శ్రీ రాఘవ నీరాజన శతకము
(తే.గీ.)
1*
శ్రీశ! భద్రాద్రి నెలకొన్న చిన్మయేశ!
భద్రు డటగోరె నాలుగు బాహువులతొ
వెలసి తనపైన నుండగా వేడుకొనియె!
రామరాఘవా నీకు నీరాజనములు!
2*
తపమునకు మెచ్చి భద్రుని తనివిదీర్చి-
సీత వామాంకముననుండి సిరులు జింద-
వెలసితివి లక్ష్మణుడు తమ వెంటనుండ!
రామరాఘవా నీకు నీరాజనములు!
3*
అవనికొనసాగె బహుకాలాంతరమున-
మొదట పోకల దమ్మక్కమ్రొక్కులిడుచు-
గాంచినది నిన్ను గూడెంబు గదలిరాగ!
రామరాఘవా నీకు నీరాజనములు!
4*
ఆటవిక పూజలనుజేసి ఆరతిచ్చి
తాళఫలమిచ్చె దమ్మక్క తగినభక్తి
ఇప్ప పూప్రసాదముబంచి మెప్పుబొందె!
రామరాఘవా నీకు నీరాజనములు!
4*
దాపునే పుణ్య గోదారి దరసి పారు-
తీరమునసాగె సద్భక్తి తీర్థయాత్ర!
గాంచ – కంచర్ల గోపన్న కదలి వచ్చె!
రామరాఘవా నీకు నీరాజనములు!
5*
నిన్ను దర్శించిముదమందె నిత్య సేవ్య!
నీపురాణగానముజేసె నిండు భక్తి!
జనుల సహకారమున సేవ జరుపనెంచె!
రామరాఘవా నీకు నీరాజనములు!
6*
నీదు గుడిగట్ట సమకూర్చె నెన్నొ నిధులు
ప్రజల శ్రమదానమున పాలుబంచుకొనియె!
దివ్య ప్రాకారముననొప్పె దేవళంబు!
రామరాఘవా నీకు నీరాజనములు!
7*
వజ్ర హారాలు పతకాలు వరుస నగలు
కానుకలుగాగ జేయించె కనక సిరులు!
దాసదాసానుడై భక్తి దారి సాగె!
రామరాఘవా నీకు నీరాజనములు!
8*
నదిని లభియించె చక్రంబు నదియె శిఖర
మందు నిల్పగా నెంచి తాముందు నడిచి
ఇష్టమై తలమోసిప్రతిష్టజేసె!
రామరాఘవా నీకు నీరాజనములు!
9*
నిత్య కైంకర్యములుసాగు నిధులొసంగె!
నాటి వైభవ క్రమమెయీనాటికైన
ధరణి ప్రఖ్యాతిగడియించె దాసు చరిత!
రామరాఘవా నీకు నీరాజనములు!
10*
భక్తి పారవశ్యమె శత్రుయుక్తి కుట్ర-
తంత్రమయ్యెరాజోద్యోగి తలపు మరచె!
లక్షలారింటి కై ఖైదు శిక్ష గడిపె!
రామరాఘవా నీకు నీరాజనములు!
11*
అవని ఐశ్వర్యమయ రూప! ఆదివిష్ణు!
నాల్గు చేతుల నీరూపు నయన పర్వ-
ముగను దర్శించి భద్రుండు ముక్తినొందె!
రామరాఘవా నీకు నీరాజనములు!
12*
కోరినట్లుగ భద్రాద్రి కొండ కోన
రామనామ తారకమంత్ర ధామమయ్యె!
రామ దాసయ్యె గోపన్న రాగమెత్తె!
రామరాఘవా నీకు నీరాజనములు!
13*
భక్తిపాటలు పద్యాలు పల్లె-పల్లె
జనపదంబుల మార్మోగె జరుగు భజన
హనుమ మందిరంబులు హారతిడగ!
రామరాఘవా నీకు నీరాజనములు!
14*
అపర కుశలవ బృందాలె అవనిజుట్టి
నీదు కథ-గానములమది నిశ్చలముగ-
తమరి మూర్తిమత్వమె జనాదర్శమయ్యె!
రామరాఘవా నీకు నీరాజనములు!
15*
తండ్రి మాటకువిలువేదితతిమ కథల?
