శ్రీయోగానంద పరమహంస ప్రణతి శతకము-2
(తే.గీ.)
1*(ప్రారంభం)
శ్రీ జగజ్జననీ సమాశ్రిత సుపుత్ర!
భారతాధ్యాత్మికానంద బ్రహ్మ వరద!
శాస్త్ర శోధక! బోధక! సద్గురుండ!
ప్రణతి గొనుమ యోగానంద పరమ హంస!
2*
శ్రీ పురాతన యోగ శాస్త్రీయ నిపుణ!
సాత్వికోత్తమా! భువిమానవత్వ సూర్య!
పావన క్రియాయోగ సద్బాట సారి!
ప్రణతి గొనుమ యోగానంద పరమ హంస!
3*
ప్రాచ్య-పాశ్చాత్య ములుగల్పు భక్తిబాట
సాగె సార్వజనీనమై యోగశాస్త్ర,
జ్ఞాన విజ్ఞానబోధ సోపానమయ్యె!
ప్రణతి గొనుమ యోగానంద పరమ హంస!
4*
పూని విశ్వప్రవక్తల పూర్వనుడుల
తమరు నెరవేర్చ బూనుట దైవకృపయె!
మానవుని మాధవుని జేయు మార్గదర్శి!
ప్రణతి గొనుమ యోగానంద పరమ హంస!
5*
కల్గు నాత్మ ముక్తికిదారి కర్మయోగ-
నామమే క్రియాయోగ నీమనిష్ఠ
మరల బాబాజి కృపబొందె-మానవాళి!
ప్రణతి గొనుమ యోగానంద పరమ హంస!
6*
కర్మ-సత్కర్మ గా పుణ్య కలిమి గూర్చు!
దురిత దుష్కర్మ దారిద్ర్య దారి కీడ్చు!
కలుగు కీడెంచి మేలెంచు క్రమము మేలు!
ప్రణతి గొనుమ యోగానంద పరమ హంస!
7*
పరగ వజ్రాన రవిరశ్మి ప్రతిఫలించు,
బొగ్గు నదినిష్ఫలంబగు బోల్చిచూడ!
సజ్జనుల భక్తి చేకూర్చు సత్ఫలంబు!
ప్రణతి గొనుమ యోగానంద పరమ హంస!
8*
గమ్యమొక్కటే మత తారతమ్యగతుల
కల్గునేకాగ్రత ముదము-వెల్గు నాత్మ!
జ్ఞానమానంద దైవ సంధానదీప్తి!
ప్రణతి గొనుమ యోగానంద పరమ హంస!
9*
ధ్యానమాయుధమై మాయ దరిమివేయు
సంతులనగతి సుఖదు:ఖ-సరణిశాంతి-
గలుగ హృదయాన నానంద కాంక్ష వెలయు!
ప్రణతిగొనుమ యోగానంద పరమ హంస!
10*
దైవదిశలోన సాగిన ధ్యాన క్రియయె
దైవ సంధానమునుగూర్చు దరియు దాపు,
మిగుల దు:ఖపూరితములు మిగత వన్ని!
ప్రణతిగొనుమ యోగానంద పరమ హంస!
11*
భక్తి సత్కర్మలే దైవ బాటసాగు
ధ్యాన కార్యాచరణ బొందు దైవ ప్రేమ!
జీవి ప్రేమగోరును దేవదేవుడెపుడు!
ప్రణతి గొనుమ యోగానంద పరమ హంస!
12*
వసుధ బాహిరమగు మానవాళి సేవ
నాత్మపరముగా సాగు జీవాత్మ సేవ!
జీవిజీవిని పరమాత్మ దివ్య సేవ!
ప్రణతి గొనుమ యోగానంద పరమ హంస!
13*
యోగమున మతములు శాస్త్ర యోగ్యమగును
ధ్యానమున మతాచరణలు ధన్యమగును
జగతి దానమే తపముగా – జన్మముక్తి!
ప్రణతి గొనుమ యోగానంద పరమ హంస!
