శ్రీ శ్రీ శ్రీ నృసింహ నివాళి శతకము
(తే.గీ.)
1*
శ్రీహరి దశరూపుడ! విశ్వ సృష్టి కర్త!
భర్త, హర్తవు, పరబ్రహ్మపదము నందు-
మూడు మూర్తులవెలుగొందు ముక్తి ధాత!
స్వామి శ్రీనృసింహ శుభనివాళి గొనుమ!
2*
శ్రీనివాస! యాదాద్రీశ! శేషశాయి!
కామిత వరదాయక! శౌరి గరుడ గమన!
భక్త మునిజన మందార! బ్రహ్మ జనక!
స్వామి శ్రీనృసింహ శుభనివాళి గొనుమ!
3*
ఆర్త జనరక్షక! పరమాత్మ రూప!
సృష్టి సుస్థితి లయకార! శ్రేష్ఠ! వరద!
ధర్మ సంస్థాపక! దశావతార మూర్తి!
స్వామి శ్రీనృసింహ శుభనివాళి గొనుమ!
4*
సనక ముని శాపగ్రస్తులు జయవిజయులు-
వరుస ముజ్జన్మలీదియు వాసమునకు
వేగ జేరెడు వరమిడన్ వేడుకొనిరి!
స్వామి శ్రీనృసింహ శుభనివాళి గొనుమ!
5*
మిత్రులై పెక్కు జన్మలు మిడుక వశమె?
శత్రులై వేగ నీసేవ సాగు దీక్ష
దగ్గరైయుండుటె కదా తనివిదీర!
స్వామి శ్రీనృసింహ శుభనివాళి గొనుమ!
6*
ధరకృత, త్రేతము యుగముల ద్వాపరాన
మూడు శత్రుజన్మలుదాటి ముక్తులగుచు!
వాసమునుజేరి తమధర్మ వసతి గనిరి!
స్వామి శ్రీనృసింహ శుభనివాళి గొనుమ!
7*
కనక నేత్ర, కశ్యపు లైరి గనిరి ముక్తి
రావణాకుంభకర్ణులై ద్వాపరాన-
వరుస శిశుపాలుడును దంత వక్త్రులైరి!
స్వామి శ్రీనృసింహ శుభనివాళి గొనుమ!
8*
నీదు ప్రతిరూపములె కదా నిజమెఱుంగ
సనక సనఁదులు సురమునుల్ సాధుజనులు!
మంచిచెడులకు సమరమే మహిచరిత్ర!
స్వామి శ్రీనృసింహ శుభనివాళి గొనుమ!
9*
బ్రహ్మ వై సృష్టిగావించి భద్రతొసగి
విష్ణువైవ్యాప్తి-శివుడవై విలయ గతుల-
శక్తి-మమ్మూర్తులను సాగు భక్త వరద!
స్వామి శ్రీనృసింహ శుభనివాళి గొనుమ!
10*
తుచ్ఛ సంపదల్ పుణ్యమున్ తూచగలవె!
తూచ దప్పక స్మరియించు దోవనీదు
శత్రు మిత్రాత్మలును బొందె సద్గతులను!
స్వామి శ్రీనృసింహ శుభనివాళి గొనుమ!
11*
అంతరంగ శాత్రవుదాడి నధిగమింప
మదిని నిల్పగా ధ్యానమే మంచిదారి
మనసునాత్మనిశ్చలమైన మనిషి ఘనత!
స్వామి శ్రీనృసింహ శుభనివాళి గొనుమ!
12*
ఎఱుక గనుదాక నీబోధ లెన్నితీర్లు
ముక్తి గలుగుదాకను సృష్టి ముడిని బడగ
స్వచ్ఛమై ధర్మధేనువునిచ్ఛ సాగు!
స్వామి శ్రీనృసింహ శుభనివాళి గొనుమ!
13*
ధర్మ సంస్థాపనయు జర్గు ధరణియందు-
ధర్మ మార్గనిరూపణ తమరి పనియె!
దానికోసమీవెలయు పౌరాణికాలు!
