గీతామననం-3
(తే.గీ.)
1*
శ్రీశ శ్రీ కృష్ణ పరబ్రహ్మ! విశ్వరూప!
సర్వ భూత నిలయ! సుఖశాంతి ధాత!
నీల జీమూత సన్నిభ! నీరజాక్ష!
వేద వేదాంత వేద్యశ్రీ వేంకటేశ!
2*
నందనందన! పండరినాథ! విఠల!
నలువ! హరిహర! ఓంకారనాదబ్రహ్మ!
పరమ పిత! పురుషోత్తమ! బ్రహ్మ జనక!
సూర్య చంద్ర నయన! విశ్వ సూత్రధారి!
3*
విశ్వ విఖ్యాత గురుదేవ! విజయ మిత్ర!
లోపరహిత! గోపాల! గోలోక నిలయ!
భక్త వత్సల! గోవింద! భవవినాశ!
కృష్ణ! గోపికా వల్లభ! కృపను బ్రోవు!
4*
రామ!భృగురామ!బలరామ!రామచంద్ర!
రామ!రిపుభీమ!గుణధామ!రఘుకులేంద్ర!
క్రూర దానవ సంహార! కుబ్జ వరద!
పార్థ సారథి! పరమాత్మ! పాండు రంగ!
5*
అస్త్ర సన్యాసమును జేసి అర్జునుండు-
రణము దాకను వచ్చి నైరాశ్యమొందె!
హృదయ దౌర్భల్యమునకు నౌషదము గాగ
గీత బోధించితివి మ్రొక్కె క్రీడి భక్తి!
6*
సరస సాహితీ సంపన్న! సకలవినుత!
రుద్ర వందిత! శౌరి! శ్రీ రుక్మిణీశ!
ఆశ్రిత భక్తజనావన! అజరభూజ!
మాధవా! మధుసూదన! మధురనాథ!
7*
మూర్తి త్రయరూప! భవబంధ ముక్తి ధాత!
ధరణి క్రతువీవె!ఘృతమీవె! కర్మయోగి!
హవన క్రియనీవె! ఓంకార కవనమీవె!
సర్వమును నీవె! శ్రీ కృష్ణ సార్వభౌమ!
8*
సకల జీవజాతుల సృష్టి సాగులీల!
భూతహితవు విధిగ సాగె! బుద్ధి జీవి-
చేతనాంశ సంభూతుడై శ్రేష్ఠుడగును-
నాల్గు పురుషార్థముల ధర్మ నడక సాగు!
9*
ధర్మ ధాతయై నిష్కామ కర్మసాగి-
కర్మ ఫరసమర్పణ ముక్తి కర్హుడయ్యి-
నిత్య నిష్ఠ గీతాభ్యాస నియతి సాగి-
ధర్మ సహిత జీవన యాత్ర ధన్యుడగును!
10*
నీతి సంకల్పమే గీత నీతి సుధలు-
గురియుటెల్లనీ సద్భక్తి గూర్చు విధమె!
సకల శాస్త్ర సారాంశముల్ సాధు మునుల-
సకల యోగాలు నేకమై సమత వెలసె!
11*
సమతయోగంబు సాధించు సజ్జనుండు
ప్రీతి పాత్రుడు నీకని గీతదెలుపు
విధివి నీవె! వేదత్రయము వెలుగు నీవె!
విద్యలకురాజ విద్యగా వెడలె గీత!
12*
జగతి నాటక కర్తవు జనుల నెల్ల
పాత్రలుగ జేసి యాడించు బ్రతుకు లాట
ధర్మమును నిల్పు నజ్ఙాత దర్శకుడవు!
కర్మ ఫలమును సమకూర్చు కర్షకుడవు!
13*
తల్లి దండ్రి గురువు నీవె తరతరాల
నాశ్రయము నాత్మ బీజముత్పత్తి నీవె!
అమృత-మృత్యు-వౌషదమీవె! యవని మిత్ర-
భావమును నీవె! యవినాశి బ్రహ్మ నీవె!
14*
హృదయ దౌర్భల్యమునుమాన్పు సుధయె గీత
కర్మ యోగమ్ము నిష్కామ కర్మ ఫలము
సౌష్ఠవాభివృద్ధిని గూర్చు చర్యలన్ని
నీదు లీలస్థితినిగాంచు నిశ్చయముగ!