14*
ధ్యానమే శ్రేష్ఠమగు కర్మ తదితరాల-
కన్న నాత్మీయ సద్వివేకంబు మిన్న!
ధ్యానమే శాశ్వతానందదాయకంబు!
ప్రణతి గొనుమ యోగానంద పరమ హంస!
15*
ధ్యానమున నాత్మతేజంబు – దానిచేత
విశ్వ తత్వావగాహన విహిత భక్తి!
నహము నాత్మలీనము జన్మరహిత ముక్తి!
ప్రణతి గొనుమ యోగానంద పరమ హంస!
16*
ధ్యానమున మాయ విడిపోవు దైవదత్త
చేతనముగల్గు – శాంతియు చేరు మదిని
సంతులన జీవనము జన్మ సార్థకంబు!
ప్రణతి గొనుమ యోగానంద పరమ హంస!
17*
సర్వ మతముల సద్యోగ శాస్త్రమట్లు
సాగుయోగదా సత్సంగ సంఘసేవ!
భాగ్యమున దైవదర్శన యోగ్యతెసగు!
ప్రణతి గొనుమ యోగానంద పరమ హంస!
18*
మదిని సమబుద్ధి శాంతియు మార్ధవంబు
ప్రేమ సద్భావనానంద ప్రేరకములు!
ధ్యానమున నాత్మగుడి దైవదర్శనంబు!
ప్రణతి గొనుమ యోగానంద పరమ హంస!
19*
నియమ నిష్ఠలాహారాది నిగ్రహంబు
పస్తు, కసరత్తు, మదినిల్పు పట్టుదలయు
ధ్యానమాత్మమోదముగల్గ దరుగు రుజలు!
ప్రణతి గొనుమ యోగానంద పరమ హంస!
20*
చావు మరచి సద్భక్తిని సంతసింప
భక్తి ప్రార్థనానందమైపరవశించు-
నాత్మ-ప్రేమశక్తియె, పరమాత్మజేర్చు!
ప్రణతి గొనుమ యోగానంద పరమ హంస!
21*
విశ్వ చేతన కుపకార విషయమొకటి,
తగిన క్రమశిక్షణయు రెండు, తాత్వికముగ
ధ్యానమార్గము మూడవ, దారియగును!
ప్రణతి గొనుమ యోగానంద పరమ హంస!
22*
దులరవాట్లతో నిహజన్మ దురిత ప్రాప్తి
దైవ ప్రార్థన సమయంబు దక్కునెపుడు?
భక్తి సాగదు చెరసాల బంధి బ్రతుకు!
ప్రణతి గొనుమ యోగానంద పరమ హంస!
23*
స్వేచ్ఛయు స్వతంత్రము జీవికిచ్చి, కర్మ
ఫలితమున తగు జన్మలు గలుగ జేసి
ధ్యాస గల్గించు సద్భక్తి దైవమెపుడు!
ప్రణతి గొనుమ యోగానంద పరమ హంస!
24*
ప్రాచ్య పాశ్చాత్యము స్ఫూర్తి-పరగ తృప్తి!
పట్టుదల సమతుల్యమౌ ప్రార్థనలను,
తిరముగానాత్మ దైవమందిరము వెలయు!
ప్రణతి గొనుమ యోగానంద పరమ హంస!
25*
ధరణి తలిదండ్రి గురువులు దైవసములు
బుద్ధి, శిక్షణ త్రికరణ శుద్ధి గలుగ
తీర్చి దిద్ధి పిల్లలబెంచు తీరుతెన్ను!
ప్రణతి గొనుమ యోగానంద పరమ హంస!
26*
పరుల మదిప్రేమ తో గెల్చి బ్రతుకువారి
మనసు దైవాను సంధానమైన చాలు-
భక్తి మార్గాన నిర్భీతి – బ్రహ్మ ముదము!
ప్రణతి గొనుమ యోగానంద పరమ హంస!
27*
దైవప్రేమ తల్లిగబుట్టు ధరణి యందు
తల్లి ప్రేమయే బేషర తైనప్రేమ!
