కృష్ణ వరనివాళి శతకము
(ఆ.వె.)
1*
శ్రీశ!చిన్మయేశ!శిఖిపించ శోభిత!
శరణు రుక్మిణీశ! కరుణ కిరణ!
రాధ మానసేశ! సాధుసజ్జన పోష!
వావిలాల కృష్ణ వరనివాళి!
2*
వేణుగానలోల!వ్రేపల్లె గోపాల!
గోపికామనోహర! హరి! గోకులేశ!
నందలాల! పాహి! నారాయణ! విష్ణు!
వావిలాల కృష్ణ వరనివాళి!
3*
దేవ దేవ! పుణ్య దేవకీ వసుదేవ-
పుత్ర పూత గాత్ర! పుణ్య పురుష!
కామజనక! భక్త కామ్యార్థ ఫలధాత!
వావిలాల కృష్ణ వరనివాళి!
4*
చక్రి! కాలచక్రి! చపలంబు నరికట్టి
బుద్ధి తీర్చి దిద్దు-బుద్ధదేవ!
మంచి వేయి విధుల మన్నించు దేవరా!
వావిలాల కృష్ణ వరనివాళి!
5*
మాయతెరలు జీల్చు మానుష విగ్రహ!
ధరణి సంసృతి ఘన తరణి – నామ!
సూక్ష్మమందు మోక్ష సూత్రగీతాధాత!
వావిలాల కృష్ణ వరనివాళి!
6*
నారద నుత! బమ్మ! శారద సంగీత
గీత వాద్యలోల! క్రీడి వరద!
సవ్యసాచి జేసి సవరించు నామది-
వావిలాల కృష్ణ వరనివాళి!
7*
ప్రకృతి చేతనాత్మ – కాకృతి గావెల్గు-
ప్రాణశక్తి రూప! ప్రణయ దీప!
సేమ ధాత వోకుచేల సన్నుత- హిత!
వావిలాల కృష్ణ వరనివాళి!
8*
నాణ్యమైన భక్తి నవవిధ తారక-
నావలొసగి జన్మ నదిగమించి-
చేరుదాక నాత్మ చేతనమొసగేవు!
వావిలాల కృష్ణ వరనివాళి!
9*
విశ్వ రూపధారి! విజయసంరక్షక!
మూర్ఖ రాజసాళి మోక్ష ధాత!
సత్య ప్రియుడ! సుగుణ సాత్విక నరరూప!
వావిలాల కృష్ణ వరనివాళి!
10*
అష్టభార్యలుండ-ఇష్టమౌ వసుధను
మిగులగారవించు మీనరూప!
నరులవెంట వైద్య నారాయణుడవీవె!
వావిలాల కృష్ణ వరనివాళి!
11*
కరుణ జూపు కన్న! కమనీయం నవనీత-
చోర! నీదులీల చోద్య పథము!
మనసు నిల్పియాత్మగనినిను శోధించు!
వావిలాల కృష్ణ వరనివాళి!
12*
వరుస దుష్ట వధలు, వనభోజన కథలు!
పల్లెమాతయొడిని పరవశాలు!
ప్రేమరాజ కేళి పెద్దసంతోషాలు!
వావిలాల కృష్ణ వరనివాళి!
13*
వత్స నరుడు వేద వాఙ్మయం గోమాత-
పితుకు పాలు గీత, ప్రీతి గూర్ప-
నీదు శరణు జొచ్చి నినదించు నరజాతి!
వావిలాల కృష్ణ వరనివాళి!
14*
ఆత్మమరచి తానునన్యంబుగానెంచి
తనువు-మనసు తాను, తలపుగొనుచు-
పొలిగి మనసుబోవు పోకలబోదురు!
వావిలాల కృష్ణ వరనివాళి!
15*
తనువుతనదిగాదు,మనసు తనదిగాదు,
ఆత్మనేనటన్న-యాది గీత-
సూక్తి చేత దొరికె-సూక్మమే మోక్షము!
