శ్రీ నరసింహ నీరాజన శతకము
(తే.గీ.)
1*
శ్రీనివాస! యాదాద్రీశ! శేషశాయి!
కామిత వరదాయక శౌరి! గరుడగమన!
భక్తమునిజన మందార! బ్రహ్మజనక!
రామ నరసింహ నీకు నీరాజనములు!
2*
శరణు శరణన్న వారల కరుణజూపి
భక్తి మార్గాన నడిపించి ఫలమొసంగి
జన్మరహిత మోక్షమునిచ్చు జానకీశ!
రామ నరసింహ నీకు నీరాజనములు!
3*
కలిని పురుషార్థి ధర్మ యుక్తముగ-కామ-
అర్థ మోక్షాదులను జన్మ సార్థకముగ
బ్రతుక నేర్చునా-నీదయబడయలేక?
రామ నరసింహ నీకు నీరాజనములు!
4*
అన్ని విని బుద్ధిమంతులననుసరించి
భక్తియోగమే సుళువైన బాటగాగ
పూనుకొనియుపాసనజేయు పుణ్యమతియు!
రామ నరసింహ నీకు నీరాజనములు!
5*
ఎంత దెలిసినా యోగంబు కొంతమిగులు
ఎంతజేసినా నీపూజ సుంత మిగులు
శరణువేడగ లభియించు సత్ఫలంబు!
రామ నరసింహ నీకు నీరాజనములు!
6*
క్షామమునుబాపి పోషించు సకలజనుల
క్షేమమును గూర్చు వైకుంఠ ధామ శరణు!
వామదేవాదిమునినుత! వాసుదేవ!
రామ నరసింహ నీకునీరాజనములు!
7*
వరములిచ్చి మరవక గర్వంబుదుడిచి
సాత్వికతగూర్చు-సద్భక్తి సాగజేసి
ముదముతో పాటు జీవన ముక్తినొసగు!
రామ నరసింహ నీకు నీరాజనములు!
8*
కలిగె నొక్కడు బంగారు కన్నువాడు
వాని తమ్ముని తనువంత పసిడిముద్ధ!
పైగ వరగర్వమున జన్మ పాపులైరి!
రామ నరసింహ నీకునీరాజనములు!
9*
భూమిజుట్టి వచ్చిన తృప్తి బుద్ధికేది?
పసిడి నేత్రుడు పరహింస పరుడు ఖలుడు!
గాగ పుడమిని ముంచెనునీట కావరమున!
రామ నరసింహ నీకు నీరాజనములు!
10*
ఆది వరహరూపమున హిరణ్యాక్షు ద్రుంచి-
పుడమి చేపట్టి బ్రోచిన పుణ్య మూర్తి!
క్రూర కశిపుజీల్చినయుగ్ర నారసింహ!
రామ నరసింహ నీకునీరాజనములు!
11*
వేల్పులకువేల్పువిలవేల్పువెచటనున్న-
బాల్యమందుకోటంచలో భక్తిగొంటి!
యవ్వనంబున యాదాద్రి యాత్రగంటి!
రామనరసింహ నీకు నీరాజనాలు!
12*
వేల్పురాజన్న జాతర వేములాడ
దారి నాంపల్లిలోగంటి తమరి రూపు!
అడుగడుగుననీలీలలే అవనిగుడుల!
రామనరసింహ నీకు నీరాజనాలు!
13*
కొరివి కొమ్మాల తీర్థాల గొప్పపేరు
కరినగరమోరుగల్లున కలగు గుడుల-
దర్శనము గల్గుపుణ్యమై ధర్మపురిని!
రామనరసింహ నీకు నీరాజనాలు!
14*
ధరణి సంపూర్ణ మగునవతారమూర్తి!
సజ్జనులను బ్రోవగవచ్చు శాంతమూర్తి!
దుష్ట హరుడవని దురితదూర కీర్తి!
రామ నరసింహ నీకు నీరాజనాలు!
15*
బాలురకునీదు రూపంబు భక్తి గూర్చు!
బుద్ధులనునేర్పు విద్యాభివృద్ధి గాను!
జరను నీభక్తి కొండంత జవము గూర్చు!
రామనరసింహ నీకు నీరాజనాలు!
16*
కామదృష్టి ధర్మముతోడ గలిసి సాగ
ప్రేమశక్తిగా రూపొంద పేరుకీర్తి!
