శ్రీ రామనరసింహనీకునీరాజనములు శతకము
(తే.గీ.)
1*
శ్రీనృసింహదేవ! తనువు చిత్తములను
శాశ్వతమ్మునెఱుగ లేను సాగు ఆత్మ
నేనుగా దెల్పు నీగీత నిత్య సేవ్య!
హారతి గొనుమ నాంపల్లి నారసింహ!
2*
నేను దేహంబుకానని ఎఱుకగల్గె
నేను మెదడుగానేకాను వెలుగునాత్మ
పుంజమంచు సద్గురురాయ పూజ్యవాక్కు!
హారతి గొనుమ నాంపల్లి నారసింహ!
3*
ఆత్మ నేనైతె నావెగా తనువు మనసు!
మనసు ఆంగ్లాన మైండుగా మరొక పదము!
అరయగానాత్మలో పరమాత్మ వీవు!
హారతి గొనుమ నాంపల్లి నారసింహ!
4*
తనువు గుడిలోన భద్రమై దనరు మనసు
మనసుగుడిలోన దీపమై మసలునాత్మ
ఆత్మగుడిలోన నీయున్కి తాత్వికంబు!
హారతి గొనుమ నాంపల్లి నారసింహ!
5*
ద్వైతమద్వైత వైశిష్ఠ్య మైన దారి
తేలిపోయెను నీదివ్య తేజ మహిమ!
గురునిదయనాజ్ఞ చక్రాన గుర్తు గనగ
హారతి గొనుమ నాంపల్లి నారసింహ!
6*
ఎంత తరచినా విన్నను ఎఱుక గల్గ
గగనమేయయ్యె నీభక్తి గమన యోగ
మందు నిశ్చలముగా సుంత మనసు నిలిచె!
హారతి గొనుమ నాంపల్లి నారసింహ!
7*
కదలనిమదిలో అరిషడ్వర్గమ్మునణగు
దానికైయింద్రియమ్ముల తగుగకట్టి
అంతరింద్రియమదినిల్ప నగును సుళువు!
హారతి గొనుమ నాంపల్లి నారసింహ!
8*
మనసు నిల్చి సంకల్ప సమాదిదనర
నీదు సమ్ముఖమున బతుకు నిగ్గుదేలు!
ఆత్మనంతర్ముఖముగాగ నడుప వీలు!
హారతి గొనుమ నాంపల్లి నారసింహ!
9*
సాగు నిరంతర సాధన సంయమనము
సంయమిగజేయు తనకుతా సమయమంత
మిగులకుండ గడపుటయే మిగులముదము!
హారతి గొనుమ నాంపల్లి నారసింహ!
10*
పరమ బ్రహ్మ ఆనందము పైన నీదు
సచ్చిదానందమౌదీప్తి సద్గతిగను
జన్మరాహిత్యమౌనాత్మ జాగృతమ్ము!
హారతి గొనుమ నాంపల్లి నారసింహ!
11*
దేవ!దేవాదిదేవుడ! దివ్యతేజ!
బాలప్రహ్లాద రక్షక! భక్తవరద!
కనక కశ్యపుజీల్చితో గడపపైనె!
హారతిగొనుమ నాంపల్లి నారసింహ!
12*
కశిపు వరగర్వమునబొందె కావరమ్ము
తానెదైవంబుగా గొల్వ దగినవాడ
ననుచు శాసించె హింసించె భువనతతుల!
హారతి గొనుమ నాంపల్లి నారసింహ!
13*
సోదరునిజంపె హరియని శోకయుక్త
మూర్ఖతయుగల్గ ముల్లోక ములను జుట్టె!
లేడు హరియని తనపాట పాడుమనియె!
హారతి గొనుమ నాంపల్లి నారసింహ!
14*
గుడిని పూజలు తనవనె గురుల చేత
బడిని పఠనపాఠ్యము తనపలుకుబడిగ-
గురుల శాసించె తనయుని గూర్చి వగచె!
హారతి గొనుమ నాంపల్లి నారసింహ!
15*
ఒక్కగానొక్క కొడుకని మక్కువెసగ
శత్రు పాటబాడకుమని చాలదెలిపె
బ్రహ్మ జనకనిన్ ద్వేషించె పద్మనాభ!