పిల్లలకుబంచి పోషించు తల్లి పుడమి!
ప్రణతి గొనుమ యోగానంద పరమ హంస!
28*
ఆది శక్తియే స్త్రీలుగా నవని బుట్టి
దయయు దావక్షిణ్యమూర్తులై తల్లి ప్రేమ
విస్తరింపగా పెంపొందె విశ్వమంత!
ప్రణతి గొనుమ యోగానంద పరమ హంస!
29*
తండ్రులందరి వెనకున్న తండ్రి – పరమ
పితగ నివ్వాళులందెడు ప్రియతముండు
తండ్రి దేహ గుడిని వెల్గు దైవమెపుడు!
ప్రణతి గొనుమ యోగానంద పరమ హంస!
30*
తల్లి, తండ్రులు తముగన్న పిల్లలట్లు
నితర పిల్లల బెంచగా నింకమేలు!
మాధవుని తత్వమునదేలు మానవాళి!
ప్రణతి గొనుమ యోగానంద పరమ హంస!
31*
దైవమున చెరి సగమైన తల్లి దండ్రి
పూని పరపిల్లలను గల్పి పుణ్య మెసగ
పెంచితే దైవమును మెచ్చు పేరు కీర్తి!
ప్రణతి గొనుమ యోగానంద పరమ హంస!
32*
మంచి మనిషైననుజాలు మహిని దివ్య
మానసాంతర జ్ఞాన విజ్ఞాన శక్తి
భగవదానందమన దేలు బ్రతుకు మేలు!
ప్రణతి గొనుమ యోగానంద పరమ హంస!
33*
సమయమతి తక్కువ, జన్మ చాలదింక
మరల జన్మించి మరణించు మార్గమేల?
సుకృత క్రియాయోగమున ముక్తి సులభ లబ్ధి!
ప్రణతి గొనుమ యోగానంద పరమ హంస!
34*
ఒప్పు పనులలో స్వీయాత్మ నొప్పుమైత్రి
తప్పు పనులనాత్మయె శత్రుతత్వమొందు
ఆత్మ మించు బంధుత్వము – అవనిలేదు!
ప్రణతి గొనుమ యోగానంద పరమ హంస!
35*
పరుల తప్పెంచు వారురాబంధు సములు!
పుడమి కలికాలచెడునిండె పుష్కలముగ
మంచి-త్రికరణ శుద్ధిని మనుటమేలు!
ప్రణతి గొనుమ యోగానంద పరమ హంస!
36*
ఎప్పుడేకాంత వాసమే గొప్పయైన
భువి సమాజసేవయు కొంతబూనిచేసి
దైవదారికి మరలింప, ధన్యజన్మ!
ప్రణతి గొనుమ యోగానంద పరమ హంస!
37*
మంచి సంకల్పమున కృషి-మంచిఫలము
భువిపరోపకారముగూర్చు పుణ్యధనము
దైవ కార్యము నెరవేరు – దక్కుముక్తి!
ప్రణతి గొనుమ యోగానంద పరమ హంస!
38*
మంచి మార్పు నాత్మల మైత్రి నెంచి గలుగు
శక్తి భావనపనిజేయు యుక్తి వెలయు!
భక్తిపూర్వక సాధన – ఫలము ముక్తి!
ప్రణతి గొనుమ యోగానంద పరమ హంస!
39*
చిత్త నాణెము కటునిటు చిత్తు బొత్తు!
ద్వంద్వములు, నేమి సత్యమై దారిసాగు!
సత్యవ్రతమాచరించుటే సాహసంబు!
ప్రణతి గొనుమ యోగానంద పరమ హంస!
40*
యాదిగా గర్తుకొచ్చేది యాత్మశక్తి!
మదిని సామర్థ్యమున్నంతె-మనిషి యూహ!
ప్రేమ-ప్రాణశక్తిగ నిండి పెరుగు సృష్టి!
ప్రణతి గొనుమ యోగానంద పరమ హంస!