పుణ్యధనము సత్కీర్తికి పుష్టి తుష్టి!
రామ నరసింహ నీకునీరాజనాలు!
17*
యాత్ర బాల్య కౌమారముల్-యవ్వనంబు!
ధర్మ యుక్త మై పురుషార్థ దారియందు-
జరయుగలిగెడు తరిదాక జరుగు బ్రతుకు!
రామ నరసింహ నీకునీరాజనాలు!
18*
తనువు బెర్గిన నేమగు తత్వమరయ-
బుద్ధిబెరిగిన నాత్మయేయుద్దరించు!
ఆత్మ నెరిగిన నరుడునిన్నందుకొనును!
రామ నరసింహ నీకు నీరాజనాలు!
19*
ఆత్మ నీలోని భాగమై యవనిబుట్టె-
పుడమి గోళము రవినుండి బుట్టినట్లు!
నీదు ఆకర్శనేభక్తి నిచ్చి బ్రోచు!
రామ నరసింహ నీకునీరాజనాలు!
20*
ధరణి సూరీని జేరెడు దాక ప్రకృతి-
సృష్టి సుస్థితి లయకారచేష్టసాగు!
ఆత్మ పరిపక్వమున పరమాత్మ జేరు!
రామ నరసింహ నీక నీరాజనాలు!
21*
దశదిశలు నీదశరూప దర్శనంబు-
గలుగు తీర్థాలు క్షేత్రాలు కనులవిందు!
భాగవతకథా నిలయాలు భక్తిసిరులు!
రామ నరసింహ నీకు నీరాజనములు!
22*
చంటి బాలల రక్షించు శాంతమూర్తి!
దుష్టసంహారమొనరించు ఉగ్రమూర్తి!
పాహియన్నరక్షించు వరాహమూర్తి!
రానరసింహ నీకు నీరాజనములు!
23*
దురిత బుద్ధికి నీయాది దుడ్డుకఱ్ఱ!
చిత్త చాంచల్యమును మాన్పు చిత్ర సింహ!
ధ్యాన మంత్రబీజాక్షర ధామ శరణు!
రామ నరసింహ నీకు నీరాజనములు!
24*
చక్కగానొక్కతనజునియసాక లేక!
కక్షసాధించు క్రూరాత్ముగర్వమణచ-
ధరకు దిగినసపూర్ణావతారమూర్తి!
రామనరసింహ నీకునీరాజనములు!
25*
వేదములు బ్రోచి యవనిపై వెలయజేసి
అవని రక్షించి కనకాక్షునివధించి-
కశ్యపుని జీల్చి ధర్మంబు గాచినావు!
రామనరసింహ నీకునీరాజనములు!
26*
కొడుకు నాయుధంబుగజేసి కోరినట్టి
మరణమునుగూర్చి మరుజన్మమరయ బంపి!
వారి కడతేర్చితివి రామబాణఘాతి!
రామనరసింహ నీకునీరాజనములు!
27*
కనకనేత్ర కశ్యపులుగ కథయు ముగిసె!
రావణాకుంభకర్ణులు రయముగాగ-
వైరి శిశుపాలు వరదంత వక్త్రహరుడ!
రామనరసింహ నీకునీరాజనములు!
28*
వంద జన్మల మైత్రియు వాసిగాదు!
మూడు జన్మల వైరమెముందుగడిపి-
సేవకైవచ్చు భాగ్యమే సేమమనిరి!
రామనరసింహ నీకునీరాజనములు!
29*
భాగవత-రామకథ-మహా భారతాది-
పాఠ గుణపాఠములె భువి పాపహరము!
ప్రేమశక్తియారాధన పేరు కీర్తి!
రామనరసింహ నీకునీరాజనములు!
30*
పుడమి పౌరాణికమువిన్న పుట్టు బుద్ధి-
తిరిగి ఇల్లుజేరగ మంచులా కరిగిపోవు!
వీనువిందుగ మరల వినగ మేలు!
రామనరసింహ నీకు నీరాజనములు!
31*
స్వస్థతనుగూర్చు తీర్థంబు వైద్యసేవ!
సంకటముబాపునీదుప్రసాదమహిమ!
ఎచట ఏరూపున నెపుడు ఎదుపడుదొ!
రామనరసింహ నీకునీరాజనములు!
