడింప సాధ్యపడద?
తిరుణహరి విను భువిదానవీర మహిమ!
9*
వినియు వినిపింపవలె దాన విధుల మహిమ!
ప్రజలు ప్రశ్నింపవలె నీతి, ప్రభుతనైన!
తర్కవాదాల వినవలె తగుజవాబు!
తిరుణహరి విను భువిదానవీర మహిమ!
10*
శిబియు, రంతిదేవుడు దానవీరులైరి!
దాన కర్ణుండు పేరొందె ధాతగాగ!
బలియు విష్ణుపాదము మోప తలనుజూపె!
తిరుణహరి విను భువిదానవీర మహిమ!
11*
వెఱవక దధీచియిచ్చెను, వెన్నుపాము!
జగతి వజ్రాయుధముగ వాసవునిజేరె!
గిరుల రెక్కలు ఖండింప కీడుదొలగె!
తిరుణహరి విను భువిదానవీర మహిమ!
12*
నరునికై సురేంద్రుడడిగినంత-సహజ-
కవచ కుండలములనిచ్చె, కలత వడక!
దాన కర్ణుడై రాజలోకాన వెలిగె!
తిరుణహరి విను భువిదానవీర మహిమ!
13*
త్యాగమే గీత-గీతయే త్యాగమనగ-
తెరచి తిరగేసి చదివిన తెలియు –
ఈవి!
పుణ్య ఖని గీత! భువి – భూతముక్తి నిధియు!
తిరుణహరి విను భువిదానవీర మహిమ!
14*
గీతయే త్యాగముగను తాగీయనంగ-
అక్షరాకృతి లీలయే – అద్భుతముగ-
దోచునది యోచనే మదిన్ దోచుకొనగ!
తిరుణహరి విను భువిదానవీర మహిమ!
15*
బ్రతుకు బుద్బుద సమమంద్రు-భద్రతెరిగి-
సతత త్రికరణ శుద్ధిని సాగునట్టి-
సత్యవ్రతమును, త్యాగిదే నిత్యసుఖము!
తిరుణహరి విను భువిదానవీర మహిమ!
16*
సత్యమన భూతహితవుగా సాగునట్టి-
దైవ కార్యక్రమమె దాన ధర్మ కర్మ!
వ్రతముగా పుణ్య నిధిగూర్చు వాస్తవంబు!
తిరుణహరి విను భువిదానవీర మహిమ!
17*
శుద్ధి గలిగిన స్థిరబుద్ధి సూక్ష్మగ్రాహి-
త్రికరణ విశేషమైన నైహికసుఖంబు-
పిదప పరసుఖమును, పుణ్య ప్రీతి గూర్చు!
తిరుణహరి విను భువిదానవీర మహిమ!
18*
రుధిరమమృత సమానము, రోగులకును!
రాక పోక ప్రమాదాల రక్త నష్ట-
రూప మృత్యువు కబలించు రూటులందు!
తిరుణహరి విను భువిదానవీర మహిమ!
19*
అన్నమే రక్తమై నరునరములందు-
అన్నియవయవములజేరు – అవసరముగ!
జీవశక్తినిచ్చియు, జీవనేచ్ఛ దీర్చు!
తిరుణహరి విను భువిదానవీర మహిమ!
20*
రుధిరమమృత సమానము-రుజలయందు-
చెడిన రక్తము వడవోయు చేష్ట గుండె-
సిరలు ధమనులు పనిజేయు చిత్రముగను!
తిరుణహరి విను భువిదానవీర మహిమ!
21*
రుధిర సుధహీనమగురోగి-రూపు రేఖ-
మారిపోవును బలహీనమగును – తిండి
రక్తమునుగూర్చు నౌషద శక్తి వలయు!
తిరుణహరి విను భువిదానవీర మహిమ!
22*
రక్తధాత-అవసరము రక్తనిధుల-
కొరత గల్గిన నేర్పడు-కోరినట్టి-
గ్రూపు – రక్త బాంకు సమకూర్చు చుండు!
తిరుణహరి విను భువిదానవీర మహిమ!