స్వామి శ్రీనృసింహ శుభనివాళి గొనుమ!
14*
వేదమునుపనిషత్తుల తేట వెలసె విధిగ
బహుపురాణసంచయనీతిబాటగీత
నిధియు నరజన్మ గతి నవనీతమయ్యె!
స్వామి శ్రీనృసింహ శుభనివాళి గొనుమ!
15*
ఒక్కమాటలో తత్వంబు నొక్కబోదు
నాత్మనలవోకనెరగదాధ్యాత్మికంబు
మదిని నాటుట నీభక్తి మార్గ వశమె!
స్వామి శ్రీనృసింహ శుభనివాళి గొనుమ!
16*
ఎన్ని వివరణలీ తత్వవిధుల నిధులు
వ్యక్తియనుభవ సారముల్ వసుధ కథలు
కలిమి లేములు కావడి కడవలనగ!
స్వామి శ్రీనృసింహ శుభనివాళి గొనుమ!
17*
ఉర్వినితిహాస భరితమై యుగయుగాలు
నణువు నణ్వున జీర్ణించె తనువు మనము
మిగిలి లేదులేదనుటెల్ల మిగుల వింత!
స్వామి శ్రీనృసింహ శుభనివాళి గొనుమ!
18*
శాస్త్ర వేత్తలు వేదాంగ శాస్త్ర హితులు
యెదను నాటగా సెలవిచ్చిరెట్టిమాట?
తుదకు తృప్తిగా దెల్పిరి అదియె నీవు!
స్వామి శ్రీనృసింహ శుభనివాళి గొనుమ!
19*
ఏదొ? మిగిలెప్రయోగమై యదియె శక్తి
విశ్వరూపదర్శన శక్తి విశ్వసింప-
నరుని మేధయోచన శక్తి నాణ్యమయ్యె!
స్వామి శ్రీనృసింహ శుభనివాళి గొనుమ!
20*
తృప్తి పడవలె కద, లేశ ప్రాప్తికైన-
భక్తియంకురించినకద, బ్రహ్మముదము!
మనిషితోబుట్టి గిట్టును మహిని భక్తి!
స్వామి శ్రీనృసింహ శుభనివాళి గొనుమ!
21*
ధర హిరణ్యాక్ష కశ్యపుల్ దైత్య నీతి
సాధు జీవుల హింసింప సాగిరంత!
కనకనేత్రుడు చెలరేగె కాంక్షమీర!
స్వామి శ్రీనృసింహ శుభనివాళి గొనుమ!
22*
తోడబుట్టువు హోలిక తోడుపడగ
రాక్షసుల జృంభనము హిరణ్యాక్ష యాన
తుదకు భూమాత చెఱబట్టె దోషమనక!
స్వామి శ్రీనృసింహ శుభనివాళి గొనుమ!
23*
పుడమి మొరలిడెను, పరమ పురుష రమ్ము
వేగ జీవుల రక్షింప వేడుకొనెను
ధర్మధేనువు ఘోషించె దారిలేక!
స్వామి శ్రీనృసింహ శుభనివాళి గొనుమ!
24*
క్రోఢరూపాన పుడమిని కోరనెత్తి
రక్షజేసిన యాదివరాహరూప!
జలధి శోధించి దైతేయు జంపినావు!
స్వామి శ్రీనృసింహ శుభనివాళి గొనుమ!
25*
ధరణి నుద్ధరించియు జీవతతుల బ్రోచి
మూర్ఖ దానవాళిని తుదముట్టజేసి
రక్షకుడవైతివాది వరాహమూర్తి!
స్వామి శ్రీనృసింహ శుభనివాళి గొనుమ!
26*
ఆర్త జనుల బ్రోవగవచ్చు ఆది దేవ!
ఆపదలు మాన్పి సంపదలందు దేల్చి
భూమి భారమును వహించు పుణ్యమూర్తి!
స్వామి శ్రీనృసింహ శుభనివాళి గొనుమ!
27*
ధర వరాహ నృసింహావతార మూర్తి!
దేవ దేవర శ్రీ దేవి దీప్తి హృదయ!