32*
ఎన్ని గాథలో బాధలో వెడలివచ్చి-
మ్రొక్కు దీర్చువారలునోపి ముచ్చటింత్రు!
చక్కబడగోరువారలు మ్రొక్కుకొంద్రు!
రామనరసింహ నీకునీరాజనములు!
33*
ఇష్టపడు భక్తి దారిలో తుష్టి పుష్టి!
కష్ట కాలాన దేవనిన్ గాంచగలము!
తప్పుగాసియు రక్షింప తరలిరమ్ము!
రామనరసింహ నీకునీరాజనములు!
34*
భోగములనిన్ను మరవనీ బోధలొసగు!
సంతసములందు నీయాది సాగనిమ్ము!
భాగ్యములమిన్న-నారోగ్యభాగ్యమొసగు!
రామనరసింహ నీకునీరాజనములు!
35*
మార్చెనే తండ్రి ప్రహ్లాదు మార్చుజతన-
ములువృధాప్రయాసయె తుద ముక్తి దారి
తథ్యమనికొడ్కు జేసెను తత్వబోధ!
రామనరసింహ నీకునీరాజనములు!
36*
పసిడి కంటికీభూమియే పసిడి ముద్ద-
ప్రాణనష్టంబునకుబూని పరగ వసుధ-
బంధనముజేసె నసువులు బాసెతుదకు!
రామనరసింహ నీకునీరాజనములు!
37*
భువియు రక్షింప గొల్లెత్తె-పుణ్యమూర్తి
నీదు కోరనెత్తగ మది నిమ్మలించె!
క్రోధి కనకాక్షు దునిమిన క్రోఢరూప!
రామనరసింహ నీకునీరాజనములు!
38*
చిరుత ప్రహ్లాదు కోరిక సింహగిరిని-
చూపితివి వరాహనృసింహ రూపు వెలయ!
ప్రజలపాలి సింహాద్రియప్పన్న వనగ-
రామనరసింహ నీకునీరాజనములు!
39*
ప్రేమ శక్తిరూపుడ! జగత్పితవునీవె!
ఆదిశక్తివై వ్యాపించు అచ్యుతుడవు!
వివిధ శక్తులు వెలయించు విశ్వ రూప!
రామనరసింహ నీకునీరాజనములు!
40*
సానుకూలతకై ప్రతి కూలకథలు!
ధన్యజన్మ కృతజ్ఞతా దారిసాగి-
నీయనంత ప్రేమనుబొందు నిజమె ముక్తి!
రామనరసింహ నీకునీరాజనములు!
41*
రోగములు మూగి బ్రతుకు నిరోధముగను
కాలము గడవకనుబాధ గ్రమ్ముకొన్న
ఓషధిగ నీదు తిరునామ ఘోష జాలు!
రామ నరసింహ నీకునీరాజనాలు!
42*
వైద్యుడవు నీవు నినుజేరు భక్తజనుల-
వివిధ శారీర మానసిక విషమ రుజల
మాన్పి యారోగ్యమునుగూర్చు మహిమ నీది!
రామ నరసింహ నీకునీరాజనాలు!
43*
తలచు నదివేరు జరిగేదితలప వృధయె?
జరుగ నున్నది జరుగును జగతియందు!
కవఛమగునీదు సద్భక్తి కలిని దాట!
రామ నరసింహ నీకునీరాజనాలు!
44*
వరుస వైద్యాల పూర్ణనివారణేది?
వ్యాధి పైధ్యాస మాన్పించు వైద్యమేది?
బాధ మరిపించు నీభక్తి బాటయొకటె!
రామ నరసింహ నీకునీరాజనాలు!
45*
బ్రతుకు టకు బట్టపొట్టయు బంధువసతి- గూటిరక్షణ సంతతిగూర్మి పేర్మి
గాక నీభక్తి ముదమొందు కాలమేది?
రామ నరసింహ నీకునీరాజనాలు!
46*
చదువు- సంపాదనలు నిల్లుచక్కబడగ
ఆలుబిడ్డల పోషణ లతిశయింపె-
సాగు నీధ్యానముద్రకు సమయమేది?
రామ నరసింహ నీకునీరాజనాలు!
47*
కోరికల మదినార్గురు కొంటె రిపులు-
ఆశనశియింప నిత్తురా – ఆత్మ బోధ
గురుని పైనెట్లు నిశ్చింత గురియుగుదురు!