హారతి గొనుమ నాంపల్లి నారసింహ!
16*
హరిహరనీదు నామంబు నడ్డుకొనుచు
కొడుకు నిందించె చెరబెట్టి కొట్టిజంప
భటులశాసించె చావని బాలు డాయె!
హారతి గొనుమ నాంపల్లి నారసింహ!
17*
వరుస శిక్షలమలుజేసి వల్లగాక
చేరి భటులంత మ్రొక్కిరి చేతగాక
తానెసంహరింప దలచి తండ్రి గుమిలె!
హారతి గొనుమ నాంపల్లి నారసింహ!
18*
ఆయుధముగబుట్టె కొడుకు హరినిగొలిచె!
మానసికచిత్ర వధ పితా మాతలకును!
నిన్నుజూపగా బాలుని నిగ్గదీసె!
హారతి గొనుమ నాంపల్లి నారసింహ!
19*
అంతటను హరిగలడన్న మాటమాను
స్తంభముననున్నడాహరి డింభకుండ?
యనగ వల్లెయనెసుతుడు నమ్మకముగ!
హారతి గొనుమ నాంపల్లి నారసింహ!
20*
ఒక్కవేటున కంబంబు వ్రక్కలయ్యె
ఉగ్రనారసింహాచ్యత రూపు వెడలి
రాగ ఖలుడహో బిలమున దాగెనంత!
హారతి గొనుమ నాంపల్లి నారసింహ!
21*
వెంట దరుమితివట దేవ వెఱచె జగతి
అథము పీడదొల్గునటంచు ముదముజెంద-
బిలముజొచ్చి గర్వినిమరి పిలిచి నావు!
హారతి గొనుమ నాంపల్లి నారసింహ!
22*
పిరికి పంద పూర్వము మర్చి ప్రేలెగాని
జయుడు వేచెనీ ద్వారాన సత్వరంబె
కశిపు దెచ్చెయాతనిఇంటి గడపపైకి!
హారతి గొనుమ నాంపల్లి నారసింహ!
23*
హే నఖాయుధా కంబజా కేసరీంద్ర!
జీల్చితి వతిభయంకరముగా జీవతతులు-
మేలుమేలన దేవతల్ పూలుగురియ!
హారతి గొనుమ నాంపల్లి నారసింహ!
24*
సంధ్య సమయమూ శత్రువు సమరమనడు
కుక్కినకణజీవిగ జచ్చె క్రూరబలుడు!
భయము చేకంపమొందెను బాలుడంత!
హారతి గొనుమ నాంపల్లి నారసింహ!
25*
నిన్ను శాంతింప జేయగా నెదరువచ్చి
నిల్చిమొక్కువారెవ్వరని సురలంత-
లక్ష్మిదేవిని రప్పించి లబ్ధిగనిరి!
హారతి గొనుమ నాంపల్లి నారసింహ!
26*
లక్ష్మి వేడగా శాంతించి లయమునాపి
బాలునెదజేర్చి దు:ఖమ్ము భయముబాపి
కరుణ దీవించితివి పొగడెలోకమ్ములన్ని!
హారతి గొనుమ నాంపల్లి నారసింహ!
27*
రాజ్యములుసాగె భక్తిపురాణనీతి!
లోభికై వరాహస్వామి ప్రాభవంబు
క్రూర గర్వికై పూర్ణావతార సృజన!
హారతి గొనుమ నాంపల్లి నారసింహ!
28*
దేవ బ్రహ్మమహేశ్వరుల్ తెలియరైరి
బ్రహ్మవరవిరుగుడురూప బవర చర్య-
వామనావతారానికి వరుస సూచి!
హారతి గొనుమ నాంపల్లి నారసింహ!
29*
మనిషి మృగము చెరిసగం మహిత విజ్ఞ
మూఢవిశ్వాశముల భక్తిముక్తిదమ్ము!
రామకృష్ణావతారాల రాణకెక్కె!
హారతి గొనుమ నాంపల్లి నారసింహ!
30*
క్షితిని నవనారసింహ సుక్షేత్ర వరుస
నొకటి యాదాద్రి పరిసర ప్రాకటములు
వివిధ తీర్థంపు జాతరల్ వెలసె సామి!