23*
రక్త ధాతయే నిజమగు ప్రాణధాత!
దానవీరుడు భువిరక్త ధాతయగును!
రక్షకులు బంధుమిత్రాది లక్షజనులు!
తిరుణహరి విను భువిదానవీర మహిమ!
24*
అన్న ధాతయు-సేద్యంబు నలరు ఫలము-
దానమును జేయు-ఆరోగ్య ధాత-వైద్య-
సేవ బ్రతికించు-వైద్యంబు చేత పుడమి!
తిరుణహరి విను భువిదానవీర మహిమ!
25*
వైద్య నారాయణుని దయ వరముగాగ-
సాగు పూర్వాధునిక వైద్య శాస్త్ర ఫలము!
నౌషద క్రియల రోగ నివారణంబు!
తిరుణహరి విను భువిదానవీర మహిమ!
26*
వైద్య శాస్త్ర ప్రక్రియలందు-వరుసక్రమము!
రుజ పరీక్షలౌషద సృష్టి-రుధిర పుష్టి!
పౌష్టకాహార సలహ సత్పౌరవృద్ధి!
తిరుణహరి విను భువిదానవీర మహిమ!
27*
వైద్య విద్యల దానంబు వసుధ గలుగు!
గురువులే ధాతలుగ సమకూరు విద్య-
పుడమిలోన విద్యాధాత పూర్ణ కృపయె!
తిరుణహరి విను భువిదానవీర మహిమ!
28*
వైద్య దాత సేవాస్ఫూర్తి వైద్యమందు-నౌషదములున్నను చికిత్స-అవసరముగ-
రక్తమందక పోయిన రిత్త కృషియె!
29*
మనుజులను గావ దైవంబు మనుజులందె-
మనుజు రూపంబు దాల్చియు-మనుచు నుండె!
వైద్యుడో-రక్తదాతయో? వారసుండొ!
తిరుణహరి విను భువిదానవీర మహిమ!
30*
మనుజులను బ్రోవ ధర్మంబు మహిని వెలయు,
హాని మాన్పియు బ్రతికించు హాయి గూర్చు! ఆత్మ బంధువో-మిత్ర మహాత్ముడొకడొ!
తిరుణహరి విను భువిదానవీర మహిమ!
31*
రక్షకుడు దైవమే-వైద్యుడై రక్షసేయు!
రక్త దాతయై బ్రతుకిడు, శక్తినొసగు!
ధర్మమే ధనధాతగా దారిజూపు!
తిరుణహరి విను భువిదానవీర మహిమ!
32*
మనుజులనుగావ నీతియు మహినివెలయు! పుణ్యవ్రతమందు జనులంత పులకరింప-
భువిపరోపకారముగూర్చు భవితనిచ్చు!
తిరుణహరి విను భువిదానవీర మహిమ!
33*
రక్త ధాత సురక్షిత రక్తమొసగి-
వైద్యధాత సురక్షిత వైద్య సేవ-
లో సురక్షితోపకరణ లొసగనయము!
తిరుణహరి విను భువిదానవీర మహిమ!
34*
ధాత యిచ్చు సురక్షితధార రుధిర-
మును సురక్షిత పరికరములను జేర్చి-
రోగి కెక్కించవలె, వైద్యుడోర్పుగలిగి!
తిరుణహరి విను భువిదానవీర మహిమ!
35*
అర్హుడొసగ నపుడె-నిల్వ రక్త నిధులు!
మలిన రక్త బేపారముల్ మచ్చదెచ్చు!
మంచి తరుణము మించిన మరణమగును!
తిరుణహరి విను భువిదానవీర మహిమ!
36*
రుధిర ధాత పరీక్షచే రుజువు పడియు-
అర్హతాపత్రమును బొందు-అదనుకంది-
ప్రాణదానమ్ము జేయు తా పవిత్రుడగుచు!
తిరుణహరి విను భువిదానవీర మహిమ!
37*
రక్తమిడగ ధాతకు లోటు రాదు పైగ-
నూత్న నెత్తురుత్పత్తియై-పుష్టి కొలది-
నూతనోత్సాహమును గల్గు-పుణ్యమనగ!