రామ నరసింహ నీకునీరాజనాలు!
48*
మూఢ విశ్వాసముల చర్ఛ ముగిసె సైన్సు-
విజ్ఞ వాదనలొకదిక్కు విషమగతుల-
మనుగడయు మిథ్య మదినిల్పు మార్గమేది!
రామ నరసింహ నీకునీరాజనాలు!
49*
పోయినది దొర్కె నీదారి పొసగ శాంతి
మది రుచింపగ సద్భక్తి మార్గమలరె!
నీదు దర్శనభాగ్యమె నిఖిల మొసగె!
రామ నరసింహ నీకునీరాజనాలు!
50*
సకలమునిడు నీ తీర్థ ప్రసాదమహిమ!
స్వాస్థ్యమునుగూర్చు కోనేటి స్నానఫలము!
లోక కళ్యాణ కారక లోచనుడవు!
రామ నరసింహ నీకునీరాజనాలు!
51*(ద్వితీయ భాగము)
తిండి సాగించ తండ్రికి తిప్పలనుచు
తాత ప్రొదస్త మానము తంటబడుచు-
మనుమడి ధనార్జననుగోరు మార్గమరయు!
రామ నర్సింహ నీకు నీరాజనములు!
52*
కదిలితే డబ్బు నీటికి గాలికొఱకు
నడక కస్రత్తు – వాహనం గడనకొఱకు
పరుగు బాట జీవనమంత పరువుమాట!
రామ నర్సింహ నీకు నీరాజనములు
53*
డబ్బుతోపని – యదిలేకడుబ్బుకైన
మనిషి కొరగాడు మనిషిగా మనగలేడు
డబ్బు తోతూగె కొంగ్రొత్త జబ్బులెన్నొ!
గాక ఇబ్బడి ముబ్బడి కష్ట మెసగు!
రామ నర్సింహ నీకు నీరాజనములు!
54*
దైవ పూజసామాగ్రి తద్దారి కల్తి-
గాక పోతెరసాయన కలుష ధినుసు-
విషపుతిండి-యౌషద పథ్య విషయ చర్ఛ!
రామ నర్సింహ నీకు నీరాజనములు!
55*
సేంద్రియాలని నమ్మిన సేద్య-పంట
పల్లె కురవాణయై వచ్చు పట్నమందు
చుక్కలంటిన ధరజెల్లు చోద్యముగను!
రామ నర్సింహ నీకు నీరాజనములు!
56*
వైద్య ఖర్చులు మందులు వరస పథ్య
మనెడు సాకున కొనియెడు మంచి సరుకు-
తడిసి మోపెడై బ్రతుకన్న జడుపు గలుగు!
రామ నర్సింహ నీకు నీరాజనములు!
57*
ముప్ప దేళ్ళగడన వైద్య మూల్య మునకె
ఆస్తి నాస్తియై దారిద్ర్య జాస్తి గాగ-
దోషియేతాను గృహచ్ఛిద్ర ఘోష లందు!
రామ నర్సింహ నీకు నీరాజనములు!
58*
సంతు సంపాదనకునఱ్ఱుజాచి బ్రతుకు
పితరులసుఖముశాంతియు పీడకలయె!
మూగరోదనే నీగుడి ముందు వెనక!
రామ నర్సింహ నీకు నీరాజనములు!
59*
వేళ్ళపైనలెక్కిడు వారి విషయమేల?
మందు లెఱువులపాలె సామాన్యు బ్రతుకు! భద్రతను యోచింప గావీలు పడునె నేడు!
రామ నర్సింహ నీకు నీరాజనములు!
60*
తిండి నీజిమ్మెదారు తతిమ్మ బ్రతుకు
దెరువు మానవమాత్రమై కరువు కోర
కంటనీకుండ దరిజేర్చు కమలనయన!
రామ నర్సింహ నీకు నీరాజనములు!
61*
శ్రీశ!దీనదయాళువు! చిత్రసింహ!
చింతలనుబాపు నీనామ చింతనమ్ము!
స్థిమితమునుగూర్చు, సద్భక్త చిత్తనిలయ!
హారతి గొనుమ నాంపల్లి నారసింహ!
62*
భక్త జనపోష! పరమాత్మ! ప్రాణశక్తి-
రూప! గీతార్థబోధక! రుక్మినీశ!
నయము జయమిచ్చు హరిహర నాథ శరణు!