15*
దేహమును మించు నింద్రియ తేజసిద్ధి
దీని కన్న నిష్ఠయు తళుకులీను చుండు-
నిష్ఠ కన్న బుద్ధియుమిన్న నింకదెలియ-
బుద్ధి కన్నకామముమిన్న పుడమి మిన్న!
16*
వెలయు జన్మాంతరములును దెలియు నీకె!
యుగయుగాల నరులవెంట నుద్భవించి
ధర్మ సంస్థాపనకు బూను దారి నీది!
పెక్కు జన్మలు కొనసాగె లెక్కలేక!
17*
దివ్య జన్మ కర్మ సుకృత దీప్తి గీత!
గీతయనతాగి, యైత్యాగ రీతి దెలుపు!
మరల మరల దెల్పునుగీత-మాతవలెను!
సంయమన రీతులును సాగు సహన దృష్టి!
18*
జగతి సర్వము నీశక్తి ప్రగతి నింగి
నిండు వాయువు, సర్వత్ర నుండు నట్లు
విశ్వ సకలమ్ములో నీవె విస్తరించి-
యుండు కతన ప్రకృతి గల్గె నిండు తనము!
19*
నరులు భువిజీవ శ్రేష్ఠులు నాత్మదెలియ-
వారు నరశ్రేష్ఠులై యోగ వారధిగను-
నిండు బ్రతుకు నర్పించగా నీదు కరుణ-
సాగు భక్తి మార్గము ముక్తి సాధనముగ!
20*
సకల భక్తుల నజ్ఞాత శక్తి వీవె!
పతియు గతినీవె-చేతన ప్రకృతి నీవె!
ప్రాణి విజ్ఞాన కళలందు పటిమ నీవె!
నీవె సర్వోపగతుడవు-నీదె సృష్టి!
21*
సూర్య కిరణాలె నీకంటి చూపుగాగ
జలము గైకొని వర్షించు జలదరూప!
జీవితాన స్వతంత్రించి జీవనంబు
చేసి నప్పుడె నీశక్తి దెలియ గలదు!
22*
విశ్వరూప! నీ గీతయు విషదపరచు-
నీతి నరుడు సాకుగజేసి నీదునోట-
వెడలె సకలజీవులముక్తి వేదికయ్యె!
దిక్కులను మ్రోగె జాతిని దిద్ధి తీర్చె!
23*
గుప్తములకెల్ల గుప్తమై గురుతరోక్తి!
నరుడు గీతబోధను విని నయముబొందె!
నరుడు నరజాతి ప్రతినిధి గురుడ వీవు!
బ్రహ్మ నిర్వాణమును గలుగు బాట సాగె!
24*
భారతుడు నెపముగ జాతి భాగ్య గరిమ-
సాంఖ్య కర్మయోగాదుల సాగె బోధ!
పుణ్య ఫలము సాధింపగా పూలబాట-
భక్తి ముక్తుల సాధించు బ్రతుకు తోట!
25*
జన్మ రహిత ముక్తి నరజన్మ ఫలము
దాని సాధించు యోగముల్ దరచి యందు
భక్తి యోగమ్ము సుళువైన బాటగాన
కర్మ పరిపక్వతను ముక్తి గలుగు బాట!
26*
కష్ట సాధ్యము బ్రతుకులీ కలియుగాన
వివిధ యోగాలు సాగించు వీలు పడదు!
చేతగాకున్న శరణన్న చేదు కొనగ
నీవు దెల్పిన గీతయే నీరజాక్ష!
27*
వివిధ జన్మల పుణ్యంబు వెంటరాగ
కలుగు జన్మంబు నరజాతి కలల పంట
భరతమాత బిడ్డగ బుట్టి బ్రహ్మ విద్య-
నిత్య పారాయణము, ముక్తి నిచ్చు వరము!
28*
విశ్వ రూప గీతా దృశ్య విషయ బోధ~
భారతీయ సాహితి వెల్గు బ్రహ్మ విద్య!