తిరుణహరి విను భువిదానవీర మహిమ!
38*
గాలి లోపింప భువి సుడిగాలి నిండు-
నేర్పు జల్లుచుండగ నూరు నీటిచెలిమె!
పౌష్టికాహారమున- రక్త ప్రాభవంబు!
తిరుణహరి విను భువిదానవీర మహిమ!
39*
క్రొత్త రక్తంబు వెనువెంట కొసరి కలుగు!
మూడు మాసాల వ్యవధిలో ముదము గాను-
రక్త దానంబు జేయునర్హతయు గల్గు!
తిరుణహరి విను భువిదానవీర మహిమ!
40*
నీరు పల్లమెరుగునంద్రు-నిజము-దాత-
రక్తమిడ ఖాళి పూరించు శక్తియుతుడు!
పుష్టినిడు తిండి విశ్రాంతి పూటజాలు!
తిరుణహరి విను భువిదానవీర మహిమ!
41*
అవని గాయపడిన రుధిరార్థిగోలు-
పోయినట్టి రుధిరమును పూని మరల-
నిపుణుడెక్కించి ప్రాణంబు నిల్పుచుండు!
తిరుణహరి విను భువిదానవీర మహిమ!
42′
కోలు పోయిన రక్తంబు కొనుటకైన-
మరల పూరింప నితరత్ర మార్గమేది?
ధాత రక్తంబె జీవించు దారిజూపు!
తిరుణహరి విను భువిదానవీర మహిమ!
43*
అర్హతయుగల్గ, దయగల్గ-అడిగినంత-
రక్తదానంబుజేయగా రాదు లోటు!
మేలునుభయత్ర సంశయమేల? తగదు!
తిరుణహరి విను భువిదానవీర మహిమ!
44*
జాలిగలిగి క్షతగాత్రు చాలినంత రక్త నిధిగూర్ప ధనదాన రాహగలుగ-మేలునుభయ తారకమగు, మెప్పు గలుగు!
తిరుణహరి విను భువిదానవీర మహిమ!
45*
ధన్య జన్ములు భువిరక్త దాన పరులు-
నిరత వితరణ శీలురు-వివిధ దాన-
ములనుజేయుట కెప్పుడు ముందునుంద్రు!
తిరుణహరి విను భువిదానవీర మహిమ!
46*
నేత్ర ధాతలు, నవయవ-నెత్రుదాత-
లన్నదాతలు-ముక్తియే లబ్ధిగాగ-
సన్నిధిజేర్చి మన్నించు సామి కృపను!
తిరుణహరి విను భువిదానవీర మహిమ!
47*
నిరత వితరణ శీలురు-నీతి మతులు-
దేహి – దేహతత్వముదేల్చు-ధీవిశేష-
ఈవితో తావులీనుచు నింపుగొంద్రు!
తిరుణహరి విను భువిదానవీర మహిమ!
48*
రుధిర దానవీరుడె భువి సుధలు గురుయు!
నేత్ర దానవీరుడు చను-నేత్రముండు!
తాసజీవుడైగాంచు పిదప తరంబు!
తిరుణహరి విను భువిదానవీర మహిమ!
49*
వెలయు సకలదానాలలో వేడ్కవెంట-
సుళువుగా రక్తదానంబు సుఖమునిచ్చు!
వేయి నోళ్ళపొగడ్తలు వినగముదము!
తిరుణహరి విను భువిదానవీర మహిమ!
50*
బ్రతికి రక్తదానమునొక్క బ్రతుకు నిలిపి-
చనియు నేత్రదానముచేత శాశ్వతముగ-
వెలుగ తనకనుల్ స్ఫూర్తిగా వెలయు కీర్తి!
తిరుణహరి విను భువిదానవీర మహిమ!
51*
రక్తమవయవదానాలు రక్షితముగ-
మార్పడికి సురక్షితమైన మార్గగతిని
దాత కీర్తిదేహముదిర్గు-ధరణిమీద!