హారతి గొనుమ నాంపల్లి నారసింహ!
63*
పాహి సంతాన నరసింహ! పాపనాశ!
సాధు సజ్జన హృదయ! ప్రహ్లాద వినుత!
జయ విజయ వరద! రిపుహర! భయవిదూర!
హారతి గొనుమ నాంపల్లి నారసింహ!
64*
డింభకునిగావ కంబాన సంభవించి-
వరము కనుకూలముగ శత్రు వధను జేయ-
చిత్రమగురూపి వైతివో చిన్మయేశ!
హారతి గొనుమ నాంపల్లి నారసింహ!
65*
జన్మ జన్మల జీవాత్మ జయముగోరి
నీతి ధర్మ సూత్ర పరిధి రీతి నడిపి-
పాత్రధారిని ధరిజేర్చు ప్రకృతినాథ!
హారతి గొనుమ! నాంపల్లి నారసింహ!
66*
పంచభూతాల శాసించు ప్రణవ మూర్తి!
ప్రాణికోటిని పోషించు ప్రణయ శక్తి!
పాప పంకంబు తొలగించు ప్రళయ మూర్తి!
హారతి గొనుమ నాంపల్లి నారసింహ!
67*
సృష్ట సుస్థితి లయముల-నీదృష్టి – నీతి
ధర్మ పునరుద్ధరణకదా ధరణినాథ!
జీవకోటిని వికసింప జేయు విధివి!
హారతి గొనుమ నాంపల్లి నారసింహ!
68*
ప్రకృతి సౌందర్యముప్పొంగు ప్రాంతమందు
చుట్టు చెట్లున్న గుట్టపై కట్టబడిన-
దేవళమునందు వెలసిన దేవదేవ!
హారతి గొనుమ నాంపల్లి నారసింహ!
69*
వేములాడ మార్గంబున వెళ్ళుదారి
నానుకొనియున్న పల్లెయే నామపల్లి!
తమరి నెలవయ్యె నారు, శతాబ్ధములుగ!
హారతి గొనుమ నాంపల్లి నారసింహ!
70*
చోళ చక్రవర్తులగొల్చి నాలయమున
ప్రజలు ననుసరించియు పూజ-ఫలముగొనిరి!
పవన సుతుడయ్యె నీక్షేత్ర పాలకుండు!
హారతి గొనుమ నాంపల్లి నారసింహ!
71*
మాత లక్ష్మీ సమేత హే మాధవుండ!
వాంఛలీడేర్చుశ్రీకృష్ణ వాసుదేవ!
భక్తి కీర్తింతు పరమేశ! బ్రహ్మ జనక!
హారతి గొనుమ నాంపల్లి నారసింహ!
72*
మూల వాగున జలధార ముదముగూర్చు
నొక ప్రక్క-మరోప్రక్క నున్న నదియు-
పొంగి పారేటి మానేరు కొంగు పసిడి!
హారతి గొనుమ నాంపల్లి నారసింహ!
73*
శౌరి!సంతాన నరసింహ సామి యనుచు
సంతుగోరి పొందిన భక్త జనము పొంగి
పోయి చేతురిక్కడ వనభోజనాలు!
హారతి గొనుమ నాంపల్లి నారసింహ!
74*
క్రొత్త పెళ్ళిజంటలుసంతు గోరి మ్రొక్కి
సంతుగలుగగా తూరుపు స్థలమునున్న-
చెట్టు రావికి ముడుపులు గట్టుచుంద్రు!
హారతి గొనుమ నాంపల్లి నారసింహ!
75*
తరలి వత్తురు తినుపదార్థముల వంట
వార్పు చెట్లనీడను సాగు బంధు మిత్ర
ప్రోది జేసితిందురు వనభోజనాలు!
హారతి గొనుమ నాంపల్లి నారసింహ!
76*
కర్ణ వేధ, పుట్టెంట్రుకలును, నామ-
కరణమాదిగా గలశుభకార్యములను
నీదు సాక్షిగా జరిపింత్రు నిండు భక్తి!
హారతి గొనుమ నాంపల్లి నారసింహ!
77*
సంబరము నంబరమునిండ సామి జాత్ర
చిన్న పెద్దలందరితోడ చేరిచూడ
కనుల పండుగే కళ్యాణ కార్య క్రమము!
హారతి గొనుమ నాంపల్లి నారసింహ!