భోగి – రోగిగాకను కర్మ యోగి గాగ-
పావనాత్మ జీవనవృత్త పటిమ గలుగు!
29*
ఆత్మ పరమాత్మ సంగమ స్థానముక్తి-
జేరు యోగంబు కొనసాగు తీరమునకు
సాగు సౌలభ్యమయ్యెను స్వామి- గీత,
బ్రహ్మ నిర్వాణమునుగూర్చు పరిధి వెలసె!
30*
విశ్వ నరులు గీతార్థంబు విశ్వసించి~
విశ్వరూపు లీలలు దెల్పు విషయ చర్ఛ!
విశ్వ కౌటుంబ భావనల్ విస్తరింప~
విధుల నిస్వార్థ కర్మయు విస్తరించె!
31*
గీత గుప్తమై ప్రసరించు నీతిబోధ
తెలియగోరిన వారికే దెలుప దగిన-
విద్యగా విభునాజ్ఞయే విశ్వమందు-
శ్రద్ధ విశ్వరూపము నెత్తు పద్ధతయ్యె!
32*
గుప్త శాస్త్రమై వివరించు గొప్పబోధ!
అడుగ కున్న దెల్పిన గాదునవగతమ్ము
మంచియనగ వినగ రూపు గాంచు దాని-
నిత్య మననంబు నాచరణీయమగును!
33*
శాంతి నిస్వార్థ బుణ్యాది సౌధమగును
శాంతి నిష్కామ కర్మలో సత్ఫలంబు
విశ్వసించు వారికి శాంతి, విశ్వశాంతి-
విశ్వరూపమెత్తగవీలు-విధిగ సాగి!
34*
తరతరాల శాంతియె నీతి సౌరభంబు
నరనరాల జీర్ణించిన-నాత్మ వెలయు
నిత్య పారాయణాత్మక నిధిగ గీత
యవని దెల్యగ ప్రశ్నింప నరుని వంతు!
35*
సకల వేదసారము బాష సరళ కృతము
భావసౌందర్య సుస్ఫష్ట భగవదోక్తి!
పరమ గుప్తము సద్యోగ పథము గీత!
దోష దృష్టియు లేకను దెల్య గోరవలయు!
36*
శ్రావ్యమై యర్థమభ్యాస గ్రాహ్యమగుచు
భారతుడు వినునెపమున భరత జాతి
శ్రద్ధగానాలకించెను-స్వామిబోధ!
విధము విశ్వ పరివ్యాప్త విద్య యయ్యె!
37*
యోగ దీప్తిగా భువి కర్మయోగమందు
సాంఖ్యమును జేర్చి దెల్పగా సమతయయ్యె
జనులకందె-శాస్త్రరాజము స్వామి కరుణ
పఠన-పాఠమై సులభార్థ పటిమ వెలసె!
38*
ఆశయమతి గంభీరము-అభ్యసింప
నాత్మ పరమాత్మ నూహింప నరుల చేష్ట
చిత్రమున శిల్పరూపంబు చెలగు నట్లు-
గీత సదవగాహనబొందు రీతి సాగు!
39*
దీక్ష ప్రత్యక్ష సాక్షి పరీక్ష నరుడు
గుప్త తత్వార్థ బోధన గుర్తెఱుంగ
గీత ధర్మ సంస్థాపన కీలకంబు-
విస్మయముబాపి విధి జూపు విషయమయ్యె!
40*
బ్రతికి నన్నాళ్ళు నాత్మీయ భావ గరిమ-
మనసు దోచగా నిర్భీతి మనెడు విద్య-
సదుపదేశమై నరునాత్మ శాంతి గూర్చె!
క్రీడి ప్రతినిధిగా జాతి కీర్తి గాంచె!
41*
జననమరణ భీతియుదొల్గి, జగతి నరులు
విధిగ విషయంబు మదినిల్పు విధముగీత!
గ్రంధరాజమై గాయత్రి సామ్యమయ్యె!
42*
దోవ దెల్యనియాత్రలో దోషదృష్టి
గమ్యమును జేరగా తారతమ్య గతులు
నాత్మ బాధించు నప్పుడు నయము గీత-
దైవ శరణాగతిని బొందు దోవజూపు!