ఆలుమగలన్నదమ్ముల – అనకువేది?
ధర్మ పోరాటమున బుద్ధి దనరెనెచట?
రామరాఘవా నీకు నీరాజనములు!
16*
అరయ జనవాక్య పరిపాలనాద్బుతంబు-
సూచనాప్రాయముననేది? సురలు మునుల-
పుష్ఫవర్ష హర్షమెచట- పుణ్య చరిత!
రామరాఘవా నీకు నీరాజనములు!
17*
ఆలునీవెంటె-అనుజులు ఆజ్ఞలోనె-
భటులు-శత్రుసోదరులు నీభక్తి పరులె!
సరళరేఖగా నీధర్మ సరణి సాగె!!
రామరాఘవా నీకు నీరాజనములు!
18*
అనగననగ రామ మతిశయించె-
వినగవినగనీకీర్తియే విస్తరించె-
కనగ నీగుడిలేనట్టి గ్రామమేది!!!
రామరాఘవా నీకు నీరాజనములు!
19*
చూడగా వ్రాత శ్రీరామ చుట్టబడక-
లేఖలారంభమేకావు! లోకహితవె-
నీదు పేరట కొనసాగు నేటికైన!
రామరాఘవా నీకు నీరాజనములు!
20*
దొరుకదాకూడు నినుబిల్చు దారి యందు!
ఎదురులేని, బాణము-మాట- ఏకపత్ని!!
రక్షయనగ నీరక్షయే సాక్షమయ్యె!!!
రామరాఘవా నీకు నీరాజనములు!
21*
సూరు దాసుకబీరులు సూపినట్టి-
దోవలో దాసుసాహితీ సేవ సాగె!
దాశరథి శతకంబు,కీర్తనలు నిచ్చె!
రామరాఘవా నీకు నీరాజనములు!
22*
పూర్వజన్మకర్మమువెంట పురమువీడి
ఖైదిగా నిన్ను కీర్తించి కనగ వినగ
కనుచెమర్చని భక్తుల గనుట యరుదె!
రామరాఘవా నీకు నీరాజనములు!
23*
లక్షలారు చెల్లింపగాలక్ష్మణుండు
తమరు విచ్చేసినారనె తానిషపుడు!
తనువు నాత్మ వీడగబొందె దాసు ముక్తి!
రామరాఘవా నీకు నీరాజనములు!
24*
మరపురానిభక్తుడు జనుల మానసమున-
బ్రతికి యుండెనేటికి గుడి పర్ణశాల!
నగలు దాసుకీర్తినిజాటు నాల్గుదిశల!
రామరాఘవా నీకు నీరాజనములు!
25*
తమరి వరముచే గోపన్న అమరుడయ్యె!
గౌతమీ భద్రగిరియాత్ర ఘనతయయ్యె!
పుణ్య తీర్థమై క్షేత్రమై స్ఫూర్తి నొసగె!
రామరాఘవా నీకు నీరాజనములు!
26*
నాడు రామదాసుని చేత నడిచినట్టి-
సకల కైంకర్యములునేడు సాగె జనులు-
నీదు కళ్యాణమును గాంచ నిచ్ఛగింత్రు!
రామరాఘవా నీకు నీరాజనములు!
27*
విశ్వ కళ్యాణకారక విషయమయ్యె!
యేట నీదుకళ్యాణమే నేటిదాక-
వరుస నూరూర జరిపించు వాడుకయ్యె!
రామరాఘవా నీకు నీరాజనములు!
28*
అల్లుడేరాముడాబిడ్డయవనిజాత!
కొడుకు రామయ్య సీతమ్మకోడలట్లు-
జానపదపాటలు పల్లె జనులయింట!
రామరాఘవా నీకు నీరాజనములు!
29*
జరుగు నీతలంబ్రాలను గరుడ పక్షి-
తెచ్చి విడుచును నీపెళ్ళిదినముననుచు-
గుడిశిఖరంబు గమనింత్రు గుట్టుగాను!
రామరాఘవా నీకు నీరాజనములు!
30*
ఎన్ని పాటలు ముచ్చటల్ యెదలుపొంగ-
దండి విశ్వాసపూర్ణమై దనరు పల్లె పత్త-
నంబులే భారతావని నాడు నేడు!