78*
ద్విగుణమగు తిండి సంతృప్తి త్రికరణాల
శుద్ధి బుద్ధిని కొనసాగు చుండు తీర్థ
యాత్రగా చెప్పుదురు దైవార్పణముగ!
హారతి గొనుమ నాంపల్లి నారసింహ!
79*
సాగు ఎములాడ నాంపల్లి జాత్ర లేక
కాల కళ్యాణ శోభలు ఘనతరంబు!
జనుల రద్ధియు జూడగా కనులవిందు!
హారతి గొనుమ నాంపల్లి నారసింహ!
80*
దేశమంతట శివరాత్రి దినము శివుని
పెళ్ళి జరుగును ఎముడాల ప్రీతిగూర్చు
నట్లు కాముని పున్నమి నాడు జరుగు
హారతి గొనుమ నాంపల్లి నారసింహ!
81*
పదియునొకటిశతాబ్ధపు పాలకుండు
రాజరాజనరేంద్రుడు-ప్రజలకోర్కె-
పత్ని రత్నాంగితోతపో ఫలముబొందె!
హారతి గొనుమ నాంపల్లి నారసింహ!
82*
నృపుడు పుత్రప్రాప్తినిబొంది నిన్నుగొలిచె!
తనయు సారంగధరునిగా తానుబిలిచె-
చోద్యమయ్యెకుళోత్తుంగ చోఢచరిత!
హారతి గొనుమ నాంపల్లి నారసింహ!
83*
చెట్లునాటించి కోనేటి మెట్లుగట్టె!
వేములాడరాజేశుని వేడ్క దలచె!
ఇంద్రసమకీర్తినొందె నరేంద్రుడంత!
హారతి గొనుమ నాంపల్లి నారసింహ!
84*
జనుల నాల్కనైతిహ్యముల్ సాగె పెక్కు
పూర్వ పౌరాణిక పుటల స్ఫూర్తి-వెంట
రాజరాజేశ్వరఖండమారాధ్యమయ్యె!
హారతి గొనుమ నాంపల్లి నారసింహ!
85*
కొండచరియలో కోనేర్లు రెండు-సహజ
సిద్ధమైయొప్పె! దేవతల్ శివుడు వెలసె-
చిన్న గుహలోన నర్చింత్రు చిత్తభక్తి-
హారతి గొనుమ నాంపల్లి నారసింహ!
86*
నాడు నవనాథ సిద్ధులకేడుగడగ
తపము జేసిరి పదవశతాబ్ధమందు
దారిగాసొరంగము గలదంద్రు నిచట!
హారతి గొనుమ నాంపల్లి నారసింహ!
87*
ఒక్కరోడ్డున వాహనాల్ పెక్కుజనుచు
దట్టు ఎముడాల నాంపల్లి గుట్టదాక!
మూడు కేయమ్ల దూరము ముదమొసంగు!
హారతి గొనుమ నాంపల్లి నారసింహ!
88*
కరిమి నగరు సిద్ధీపేట గలుపు జగితి
యాలరోడ్డునుగల్సి కూడలిగ వేము
లాడ దాపునాంపలి గుట్టజూడగలము!
హారతి గొనుమ నాంపల్లి నారసింహ!
89*
భాగ్యనగరు సిర్సిల్లల బాట నూట
ఏబదియురెండు జగితియాలేబదైదు
కరిమి నగరుముప్పదిరెడుగా కి. మీ. లు!
హారతి గొనుమ నాంపల్లి నారసింహ!
90*
పరిసరాలరవాణా నగరములందు
నడుచునార్టీసి ప్రైవేటు నడుపు బండ్లు
అన్ని వేళలనుండును-అందుబాటు!
హారతి గొనుమ నాంపల్లి నారసింహ!
91*
కనగ కాళీయ మర్ధనం కనులవిందు
తలలు ఐదింట కన్నయ్య తాండవంబు
కళల నిపుణత భక్తిసంకల్ప బలము!
హారతి గొనుమ నాంపల్లి నారసింహ!
92*
కనగ నాగదేవతగుడి కట్టడంబు-
జనులు జననాయ కులకృషి జన్మవరము!
కార్యరూపమొందిన గొప్పకాన్క గాగ!
హారతి గొనుమ నాంపల్లి నారసింహ!