43*
తాను నాత్మగా భావించి తరతరాల
తర్కమాపి, నాప్తియుబాసి-తరలిపోక
తృప్తి గల్గించు లేశమే ప్రాప్తసుఖము~
గాక సకలమ్మును మది వికలమగును!
44*
తరతరాల బోధనల-గీతార్థ మహిమ
ప్రాప్త లేశంబునకు తృప్తి పడుట నేర్పు!
నోర్పు గలిగించు నాపేక్ష నొందనీక!
సాగు – సంసృతీ, సంస్కృతి, జనులమేలు!
45*
సహజరూప స్వభావాల సాగు మాయ-
మనసు నిల్వ నీయదు మంచి మార్గమందు
జనులు పాటింపదగిన యాచరణ గీత!
సాగి పోవుచు శరణన్న చాలమేలు!
46*
మాయయే స్వార్థ గుణమగు మనసు నిల్పి
మాయ పొరజీల్చుటకు పరమాత్మ బోధ
నరుని శ్రేష్ఠత్వమును నిల్పి నయము గూర్ప-
గీతగావించె పరమాత్మ క్రీడి బొగడ!
47*
సకల జన్మల నాత్మ సంచార సరణి
సకల జీవరూపుల పుణ్య సంచితంబు
గాగ-నరు జన్మయుగలుగు, గమనగతుల-
జన్మ శ్రేష్ఠత్వమునుబొందు, ధన్యుడగును!
48*
మాయ మర్మంబు నజ్ఞత మాయికతయు-
సహజ రూపస్వభావముల్ స్వార్థ పూర్ణ
నరుల కెట్లు శ్రేష్ఠత్వంబు-నలరు? మార్పు-
తీర్పుగా గీత బోధించు తీరుతెన్ను!
49*
దివ్య గీతార్థ మననంబు ధీయుతంబు!
మధురమున్ గ్రోల తత్ఫల మమరపథము-
గీత విజ్ఞాన వాహిని చేత జనులు-
చేతనాంశ జీవనముక్తి జెందు చుంద్రు!
50*
ఆత్మలో పరమాత్మయు నలరు దీప్తి-
వెలయు గురుత్రయ సిద్ధాంత వేదికలను
భక్తి బాటయే సుళువైన ముక్తి యనుచు-
శిష్టవైశిష్ట్యమద్వైత శ్రీలుదెలుపు!
51*
ఆత్మ పరమాత్మ జేరుటే యగును ముక్తి
ఆత్మ పరమాత్మ వీడుటేయగును జన్మ-
పుణ్య సంపాదనకె జన్మ పునరు జన్మ!
ధర్మ సంస్థాపనే యవతార లీల!
52*
జన్మ పుణ్యంబు భవబంధ జాలమూడ్చి
మూలకములంతరించగా ముక్తి జేర్చు-
బాటయే యోగమగు భక్తి బాట, జగతి
నాత్మ పరమాత్మ లద్వైత నటన సాగు!
53*
ఆంగ్ల రిలిజియో పదమూల సంగతిదియె!
రిలిజియను పేర కొనసాగు రీతి ముక్తి!
ఆత్మ పరమాత్మ వీడియు నవని బుట్టి-
జన్మ రహితమై పరమాత్మ జేరు మరల!
54*
పిల్లలిది విన్న చెడి పోరు! ఇల్లు వదలి
సాధు సన్యాసులను గల్సి సాగిపోరు!
రిత్త మాటలపోహలనుత్తరించ
మేటి గీతార్థ నిధి మది మేలు గూర్చు!
55*
జరగు శుభకార్యముల గీత జయము, శుభము-
గూర్చు, సంసారి సన్యాసి కోర్కె దీర్చు-
సాంప్రదాయ సంస్కృతి గీత చల్ల-వెన్న!
జన్మ రహితముక్తిని జూపు జనుల ప్రాపు!
56*
యోధ నరుడు గీతను దెల్సి యోగ్యుడయ్యె!
వివిధ ధర్మమర్మములెర్గి వీరుడయ్యె!
మిగత బ్రతుకు గృహస్తుడై మిగుల కీర్తి
సమత యోగాన సాధించె సవ్య సాచి!