41*
తనువు విషతుల్యమైనంత – తగని భయము
చిత్తమాయచీకటి బుద్ధి చితికి పోవు!
మాయతెరజీల్చు సద్భక్తి మార్గమొకటె!
ప్రణతి గొనుమ యోగానంద పరమ హంస!
42*
మొదటి గుడి దేహమున నాత్మ మోద మొసగ-
తృప్తి, ప్రతిగుడి ననుభూతి ప్రాప్తి పిదప
కాంక్ష దీర దైవమును సాక్షాత్కరించు!
ప్రణతి గొనుమ యోగానంద పరమ హంస!
43*
అన్ని ధర్మాలలో సత్యమలరు – యోగ
శాస్త్రమేమాయ తెరజీల్చు – శస్త్రమట్లు!
ఆత్మ లక్ష్యసిద్ధిని పరమాత్మ జేర్చు!
ప్రణతి గొనుమ యోగానంద పరమ హంస!
44*
తప్పుడలవాట్లు – మనిషియు తనకు తానె,
శత్రువై యహంకారాన మైత్రి మరచు,
కనక-వినక నాత్మయుతానె యనక బ్రతుకు!
ప్రణతి గొనుమ యోగానంద పరమ హంస!
45*
వైరి భావన విద్వేష వైఖరి మది
హానిగూర్చు జాతిని బలహీనపరచు!
సఖ్య భావన భక్తియై సత్వమొసగు!
ప్రణతి గొనుమ యోగానంద పరమ హంస!
46*
తనకు తానె మంచినిజేయు తపనగలిగి
మంచియలవాట్లనెంచియు మనుట మేలు!
సానుకూల ప్రేమను బంచి-సాగవలయు!
ప్రణతి గొనుమ యోగానంద పరమ హంస!
47*
నవ్వులానంద పరబ్రహ్మ దివ్యవరము!
నవ్వు విశ్వచేతన నావ నడుపు సూచి!
పుడమి నవ్వు దేవునిపూజ పువ్వు సమము!
ప్రణతి గొనుమ యోగానంద పరమ హంస!
48*
సతత చిరునవ్వు సంతోషమతుకు జిగురు!
మానవుడు చిరునవ్వు శ్రీమంతుడైన
ప్రాణశక్తి సంపన్నుడై బ్రతుకు చుండు!
ప్రణతి గొనుమ యోగానంద పరమ హంస!
49*
డబ్బు వెసనాల సుఖవాంఛ జబ్బు మాన్పు!
సహజ కోర్కె వివేకమై సాగుబుద్ధి
రక్షణ కవచమై యాత్మ దీక్ష నడుపు!
ప్రణతి గొనుమ యోగానంద పరమ హంస!
50*
మదివికాసమే కీలకమ్! మానవాళి
సూర్యరశ్మియు వ్యాయామ సూత్ర పటిమ,
మితము పౌష్ఠికాహారసహితము బ్రతుకు!
ప్రణతి గొనుమ యోగానంద పరమ హంస!
51*
ప్రకృతి నియమాలు పాటించి-బ్రతుకు తిండి-
పిండి కొవ్వుల తగ్గింపు దండి మేలు!
దైవ నామమౌషద, రుజల్ దరికిరావు!
ప్రణతి గొనుమ యోగానంద పరమ హంస!
52*
కూరగాయ – ధాన్యము పండ్లు గూర్చుమేలు-
పాలు-వెన్నలారోగ్యమున్ పాదుకొల్పు-
ముఖ్య పోషణ దేవుని మూలశక్తి!
ప్రణతి గొనుమ యోగానంద పరమ హంస!
53*
ఆబగాదిన్న బాధయే ఆకలైన-
పౌష్టికాహార సమతుల్య పథకరీతి-
అతిని వర్జించిదినుతిండి మితము హితము!
ప్రణతి గొనుమ యోగానంద పరమ హంస!
54*
భయము,విధిపూర్వకదైవ భయము-బాని
సత్వభయములు బాధించు-చావు భయము!
అభయ మిచ్చు దేవునిరక్ష శుభముగూర్చు!