తిరుణహరి విను భువిదానవీర మహిమ!
52*
తనువువీడియుచను నాత్మ-ధాతపేర-
మరొక తనువును నేత్రాది మార్గ గతుల- ధాత జీవించు పుణ్యంపు ధనము గొనును!
తిరుణహరి విను భువిదానవీర మహిమ!
53*
వరుస దానాలలో రక్త వారసత్వ-
గ్రూపు ప్రవహించుటయెవింత-గొలుపుమరొక తనువులో సామ్యతగ రక్త తరణి సాగు!
తిరుణహరి విను భువిదానవీర మహిమ!
54*
వరుస వ్రతమయ్యెదానముల్ వసుధయందు
నాడు నేడును రేపట నడవడికగ- నేత్ర దానము కన్నప్ప నేమమయ్యె!
తిరుణహరి విను భువిదానవీర మహిమ!
55*
వరుస రక్తదానము క్రొత్త వ్రతముగాగ- మూత్ర పిండదానాదులు ముందుబడియె!
మరొక వడవోత పిల్టరు మార్చినట్లె!
తిరుణహరి విను భువిదానవీర మహిమ!
56*
మంచి గుణమె కులముగాగ మనసు విరిసె!
మానవతయె సమ్మతముగా మనుజు కీర్తి-
విధిగ విశ్వ గ్రహాంతర వీధి సాగె!
తిరుణహరి విను భువిదానవీర మహిమ!
57*
సేకరణ పరికర సృష్టి చేత-సులభ-
మయ్యెను పరీక్ష నాళిక మార్గమందె-
నూత్న వ్రత పరికర సృష్టినుర్వి గలిగె!
తిరుణహరి విను భువిదానవీర మహిమ!
58*
సులభసేకరణలు సాగె-సునిశితముగ-
సున్నితపు మార్పిడి క్రియ సూత్రబద్ధ-
నిపుణతలుగల్గె! చిటికెలో నిచ్చె ఫలము!
తిరుణహరి విను భువిదానవీర మహిమ!
59*
రామ రక్ష కంపూటరు ర్యాము రక్ష –
గణన గలిగె సురక్షిత గ్రహణ శక్తి!
అతికి, విడదీయు నైపుణ్యమతిశయించె!
తిరుణహరి విను భువిదానవీర మహిమ!
60*
రక్తధాతలుమెచ్చు మార్గమున సాగు-
నేత్ర ధాతలు మెచ్చు త్రినేత్ర సములు-
వైద్యనారాయణులు-శస్త్రవైద్య ఘనులు!
తిరుణహరి విను భువిదానవీర మహిమ!
61*
శివుని దీక్షకంపూటరు చిప్పుగాగ-
భువి సుభిక్షమేకాగ్రత బూను క్రియల-
ఆస్తినాస్తియు, సుకృతమాసక్తిగూర్చె!
తిరుణహరి విను భువిదానవీర మహిమ!
62*
గుప్తమౌ సహజ ప్రకృతి గుణవిశేష
గణన చేరువయ్యెను, సైన్సు గలుగు మేలు-
భవిత దర్శించు శోధనల్ ప్రస్తుతంబు!
తిరుణహరి విను భువిదానవీర మహిమ!
63*
ధనము కన్నను విజ్ఞాన ధనము మిన్న! కులము కన్నను నరుని సద్గుణమె మిన్న!
దానముల మిన్నగ రుధిర దానఫలము!
తిరుణహరి విను భువిదానవీర మహిమ!
64*
మనుజుడొంటరి మార్గాన మనగ లేడు!
ఇరుగు పొర్గునోర్వగలేడు హితవటంచు!
జీవితము గడ్పు సరి సంఘజీవిగానె!
తిరుణహరి విను భువిదానవీర మహిమ!
65*
సంఘ కట్టడి శాసన చట్ట పరిధి-
మీరజూచి నీతినిదల్చి మితముగూర్చు-
క్రియల కొనసాగు తగు పుణ్య కీర్తి కాంక్ష!
తిరుణహరి విను భువిదానవీర మహిమ!