హారతి గొనుమ నాంపల్లి నారసింహ!
31*
పుణ్య పూరి జగన్నాథు పూర్వచరిత-
పురమునంటురోగము ప్రబల పూని యోగ
మూర్తివైనీవు వెడలగా ముప్పు దప్పె!
హారతి గొనుమ నాంపల్లి నారసింహ!
32*
పెద్దలానతి నిప్పుడు పెద్ధ సేవ
సాగెను కరోన కణ జీవి సమసిపోగ
వేగ రావయ్య యాదాద్రి యోగమూర్తి!
హారతి గొనుమ నాంపల్లి నారసింహ!
33*
జ్వాల నరసింహ వైరసుల్ కాల్చవేమి?
యోగ నృహరి కరోనార్పె యోగ్యతొసగు!
పంచనరసింహ! మాలోన మంచిబెంచు!
హారతి గొనుమ నాంపల్లి నారసింహ!
34*
గండబేరుండ నరసింహ గాయి గత్త
రలను మించెకణవిష రజము నరుని
లోనదూరెనా మరణమే లోకులకును!
హారతి గొనుమ నాంపల్లి నారసింహ!
35*
యజ్ఞ నరసింహ పరదేశ విజ్ఞ మాయ
అజ్ఞులనుజేసె భారత ప్రజ్ఞ మరచి-
శుభ్రతనుగూర్చు మారోగ్య సూత్రగతుల!
హారతి గొనుమ నాంపల్లి నారసింహ!
36*
ఉగ్రనరసింహ నవరుజనిగ్రహించు
శ్రద్ధ శుభ్రతరహితుల వద్ద వృద్ది!
శ్వాసనాళాన నిదిదూరు చంపివేయు!
హారతి గొనుమ నాంపల్లి నారసింహ!
37*
లక్ష్మి నరసింహ వైరసు లక్షణాలు
స్ఫష్టమొనరించు తగురీతి శాస్త్రవేత్త
టీక గనిపెట్టుటకిడు తదేకదృష్టి!
హారతి గొనుమ నాంపల్లి నారసింహ!
38*
శ్రీవరాహనృసింహమా భావమందు
విశ్వమానవకళ్యాణ విత్తనంబు –
నాటి వటముగాగ మదినలరజేయు!
హారతి గొనుమ నాంపల్లి నారసింహ!
39*
స్వామి కోటంచ నరసింహ సజ్జనాళి
పుణ్యగణననచే శక్తిపెంపొందజేసి-
రుజనిరోధించి సకలమున్ బ్రోవరమ్ము!
హారతి గొనుమ నాంపల్లి నారసింహ!
40*
దేవ సంతాన నరసింహ దీనబంధు!
కలుష కాళీయమర్ధనా కరుణ సిందు!
మందు లేనిరుగ్మతబాధ మాన్పుముందు-
హారతి గొనుమ నాంపల్లి నారసింహ!
41*
కణజ భూతపిశాచ రాకాసిమూక
రక్త బీజుని వలె వృద్ధి రాక పోక
నరుల నంటనీయక వేగనణచరమ్ము!
హారతి గొనుమ నాంపల్లి నారసింహ!
42*
జగతినాటికినేటికి జరుగు చరిత-
మునుల జాగ్రతల్ ప్రతియింట ముదమొసంగె!
సాగెనాచారవిధులట్లు సంఘమందు!
హారతి గొనుమ నాంపల్లి నారసింహ!
43*
పాత రోతగా కాలము పరుగులెత్తె!
క్రొత్త చేర్పున మంచివి కొన్ని తొలగి
కొంతచెడుదూరె కొందరి కోర్కెదీరె!
హారతి గొనుమ నాంపల్లి నారసింహ!
44*
శుచియు శుభ్రత పూర్వక శుద్ధి మడియు
చాందసముగాగ పెద్దల చాటు చెడుగు
క్రియలనాధునికతచాప కిందనీరు!
హారతి గొనుమ నాంపల్లి నారసింహ!
45*
రాసుకొని పూసుకొనితిర్గు రాత్రిపగలు
ఐక్యతనుదెల్పె క్రిములకునాటపట్టు
గాగరోగములుపంచుకొనగల్గు బతుకు!