రామరాఘవా నీకు నీరాజనములు!
31*
అమృత ఘడియలొతాతలునాలపించు-
కీర్తనలు గోపన్న త్యాగయ్య కీర్తి సిరులు
సాగె మేల్కొల్పు భూపాలరాగఝరులు!
రామరాఘవా నీకు నీరాజనములు!
32*
తత్వములుబాడగలదిక్కు తాతలేరి?
స్వీయచెరసాల బ్రతుకంత శిక్ష గాక-
గుండె విప్పిమాటాడని గొట్టు బ్రతుకు!
రామరాఘవా నీకు నీరాజనములు!
33*
తమిళుడైనను తెలుగున తాత్వికముగ-
జేసె కీర్తనల్ జగతి జేజేలు బలుక!
పరగ నీదయ తెల్గు సంపన్నమయ్యె!
రామరాఘవా నీకు నీరాజనములు!
34*
తేపతేపకు వినుటయు సైపలేని
తెల్గు శ్రోతల వశమౌనె తెలిసి దెలుప-
పరులె పలుమారు వినుచుంద్రు పరవశించి!
రామరాఘవా నీకు నీరాజనములు!
35*
రాగ తాళ పల్లవివాద్య రమ్యగతుల-
వీనులకు విందు త్యాగయ్య విరచితములు!
గాన గాంధర్వులునుమెచ్చు గమక ఝరులు!
రామరాఘవా నీకు నీరాజనములు!
36*
నీదు భక్తుడై త్యాగయ్య నియమ నిష్ఠ
భక్తి నిత్యార్చనగ తన శక్తికొలది-
గానమేజీవనముగాగ గడిపి చనియె!
రామరాఘవా నీకు నీరాజనములు!
37*
భారతీయబాషలనొక్క బాటజేర్చి-
జాతి నైక్యంబుగావించి జనుల బ్రోచె!
నీదు భక్తియే వరమయ్యె నిగమ వినుత!
రామరాఘవా నీకు నీరాజనములు!
38*
త్యాగరాజు గొంతున తెల్గు తాండవమ్ము!
ఆత్మ లోనీవుగా నీకథాత్మకముగ-
సాగుకీర్తన సాయుజ్య సాధనమ్ము!
రామరాఘవా నీకు నీరాజనములు!
39*
కీర్తనల రక్ష త్యాగయ కీర్తి భిక్ష!
అమర జీవిగా దీవించి యమిత ప్రేమ
శక్తి సామ్రాజ్యమిచ్చిన భక్త సులభ!
రామరాఘవా నీకు నీరాజనములు!
40*
తప్పకను నీకథా వ్రాయు తరతరాలు!
జనులకెల్ల నీదేస్ఫూర్తి జగతి కీర్తి!
కథలు కావ్య గానాదుల కలుగు ప్రగతి!
రామరాఘవా నీకు నీరాజనములు!
41*
నీదు భక్తినిమగ్నుడై నీమగతుల-
పెద్దలనుగూడి పదవుల పద్దు వదలి-
నీదునామకీర్తనలందు నిపుణుడయ్యె!
రామరాఘవా! నీకు నీరాజనములు!
42*
గీత గానసంగీతాది గేయకవియు
గాయకుడుగాగ సత్కీర్తి గడనజేసి-
నిత్య దారిద్ర్యమున నీడ్చె నిండు బ్రతుకు!
రామరాఘవా నీకు నీకు నీరాజనములు!
43*
తరచి రాగసంపదగూర్చి తాళమేసి-
త్యాగరాజు నీసద్భక్తి సాగి ఇంట
గెలువకనె గాయకులరచ్చ గెలిచె భువిని!
రామరాఘవా నీకు నీరాజనములు!
44*
గంగ పాలైన గ్రంథముల్ గాచి భక్తు
విగ్రహములతొ సహదేల్చి విజయమొసగ-
తెలుగువాగ్గేయకారుడై తేజమొందె!
రామరాఘవా నీకు నీరాజనములు!
45*
ధనము కన్నను శాశ్వత ధనము కీర్తి!
పుడమి నద్దాని సాధించె పుణ్యమూర్తి!
తేగరాజుచే వ్యాపించె తెలుగు కీర్తి!
రామరాఘవా నీకు నీరాజనములు!