66*
చట్ట పరిధి, సేద్యము వైద్య చరిత పుటల-
సాగుటే నీతి యుపకార సాధనముల!
తన్ను మాలిన ధర్మంబు దలచునెటుల!
తిరుణహరి విను భువిదానవీర మహిమ!
67*
శ్రేష్ఠ సహజీవనమె దేశ శ్రేయమయ్యె!
చేతలో మాటలో గనదగు క్షేమమయ్యె!
తలచు సాధన త్యాగమై తళుకుమనియె!
తిరుణహరి విను భువిదానవీర మహిమ!
68*
మాట దప్పుట మరణ సమానమనిరి!
సర్వమును వీడి సాగిరి సత్యవ్రతము!
దాన ధర్మంబులే ముక్తి దాయకకముగ!
తిరుణహరి విను భువిదానవీర మహిమ!
69*
శ్రద్ధ గలిగిన త్రికరణ శుద్ధి గలుగు!
జీవితత్వమెరిగి పుణ్య ప్రీతి గలిగి-
దానికై దానమొనరించి దాతలైరి!
తిరుణహరి విను భువిదానవీర మహిమ!
70*
ధర్మ యుక్తమై పురుషార్థ దారి సాగి!
జన్మ సార్థకమగు నట్లు-జగతి బ్రతుకు!
విజ్ఞులును దానపరులైరి విశ్వమందు!
తిరుణహరి విను భువిదానవీర మహిమ!
71*
పూని పురుషార్థ సాధన స్ఫూర్తిగొనుచు-
భారతీయపురాణాల బాట నడచి-
అడిగినది లేదనకదానమిడగ జనిరి!
తిరుణహరి విను భువిదానవీర మహిమ!
72*
భక్తి శ్రద్ధల దురితంపు భయము వీడు-
భయమువీడగ మదిమాయ భ్రమలు దొలగు!
భ్రమయు దొలగిన ధనపాతరలను బంచు!
తిరుణహరి విను భువిదానవీర మహిమ!
73*
వెళ్ళిపోవునాత్మయు దేని వెంటగొనదు!
వదలి పోయినదెవ్వరి వద్దజేరు!
ఎట్లు వినియోగమగు -ఆత్మ లెక్కగొనదు!
తిరుణహరి విను భువిదానవీర మహిమ!
74*
నూరు చేతులనార్జించు సొమ్ములెల్ల –
వేయిచేతుల పంచగా వెలయు కీర్తి!
వితరణము విత్తమున్ననే వేడ్క సాగు!
తిరుణహరి విను భువిదానవీర మహిమ!
75*
వయసు పద్దెనిమిదేడుల వారు మొదలు-
అరువదేండ్ల లోపున్ననే-అర్హులంత-
పూని రుధిరదానము జేయ పుణ్యమగును!
తిరుణహరి విను భువిదానవీర మహిమ!
76*
సేకరణ నియమంబున-చేరువారి-
అర్హతలుజూచి యారోగ్యవంతులైన-
ధాతలను ప్రోత్సహించు విధానముండు!
తిరుణహరి విను భువిదానవీర మహిమ!
77*
రగ్మతలు గల్గు వారలు రుధిరమిడగ-అనుమతించబడరు-తగునర్హతలను-
టెస్టు జేసియే వైద్యులు స్వీకరింత్రు!
తిరుణహరి విను భువిదానవీర మహిమ!
78*
రోగ రహితులైన లేదు రోకుటోకు!
బలము పుష్టి తుష్టియు గలుగ ఫలము మెండు!
అర్హతలులేని రక్తంబు – అసలుకెసరు!
తిరుణహరి విను భువిదానవీర మహిమ!
79*
అనుమతిని బట్టి సేకరణానుకూల-
చోటులో రక్తమునుదొర్కు-వైద్యు-
చీటియాధారముగని దెచ్చేటి వీలు!
తిరుణహరి విను భువిదానవీర మహిమ!