57*
గీత సంస్కృతి-సంసృతి చేతనంబు
సాంప్రదాయ సదాచార సామ్య గతుల-
గీత పాలమీగడ బోలు – ప్రీతి గ్రోల-
జన్మ రహిత ముక్తిని గూర్చు-జాగృతంబు!
58*
పరమ పద ప్రాప్తియోగుల పథమువెంట-
సాంఖ్య కర్మంబులును గల్సి సాగె-గీత-
జయము నుద్యోగ సద్యోగ జనుల యింట-
సహన సంపద సమకూర్చు సాధకంబు!
59*
కర్మయోగి గీతార్థంబు కరణి నరుడు-
సాగె, కర్మఫలత్యాగ, సామ్య దృష్టి!
పుణ్య సంసారి-సన్యాసి పూని నడువ-
ధర్మకర్మల-నిష్కామ కర్మ వెలసె!
60*
కర్మ యోగాన విశ్వాత్మ గాంచి, తాని-
మిత్తమాత్రుడై విధిసాగి, మితిగ కర్మ-
నీశ్వరార్పణ జేయగా మిగత దంత-
తనదె-భారమనెను, తత్వ గురుడు!
61*
భక్తి నిష్కామ కర్మలో బ్రతుకుటన్న
ఫలమునాసక్తి వీడుటే-భగవదాజ్ఞ
ఫలసమర్పణ గావింప, ప్రతి ఫలంబు
తానొసంగుదుననె గీత తత్వగురుడు!
62*
అన్ని ఆశ్రమంబుల సాంఖ్యమనుసరింప
కష్ట సాధ్యము, నిష్కామ కర్మ మేలు!
తత్ఫలాసక్తి లేకను – తరలు జన్మ-
గడప నేకాత్మభావన గలుగుచుండు!
63*
శత్రు శత్రుత్వమును జంపి-మిత్రు జేసి-
సాగు చిత్తచికిత్సగా స్వామి గీత!
నరుల సదసద్వివేక చాతుర్య మొసగి
ఫలనిరాసక్తిగను భక్తి బాట నడుపు!
64*
నరుడు నరజాతి ప్రతినిధి – అడుగు ప్రశ్న-
విశ్వ నరు ప్రశ్న, గీతార్థ విషయ బోధ-
సంశయములెల్ల దీరగా సాగు వేళ-
విశ్వ రూప సందర్శన – విశ్వ గీత!
65*
భువి చరాచర జీవ తత్పూర్వ పరము-
జనుల కిహపర సుఖవాంఛ జనిత మైన-
కర్మ త్రిగుణ బంధమును త్రికరణ శుద్ధి!
సాగె గీత సర్వస్వము స్వామి మహిమ!
66*
వేద వేదాంత తత్వంబు వెలయు, నుపని-
షత్తు సారాంశమే గీత సాగు బోధ!
భువి పురాణ సాహితి నెల్ల బూని పుణ్య-
దధిని జిల్కె, గీతయె వెన్న విధము దేలె!
67*
భారతీయ వేదిక వేద భావ జలధి-
గీత తరియించు నావయై క్రీడి వెంట-
కృష్ణుడే వ్యాస మునిగ సుకృతము నెల్ల
విశ్వ తత్వ తార్కాణమై వెలసె గీత!
68*
వేద చరితేతిహాసాల వెలయు కవన-
కృతులు పౌరాణికోక్తులు కృష్ణ విభుని-
చేత వెన్న ముద్ధగ దోచె చేత నాంశ!
ప్రకృతి గీతమై గీతార్థ పటిమ గాంచె!
69*
చపల మది పంచేంద్రియ సడుల నణచి
ఆత్మ పరమాత్మ బోధన -నలరుచుండ-
తనువు తానుగాదని దెల్సి, తానునాత్మ-
గాను, దెల్సిన పరమాత్మ గమ్యమెఱుగు!
70*
త్యాగ దీప్తి యంతరశత్రు దాడి నాపి-
కోర్కె మాని, శోకములేని గొప్ప తనము-
దోష దృష్టి లేకను, సాగుదోవ-గీత!
జన్మ రహితముక్తిని బొంజాడదు
దెలుపు!