46*
త్యాగరాజకీర్తన జేసె తాండవంబు!
నృత్యమై క్షేత్రయ పదము సత్యమయ్యె!
భళిరె! భక్తతుకారాము బంధముక్తి!
రామరాఘవా నీకు నీరాజనములు!
47*
ఎందరో దాసులిల వీను విందుగాను
శ్రోతనుఱ్ఱూత లూగించు స్త్రోత్ర గాన
యజ్ఞ ఫలసమర్పణల-జీవయాత్రజనిరి!
రామరాఘవా నీకు నీరాజనములు!
48*
బాషలేవైన గానమై భక్తి పూర్ణ
భావనల లలితకళలుగా వహించు-
ఘనత కీర్తి తేజము తమదె! గరుడ గమన!
రామరాఘవా నీకు నీరాజనములు!
49*
అమ్ముడైపోయె నేటికళార్చనములు!
సొమ్ముగామారె మేధస్సు వమ్ముఘనము!
నీతి ధర్మంబునిలబెట్టు! నిగ్గుదేల్చు!
రామరాఘవా నీకు నీరాజనములు!
50*
ఏది ఏమైన శాంతిని యెదుగనిమ్ము!
ఇంట నొంట ప్రశాంతతనిముడనిమ్ము!
స్వేచ్ఛ జీవన సాఫల్య మిచ్చి బ్రోవు!
రామరాఘవా నీకు నీరాజనములు!
51*
కైక కోర్కెనెపము దశకంఠు దునుమి
తిరిగిచేరగనయోధ్య తేజరిల్లి-
నటుల- ప్రతి యేట నీపెళ్ళినలరుగుడులు!
రామ రాఘవా! నీకు నీరాజనములు!
52*
వెలయు నూరూర నీగుడి వెలుగులీను
నీదు కథనుగానముజేసి నీతి ధర్మ
కట్టు బాటునీ యాజ్ఞగా కదలు జనము!
రామ రాఘవా నీకునీరాజనములు!
53*
భయము గల్గెనా హనుమంత పాదసేవ!
బ్రతుకు భద్రతా భారముల్ హితవుగూర్చు-
నామ తారకమంత్రమే నయజయంబు!
రామ రాఘవా నీకునీరాజనములు!
54*
తప్పు జరిగిన తలవంచి దండమెట్టి
బుద్ధి సవరించు కొందురు పుడమి జనులు!
మ్రొక్కి మరచిన వాయిదా మ్రొక్కు చుంద్రు!
రామరాఘవా నీకునీరాజనములు!
55*
ఎంత చల్లని దైవమై యెదను నిల్చి
నెమ్మదిని గూర్చి నడిపించు నేతవీవు!
మరుపురాని రాజ్యమునీది మహిత చరిత!
రామరాఘవా నీకునీరాజనములు!
56*
కలిని పాతిక ధర్మమే కలుగునంద్రు
రామ కృష్ణాహరేయని రాత్రిబవలు
తారకముగాగ కీర్తింత్రు తమరి మహిమ!
రామరాఘవా నీకునీరాజనములు!
57*
పెద్దలందరు మదిగోరు ప్రేమ కోర్కె
తరతరాలకు నీకథ తరలు నట్లు
మేలు మేలని పాడేరు మేలుకొలుపు
రామరాఘవా నీకు నీరాజనములు!
58*
భాగవత భారతము రామ భద్ర నీదు
దివ్య పౌరాణికము నరు తీర్చి దిద్దు
విశ్వ శాంతి ప్రసాదించువిధియు విధము!
రామరాఘవా నీకు నీరాజనములు!
59*
జానకీ తనమాటనిజమ్మటంచు
విశ్వసింప గానముజేసెవినమటంచు
ప్రథమ రామాయణపు కవి పవనసుతుడె!
రామరాఘవా నీకు నీరాజనములు!
60*
మానవత్వపునాదిగా మానవాళి
నీకథానీతి పాటింత్రు నిజమునెఱిగి
పుడమిభారతీయతపొందె పుణ్య గరిమ!
రామరాఘవా నీకు నీరాజనములు!
61*
పండువో పబ్బమో నిన్ను ప్రస్తుతించి
కొలువగా మది సంతృప్తి కోరి జనులు
యాదిమరువని సంస్కృతి పాదుకొనియె
రామ రాఘవా నీకునీరాజనాలు!