చిన్మయానంద భూదేవి చిత్తచోర!
స్వామి శ్రీనృసింహ శుభనివాళి గొనుమ!
28*
బ్రహ్మ శివుల వరాలంది బలిమి గ్రొవ్వి
దానవాధముల్ బూనేరు ధర్మహాని-
వారి దునిమి జీవుల బ్రోచు వాసుదేవ!
స్వామి శ్రీనృసింహ శుభనివాళి గొనుమ!
29*
బ్రహ్మ సృష్టి, శివలయపు బాట నడుమ-
వ్యాప్తి సాగించు విష్ణువై వసుధయందు-
భక్తి యోగసాధనమెచ్చు భవవిదూర!
స్వామి శ్రీనృసింహ శుభనివాళి గొనుమ!
30*
అగ్రజుని జంపె హరియని యాగ్రహించి
వైరమునుబూనె కుత్సిత వర్తనుండు!
కశ్యపుడు హరి భక్తుల గనడు వినడు!
స్వామి శ్రీనృసింహ శుభనివాళి గొనుమ!
31*
శ్రీశ!భక్త చిత్తాబ్జనివేశ! భువిని
సింహగిరి నాథకోటంచ స్థిరనివాస!
హరిహర నాథ! మురవైరి! శౌరి శరణు!
స్వామి శ్రీనృసింహ శుభనివాళి గొనుమ!
32*
హ్లాదమునుగోరి నినుగొల్వ హాని జేయు
కశిపు-వరగర్వి పూజింప గానిపనియె
రాజునానతి తలదాల్చ రాజ్యఘోష!
స్వామి శ్రీనృసింహ శుభనివాళి గొనుమ!
33*
కొడుకు హరిభక్తి గమనించి కోపగించి
గురుల శాసించె తనభక్తి గూర్ప గోరె!
సాధు సద్భక్తులనుమార్చ సాధ్య పడునె!
స్వామి శ్రీనృసింహ శుభనివాళి గొనుమ!
34*
నీటమునుగడు, నగ్నిలోనీరుగాడు,
గిరులలోయల విసరిన గొఱతవడడు!
హాయి హరినామపాయి ప్రహ్లాదుడనగ!
స్వామి శ్రీనృసింహ శుభనివాళి గొనుమ!
35*
అగ్ని గాలని వస్త్ర యైయ్యధిక గర్వి-
కశ్యపు తోబుట్టు హోలిక గాలె తానె
బాల ప్రహ్లాదు నొడిజేర్చి భస్మమయ్యె!
స్వామి శ్రీనృసింహ శుభనివాళి గొనుమ!
36*
హోలికా బాధ సమసెను గోలమాని
జనులు ప్రస్తుతించిరి – సురమునులు గూడి
భక్త ప్రహ్లాదుబొగడిరి బహువిధాల!
స్వామి శ్రీనృసింహ శుభనివాళి గొనుమ!
37*
కాముకి హోలికయుగాలె కలిగె ముదము
పాడిపంటల పర్వమై ప్రజలయందు
కామదహనంబు మరునాటి కథగ మిగిలె!
స్వామి శ్రీనృసింహ శుభనివాళి గొనుమ!
38*
తనయుడుజూపె కంబము తండ్రియడుగ-
ఎందు జూచిన హరియుండునందనంగ-
మూర్ఖ కశిపుండు పెనుగద మోదెనంత!
స్వామి శ్రీనృసింహ శుభనివాళి గొనుమ!
39*
భీకరాద్భుతరూపాన నేకముగను
దిక్కులును పిక్కటిల్లియు బిక్కుమనగ
కశిపుదునుమాడి ప్రహ్లాదు గాచినావు
స్వామి శ్రీనృసింహ శుభనివాళి గొనుమ!
40*
సన్నిధినిజేరె లక్ష్మియు శాంతిగూర్ప-
బాల ప్రహ్లాదు దీవించి ప్రభువు జేసి
వేడ్క నరహరి రూపమై వెలసినావు!
స్వామి శ్రీనృసింహ శుభనివాళి గొనుమ!