వావిలాల కృష్ణ వరనివాళి!
16*
మనసు నిల్చినంత మాయపొరలు దొల్గు
బుద్ధివెలుగు పారు భూతకైన-
నీదు భక్తి నిత్య నియమావళి భాసించు!
వావిలాల కృష్ణ వరనివాళి!
17*
భక్తి గొలుతు నిన్నె- బలభద్ర సోదరా!
ముక్తి వలతు జన్మముక్తి ధాత!
బతుకు ప్రీతి గూర్చు వలరాజు జనకుడా!
వావిలాల కృష్ణ వరనివాళి!
18*
చిత్తచోర రామ-సీతామనోహరా!
స్థితికి కర్త వీవె! చిత్రసింహ!
రాధ మానసపతి! సాధుహృదయ!
వావిలాల కృష్ణ వరనివాళి!
19*
యుక్తి బుట్టి మధుర శక్తివై తిరుగాడ-
కల్ల-శక్తులణగె-కంసుడుడిగె-
సృష్టి గెలుచు-ప్రేమ పుష్టిగా ధరనిండె!
వావిలాల కృష్ణ వరనివాళి!
20*
పల్లెనుండి మధుర పల్లవించిన చైత్య
రథముసాగె భక్తి పథము సాగె!
విశ్వ గెలుపుధాత- విజయసారథి వీవె!
వావిలాల కృష్ణ వరనివాళి!
21*
జీవిమనుగడాగు, జీవితేచ్ఛయులేక?
ప్రణయం రహిత మది-బాధగుములు!
ప్రణవనాదమూది-ప్రాణిగావుము ప్రభూ!
వావిలాల కృష్ణ వరనివాళి!
22*
వైరి వైరసెదిగి, వాస్తుపై మానవ-
లోపమందు దూరు-లోక జనుల-
లోపసవరణ తమది-లోకకల్యాణమై!
వావిలాల కృష్ణ వరనివాళి!
23*
బాల్య గ్రహ దోష బాధ సూక్ష్మక్రిమి-
విషకణజము-రుజల విస్తరించు-
నయము జేయ నీదు- నామౌషధమె చాలు!
వావిలాల కృష్ణ వరనివాళి!
24*
పల్లె పాడి-పంట పసిడి సిరులెల్ల
ఆకలార్పు దివ్య ఔషధాలె!
తీర్చి దిద్దుమమ్ము-దివ్యగీతాయుధం!
వావిలాల కృష్ణ వరనివాళి!
25*
విపులరాజనీతి-వివిధనగర సంఘ
సంస్కరింత-నీదు సంస్కృతయ్యె!
ప్రేమశక్తి రూప! ప్రేరణాత్మక దీప!
వావిలాల కృష్ణ వరనివాళి!
26*
పత్రహరిత సృష్టి ప్రాణవాయువు పుష్టి
చెట్టు చేయనున్న శ్రేష్ఠి నీవె!
ప్రాణభిక్ష గలిగె-ఆయురాగోగ్యమై!
వావిలాల కృష్ణ వరనివాళి!
27*
రాజలోకబుద్ధి రాణించె-రాముని
ఏకపత్ని వ్రతము-లోకమందు!
పల్లజనులజుట్టె-బహుభార్యబంధముల్
వావిలాల కృష్ణ వరనివాళి!
28*
దుష్టరాజనీతి-దుడుకుచేస్టకు భూమాత-
మొరలుబెట్టె -చేటుమూడువేళ!
చెడుకు శిక్షగలిగె-సేమంబుగనె మంచి!
వావిలాల కృష్ణ వరనివాళి!
29*
పరశురామ ప్రీతి పరగర్వ ఖర్వమై
రామధర్మతేజ రణనినాద-
కార్యరంగమాయె-కలుషాపహరణమై!
వావిలాల కృష్ణ నివాళి!
30*
హాని జేయువేళ కానివాదుల జీల్చి
భారతసమరంబు బదులుజెప్పె!