62*
చలన చిత్రప్రదర్శన శాలముందు-
యాగ సంరంభమే చిన్ననాటి యాది
తమరి మాటలు పాటలే తలపులందు!
రామ రాఘవా నీకునీరాజనాలు!
63*
సీత రామ నీకళ్యాణ చిత్రకథయె-
వింటుకొనసాగె విధులన్ని ఇంటబయట!
పదుగురునుజేర మార్మోగె పాటలన్ని-
రామ రాఘవా నీకునీరాజనాలు!
64*
పెండ్లి జరిగువేళరికార్డు వేయకున్న
నదిసమగ్రముగాదంద్రు ముదము గోరి
వచ్చి వినువారితోగల్గె పచ్చదనము!
రామరాఘవా నీకునీరాజనాలు!
65*
పోటి పాటల తమపెళ్ళి పాట గెలుపు
భక్తి లవకుశగానముల్ బడులయందు
నిజము దెల్పిన కలయంద్రు నేటివారు!
రామ రాఘవా నీకునీరాజనాలు!
66*
తండ్రి యానతి జవదాట తనయు వెఱపు
సాగు తోబుట్టుకలహాలు సద్దుమణుగు!
గొప్ప ఆత్మీయతాభావముప్పతిల్లె!
రామ రాఘవా నీకునీరాజనాలు!
67*
మంచి దారిసాగిన గల్గు మంచిఫలము!
కష్టమిష్టమై సత్కీర్తి సంపదెసగు!
సత్యవ్రతశీలియు నగునజాతశత్రు!
రామరాఘవా నీకునీరాజనాలు!
68*
జానపద సాంప్రదాయ సమానదృష్టి-
నీదుకళ్యాణమును గాంచు నిఖిలజనుల-
పెండ్లి తంతుపవిత్రత పెచ్ఛుమీరె!
రామరాఘవా నీకునీరాజనాలు!
69*
నీదు చరితగానము సాగు నీతి ధర్మ
సంకటములుబాపు తగు సామెతలుగ!
మైత్రిబాటవేసియు దౌష్ట్యమణచు చుండు!
రామరాఘవా నీకునీరాజనాలు!
70*
లక్ష్మణ విభీషణులు తమ్ము లైనవిధము
మారుతి భరతులేకసన్మానులగుట!
నీదు వాక్కున ధర్మంబు నిగ్గుదేలె!
రామరాఘవా నీకునీరాజనాలు!
(ఆ.వె)
71
తమరి పెళ్ళి పుణ్య దాంపత్యమాదర్శ
మయ్యె-పేద గొప్ప మాటమరచి
రీతినీతిగాగ జాతి యనుసరించె!
రామ రఘువరా! నివాళి!
72*
ఆలుమగల నడత ఆదర్శవంతమై
కష్టసుఖములందు కలిమిడిగను-
బ్రతుకుగెలువ నెంచి భక్తినిన్నర్చింత్రు!
రామ రఘువరా! నివాళి!
73*
కనుల విందు తమరి కళ్యాణ వైభవం
వీనువిందు కథయు విధిగ జనుల-
సీత కూతురట్లు చిత్తగింతురు చేరి!
రామ రఘువరా! నివాళి!
74*
ఒకరికొఱకునొకరు నొనరజీవించగా
భార్య భర్త లైరి బ్రతుకు నెల్ల-
కష్టసుఖము గడిపి కడతేరు దీక్షయే!
రామ రఘువరా! నివాళి!
75*
రాజధర్మనిరతి రక్షణ సమధర్మ
పరిధి జనుల సేవ ప్రభులదయ్యె!
వసుధ సాగెను జనవాక్య కర్తవ్యము!
రామ రఘువరా! నివాళి!
76*
తల్లి దండ్రి గురువు దైవభక్తియు సేవ
ధర్మపరిధి కొడుకు- తండ్రియాజ్ఞ
మీరరాని విధియె మేదిని మెప్పయ్యె!
రామ రఘువరా! నివాళి!
77*
అన్నదమ్ములందు అతిథియభ్యాగతు
లందు-ప్రేమ గలుగ లబ్ధి గూర్చు-
ప్రస్తుతింత్రు విధిగ పరులతమ్ములైన!