71*
ఆత్మ తత్వంబు వడవోసి యలరు గురుల-
చేరి సామాన్యులును వారి చేష్టలెంచి-
యనుకరింతురు, శ్రేష్ఠత్వమదియటంచు-
జాగరూకులై శ్రేష్ఠులు జనుట మేలు!
72*
పంకమును వీడి గుడిజేరు పంకజంబు-
దేహ తతివీడి యాత్మయు దేవు నరసి-
లీనమగుచుండు మరుజన్మ లేని గతుల-
గడ్డి పూవై గుడినిజేర గలుగు భక్తి!
73*
మనసు బుద్ధి నర్పించియు మనెడు జన్మ
పుణ్య నిధి పూర్ణమై యాత్మ బొందు ముక్తి!
యిహపు సంసార సుఖశాంతినిచ్చు విభుడె!
భక్తి నావలో పయనించ బలముగూర్చు!
74*
మొదట కీడెంచి సాగిన మోదమిచ్చు
పిదప మేలెంచు దారుల ప్రీతి గూర్చు-
మంచిదలపెట్టి సేవించు మనుగడంత-
గలుగునుపకార పుణ్యంబు గట్టి మేలు!
75*
ప్రకృతి జఢచేతనంబుల బడిన జనుల
బ్రతుకు బండి చక్రాలుగా పరుగులెత్తి
మంచి చెడ్డల ఫలితంబు-మరల జన్మ-
చిత్త శుద్ధిచే చేతన స్థితియు గలుగు!
76*
కాల మాసన్నమగుదాక కలుగు జన్మ-
ఎన్ని జన్మల కైనను ఎంచుకొన్న-
పుణ్యమార్గమే వెన్నంటు పుడమినాత్మ-
భక్తియోగాదులనుబొందు బ్రహ్మముదము!
77*
క్షితిని పాంచభౌతిక సృష్టి, జీవరాశి-
యాత్మ నెలకొన్న దైవమజ్ఞాత శక్తి-
ప్రకృతి దండ దారము బోలు పరమ పురుషు-
లీల, పంచభూతాత్మక కేళి సాగు!
78*
మంచి బుద్ధియు సత్కర్మ మాటశుద్ధి-
త్రికరణ, త్రిగుణ బంధమ్ము తీరు తెన్ను
గీత వివరించు, నాత్మీయ చేతనంబు!
వెలయు దారుల, భక్తి – వివేకముండు!
79*
జన్మ-జన్మల పుణ్యంబు జతపడంగ
పుడమి పుణ్యాత్ములింటిలో బుట్టునాత్మ!
నదిగ సాగుచు దరులొర్సి నాణ్య మగుచు-
సాగి పరమాత్మ కడలిలో సంగమించు!
80*
పుణ్య సంచితార్థము జన్మ పూర్వకముగ
నరుని జన్మ గల్గుట చేత నరుడె శ్రేష్ఠ-
జీవియయ్యె, పూరించు-పూజించు పుణ్య-
ఫలము రాజు పేదల కొక్క బాట గలుగు!
91*ఆ. వె.
విశ్వ దేశ దేశ విషయాను వాదాల
నచ్చు పడిన ధర్మమైచ్ఛికముల-
పటిమ వెలయు ధర్మ పర్యాయ పదమేది-
ధర్మ మనియె వ్రాయ దగునటండ్రు!
92*ఆ. వె.
సాధు వృత్తి భక్తి సామ్రాజ్య జీవనమ్
భరత జాతి కుగ్గు పాల బువ్వ!
ప్రాణహితవె నీతి ప్రాధాన్యతను దెల్పు-
శాశ్వత సుఖ శాంతి జాతి వాంఛ!
93*గీ.
అనువు విభజించి పరమాణువరయ నేర్చి
గురుడు బోధించె తాత్విక గురియు కుదర!
ఆత్మ విభజించి పరమాత్మ నరయు దోవ-
గీత బోధించె కర్మయోగీశ్వరుండు!
94*గీ
గుర్త గల్గిన గరుబోధ గుప్తగీత!
తత్వ పరిశోధనలు సాగె తరతరాల!
విజ్ఞ జీనోము గనిపెట్టె విశ్వ నరుడు!