ధర్మజు ఘననీతి దారి సుస్థిరమాయె!
వావిలాల కృష్ణ వరనివాళి!
31*
భాగవతము వెలసె, భక్తినవవిధాల
నీదు పూజసాగె! నిత్య నిష్ఠ-
నీదు భాగమాత్మ నిశ్చలత్వము గనె!
వావిలాల కృష్ణ వరనివాళి!
32*
బాల భక్తు మెచ్చి, లాలించి గాచిన
చిత్ర సింహ! నిన్ను చేరికొలుతు!
దుష్ట హరుడ వీవె! దురిదూరుడ వీవె!
వావిలాల కృష్ణ వరనివాళి!
33*
బంగరు తనువొంది- బంధియై కశిపుడు-
తానెదైవమనుచు-తగినవరము-
పొంది గర్వమొంది-పొగిలెను బతుకంత!
వావిలాల కృష్ణ వరనివాళి!
34*
పట్టు వదలనట్టి-పసిడినేత్రుడు జచ్చె
కోర్కెదీర్చు కొనెను-క్రోడరూప!
చిత్రసింహమైన – శ్రీహరి మాంపాహి!
వావిలాల కృష్ణ వరనివాళి!
35*
రక్త బీజు, మహిష రాకాసులను గొట్టి
ధర్మ సుస్థిరతను ధరనునిల్పి-
చేవగూర్చి దుర్గ చేయూతనందించె!
వావిలాల కృష్ణ వరనివాళి!
36*
బ్రహ్మ సృష్టి శివుని ప్రళయంబు మధ్యనా
వ్యాప్తి నీదె విష్ణు – వసుధయందు!
కార్యమాగిన త్రి కల్పించుకొనెదవు!
వావిలాల కృష్ణ వరనివాళి!
37*
యోగనిద్ర-నిరత యోచన యోజనల్
చేయు నీకు గలిగె వేయిపేర్లు!
పిలిచినపలికేవు-ఏపేరునైనను-
వావిలాల కృష్ణ వరనివాళి!
38*
నిజము కలయె-కల్ల నిజమగు నరులకు
మాయ మనసుటూహ-డాయునిలను-
మాయ దొలగినయమాయకత్వము గలుగు!
వావిలాల కృష్ణ వరనివాళి!
39*
జరుగు శుభము-సృష్టి జరిగి పోవుకొలది
లోకకంఠకాళి లొంగి చనగ-
జరుగనున్నదెల్ల జరుగక మానదు!
వావిలాల కృష్ణ వరనివాళి!
40*
చెడ్డ మరచి మంచి చేయూత మానవ-
జాతికెల్లనాత్మ జాగృతంబు!
అంతరాత్మ బోధ – ఆలకింపగ మేలు!
వావిలాల కృష్ణ వరనివాళి!
41*
సంతసంబె బతుకు సాగించునాయువు
హర్షమందె బెరుగు – నీర్ష్యరహిత-
ప్రేమ సానుకూల ప్రేరణ గలిగించు!
వావిలాల కృష్ణ వరనివాళి!
42*
స్వాగతించి పరుల సంక్షేమ విధులలో
తిరిగి చేసి యలసి – తృప్తినంది-
సానుకూల ప్రేమ సంధింప మేలగు!
వావిలాల కృష్ణ వరనివాళి!
43*
ద్వేషగుణముచేత,దేహము – దేశము
గాసిజెందును ప్రకాశముడిగి-
శాంతిరహిత బతుకు- సాగదు సద్భక్తి!
వావిలాల కృష్ణ వరనివాళి!
44*
కాలచక్ర గమన గమ్యవేగము తన-
గర్భమందు గలుపు-గతము, భవిత-
రిత్త-వర్తమాన రీతి సాగుటమేలు!
వావిలాల కృష్ణ వరనివాళి!
45*
సృష్టి లయము నడుమ-స్థితికర్తవేనీవు!