ప్రణతి గొనుమ యోగానంద పరమ హంస!
55*
శాంతి రహిత మానస భీతి భ్రాంతి చేత
శిథిల దేహాన రోగియై చింతజెందు!
ఆత్మ దెలియక మాయలో నలమటించు!
ప్రణతి గొనుమ యోగానంద పరమ హంస!
56*
ఆత్మ నిగ్రహమారోగ్యమైన దారి!
తగినతిండి, పస్తులు,నౌషదములు భక్తి
ప్రార్థనల చేత నిండును ప్రాణశక్తి!
ప్రణతి గొనుమ యోగానంద పరమ హంస!
57*
పరులకుపకారమొనరించు పనులబూను
నియమనిష్ఠపూర్వక భక్తి – నిర్విరామ
ప్రార్థనలు మెచ్చు పరమాత్మ ఫలమొసంగు!
ప్రణతి గొనుమ యోగానంద పరమ హంస!
58*
స్వస్థతాధ్యత్మికాధార శక్తి మేలు
యోగమభ్యాసపూర్వక యోగ్య తెసగు
సకల మత దారులను దైవ సాయముండు!
ప్రణతి గొనుమ యోగానంద పరమ హంస!
59*
స్వాస్థ్యకారుడు దైవమే సకలజనుల
యత్నముల వెన్క తానుండు-యాది కొలది
దైవమునుగల్సి బ్రతికెడు దారి నయము
ప్రణతి గొనుమ యోగానంద పరమ హంస!
60*
దైవ జిజ్ఞాస యొకటె ప్రధాన కోర్కె!
మిగత తాత్కాలికములన్ని మిడుకు పనులె!
దైవసంసర్గమున కోర్కె దరికిరాదు!
ప్రణతి గొనుమ యోగానంద పరమ హంస!
61*
తనవలె నితరుగాంచుటే – దైవప్రేమ!
పుడమినేకాత్మలనలరు, సంపూర్ణ జీవ-
శక్తి దైవసంసర్గాన సార్థకంబు!
ప్రణతి గొనుమ యోగానంద పరమ హంస!
62*
విషము,శత్రువిద్వేషమే విశ్వ చరిత-
కాంతకనకాల మోజులో కనలు జన్మ-
పాత్రధారి వీడడు జన్మ సూత్ర ధారి!
ప్రణతి గొనుమ యోగానంద పరమ హంస!
63*
చిత్త శుద్ధిని దీరును చిన్నకోర్కె-
మిగుల కోరేది ముక్తియే మిగతవేవి?
జన్మ రహితమై పరమాత్మ జేరుటొకటె!
ప్రణతి గొనుమ యోగానంద పరమ హంస!
64*
చలన చిత్ర జీవనమిది- సకలజనుల-
సమమనస్కతయే జేర్చు సద్గతులకు!
స్వప్న జగతిమాయనుదెల్సి సాగమేలు!
ప్రణతి గొనుమ యోగానంద పరమ హంస!
65*
కదలు దైవమే మదిలోన కలసి మెలసి-
యుండగ స్వర్గము బయటనుండునెట్లు?
స్వర్గమున్నది దైవ సంసర్గమందె!
ప్రణతి గొనుమ యోగానంద పరమ హంస!
66*
సత్ప్రవర్తన వెంటనే జనుల మైత్రి
భావప్రకటన స్పష్టము – బ్రతుకు దారి
పూర్ణ సమజీవనము మేలు పుడమి యందు!
ప్రణతి గొనుమ యోగానంద పరమ హంస!
67*
మనసు దైవపీఠముగాగ మానవాళి
ధ్యానమగ్నస్థితిని దైవదర్శనంబు-
గూర్చు మదివిశ్వచేతన గురుని కృపయె!
ప్రణతి గొనుమ యోగానంద పరమ హంస!
68*
కలిని వెలిని విశ్వాసమాకాశవాణి!
అంతరాత్మ నారవ సెన్సు ఆప్తవాణి!