హారతి గొనుమ నాంపల్లి నారసింహ!
46*
అంటురోగహేతు పరస్పరమంటుకొన్న
గజము దూరముండక ముప్పు గలుగనుండె!
పాతక్రొత్తలుకలబోసె బతుకు దెరువు!
హారతి గొనుమ నాంపల్లి నారసింహ!
47*
భుక్తి భోగముతోపాటు భక్తి యోగ
మవసరము సదాచారముల్ మానవతయు
సంస్కరణపూర్వకముగను సాగె జగతి!
హారతి గొనుమ నాంపల్లి నారసింహ!
48*
ఆపద మ్రొక్కు సంపదనాదమరచునట్లు
పాతగొప్పలు నూత్నవివాదములును-
భ్రష్టుబట్టించె శుభ్రతల్ భ్రమగ మిగిలె!
హారతి గొనుమ నాంపల్లి నారసింహ!
49*
ఏది మంచియో చెడుగేదొ ఎఱుక జేయు
ధర్మ సూక్ష్మమార్పులకవతారమెత్తి-
రమ్ముదేవ నీగీతార్థ మిమ్ము మరల!
హారతి గొనుమ నాంపల్లి నారసింహ!
50*
ఇంటనాశ్రమ జీవన నియమవిధులు-
వైరి వైరసు భయము నీభక్తి ధైర్యమిడగ
కాలతీర్పున నరజాతి కదల నిమ్ము!
హారతి గొనుమ నాంపల్లి నారసింహ!
51*(contd. భాగముతో సంపూర్ణం)
కాళికాదేవిచేదుష్ట కణజ మూక-
రక్త బీజుని పేరవిముక్తమాయె!
మరలవచ్చెనీనాడిట్లు మనిషిజొచ్చె!
హారతి గొనుమ నాంపల్లి నారసింహ!
52*
లీలవెయించు సింగోట లింగరూప!
సూక్ష్మవిషబీజ విర్గుడు సూచినిమ్ము!
తిర్గుబోతుతనంబాపి పెరుగనిమ్ము!
హారతి గొనుమ నాంపల్లి నారసింహ!
53*
సురస సింహికలనుగూల్చి శూరహనుమ-
తల్లి సీతమ్మ జాడను తమకుదెలిపె!
యాదమునిగొల్చె కలిసంతు యూధమణచె!
హారతి గొనుమ నాంపల్లి నారసింహ!
54*
మొదటి తాతలమడి నాటుమోటుగాగ
ఎంగిలిభుజింపు నవనాగరికత నీటు!
దీని వంచిచక్రముదిప్పు దీనపోష!
హారతి గొనుమ నాంపల్లి నారసింహ!
55*
ఏమి మిగిలె సర్వస్వమునీల్గె మట్టి
చెట్టునాటినయట్లిమ్ము చేతనమ్ము!
సాధు సంస్కృతి కట్టడుల్ సాగనిమ్ము!
హారతి గొనుమ నాంపల్లి నారసింహ!
56*
మతమతంబున పరిశుద్ధి మాటగలదు!
హితహితంబున శుచిశుభ్ర రీతి గలదు!
ముడియు బడెమడి భుక్తికి ముక్తిదాక!
హారతి గొనుమ నాంపల్లి నారసింహ!
57*
పైమెరుగుకోసమై బ్రతుకు పడవమునిగె!
కొంప దాటగ నేరమై రొంపదాడి!
ఆత్మ – పరమాత్మ శోధన నలరనిమ్ము!
హారతి గొనుమ నాంపల్లి నారసింహ!
58*
వేషబాషలు దేహాళి వేడ్కవేరు!
బుద్ది సుద్ధుల విజ్ఞాన వృద్ధి వేరు!
అంటరానివంటగ హాని తంటదీర్చు!
హారతి గొనుమ నాంపల్లి నారసింహ!
59*
అదియునొక్కటమంచిదై ఆత్మ భోధ
బుద్ధి వచ్చెను శుభ్రతల్ వృద్ధిజొచ్చి
కల్మశముగడ్గ సాగెనో కల్కిరూప!
హారతి గొనుమ నాంపల్లి నారసింహ!