93*
గుట్టపైనుండి వీక్షింప గుట్టుదెలియు
చెట్లనడుమ కొండంతగాజుట్టుకొన్న
పాము గనిపించ-ప్రార్థించు భక్త జనము!
హారతి గొనుమ నాంపల్లి నారసింహ!
94*
చిత్రమీగుట్ట నిద్రించు సింహమనగ
పామునోటనృసింహుని పరమలీల
దెల్పు శిల్పాలు మరినాగ దేవతుండు!
హారతి గొనుమ నాంపల్లి నారసింహ!
95*
వలయు దత్తతాక్షేత్రమై వేములాడ
ఆలయాధికారుల కృషి పదియునైదు
వత్సరాలుగా నభివృద్ధి పరచు సేవ!
హారతి గొనుమ నాంపల్లి నారసింహ!
96*
రోడ్డు ముఖ్యదారిగను ఘాట్ రోడ్డువెంట
పైవరకురవాణయే-భక్తజనులు
వాహనాలన్నిట పయనించు వసతులుండె!
హారతి గొనుమ నాంపల్లి నారసింహ!
97*
వెలయు గుట్టపై సాగెడు వేడుకలుగ
లక్ష-నరసింహ స్వామి కళ్యాణ మగును-
పార్వతీ రాజరాజేశు పరిణయంబు!
హారతి గొనుమ నాంపల్లి నారసింహ!
98*
మంది యెక్కువ శ్రావణ మాసమందు
ఏకముగ సాగు భక్తి ప్రత్యేక పూజ!
జనుల వంటమ్రొక్కు-వనభోజనముసాగు!
హారతి గొనుమ నాంపల్లి నారసింహ!
99*
రామ నవమి, సీతారామ సామి పెళ్ళి-
గోద రంగనాథుల పెళ్ళి గుట్టపైన
జరుగు నేటేట సద్భక్త జనులవేడ్క!
హారతి గొనుమ నాంపల్లి నారసింహ!
100*
ప్రకృతియందాల రాశి నాంపల్లి గుట్ట!
ఎగువ కాళీయమర్ధనం-దిగువ నాగ
గుడి పురాతనగుడి నీదు గొప్పమహిమ!
హారతి గొనుమ నాంపల్లి నారసింహ!
101*(సంపూర్ణం)
మనిషి “ఇదియునొకందుకు మంచి” దనుచు
లౌకికముమాని మదిపారలౌకికముగ
మంచిభావింప సర్వత్ర మంచి జరుగు!
హారతి గొనుమ నాంపల్లి నారసింహ!
102*
జరుగనున్నదే జరుగును జగతి-జనులు
మంచిభావింప జరిగేది మంచిదగును!
నిత్య సత్యమై నీదయ నిఖిలమొసగు!
హారతి గొనుమ నాంపల్లి నారసింహ!
103*
నయము జయమిచ్చును సహస్రనామ జపము
శతక పద్యాల నుతిజేయ సతము శుభము
గాగ నీధ్యానమున ముక్తి నిశ్చయంబు!
104*
తెలుగు” సత్యనారాయణ తిరుణహరి”ని-
దాస దోషంబు దండముతోసరియగు!
భక్తి శతకాంకితం ప్రేమ శక్తి రూప!
హారతి గొనుమ నాంపల్లి నారసింహ!
105*
పంకజము జేరు నీపాద పద్మయుగము-
చెఱుకు వక్రత తీపిని- చెరపలేదు!
సాధుజనరక్ష నీయిచ్ఛ-సామి శరణు!
హారతి గొనుమ నాంపల్లి నారసింహ!
106*
కడకు కశిపుని వరగర్వమణిగి సమసె!
భక్త ప్రహ్లాదుని ప్రేమ శక్తి గెలిచె!
చేతనమె ముక్తి మార్గమై చెన్ను మీరు!
హారతి గొనుమ నాంపల్లి నారసింహ!
107*
తపము సహనదీక్షగభక్తిదారి-శతక వ్రతము సాగెను-హరిహర! శతక సరము-
అర్పణముజేసితి, దేవ! అభయ వరద!
హారతి గొనుమ నాంపల్లి నారసింహ!
108*
శుభము కవిపండితోత్తమ శ్రోతలకును
శుభము సద్విమర్శకులకు సుఖము శాంతి!
శుభములను గూర్చి దీవించు సూత్రధారి!
హారతి గొనుమ నాంపల్లి నారసింహ!