41*
బాలుడడుగ సింహాద్రియప్పన్నవగుచు
వెలసితివి దేవ జనులకు వేడ్కలొసగ
శబరిగిరినాథ యయ్యప్పసామి నీవె!
స్వామి శ్రీనృసింహ శుభనివాళి గొనుమ!
42*
శత్రు జన్మ నహంబున జయవిజయులు
ఎంత కథను సృష్టించిరి యెఱుగఁ బ్రతుకు
మైత్రి బలపడు నీతి సన్మార్గముగను!
స్వామి శ్రీనృసింహ శుభనివాళి గొనుమ!
43*
మిత్రులై జన్మనెత్తిన మితము భక్తి
పెక్కు జన్మలు నహమింక పెరుగుచుండ
నీదు సేవ-భాగ్యపు తృప్తి-నెలవులగున!
స్వామి శ్రీనృసింహ శుభనివాళి గొనుమ!
44*
తారకుని వధింపగను కుమార సామి
జన్మ గౌరీశ్వరుల పెళ్ళి జరుగవలయు
కామదేవుడు దిక్కయ్యె కథయు నడిచె!
స్వామి శ్రీనృసింహ శుభనివాళి గొనుమ!
45*
కాముడిలలోక కళ్యాణ కారకుండు
హోలికా లోకమారణ హోమ శక్తి
మంచి చెడు వెల్గు నీడల మనిషిబ్రతుకు!
స్వామి శ్రీనృసింహ శుభనివాళి గొనుమ!
46*
కాము పునరుజ్జీవనకాంక్ష గలిగి రతియు
తపము సాగించె గౌరియు ధవుని వేడె
హరుడు వరమిచ్చె కాముడు మరల బ్రతికె!
స్వామి శ్రీనృసింహ శుభనివాళి గొనుమ!
47*
ధరవసంత జయంతుల దారి ప్రకృతి
మరల చిగురించె చిలుకపై మన్మథుండు
పుష్టి గలిగింప ప్రేమతో సృష్టి వెలిగె!
స్వామి శ్రీనృసింహ శుభనివాళి గొనుమ!
48*
వ్యసన సప్తకంబు నరిషడ్వర్గములకు
నరుడు బలిగాక మదినిల్పు నట్లు భక్తి
కామియై మోక్షగామియౌ కాంక్షదీరె!
స్వామి శ్రీనృసింహ శుభనివాళి గొనుమ!
49*
ధరణి నరనీతి ధర్మమై దనరు సృష్టి
విశ్వ కర్మ శిల్పములాగ విస్తరించె!
పాఠ గుణపాఠముల ధర్మ పథముసాగె!
స్వామి శ్రీనృసింహ శుభనివాళి గొనుమ!
50*
సకల పౌరాణికవిధుల సాగు శక్తి!
ధర్మ వర్తనమై ప్రేమ దనరు భక్తి-
యోగమై గీత భోధల యోగ్యతెసగె!
స్వామి శ్రీనృసింహ శుభనివాళి గొనుమ!
51*
దేవ దానవ బుద్ధియు దేనికదియె!
మదిని యుద్ధరంగముజేసి మరలజరుగు!
మంచి చెడుపేర ఘర్షించు మానవాళి!
స్వామి శ్రీనృసింహ శుభ నివాళిగొనుమ!
52*
మూడుమూర్తుల విహరించు మూలశక్తి
ప్రేమ శక్తియే ప్రాణమై ప్రేరణొసగు!
భోగమై యోగమై సాగి పోవుచుండు!
స్వామి శ్రీనృసింహ శుభ నివాళిగొనుమ!
53*
స్వార్థమునుమాని పూర్ణవిశ్వాసమొంది
వివిధ ప్రేమల నీప్రేమ విస్తరింప-
త్యాగపూరితమగు నాత్మ తపన ముక్తి!
స్వామి శ్రీనృసింహ శుభ నివాళిగొనుమ!
54*
కోరి పాల్గుణ పూర్ణిమ కొడవటంచ
జాత్ర శోభయాత్రయు రథోత్సవముజరుగు పూర్వ పరము కైంకర్యముల్ నుర్విమేలు!