60*
ముక్కుమూసుకు కూర్చొని ముదముబొందు
బ్రతుకు-శుద్ధితిండినిగూర్చి భయముదీర్చు!
కడప దాటక ధ్యానింతు కంబజాయ!
హారతి గొనుమ నాంపల్లి నారసింహ!
***********************
61*
పుడమి సారవంతముజేయు పూని సేంద్రి
యములు గూడగట్టియు పెంట జార
గొట్టి పొలమును పండించు గొప్పలేవి?
రామనరసింహనీకునీరాజనములు!
62*
పొలము బలముబీల్చెడు పంట ప్రోదిజేయ
విషరసాయనములచేత వికట సేద్య-
పైక మునుగూర్చ మోజాయె! పరమ పురుష!
రామ నరసింహ నీకు నీరాజనములు!
63*
రుగ్మతలు జేరె నౌషద రుజువు లెగసె
మూలికౌషద ములుపిరముగను గొనగ
పేదలకు నీదునామమే పెద్ద దిక్కు!
రామనరసింహనీకునీరాజనములు!
64*
పాతరోతంచు నూత్నముల్ పరగవృద్ధి
విషరసాయన ధినుసుల నేమి మేలు
వాస్తవము దెల్పి బ్రోవుమా వాసుదేవ!
రామనరసింహనీకునీరాజనములు!
65*
అవని ఆశానిరాశలు నవసరంబె!
మానసికము శారీరకమందు నలత
శాంతిలేక సాగదు కదా సగటుబతుకు!
రామనరసింహనీకునీరాజనములు!
66*
ధనమె మూలమై మేము నీధ్యాసమరచు
మాట నిజము నీదగుభక్తి మార్గ గమన
మందు సాగుబాటును సాగ మంచిజరుగు!
రామనరసింహనీకునీరాజనములు!
67*
రోయు డబ్బు కోసము సదా భోగి పిదప
రోగియై డబ్బునవసరముగనురోయు
దారి ఎదురేగిదోయును ధనపిశాచి!
రామనరసింహనీకునీరాజనములు!
68*
కర్మ కరిగించి భక్తుల కరుణ జూపు
కాంక్షనీయందు మరలించి క్రాంతి నొసగు
భక్తి గలిగించి వరముక్తి బాటనడుపు!
రామనరసింహనీకునీరాజనములు!
69*
పుడమి కాలుష్య భరితమై పుట్టె విషము
నరుల విరబారు చుండెను హరిహరుండ!
లభ్యమొనరించు శుద్ధి జనాభ తిండి!
రామనరసింహనీకునీరాజనములు!
70*
తెలిసినాకొద్ది మాకేమి దెలియదనెడు
విషయమే దెల్సెనని నాటి విజ్ఞులనిరి!
కలుష విష – విరుగుడు వృద్ధి కలుగనిమ్ము!
రామనరసింహనీకునీరాజనములు!
71*
కల్తి దోషంబు మిక్కిలై కలియుగాన
కలుషములకు తోడయ్యె కలిమికాంక్ష!
వెడలు విషవైరసుల నుండి వేగగావు!
రామనరసింహనీకునీరాజనములు!
72*
కల్గు భోగాలు రోగాలు కలహకలత
వివిధ సరిహద్దు లనుమీరు విధుల ఘోష!
ధర్మహానిచే గలిగెడు దాడి గనుము!
రామనరసింహనీకునీరాజనములు!
73*
వైద్యమున గల్గు ఔషద వస్తు నికర
మందు కల్తి రక్తము కల్తి మాటెగాని
దాని సాగనీయని మంచితనమొసంగు!
రామనరసింహనీకునీరాజనములు!
74*
అసలు నకిలీలు అన్నింట అధికమవగ
మనిషి బ్రతుకు వాయిదా మాయమర్మ
మెరుగలేమయ్య మముబ్రోవు మేటివైద్య
రామనరసింహనీకునీరాజనములు!
75*
ప్రకృతి కాలుష్యమును జూడ బ్రతుకు భయము!
నీరు భూమివాయువు నింగి నిప్పుగూడ
కలుషములు జల్లె కృపజూపి గావుమయ్య!
రామనరసింహనీకునీరాజనములు!