ననుసరింపగా మేలగు నరుల కెల్ల!
ప్రణతి గొనుమ యోగానంద పరమ హంస!
69*
జన్మ వదలు పాఠ్యము మరుజన్మ ఫలము!
జన్మ మారదు పుణ్యంబు జతను పడక!
పిదప దివ్యత్వమందగా పిలుపు వచ్చు!
ప్రణతి గొనుమ యోగానంద పరమ హంస!
70*
పూను పుణ్యార్జనల జన్మ పుట్టి సాగు!
పుణ్య రహితమే మ్యూజియం పునరు జన్మ!
పాపమచ్చుగా మరుజన్మ బ్రతుకుసంత!
ప్రణతి గొనుమ యోగానంద పరమ హంస!
71*
అహము వీడియు జ్ఞానియై యిహమునందె-
తానునాత్మగా నెఱిగిన దైవభాగ-
ఫలము, జన్మరాహిత్యమౌ పరమపధము!
ప్రణతి గొనుమ యోగానంద పరమ హంస!
72*
ఇతరులందున కపటంబు నింతలేక-
నిరతమితర ప్రేమలయత్కు నిత్య బ్రతుకు-
ప్రేమమూర్తిబొందును విశ్వ ప్రేమరూపు!
ప్రణతి గొనుమ యోగానంద పరమ హంస!
73*
బల్బు బగిలినా విద్యుత్తు బారునట్లు-
ప్రాణశక్తియు ప్రవహించు ప్రజ్వరిల్లు!
మార్చు-జన్మ బల్బున జేరి మరల వెలుగు!
74*
కలను గాంచినదియు వెలి కలగ దెలియు-
విశ్వచేతన మేల్కొన్న వింత జగతి-
బ్రతుకు కలవలె గాంచుటె-పరమ సుఖము!
ప్రణతి గొనుమ యోగానంద పరమ హంస!
75*
మొదటనాలోచనా రూపు-పిదప వస్తు-
సకల సృష్టి చలన చిత్ర సానుకూల-
వెలుగు రేఖయే-తెరమీద వెలయుబొమ్మ!
ప్రణతి గొనుమ యోగానంద పరమ హంస!
76*
బాధలందున ప్రేక్షక పాత్రమేలు!
భక్తి తాదాత్మ్యమునుజెంద బంధముడిగి తగు
పరిష్కారమిడు దైవ తత్వ సిద్ధి!
ప్రణతి గొనుమ యోగానంద పరమ హంస!
77*
నటక రాజుపేదయు బంటు – నాటకాన,
ఎవరి పాత్ర వారిది ముఖ్య మేదియైన
దర్శకునియాజ్ఞ జీవింప దగినపాత్ర!
ప్రణతి గొనుమ యోగానంద పరమ హంస!
78*
వ్యక్తి దృక్కోణమును బట్టి భక్తి కలుగు
భిన్న జీవన స్పందన ప్రీతి రీతి
వర్తన ప్రవర్తన దైవ వరము ముక్తి!
ప్రణతి గొనుమ యోగానంద పరమ హంస!
79*
నిత్య కృత్యముల్ తిండియు నిద్రగామ
మింక నేదియో గోరు మనిషి యదేమి?
దైవదర్శన కాంక్షయే ధరణియందు!
ప్రణతి గొనుమ యోగానంద పరమ హంస!
80*
లోభియై తలయొగ్గు ప్రలోభములకు
నాత్మ దివ్యత్వమును బొందు నంతదాక!
మంచి చెడుపోరు – కొనసాగు మరల మరల!
ప్రణతి గొనుమ యోగానంద పరమ హంస!
81*
మేలుగూర్చు, ఆధ్యాత్మిక మేలుకొలుపు-
శాశ్వత ఫలదమిల సృష్టి నశ్వరంబు!
భగవదానందమున భ్రాంతి భయముదొలగు!
ప్రణతి గొనుమ యోగానంద పరమ హంస!