స్వామి శ్రీనృసింహ శుభ నివాళిగొనుమ!
55*
గరుడ గజవాహనములతో కదలు రథము
నీదు కళ్యాణ వైభవం నింపొసంగు!
చక్రతీర్థంబు దాకను సంబరములె!
స్వామి శ్రీనృసింహ శుభ నివాళిగొనుమ!
56*
ఎద్దు బంది సంసిద్ధత యెంత శ్రద్ధ!
ఊహమాత్రమై పోయెను ఊసులన్ని
ముందు జాగరూకతలన్ని మురిపెమొసగె!
స్వామి శ్రీనృసింహ శుభ నివాళిగొనుమ!
57*
వారి వారి హోదాగసవారు బండి
తడకలమరించినవి పెద్దతరపు బండ్లు
పరగ వస్తుసామాగ్రియు పసుల మేత!
స్వామి శ్రీనృసింహ శుభ నివాళిగొనుమ!
58*
జాజు సున్నపు పట్టెలు జనుము తైల-
మందుదడపిన యిరుసులు మంచినొగలు
చక్ర శీలపటిష్టత చాటువలును!
స్వామి శ్రీనృసింహ శుభ నివాళిగొనుమ!
59*
వరుస కనెములు దుత్తలు వారుగట్టె
మువ్వ గజ్జెలు ఫణతాళ్ళు మొలకు గంట!
కొమ్ము రంగుల పగ్గముల్ కోరినట్లు!
స్వామి శ్రీనృసింహ శుభ నివాళిగొనుమ!
60*
వరుస సాగుజోడెడ్ల సవారుబండ్లు
సెలవు దినములు పనిపాట సేదదీర్పు!
మనసులానంద వారాశి మునిగి తేలు!
స్వామి శ్రీనృసింహ శుభనివాళి గొనుమ!
61*
బండి నడిపి సంతోషించు పసితనంబు
ముందు గూర్చుండి పయనించు ముచ్చటగును
జాత్ర సంబరమేగ రోజంత సాగు!
స్వామి శ్రీనృసింహ శుభ నివాళిగొనుమ!
62*
రాత్రి వరకుజాత్ర పరిసరాలనాగి
తోట విడిది వంటలు సాగు తోటివారి
స్నాన బోనాదులును వస్తు సంచయములు!
స్వామి శ్రీనృసింహ శుభ నివాళిగొనుమ!
63*
ఎన్నిమారులు తిర్గునో ఎడ్లబండి
పిదప దర్శనార్థము గుడి ప్రీతివెంట
మ్రొక్కు సేవ ప్రదక్షిణల్ మోదమొసగు!
స్వామి కోటంచ వాస నివాళిగొనుమ!
64*
పుట్టు వెంట్రుకల్ కళ్యాణ ఘట్టనొసగి
పూర్ణ భక్తి జోటసేవ భుజపు మ్రోత
దంపతులమ్రొక్కు టెంకాయతదితరాలు!
స్వామి శ్రీనృసింహ శుభ నివాళిగొనుమ!
65*
రకరకాలుగ జనసమారాధనములు
గొడుగు మీస సమర్పణల్ ముడుపుకాన్క-
జానపద సంబరాలతో జాత్ర మెఱయు!
స్వామి శ్రీనృసింహ శుభ నివాళిగొనుమ!
66*
చుట్టముల్ ప్రక్కముల్ దూర చూపు జనులు
యేట గల్సి సంబాషించు పెద్ద చిన్న
ముద్దు మురిపెంపు పిల్లలు ముందు వెనక!
స్వామి శ్రీనృసింహ శుభ నివాళిగొనుమ!
67*
తనివి తీర్థ ప్రసాదముల్ దర్శనములు
మ్రొక్కుదీర తోటకుజేరి మొదలు తిండి
వివిధ వస్తుల కొనుగోలు వెడలుదాక!
స్వామి శ్రీనృసింహ శుభ నివాళిగొనుమ!