80*
ప్రభుత యనుమతిగల రక్త బాంక్ సురక్ష-
హామిగలిగిన లేబిలు వాస్తవములు-
గ్రూపు తేదీ వివరముల, గుర్తులుండు!
తిరుణహరి విను భువిదానవీర మహిమ!
81*
వ్యాధి గ్రస్తులును-దురలవాటు రోగు
లర్హులే గారు బలహీనులైనవారు-
రక్తమిడుటేల? యత్నింప రిక్తశ్రమయె!
తిరుణహరి విను భువిదానవీర మహిమ!
82*
సులభ సేకరణార్థమై జూచు విధము-
దాత వైద్యులు నుభయత్ర తగినరీతి-
సేవలు లభించు- ఎన్నెస్సెస్ శిబిర వసతి!
తిరుణహరి విను భువిదానవీర మహిమ!
83*
వైద్య సమ్ముఖ నికషల వైనమరసి-
నిపుణులు సురక్షిత నిధి స్వీకరింత్రు!
సేకరణలొప్పు ధాతల స్వేచ్ఛవెంట!
తిరుణహరి విను భువిదానవీర మహిమ!
84*
పదిల పరచని రక్తంబు పాడుగాగ-
భద్రతా సీలు లేనిది భయముగూర్చు!
విశ్వసించక సుధయైన విషసమంబె!
తిరుణహరి విను భువిదానవీర మహిమ!
85*
ఎయ్డ్సురుజనిరోధక శక్తి నెండగట్టు-
మూలకణశోధనలు సాగె మొలక దశనె!
కల్తి రక్తాన నన్నింట గలుగు హాని!!!
తిరుణహరి విను భువిదానవీర మహిమ!
86*
కల్తి రక్తంబు ప్రాణాంతకంబుగాన-
ముందు వెన్కచరిత్ర సమూలమెఱిగి-
సీలు లేబిల్లు జాగ్రత జేయమేలు!
తిరుణహరి విను భువిదానవీర మహిమ!
87*
వలదు-ఊహలపోహలు-వైద్యునాజ్ఞ-
బూని,యాతనియాధ్వైర్యముననె రోగి-
రక్తమెక్కించువిధులు జాగ్రత్తయగును!
తిరుణహరి విను భువిదానవీర మహిమ!
88*
వివిధ సంస్థల స్వచ్ఛంద విశ్వరూపు!
జూడనాశ్చర్యమే-ముందుచూపు ప్రభుత-
రక్త-నిధుల బాంకర్లదే రామరక్ష!
తిరుణహరి విను భువిదానవీర మహిమ!
89*
రక్తమివ్వవచ్చును-శిబిరాలు జేరి-
వైద్యనిలయాల- నిర్ణీత వార్డులందు
నిపుణులుంద్రు సేకరణలు నెఱపుచుంద్రు!
తిరుణహరి విను భువిదానవీర మహిమ!
90*
రక్తమివ్వగా రావచ్చు రాక పోక-
ముప్పది నిమిషాలె బట్టును-ముదముగాను!
పుష్టికరమైన తిండిచే పూర్ణ సిద్ధి!
తిరుణహరి విను భువిదానవీర మహిమ!
91*
మందులవసరమే లేదు ముందు వెనక-
జాగ్రతల్ గూర్త్రు వైద్యులు జాలమేల!
రక్త దాన ప్రక్రియలు సురక్షితములు!
తిరుణహరి విను భువిదానవీర మహిమ!
92*
సేకరణ పావులీటరే స్వేచ్ఛవెంట-
బొప్పి కట్టదు, సూదంటు నొప్పిరాదు!
రికవరి సులభసాధ్యము ఫికరు లేదు!
తిరుణహరి విను భువిదానవీర మహిమ!
93*
రక్త దానము క్షతగాత్రు రక్షగాగ-
జాగు సేయక పొందు మా యాగఫలము!
పుణ్య యోగమిదియె! జన్మ పుణ్యధనము!
తిరుణహరి విను భువిదానవీర మహిమ!
94*
ఆయురారోగ్య దాయక మమృత సేవ!