వెలయు పుష్టి నీదు వేడ్క సాగు!
జగతినాటకమున-సుగతిపాటవ భక్తి!
వావిలాల కృష్ణ వరనివాళి!
46*
ప్రజల జన్మనాటి పంటపుణ్యముదీసి
కాన్కపొందు నీదు కథలు పెక్కు!
జగతి సాగుబడుల-సర్వంబు నీకృప!
వావిలాల కృష్ణ వరనివాళి!
51*
రాజు పేదయనక రాణించు నీభక్తి
పేదకన్న తేగి పెద్దరికమె-
రాజునదుపు జేసి రాజ్యాన్ని పాలించు!
వావిలాల కృష్ణ వరనివాళి!
52*
ఏమి వింత మదిని వెలయుకోరిక శోక
తిమిరకారకంబు-తీరుదాక!
కోర్కె నియతి-భక్తి కొలువున సాధ్యమౌ!
వావిలాల కృష్ణ వరనివాళి!
54*
ఆత్మ కొఱకె విద్య-అందు కొఱకె తనువు-
మంచికొఱకె మనసు – మనుజుకందె!
మనసుగట్టు భక్తి మార్గగమ్యము ముక్తి!
వావిలాల కృష్ణ వరనివాళి!
55*
పతనమొంది జనిరి-ప్రభువులు పెక్కురు
దనుజ వైరి నీవె-ధరణిగావ-
మరల సుఖము శాంతి మహిలోన చిగురించె!
వావిలాల కృష్ణ వరనివాళి!
56*
ఆత్మలోనె నిన్ను అర్చింతు – నీదివ్య
దీప్తిగాంచి మదిని దిద్దుకొందు!
జన్మరుణము దీర్చు-జాగృతిన్ వరమిమ్ము!
వావిలాల కృష్ణ వరనివాళి!
57*
ధనమూలమైన-ధారుణి బంధముల్
సాగనియవు-భక్తి సమయమేది?
త్యాగబుద్ధినొసగి-తప్పించుమిహ బాధ!
వావిలాల కృష్ణ వరనివాళి!
58*
గతము మరువజేసి గల్పించు ఈక్షణం
బతుకు విధము గూర్చి భద్రతొసగు!
వచ్చుకాలమునకు-రెచ్చియోచనలేల!
వావిలాల కృష్ణ వరనివాళి!
59*
అందుకొనుము-మంగళారతి జగతి-గో
వింద – శుభములొసగు! విశ్వరూప!
సజ్జనోద్ధరణలు-సాగించి మన్నించు!
వావిలాల కృష్ణ వరనివాళి!
60*
వితరణిచ్ఛసున్న – విధులనాస్తియె మిన్న
డబ్బులబ్ధికొఱకె-తపన బతుకు!
ఎదుటి పోటి గెల్వ చెలరేగ జేయకు!
వావిలాల కృష్ణ వరనివాళి!
61*
భువిపరస్పరము-భూతదయయులేక
నరుడు బతకలేడు-నరరూపదానవుల్
ఆశ్రయించి కలిని అవనిబుట్టెదరింక!
వావిలాల కృష్ణ వరనివాళి!
62*
సొంతసొమ్ము మేలు సొరగమ్ము తలపించు-
పరధనంబుకాశ పడుట చేదు!
నిన్నునమ్మికొలువ-నిండు ధనకోశముల్
వావిలాల కృష్ణ వరనివాళి!
63*
ఆయవారవృత్తి అవనిగారవమందె!
నేటి దైవభిక్షు నిగ్గుదేలె!
వేదమంత్రవిధుల వేవేగసంధించె!
వావిలాల కృష్ణ వరనివాళి!
64*
అవనిగౌరవించె మదిసగుణోపాసన-
తపమెదానమయ్యె! తపసిదాత!
గమనదారులన్ని గమ్య పుణ్యంబుకె!
వావిలాల కృష్ణ వరనివాళి!