68*
ఆటవస్తులు నిత్యావసరపు పనులు
పిలిచి పంచు మిఠాయిలు పిన్న పెద్ద-
తృప్తి తిర్గు పయనదారి తీపియాది!
స్వామి శ్రీనృసింహ శుభ నివాళిగొనుమ!
69*
అలసి బండిలో దిగబడి యరగు వేళ
అందరాత్మీయులను వీడు నపుడు బాధ
చెప్పజాలని స్త్రీ దు:ఖమొప్పు సొదలు!
స్వామి శ్రీనృసింహ శుభ నివాళిగొనుమ!
70*
మరల జాతరలో గల్సి మరువలేని
మాట మంతి సాగింపగా మనసు గోరు
దూరములు దగ్గరయ్యనో దురిత దూర!
స్వామి శ్రీనృసింహ శుభ నివాళిగొనుమ!
71*
నాటి యేటేటయూరట నేటియాది
మ్రొక్కుబడియె ఆత్మీయత పెక్కువిధుల-
వేగవంతజీవనయాన వేదికలను
స్వామి శ్రీనృసింహ శుభనివాళి గొనుమ!
72*
మరపురానిదై పిల్లలమనసు దోచు
పాఠమగు యువతకు గుణపాఠమగును
యాది గా వృద్ధులకు నచ్చు యాత్రసోది!
స్వామి శ్రీనృసింహ శుభనివాళి గొనుమ!
73*
ఉరుకు పరుగుల జాతరల్ ఊయలట్లు
గుడికి నింటికి జనుపొద్ధు గ్రుంకువరకె!
కలిసినంతసేపును పోవునలసి నిద్ర!
స్వామి శ్రీనృసింహ శుభనివాళి గొనుమ!
74*
సాగె దూరపు యాత్రలు సత్రవసతి
దేశమంతయు తిర్గునుద్ధేశమొకటి!
మంచిదే యైన సంతృప్తి మనసుకేది?
స్వామి శ్రీనృసింహ శుభనివాళి గొనుమ!
75*
భక్తి పద్యాన బాషయు భావపుష్టి
భావ్యమరయక తప్పలుబట్టి చనెడు
పండితుడుదిద్ది తీర్చడు పలుకు బడిని
స్వామి శ్రీనృసింహ శుభనివాళి గొనుమ!
76*
దాసు దోషము దండంబు తోసరియన!
శతక నిధిని గాపాడుమో చక్రధారి!
గురుల మెప్పించు బాధ్యత గురతరంబు!
స్వామి శ్రీనృసింహ శుభనివాళి గొనుమ!
77*
తాము వ్రాయరు వ్రాసిన తప్పటంచు
భావ్యమెరుగరు సోమరుల్ భక్తి గనరు!
బాష లే నీవి సద్భక్తి పథము మాది!
స్వామి శ్రీనృసింహ శుభనివాళి గొనుమ!
78*
సాధనయు లేని పనులెట్లు సాధ్యపడును
సాగనీని ఖలుల మూక సాగనంపి-
భక్త ప్రస్తుతి పద్యం పు బలమొసంగు!
స్వామి శ్రీనృసింహ శుభనివాళి గొనుమ!
79*
మాట పోటున చిధ్రమౌ మనసు మాది
భక్తి పోటిని భధ్రమౌ వరము నిమ్ము!
భక్తి బాటసాగెడు మంచి బ్రతుకు నొసగు !
స్వామి శ్రీనృసింహ శుభనివాళి గొనుమ!
80*
వ్రాయనేర్చిన దుష్టమౌ వాదమాయె!
మానివైచిన శిష్టమై మన్నికాయె!
సంస్కరింపక నిల్చెనే సంస్కృతంబు!
స్వామి శ్రీనృసింహ శుభనివాళి గొనుమ!
81*
వినరు తమతోడిదేలోకమనెడు వారు
శ్రమకు నోపరు సోకుకై రాకపోక
పరుల బాధకే నినుమ్రొక్కు భక్తి యాత్ర!
స్వామి శ్రీనృసింహ శుభనివాళి గొనుమ!