82*
మొదట గుడి గోపురముగాంచి పిదప దైవ-
విగ్రహము గర్భ గుడిజూచు-విధినియాత్మ-
లోన పరమాత్మ గన కర్మ పక్వమగును!
ప్రణతి గొనుమ యోగానంద పరమ హంస!
83*
మొదట విశ్వ వింతయె దైవ విషయ చర్ఛ!
పిదప శోధింప- పరమాత్మ ప్రేమవెనుక-
రాగ రంజిత కైవల్య రాజ్య శోభ!
ప్రణతి గొనుమ యోగానంద పరమ హంస!
84*
మొదట భావన-తదుపరి ముడిపదార్థ-
సూక్ష్మమును-మూట-భౌతిక స్థూలరూపు!
వస్తు సముదాయ త్రిత్వమై వరలు సృష్టి!
ప్రణతి గొనుమ యోగానంద పరమ హంస!
85*
భౌతికము సూక్ష్మమును, కారణాత్మకముగ-
దేహములనాత్మ విహరించు, తేజమొప్ప-
పొందునాధ్యాత్మిక స్వేచ్ఛ పుణ్య నిధుల!
ప్రణతి గొనుమ యోగానంద పరమ హంస!
86*
జనన మరణాల పలుమారు చావుబ్రతుకు
భయము వీడియు – పరమాత్మ బాటనెరిగి
మూడులోకాల జన్మించి-ముక్తినొందు!
ప్రణతి గొనుమ యోగానంద పరమ హంస!
87*
ప్రాచ్యమందు నాధ్యాత్మిక ప్రాభవంబు
సాగు భౌతికోత్పత్తి పాశ్చాత్యమందు
రాకపోక సాగు – పరస్పరాభివృద్ధి!
ప్రణతి గొనుమ యోగానంద పరమ హంస!
88*
జాతులేకమై పాశ్చాత్య జాగృతంబు
మతములేకమై ప్రాచ్య ప్రమాణికంబు!
రాకపోక సమైక్యతా రాహవెలసె!
ప్రణతి గొనుమ యోగానంద పరమ హంస!
89*
తూర్ప పడమరలో గల్గు మార్పుచేర్పు!
సూర్య సంధ్యలు గల్గుటే స్ఫూర్తి గాగ
గలిగె నాధ్యాత్మికము దైవఘటన సాగె!
ప్రణతి గొనుమ యోగానంద పరమ హంస!
90*
సృష్టి తెలివి తేటలకెల్ల స్రష్టయెవరు?
ఈథరు నెవరి మేథస్సు నిండి-దాగె?
సైన్సుకంతుబట్టని రహస్యంబు లెన్నొ!
ప్రణతి గొనుమ యోగానంద పరమ హంస!
91*
సిద్ధ గురుబోధచే జ్ఞాన వృద్ధి గలుగు-
సంతులనగతి జీవింప సత్వసిద్ధి-
ముందడుగు జాగ్రత సంయమనము మిగుల్చు!
ప్రణతి గొనుమ యోగానంద పరమ హంస!
92*
వ్యసన బంధాల జిక్కిన వసుధ జనుల-
నాత్మ తనమీద ప్రేమతోనలరుదాక-
వేడ్క నాటకమాడించు వెనకనుండి!
ప్రణతి గొనుమ యోగానంద పరమ హంస!
93*
ఖాళి మదిమాయ – చెడుచేత గలిసినిండు-
భయమువీడి మంచిని నింపి-భక్తి గలిగి-
మంచి గిరిగీసి బ్రతకాలి-మానవాళి!
ప్రణతి గొనుమ యోగానంద పరమ హంస!
94*
దైవ సృష్టియె, దయ్యము- దానిమాయ-
హామి యిచ్చి మరచిపోయి హానిజేయు!
స్రష్టతోగల్సి మనవలె-సృష్టియందు!
ప్రణతి గొనుమ యోగానంద పరమ హంస!
95*
కొట్టు యజమానియు మిఠాయి ముట్టనట్టు-
పాలలో వెన్న-నీటిలో తేలినట్టు-
పంకజమువలె బ్రతుకుటే పరగ మంచి!