తనువు చెలిమెనూరెడు రక్తధార నూత్న-
చేతనావృతాంతర శక్తి తేజరిల్లు!
తిరుణహరి విను భువిదానవీర మహిమ!
95*
ఆపరేషనులో రుధిరార్థులకును-
వరుస బాటప్రమాదాల పరిసరాల-
గాయపడిన వారికి, మేలు గలుగు చుండు!
తిరుణహరి విను భువిదానవీర మహిమ!
96*
రక్షకులకు కుటుంబ సంరక్షణేది?
సైనికులకు రుధిరావసరము బెరిగె! ధాతలెందరో దీనికై తరలవలయు!
తిరుణహరి విను భువిదానవీర మహిమ!
97*
రక్త దానముజేయు కర్తవ్య విధికి-
భరతమాత యాజ్ఞ ప్రజా భారమయ్యె!
జాతి గౌరవశ్రీ నిలుప-జగతి కీర్తి!
తిరుణహరి విను భువిదానవీర మహిమ!
98*
అధిక కీర్తిమంతుడు ధాత-అర్హడైన
అన్న దాత – విద్యాదాత ప్రాణధాత!
విశ్వ రూపుడే విజ్ఞాన విత్తధాత!
తిరుణహరి విను భువిదానవీర మహిమ!
99*
అర్హుల బరువు కేజీలు నలుబదైదు!
వయసు పద్దెన్మిది మొదలు -అరవదేండ్లు!
ధాతలారోగ్యవంతులై దనరవలయు!
తిరుణహరి విను భువిదానవీర మహిమ!
100*
రక్త హీనుతరమ? జీవి రక్షజేయ!
కండగలవాడె మనుజుడు-అండదండ!
రక్త పూర్ణులే-రుధిరార్థి రక్షరేఖ!
తిరుణహరి విను భువిదానవీర మహిమ!
101*
రక్త బలమున్ననాటిదే రంగుపొంగు!
బ్రతుకు రక్తహీనతచేత బడలుదాక-
ఉన్ననాటిదానము-లేమినుపకరించు!
తిరుణహరి విను భువిదానవీర మహిమ!
102*
ఎట్టివారైన నాపద మెట్టియుంద్రు!
ప్రాణధాతను మరువదే ప్రాణియైన-
రక్తదానంబుజేయ శ్రీరామరక్ష!
తిరుణహరి విను భువిదానవీర మహిమ!
103*
రక్త ధాతకు భీమాది రాయితీలు!
ఐదు వేలు రిస్కున, నిర్వదైదువేలు!
టాక్సుమాఫియు-సత్కీర్తి టాకు కీర్తి!
తిరుణహరి విను భువిదానవీర మహిమ!
104′
యువత దానధర్మాసక్తినుద్యమింప-
హెల్తు శిబిరాల నుపకారమెచ్చు-చూడ-
నేటియువత రేపటిపౌర నేతలనగ!
తిరుణహరి విను భువిదానవీర మహిమ!
105*
బ్రతుకునావ చుక్కానిగా, ప్రభుత గలుగ-
యువత జాతీయ సేవచేయూత గాగ!
ప్రజల మేల్గోరు జాతీయ పథకసేవ!
తిరుణహరి విను భువిదానవీర మహిమ!
106*
జనని, జనకులపైభక్తి జనుల భక్తి-
దైవభక్తి సద్గురు భక్తి అతిథి భక్తి-
దేశ భక్తి ధాతనుతీర్చి దిద్దు శక్తి!
తిరుణహరి విను భువిదానవీర మహిమ!
107*
జగతి ధాత పాత్రనుమించు జన్మకేది?
సూత్రధారి నాటకలీల-సూచి, ధాత
దైవ ప్రతినిధి-సంస్కృతి దనరు విధుల!
తిరుణహరి విను భువిదానవీర మహిమ!
108*
శుభము దాతృత్వమును మెచ్చు శ్రోతలకును!
శుభము శతకపాఠకులకు సుఖము శాంతి!
శుభము రుధిర ధాతలకు శుభము-శుభము!
తిరుణహరి విను భువిదానవీర మహిమ!