82*
తెలివి తనసొమ్ముగా నెంచి తెగను వాగు
తుంటరియు జిక్కు తుదకు తాఁ నొంటరిగను!
పామరులె దాపు ప్రాపుగా ప్రేమబొందు!
స్వామి శ్రీనృసింహ శుభనివాళి గొనుమ!
83*
తర్క వయ్యాకరణ నేర్పు తగినయోర్పు
ప్రతిభ సత్పండితుల సొమ్ము ప్రజల సొమ్ము
జానపద బాషయందురు జగతియందు!
స్వామి శ్రీనృసింహ శుభనివాళి గొనుమ!
84*
పరగ మూర్ఖు సంతోష పరతు రెవరు
అద్దమున కొండవలె విజ్ఞుడణగియుండు
క్షమను గోరియు వారకి క్షేమ మొసగు!
స్వామి శ్రీనృసింహ శుభనివాళి గొనుమ!
85*
వాదమేదైన తుది తీర్పు వాస్తవంబు
భక్తి యేదైన తుదజేరు ముక్తి ధరిని
సంయమనము పాటింపగా చాలమేలు!
స్వామి శ్రీనృసింహ శుభనివాళి గొనుమ!
86*
మంచి దిక్కుమొగ్గునుజూప మంచి గలుగు
అల్పువాదవివాదాలు యవని కీడు-
కూర్మము పగిదిని ముడుచు కొనుట మేలు!
స్వామి శ్రీనృసింహ శుభనివాళి గొనుమ!
87*
కరువు దీరగ కృషిజేయ పరువు దక్కు!
వ్యర్థ జంజాటములకన్న భక్తి మేలు!
మానవత నీడలో నీదు మార్గముండు!
స్వామి శ్రీనృసింహ శుభనివాళి గొనుమ!
88*
ధ్యానమున మది నిల్పిన దనరు శాంతి
సహనమును గల్గి జీవన సౌఖ్యమలరు
తృప్తియానందమున ముక్తి పాత్ర మగును!
స్వామి శ్రీనృసింహ శుభనివాళి గొనుమ!
89*
అనుభవము దక్కె దుడుకుల నధిగమింప
కాలయాపన దొల్గె నీకరుణ చేత
స్తిమిత మేర్పడె సద్భక్తి చిత్త మలరె!
స్వామి శ్రీనృసింహ శుభనివాళి గొనుమ!
90*
జరను నీధ్యానమీలోక జాగృతొసగు
పారలౌకిక మగుభక్తి పథము వెలయు
భక్తి జన్మరాహిత్యమగుముక్తి పదము జేర్చు!
స్వామి శ్రీనృసింహ శుభనివాళి గొనుమ!
91*
శిష్టులును జానపదులును – ఇష్ట పడగ
స్పష్ట మగు నర్థ తాత్పర్య పుష్టి-శతక
కృతులనర్పించి మ్రొక్కితి కృపను గనుమ!
స్వామి శ్రీనృసింహ శుభనివాళి గొనుమ!
92*
పండితులు దుష్టములనెత్తి బాధి యడుగ-
శాస్త్ర మని సంస్కృతమురుద్ధ సరియుగాదు
తెలుగు హితవుగా కృతి సేయ తెగువనొసగు!
స్వామి శ్రీనృసింహ శుభనివాళి గొనుమ!
93*
ఎవ్వరేమన్న సద్భక్తి నివ్వటిలగ
శుద్ధి నిశ్చల మగు భక్తి శ్రద్ధ మదిని
యాత్మ దర్శనమున జన్మ సార్థకంబు!
స్వామి శ్రీనృసింహ శుభనివాళి గొనుమ!
94*
సింధువుననేక బింధువీ చిన్ని శతక
మిష్ట దైవ ప్రస్తుతి భక్తి నిష్ఠ వెలసె!
భక్త జనసమాజము భావ భద్రతొసగె!
స్వామి శ్రీనృసింహ శుభనివాళి గొనుమ!
95*
వాసు దేవసర్వస్వమై వస్తు నిధుల
ధర్మముల శోధ మొదటిదే తదుపరేది?