76*
సులభమని కృత్రిమాలతో సుఖముబొంద
మొదటికేమోసమని తెల్సి ముదము వీడి
ప్రకృతి సిద్దంబులనుగోరి పరుగు సామి
రామనరసింహనీకునీరాజనములు!
78*
కడలి ఇసుమంత చెత్తైన కడకు ద్రోయు
నదుల కాలుష్యమున జనం నలుగు పైగ
చెత్త సమకూర్చు మా చిత్త వృత్తి మార్చు!
రామనరసింహనీకునీరాజనములు!
79*
చెట్టు గొట్టిన దేలిసెను చేటు విధము
మరలబెంచుయోచన సాగు మార్గమేది!
మొక్క వృక్షమయ్యెడు దాక మొరలు వినుము!
రామనరసింహనీకునీరాజనములు!
80*
వాయువోష్ణతతోప్రాణ వాయు దరిగె
దాని కొనిబీల్చుటకు కూడ ధనము లేమి!
పంచభూతకాలుష్యమై బ్రతుకగలేము!
రామనరసింహనీకునీరాజనములు!
81*
పంచభూతకాలుష్యాలు పాదుకొన్న
వింతరోగాలు ముసిరిన విశ్వజీవ
లయము సూచించు నరజాతి రయమె మొదలు!
రామనరసింహనీకునీరాజనములు!
82*
వేగ పరియావరణ శుద్ధి వెలయజేయ
బూనవలె మానవాళిదోబూచులాపి
గాసి దప్పు సమైక్యతన్ గదలమేలు!
రామనరసింహనీకునీరాజనములు!
83*
కలుష ధూమావృతము మేఘ గగన గామి
జీవజాలమూపిరులార్పు చీడపీడ!
శ్రమవృధయె పారిశ్రామిక భ్రమలు జూడు!
రామనరసింహనీకునీరాజనములు!
84*
ఆట పోరాటముల వైరసాటసాగె
చంపితాజచ్చు మూర్ఖత జరుగు చరిత-
భవిత పట్టింపులెవ్వారి బాధ్యతగును!
రామనరసింహనీకునీరాజనములు!
85*
బ్రతుకు శుభ్రత శౌచాది భద్రతనక
ఏమి లబ్ధి కరోన గాలేమిజేసె?
విజ్ఞ మూఢమునొకమట్టు వేసికట్టె!
రామనరసింహనీకునీరాజనములు!
86*
చాందసాలటుంచియు తుచ్ఛచందములను
కల్మిడినిదూరు వైరసుల్ కలతరేపె
మాయికామాయికులహాని గాయినాపు!
రామనరసింహనీకునీరాజనములు!
87*
మనిషి లోపదారులదూరు మారి వైరి
కణజములు ఎయిడ్స్ కరోన గాకనొకటి
సన్నిహితతత్వమెడబాపెనన్న నిజము!
రామనరసింహనీకునీరాజనములు!
88*
మానవుని యత్నమేముందు మంచిఫలము
పొందవలెనన్న నీకథా ప్రోత్సహింప
గజముదూరాన పరిశుభ్ర గతుల సేవ!
రామనరసింహనీకునీరాజనములు!
89*
ఏడ్సుబోలెకరోనలు లెక్కలేని
వైరసుల్ గెల్కి వైరులు పైకివచ్చి
గావుపట్టేరు దీనుల గావుమయ్య!
రామనరసింహనీకునీరాజనములు!
90*
నీరధినిజిల్కి నప్పుడే నీరజాక్ష!
అణగదొక్కిన కణమెట్లు అధిగమించె!
కట్టడినిజేయు నీబాణ ఘాతమొకటె!
రామనరసింహనీకునీరాజనములు!
91*
ఆత్మదృష్టి గీతార్థమై అవనిమ్రోగె!
ఊర్ధ్వ దృష్టి సాగెడుభోధలుర్వి గలిగె!
తుచ్ఛ దేహసౌఖ్యాదుల ఇచ్ఛలణగె!
రామనరసింహనీకునీరాజనములు!
92*
దూరమెంతైన మానసమ్ చేరువగును!
ఆత్మలోభావనారూపమైన దేహ
మూహసేయగ వీలుండు మురిపెమలర!
రామనరసింహనీకునీరాజనములు!