65*
నీతిరహిత సొత్తు నిప్పచ్చరంబగు
నీతియుతమె మంచి నియతినొసగు!
సులభ సిరులు వెసన సోకుతో పరిమార్చు!
వావిలాల కృష్ణ వరనివాళి!
66*
వృద్ధసేవజేయ సిద్ధమై యవ్వారి
మనసుదెలిసి-సంయమనము జూపి
స్వాస్థ్యమొప్పజేయ-సార్థక శ్రమయగు!
వావిలాల కృష్ణ వరనివాళి!
67*
చాలకష్ట పడియు శారీర, మానసి
క స్థితిని బట్టి మెదల కస్తియైన-
గతపు వారిసేవ – గమనించుకోవలె!
వావిలాల కృష్ణ వరనివాళి!
68*
కోపగించి వృద్ధు ఘోషబెట్టగ తప్పు
బట్టపనియులేదు-తరతరాల-
తాల్మియాస్తిగాగ తలవంచి మొక్కాలి!
వావిలాల కృష్ణ వరనివాళి!
69*
కఠినమాడకుండ-కన్నపేగు దలచి-
ఒకటిరెండుమార్లు-వొనరజెప్పి-
అవసరాలు దీర్చి ఆనందపరచాలి!
వావిలాల కృష్ణ వరనివాళి!
70*
పుడమి మంచి జనులె! పోయినవారల-
తీపిగుర్తులున్న తీరుతెన్ను-
లరసి-భావితరము-లనుసరింపగ మేలు!
వావిలాల కృష్ణ వరనివాళి!
71*
ఈసుగలిగి మదియు నిద్రకు దూరమౌ
గర్వమున్న మైత్రి గలుగుటెట్లు!
సందియముల వలన-రంది జీవనదారి!
వావిలాల కృష్ణ వరనివాళి!
72*
అదుపుజేయ – పూర్వ ఆశ్రమ వ్యవస్థ
గలుగవలయు ఇంటి గలుమలందె!
ఆచరణ మది – శాంతి-నీచవైరము దొల్గు!
వావిలాల కృష్ణ వరనివాళి!
73*
అత్తజేసె తనకు అన్యాయమని దల్చి-
కోడలందుకొన్న కొంప పెద్ద-
రికము మరల కోడరికము పాలేకదా!
వావిలాల కృష్ణ వరనివాళి!
74*
వచ్చు పితరులాస్తి వారసత్వంబుగా
వారిమంచిబుద్ధి పటిమరాదు!
వరుసగాను మానవత్వసిద్ధిని గూర్చు-
వావిలాల కృష్ణ వరనివాళి!
75*
దుడుకుగాను బెంచి దౌష్ట్యమూకను జేర్చి
ముదిమి దిట్ట రిత్త-ముళ్ళమొక్క-
నాటి పళ్లు గోర-నయశూన్య వేదనే!
వావిలాల కృష్ణ వరనివాళి!
76*
సమ్మతమగు రక్తసంబంధియంశమే
నమ్మకమ్మెనడుపు నమ్మ, నాన్న!
మాట వృధయె-సేవ మార్గమే విధియగు!
వావిలాల కృష్ణ వరనివాళి!
77*.
ఆప్తుగాంచి గంపెడాశింప వచ్చునా-
మితముమేలు-గతముమిడుక-కీడు!
చిత్తవృత్తి మాన్పు నిత్య చేతనత్వము నీదె!
వావిలాల కృష్ణ వరనివాళి!
78*
తృప్తి గలుగ మేలు ప్రాప్తసౌఖ్యమునకు-
నోటనొక్కమంచి మాటజాలు!
ఇచ్చినంత మరల పుచ్చుకో వీలగు!
వావిలాల కృష్ణ వరనివాళి!
79*
సానుభూతి వెంట సాయమాశింపకూ!
మైత్రితానె ఇచ్చు-మరి సుధామ-
అడుగ వెఱచె! నీదు అడుగులమడుగొత్తె!