ముగ్ధ భక్తి నోమున జన్మ ముక్తి గాంచె!
95*గీ
నేటి విద్య లో నేపేజి విశ్వశాంతి?
విషయ సూచిలో నుపకార విస్మరింపె!
విద్య కీడెంచి మేలెంచు విధులు మేలు!
చేత గాని కోతల నీతి నేతిబీర!
96*ఆ.వె.
ధర్మ పక్షపాతి ధర్మజు గెలిపించె-
కలినిరోధమైన కట్టుబాటు-
చర్యలందు ధర్మ ఛత్రంబు బట్టెను-
ధర్మ ధేను సాగె ధరణి యందు!
97*ఆ.వె.
సత్యగతులె నీతి సంస్కృతికాయువుల్
సాగు సత్యవ్రతము సంసృతిగను-
సత్య ధృవమె ద్రిప్పు సకల భువనములన్
సత్యమందె దైవ సదనముండు!
98*ఆ.వె.
స్వేచ్ఛజీవనంబు సేమంబు స్వాతంత్ర్య-
భావనంబు జన్మ పావనంబు!
భక్తుడై స్వతంత్ర భావ సాధన చేత-
బ్రహ్మ తత్వమొందు భారతుండు!
99*ఆ.వె.
సామ్య భావ సుగమ సంసార జీవనమ్
భరత జాతి సొమ్ము పౌరనీతి-
ప్రాణి హితవు గూర్చు పావన ధర్మము
వెన్నుని దయ గీత వెన్నెలయ్యె!
100*ఆ. వె.
దివ్వె క్రింద మరొక దివ్వె వెల్గింపగా-
నీడ దొలుగు నట్లు పీడనంబు-
దొలగె, గత హృదయ దుర్భలత్వము మాన్పె-
బలము గూర్ప పుణ్య భావ మెసగె!
101*ఆ.వె.
స్వేచ్ఛ బ్రతుకు బాట సేమమై రాణించు
ప్రజల గన్న తల్లి భరత మాత!
పారతంత్ర బాట – భక్తి సాగదు కదా!
స్వేచ్ఛలేక నాత్మ దెలియరాదు!
102*అ.వె.
భారతుండె గీత ప్రశ్నోత్తరాలకు
కారకుండు ధర్మ కార్మికుండు!
కదలె యుద్ధమందు కారణమాత్రుడై
జగతి నాట క్రియ ప్రగతి గీత!
103*తే.గీ.
భక్తి నికషలో నిర్ధేశ్య పటిమ కొలది
సుకృతము బెంచు శ్రీకృష్ణ సూక్తి – ముక్తి
గీత భూతద్ధమున తత్వరీతి గాంచ
లోక కళ్యాణకారకాలోచనంబె!
104*తే.గీ.
పుణ్య విత్తంబు వెచ్చించి పౌనపున్య-
ఫలము పరమాత్మ కర్పించి భక్తి సాగు!
పారలౌకిక దృష్టియే భక్తి యిహపు-
సౌఖ్యమాడంబరముగాదు జగతి చరిత!
105*తే. గీ.
ద్వంద్వముల శాంతి చేనోర్చు దారి గీత
మంచి త్రికరణ శుద్ధిగా నెంచు క్రియల-
గురుల సమమనస్కతగీత గుర్తు జేయు!
మానసిక సంతులనగతి మనుట మేలు!
106*తే. గీ.
కర్మ ఫలము దైవార్పణ గాగ బ్రతికి
నిత్య నిష్కామ కర్మ పునీత మగుచు-
దైవ శరణాగతిని జన్మ ధన్య మట్లు
సాగవలయు సద్భావన శాంతి గతులు!
107*తే. గీ.
పూని దేవుని ప్రేమకై దైవంబు నవతరించు
దైవ సంకల్పమే జన్మ దారి బ్రతుకు
వేడ్క పరమాత్మ కోసమే వెతుకు లాట!
108*ఆ.వె.
శుభము నరులకెల్ల సుఖము శాంతి!
శుభము భక్తి, ముక్తి గూర్చు విధుల-
శుభము గల్గు శతక శ్రోత ధాతలకెల్ల-
శుభము గీత పఠన శుభప్రదంబు!