93*
నేరమెవరిదైనను ఫలము నేకపంక్తి-
కుడువ మర్యాద కారణమడుగ రిత్త!
జరుగునదిమానకుండనే జరుగుసృష్టి!
రామనరసింహనీకునీరాజనములు!
94*
స్వచ్ఛత స్వేచ్ఛ సొంతమై సాగునిష్ఠ
కష్టమగు కట్టడందురా కలియుగాన
కర్మ ఫలితానుభవసిద్ధి కలుగుచరిత!
రామనరసింహనీకునీరాజనములు!
95*
శుచియు శుభ్రత లేకున్న సూక్ష్మకణజ
విషము చేతికంటు మొదట పిదప గొంతు
నూపిరి తిత్తుల తనసంతునుద్ధరించు!
రామనరసింహనీకునీరాజనములు!
96*
మంచిచెడు తూకమేసియు చూచుటేల?
మంచిబెంచితే చెడుతొల్గుమార్గమొదవు!
రెంట సుఖదు:ఖములమధ్య రేఖ విధియె!
రామనరసింహనీకునీరాజనములు!
97*
భారమేమగు సామాజిక దూరగతులు?
బతుకవలెనన్న దప్పని భద్ర హితులు!
పరులకోసమైననసరె పరగు విధులు!
రామనరసింహనీకునీరాజనములు!
98*
ఎఱిగి పదిమంది కంటించు నేరమునకు
శిక్ష లిబ్బడిముబ్బడి సేయ మేలు!
మనికొకమాట జెప్పెడు మార్గముండు!
రామనరసింహనీకునీరాజనములు!
99*
తాత సంస్కార వాసన తండ్రి కొడుకు
మనుమలకువచ్చునాస్తుల మార్పిడట్లు!
నాటుమోటైన సరి భక్తినలర చాలు!
రామనరసింహనీకునీరాజనములు!
100*
దుడుకు నాగరికత గోతి దూకవలదు!
నూత్ననాజూకు కావద్దు నూతిపాలు!
బతుకుటె తెలివి తదుపరి బలిమి కలిమి!
రామనరసింహనీకునీరాజనములు!
101*
పశులనాశ్రయింపగమాని వైరసాళి
నరులపీడింపసాగుట నదుపుజేసి
భయముమాన్పించు తగినట్టి భద్రతొసగు!
రామనరసింహనీకునీరాజనములు!
102*
కలిమి తెలివి బలిమియధికారముండి లేమి
మంచిచెడునొక్క పెట్టున మలిచి మడయ
జేయు మహమారి బ్రతుకులన్ మార్చివేసె!
రామనరసింహనీకునీరాజనములు!
103*
సంఘజీవి నాగరికత సాగు దారి-
మూతబడిపోయె కలకలం ముగియుదాక!
మ్రోగె వెనుదిర్గి యోచించు వేళఘఁటిక!
రామనరసింహనీకునీరాజనములు!
104*
ఆయురారోగ్యభారతి- వేద భూమి!
సాంప్రదాయ సంస్కృతి సదాచార చరిత!
పసిడి పిట్ట ప్రపంచపు పటమునందు!
రామనరసింహనీకునీరాజనములు!
105*
నూత్న పోకడవైరసుకూతకర్ర-
గాన పాతపద్ధతి జీవనానుకూల-
విధులుచేపట్ట తగుమేలు విస్తరించు!
రామనరసింహనీకునీరాజనములు!
106*
నీపురాణ పారాయణ నిష్ఠ మేలు!
గుండె తేలికపడు వైరిగుట్టుదెలియు!
ఖడ్గములపాట డేగాట గలుగుధిటవు!
రామనరసింహనీకునీరాజనములు!
107*
భక్తి దర్శింప హృదయంబు భద్రమగును!
తీవ్ర రుజకు నీతీర్థమే టీక ఇపుడు!
బ్రతుకు జాగరూకతయె ప్రథమచికిత్స!
రామనరసింహనీకునీరాజనములు!
108*
శుభము భారతీయులకెల్ల శుభకరమ్ము!
శుభము విశ్వమానవులకు సుఖముశాంతి!
శుభము శతకపాఠకులకు శుభయశంబు!
రామనరసింహనీకునీరాజనములు!