ప్రణతి గొనుమ యోగానంద పరమ హంస!
96
తగనియత్యాశ, పక్షపాతంబు-మాయ-
దారిమరలించు జాగ్రత-దైవభక్తి-
పరిమళించు జీవనగతి పరమ ముదము!
ప్రణతి గొనుమ యోగానంద పరమ హంస!
97*
మది సదానందపూర్వకమైన శాంతి,
మంచి తనమిహపర సుఖమార్గ సూచి!
మైత్రి – భక్తియు సంతోష ప్రాప్తి గూర్చు!
ప్రణతి గొనుమ యోగానంద పరమ హంస!
98*
తప్పులెన్నువారు విమర్శ తట్టుకొనరు!
జనులు దూరమైనను దుడుకు పనులు విడరు!
బ్రతుకులో ప్రేమ పూర్ణమౌ బాట గనరు!
ప్రణతి గొనుమ యోగానంద పరమ హంస!
99*
పట్టు విడని యేకాగ్రత ప్రాణశక్తి!
జీవచక్రాల జాగృతి దివ్య దీప్తి!
శ్రద్ధగా ధ్యాన క్రియసాగ సత్ఫలంబు!
ప్రణతి గొనుమ యోగానంద పరమ హంస!
100*
మౌనమును ప్రార్థనయు యోగమార్గ క్రియలు
భక్తి పూర్వక జీవనబాట విధులు!
సాగు దైవానుసంధాన సాధనములు!
ప్రణతి గొనుమ యోగానంద పరమ హంస!
101*(సంపూర్ణం)
తనువు చిత్తమునైతికాధ్యాత్మికముగ-
మంచి లక్షణ సముదాయ-మహిసమాజ-
శాస్త్ర ప్రజ్ఞ సాగిన జన్మ సార్థకంబు!
ప్రణతి గొనుమ యోగానంద పరమ హంస!
102*
సర్వతోముఖమగు వృద్ధి-సంయమనము-
సద్వివేక సంకల్పమై సాధ్యపడును!
దివ్యమైన స్మృతినిబొందు దైవనిష్ఠ!
ప్రణతి గొనుమ యోగానంద పరమ హంస!
103*
దైవమునుగాంచు యత్నము-తగిన శ్రద్ధ-
సత్క్రియాయోగ, ప్రార్థనల్ సాగువేళ-
మనిషి భగవదన్వేషణే-మంచి వరము!
ప్రణతి గొనుమ యోగానంద పరమ హంస!
104*
పేరు సత్యనారాయణ తిరుణహరిని-
చంద్రునకు నూలుపోగన్న చందముగను-
నాల్గు శతకాలుగా నీకునంకితంబు!
ప్రణతి గొనుమ యోగానంద పరమ హంస!
105*
సృష్టి జీవుల మనిషియే శ్రేష్ఠుడవని-
నాత్మ పరమాత్మ భాగమైయలరుకతన-
దైవమునుగల్సి జీవింప ధన్య జన్మ!
ప్రణతి గొనుమ యోగానంద పరమ హంస!
106*
దైవ ప్రాధాన్యత బ్రతుకు దారి కృషియు
విత్తనము నాటి – యాధ్యాత్మికోత్తమముగ-
పుణ్య పంటనూర్చగ జన్మ పుడమిగలిగె!
ప్రణతి గొనుమ యోగానంద పరమ హంస!
107*
తగిన విధమగు స్వేచ్ఛ-స్వతంత్ర్యమొసగి-
నిశ్చయాత్మక సంకల్ప నిష్ఠ-సంతు-
బెంచు తలిదండ్రులెల్లరు ప్రేమమయులు!
ప్రణతి గొనుమ యోగానంద పరమ హంస!
108*
శుభము-శతకపాఠకులకు సుకృత ఫలము!
శుభము-విశ్వశాంతినిగోరు సభకు శుభము!
శుభము-భారత గురులకు శుభయశంబు!
ప్రణతి గొనుమ యోగానంద పరమ హంస!