రామ రఘువరా! నివాళి!
78*
భక్తుడాంజనేయు భరతసముడవని
యెదనుజేర్చి నట్టి సదయ! జాంబ
వంతుడు-కపివీర వరులు జయంబనన్
రామ రఘువరా! నివాళి!
79*
ఉడుత యిసుకరాల్చ కడువింత నీచేత
జేరి దీవెనొందె చెట్టు పుట్ట
నీదు ప్రేమ దడిసె-నినదించె సృష్టియే!
రామ రఘువరా! నివాళి!
80*
ధర్మముద్ధరించి దానవాళి దునిమి
మానవతను గూర్చి మనిషి నిలిపి
త్రేతయుగమునందు తేజరిల్లిన దేవ!
రామ రఘువరా! నివాళి!
81*
సీత రామస్య ఆయనం హితవు ధర్మ
మార్గమే రామాయణంబు గాగ
ముళ్ళ బాటనడిచితివి ముదముతోడ
రామరాఘవా నీకు నీరాజనములు!
82*
ధర్మమునకు నూపిరినూది దాశరథిగ
చల్లగా బ్రోవ వచ్చిన చంద్రునట్లు-
సకలలోకుల నేలిన స్వామి శరణు!
రామరాఘవా నీకు నీరాజనములు!
83*
సత్యమును బ్రతి కించిన సాత్వికుడవు!
పుణ్య రాశివి సుగుణాల పుట్టవీవు!
ధర్మ ధేనువు ప్రాపువూ-దాపువీవు!
రామరాఘవా నీకు నీరాజనములు!
84*
ప్రజలు రాజులు నీప్రేమ పాత్రులైరి
శత్రువులుకూడ నీధర్మ శక్తి బొగడి
ముదముతో యుద్ధమున జచ్చి ముక్తిగనిరి!
రామరాఘవా నీకు నీరాజనములు!
85*
చిన్న ప్రాయాన విద్యలన్ చిత్తుజేసి
ఘోర దనుజుల గూల్చిన గొప్ప తమది
బుద్ధి హృదయ విద్యలనీదె భూరి యశము!
రామరాఘవా నీకు నీరాజనములు!
86*
దండకాటవి రాకాసి దండునణచి-
మంచికవధివై యాదర్శ మానవునిగ-
వ్యక్తి గతపు విద్వేషమున్ వదలినావు!
రామరాఘవా నీకు నీరాజనములు!
87*
ధర్మముగ పదవిని పొంద దలచినావు-
తమ్ములైక్యత కొఱకెనీ తపన చూడ!
న్యాయ నిరతి నీనడతలోనలరె దేవ!
రామరాఘవా నీకు నీరాజనములు!
88*
ముదము చెదరని చిరునవ్వు ముఖము జూడ!
నుడులు మృదువు మరియాద లున్నతములు
పితరు వాక్య పాలన నీకు ప్రీతికరము!
రామరాఘవా నీకు నీరాజనములు!
89*
చక్ర వర్తిగుణగణముల్ సర్వమున్న-
నీదు అభివృద్ది కాంక్షించి నిష్ఠ గలిగి
ప్రజలు దైవాన్ని మ్రొక్కిన ప్రభువు వీవు!
రామరాఘవా నీకు నీరాజనములు!
90*
ధర్మ ప్రభుడవు నీవయ్య ధర్మయోగి
కర్మయోగివి కళ్యాణ కారకుడవు-
పుడమి బుట్టిన ఆదర్శ పురుషు డంద్రు!
రామరాఘవా నీకు నీరాజనములు!
91*
అరువది నాల్గు కళలను అభ్యసించి-
జనుల బ్రోచివచ్చితి ఆజానుబాహు!
జలధి గంభీర! హిమశైల సమ సుధీర!
రామరాఘవా నీకు నీరాజనములు!
92*
నిఖిల మునిజన సన్నుత నిర్వికార!
సర్వ శాస్త్ర పండితవర! సద్గుణుండ!
సకలలోక పోషక హరి సాధు హృదయ!
రామరాఘవా నీకు నీరాజనములు!
93*
వీర శౌర్య పరాక్రమ విష్ణుమూర్తి
సర్వ మంగళకరనామ శాంతమూర్తి!