వావిలాల కృష్ణ వరనివాళి!
80*
సంతు విశ్వసించి సాంతము బతుకంగ-
స్థైర్యమొసగు గుండె ధైర్యమొసగు!
చిత్త శుద్ధి నీదు శ్రీపాద సిరులిమ్ము!
వావిలాల కృష్ణ వరనివాళి!
81*
శ్రీకర!శుభకర!సురేశ!గోవర్ధన-
ధారి!కంసవైరి!ధర్మతేజ!
మానవాళి సేవ మార్గదర్శివి నీవె!
వావిలాల కృష్ణ వరనివాళి!
82*
సఖ్యభక్తి దారి ముఖ్యమనియు చాటె-
భక్తియోగమందె భద్రతొసగె-
శరణు జొరగనాత్మ- సాయుజ్యమొసగేవు!
వావిలాల కృష్ణ వరనివాళి!
83*
సర్వమీవె!నరుడు సాగియాగినవేళ
నిర్ణయంబు ధర్మ నియతి సాగు!
చేతులెత్తి మొక్కి చేవబొందును జాతి!
వావిలాల కృష్ణ వరనివాళి!
84*
కలయొ?వెలియొ?బతుకు కల్లయో నైజమో
అండనీవునుండ దండిమేలు!
గోరుదీప కాంతి కొండంత సంక్రాంతి!
వావిలాల కృష్ణ వరనివాళి!
85*
అవనియవసరాలు-అందించు అయ్యవై
వెంటనుండ జీవవెలితి యేమి?
డబ్బు జబ్బు చింత డాయదు ఇసుమంత!
వావిలాల కృష్ణ వరనివాళి!
86*
స్వార్థ తేగమనక సంతుకొఱకు సంత
బేరమాయె బతుకు భారమాయె!
సొంతకొఱకు చింత-చొప్పడవు చింతనల్
వావిలాల కృష్ణ వరనివాళి!
87*
ధ్యాన నిష్ఠనొసగు-దయనాత్మ దీప్తివై
భక్తియోగమిష్ట పథము జేసి-
కరుణతోడ నీదు శరణాగతి బ్రోవు!
వావిలాల కృష్ణ వరనివాళి!
88*
కాలహరణమాయె-కలవరించితి నిన్నె
అన్యచింత వంత అలుసులేల!
నియమరహిత భక్తి నిధియు నిష్ఫలమంద్రు!
వావిలాల కృష్ణ వరనివాళి!
89*
రోతపనికి – భువిపరోపకారానికి
దానధర్మకర్మ దారి ధనమె?
ధనమె మూలమయ్యె-దారెంట బతుకెల్ల!
వావిలాల కృష్ణ వరనివాళి!
90*
మనసు నిల్వదాశ మరిమరి పీడించె
నొక్కచిత్త భక్తినొనర జేసి-
ఆశపాశముడిపి ఆదరించగ రమ్ము!
వావిలాల కృష్ణ వరనివాళి!
91*
పూజజేసి మొక్కి పూర్ణ సాంగోపాంగ
యాగముగను భక్తి యోగమందు-
హారతిచ్చి తృప్తినందేరు ప్రజలెల్ల!
వావిలాల కృష్ణ వరనివాళి!
92*
చిత్తశుద్ధి వెంటచేతనివ్వాళితో
చేరవచ్చు జనులు-సేమమొంద-
సేవమొక్కు దీర్చి చెల్లింత్రు కాన్కలు!
వావిలాల కృష్ణ వరనివాళి!
93*
శుభకరము-దీపశోభితకాంతులున్
దీపపంక్తి పర్వ దివ్యవేడ్క
పరవశింపజేయు- ఫలపుణ్య ప్రదముగా
వావిలాల కృష్ణ వరనివాళి!
94*
మాసమాసమునకు మనిషింట పండుగ
పున్నమి యమవాస్య – పుష్టిదములు!