నూత్న గతినీదు ప్రకృతి వినూత్న శక్తి!
స్వామి శ్రీనృసింహ శుభనివాళి గొనుమ!
96*
వసుధ నరులు వాస్తవమెర్గి వరలు జీవ
తతుల నుద్ధరింపగ గీత దరచ మేలు!
నరులు మరచిన ప్రకృతియు నష్టమొందు!
స్వామి శ్రీనృసింహ శుభనివాళి గొనుమ!
97*
లోక జీవనమొక కల లోపయుక్త-
బ్రతుకు రూపకమును సాగు బంధమగుచు-
తద్విముక్తికై నినదించు తాత్వికంబు!
స్వామి శ్రీనృసింహ శుభనివాళి గొనుమ!
98*
తెలిసిన కొలది తెలిసేది తెలియదనియె!
యోగ్య వైజ్ఞానికదశ ప్రయోగ శాల
దాటునెప్పుడు మదిభక్తి దరచ మేలు!
స్వామి శ్రీనృసింహ శుభనివాళి గొనుమ!
99*
ఊహ వస్తువై వస్తులే యూహ దేల
శాస్త్రమైయాగె ముందుకు సాగె భక్తి
జన్న జన్మాంతర దృష్టి జాగృతొసగె!
స్వామి శ్రీనృసింహ శుభనివాళి గొనుమ!
100*
జీవి జీవిని నీదీప్తి దివ్య ప్రేమ
ఆత్మ పరమాత్మ దర్శన మైనదెలియు!
ధ్యానమున చిత్తమును నిల్ప దనరు భక్తి!
స్వామి శ్రీనృసింహ శుభనివాళి గొనుమ!
101*
నీదు ప్రేమ యనిర్వచనీయ శక్తి!
స్పష్టమొనరింతు సామాన్య జనులకొఱకు!
తదితరాలతో పనియేమి తదుపరవియు!
స్వామి శ్రీనృసింహ శుభనివాళి గొనుమ!
102*
ఆత్మ తనవు నాత్మీయులు నతుకుపడిన
బంధుమిత్రాదులను సాగు బంధమేది?
ప్రేమ శక్తి నీ భక్తియే ప్రేరణొసగ!
స్వామి శ్రీనృసింహ శుభనివాళి గొనుమ!
103*
కనగ వినగ శక్తులనమ్ము కలిమియట్లు
నలరు ప్రేమశక్తియు నీదు నటన సూత్ర
జగతి నాటకమాడించు జన్మగతుల!
స్వామి శ్రీనృసింహ శుభనివాళి గొనుమ!
104*
వసుధ నరులు వాస్తవమెర్గి వరలు జీవ
తతులనుద్ధరింపగ ధర్మ దారి ప్రేమ-
శక్తి నీతిధర్మము గీత సాగుబోధ!
స్వామి శ్రీనృసింహ శుభనివాళి గొనుమ!
105*
బయట బడిపరీక్షలు లోన బరగునాత్మ
నికష నిర్ధేశ్యములు సాగె నీదు శతక
మాలనర్పించితిని భక్తి మార్గమందు!
స్వామి శ్రీనృసింహ శుభనివాళి గొనుమ!
106*
సృష్టి శోధనలిహలోక పుష్టి గూర్ప-
పరముకై సాగు సద్భక్తి పడవ జేరి-
యెఱుక గల్గితరింపగా మెఱుపు గీత!
స్వామి శ్రీనృసింహ శుభనివాళి గొనుమ!
107*
వ్రాయనెఱిన సత్యనారాయ కవిని
తెలుగుసారు పేరునసాగు తిరుణహరిని!
దోషముల్ క్షమార్హముజేసి దోవజూపు!
స్వామి శ్రీనృసింహ శుభనివాళి గొనుమ!
108*
శుభము శతకాభిమానులౌ శ్రోతలకును-
శుభము భారతజాతికి శుభయశంబు!
శుభము విశ్వమానవులకు సుఖము శాంతి!
స్వామి శ్రీనృసింహ శుభనివాళి గొనుమ!