ప్రాణికోటి సంరక్షక బ్రహ్మ జనక!
రామరాఘవా నీకు నీరాజనములు!
94*
పాపములుబాపి దీవించు పావనాంగ!
శూర వైరిమూకల పాలి సూర్య తేజ
ధరణి చంద్రునివలె ప్రియ దర్శనుండ!
రామరాఘవా నీకు నీరాజనములు!
95*
దివ్య సుందర విగ్రహ దీన పోష!
సాధు సజ్జన స్తోత్ర విశాలహృదయ!
దివ్య వేదాంతములవెల్గు దేవదేవ!
రామరాఘవా నీకు నీరాజనములు!
96*
నారదవినుత సకలగుణాభి రామ!
లక్ష్మణాగ్రజ ధరశుభలక్షణుండ!
జానకీమనోహర! సువిశాలవక్ష!
రామరాఘవా నీకు నీరాజనములు!
97*
వేద శాస్త్రజ్ఞ ధరధనుర్వేదనిపుణ!
బాణమొక్కటే యొకమాట భార్య యొకతె-
వ్రతముగా సాగినట్టి దివ్యావతార!
రామరాఘవా నీకు నీరాజనములు!
98*
దైవముగ నవతారంబు దాల్ఛకుండ
చందమామలా శ్రీరామ చంద్రుడనగ
చల్లగనుగావ వచ్చిన సచ్చరిత్ర!
రామరాఘవా నీకు నీరాజనములు!
99*
వెడలు రూపంబె శక్తిని వెల్లడించు
మనసు తత్వంబు కరతలామలకమనెడు-
వేద – శాస్త్ర సూక్తియధార్థ విషయ బోధ!
రామరాఘవా నీకు నీరాజనములు!
100*
సీత రాముల ప్రేమయే చిత్రమయ్యె!
తనువు దూరమై చిత్తము దగ్గరయ్యె!
ముళ్ళబాటయే తమకునామోదమయ్యె!
రామరాఘవా నీకు నీరాజనములు!
101*(సంపూర్ణం)
కరుణ జూపుము వాయ్ లాల ఖాదినిలయ!
భక్తి సద్గుణ పూరక బాట జనుల-
వ్యసనములుమాన్పియారోగ్య భాగ్యమిమ్ము
రామరాఘవా నీకు నీరాజనములు!
102*
పల్లె పట్టణమగ-పట్న పల్లయనగ-
రాహ రూపులు మారె పరస్పరంబు!
నడుచు రాకపోకలయందు నాగరికము!
రామరాఘవా నీకు నీరాజనములు!
103*
వైద్య మునకు పట్టణమందె వసతి – పల్లె
విద్య సంబంధ పనిదొర్కు విధములేదు
సర్వమొకచోట గల్పిప సాధ్యపడదు!
రామరాఘవా నీకు నీరాజనములు!
104*
ఉమ్మడికుటుంబములు జీలె ఉనికి వేరు- వేరుతలముల సభ్యులు చేరిబ్రతుక-
వలసి వచ్చెను-వీలేది? కలసిమనగ!
రామరాఘవా నీకు నీరాజనములు!
105*
తప్పు లెంచియానందించు తత్వమొకటి
నూత్నముగ వచ్చె కవితార్థ మూహజేయు
సమయమేలేదు కవులంత చప్పబడిరి!
రామరాఘవా నీకు నీరాజనములు!
106*
భక్తి శతకాళి యాధ్యాత్మికోక్తి సాగు
గాన చిన్నచితుక తప్పు గనిన దిద్ధి
సాయపడకుండ దలతురు- చౌక పనిగ!
రామరాఘవా నీకు నీరాజనములు!
107*
తెలుగు సత్యనారాయణ తిరుణహరిని
వెంకటయ్య సీతమ్మల వేడ్క సుతుడ!
శతకమర్పించి మ్రొక్కితి సార్వభౌమ!
రామరాఘవా నీకు నీరాజనములు!
108*
శుభము శతకాభి మానికి శుభయశంబు!
శుభముపఠిత శ్రోతలకెల్ల సుఖముశాంతి!
శుభమునీనామ కీర్తన శుభకరంబు!
రామరాఘవా నీకు నీరాజనములు!