నేలగురియు చుండు నెలమూడు వర్షాలు!
వావిలాల కృష్ణ వరనివాళి!
95*
ప్రకృతి వికృతి గాగ ఫలిత-విరుద్ధమై
కరువుతాండవించు-కలియుగాన-
పచ్చదనము లోటు ప్రకంటించు ప్రకృతీ!
వావిలాల కృష్ణ వరనివాళి!
96*
కర్మఫలము నీకె కాన్కజేసియు మొక్కి
ధ్యాన ఫలము నిచ్చు-దాస దాసు-
నిత్యభక్తి యోగనీరాజనమె బతుకు!
వావిలాల కృష్ణ వరనివాళి!
97*
కరుణాంతరంగ!శరణాగతిని గూర్చి-
సమతయోగ బాట సాగజేసి-
తుచ్ఛకోరికలను-తుడిచేయు బలమిమ్ము!
వావిలాల కృష్ణ వరనివాళి!
98*
చాలకాలమేగె-సంకటహరణుడా!
బింకమణుగదాయె బెట్టు మదికి!
నిచ్చలంబుజేసి-నీధ్యానమననిల్పు!
వావిలాల కృష్ణ వరనివాళి!
99*
మనసు నిల్వదాశ మరిమరి పీడించు-
నిశ్చలత్వమొసగి- నిగ్గుదేల్చి-
ఆశాపాశముడిపి-ఆదరించగ రమ్ము!
వావిలాల కృష్ణ వరనివాళి!
100*
రోతపనికి భువిపరోపకారాలకూ-
దానధర్మ కర్మరదారి ధనమె!
ధనమె మూలమయ్యె తరియించు మార్గమై
వావిలాల కృష్ణ వరనివాళి!
101*
ఎందరో ఘనులుంద్రు-రెందైన ఉచితసత్
బోధ-గురులు-వారి ఊర్థ్వదృష్టి-
సుగమదారి-తత్వసూక్తి సాగగ నిమ్ము!
వావిలాల కృష్ణ వరనివాళి!
102*
భక్తిసాగును సమభావపూర్ణ గతుల-
యుక్తిసాగుయోగ శక్తిగోరి-
తుచ్చ మనసు- వెనక తచ్చాడ జేసేను-
వావిలాల కృష్ణ వరనివాళి!
103*
ఆశలుడిపి చరమ ఆశ్రమ జీవన
దారినడుపు కలుషదారి మలుపు!
సాధుజీవనవృత్తి-సాగజేయగ రమ్ము!
వావిలాల కృష్ణ వరనివాళి!
104*
వేడుకొంటి శతక వేదిక సప్తతిఁ
పాఠమయ్యె భక్త భజన సాగె బతుకుదెరువు
మాయలుడుగవాయె-మనసునిల్వదాయె!
వావిలాల కృష్ణ వరనివాళి!
105*
సత్యసాధనములు-సత్సంగమునదొర్కు
తేగమొప్పు బుద్ధి తేజరిల్లు!
నిగ్గుదేలునాత్మ నిత్సంగ దారిలో-
వావిలాల కృష్ణ వరనివాళి!
106*
ఆత్మనిబ్బరంబె-అవనిమానవ రక్ష!
ఆత్మదీప్తిని పరమాత్మనీవె!
నిజముముక్తి భువిని నిత్యమానందమే!
వావిలాల కృష్ణ వరనివాళి!
107*
మంగళకర!గొనుము-మంగళహారతి-
శతకపూజమెచ్చి బతుకు దిద్దు!
భక్తిగల్గు కూడు-పట్టెడైనను బెట్టు!
వావిలాల కృష్ణ వరనివాళి!
108*
శుభము-పఠితజనులు-శ్రోతలు కవులకూ-
శుభము-భక్తి పూర్ణ శోభితులకు-
శుభము-పద్యపఠన-లభిత సంతోషికి!
వావిలాల కృష్ణ వరనివాళి!