గీతామధురం-3
(తే.గీ.)
1*
శ్రీశ! శ్రీకరపాదరాజీవ! కృష్ణ!
వేణుగానలోల! ముకుంద! వేదవేద్య!
విశ్వ భర్త! గీతాచార్య! విశ్వరూప!
సకల యోగీశ్వరేశ్వరా! సాధు హృదయ!
2*
ధర్మ ధేనువు నాల్గు పాదమ్ములూని
సాగె యుగమున కొక్కొక్క చరణమెత్తె!
కడకు పాతిక ధర్మమే కలియుగంపు-
కాలమై ద్వాపరాంతాన గలిగె చర్ఛ!
3*
నాల్గు పాదాల మూడింట నడుచు విధులు
త్రేతమున సాగె భువి ధర్మధేను గెంతె!
రెండిట ద్వాపరంబున పాండవేయ-
కథ కలిప్రవేశపు తొలి కాలమనగ!
4*
ఆరుగురు శత్రువులు మది నాక్రమింప
పతనమగు నీతి, పీడన పనుల దూరు
దోష దూషిత జీవన దోవ మలిపి-
ప్రకృతి యుక్త కర్మవిశుద్ధి ప్రగతి గీత!
5*
ప్రాణి పరతంత్రమున భక్తి బరగ లేదు-
పటిమజూప స్వతంత్ర్యమే బ్రతుకు దారి!
వెల్గు భక్తి విశ్వాసము గల్గు! నాత్మ-
రూప గోచర సృష్టి సర్వోపగతుడు!
6*
మంచి-చెడు యుద్ధ మాగదు, మరల మరల-
తెగక నెడతెరపియులేక తెగువ మీరి
నాడు నేడు రేపటికడ నడచు-ధర్మ
గతియు నొకపాలు-జీవన గమనమందు!
7*
మంచి పాలమీగడ గాగ మానవతయు
సాంప్రదాయ సదాచార సంపదగును
పుడమి భారతీయుల పూర్వ పుణ్య ఫలము!
సహన సంపన్నమై మత సహన మెసగు!
8*
శాంతి బాటలో స్వాతంత్ర్య శ్రమఫలంబు
నందరికి జెందు నిస్వార్థ చందమొప్పు-
భక్తి భావ సమైక్యతా బాట నడుప-
కర్మ ఫలము నైవేద్యమై కలుగు తృప్తి!
9*
భారతీయ ప్రాభవమెల్ల పరులచేత-
శిథిలమైపోయె~వేదాంత నిధియె మిగిలె!
చదువు సంస్కారమే దక్కె – పదవి, నిష్ఠ-
సహన సంపన్నమై దేశ శాంతి వెలిగె!
10*
సమ్మతము గూర్చు పరమత సహనమిచ్చు
నమ్మకము గీత పారాయణాత్మకముగ
జన్మ జన్మల నేకాత్మ జాగృతంబు!
ధర్మ పాలన-పోషణ దారి గీత!
11*
భీష్మ పర్వ హృదయపుట విష్ణుగీత
నుపనిషత్తు సారాంశమై యుర్విమ్రోగె!
తత్వసారమాధ్యాత్మిక సాధనముల-
నిహపర సుఖము-తుదముక్తి నిశ్చయంబు!
12*
నీరు కాల్వ సాగును నది నీరధులను
సంగమించి యావిరి మబ్బు నింగికెగిరి-
కురియునట్లు దీవుల నాత్మ దూరు జన్మ-
జన్మ గుమ్ము తుదజేరు సద్గతికిని!
13*
కలుగుప్రాత క్రొత్తల మేటికలయికలను
సంసృతి జ్ఞాన భారతి శాస్త్ర చర్ఛ-
సగుణ నిర్గుణోపాసనల్, సాగు జాతి
సౌష్ఠవం సమదృష్టి-సమత సత్ఫలంబు!
14*
దాస దాసాన దాసత్వ దారి సేవ-
వైష్ణవాదర్శ సిద్ధాంత వైనములను
జీవ శరణాగతి యె దోచు దివ్య గీత!
భక్తి నావ చుక్కానియై భద్రతొసగు!
15*
అసురి-రాక్షసీ-మోహిని యనెడు ప్రకృతి-
గుణములుభయత్ర, వైరులై గుప్తగతుల-
బాహిరాంతర ఘర్షణ బాట వేయు!
వాని నెట్టగా గీతార్థము వాణి మేలు!
16*
రూఢియయ్యెను-విశ్వాత్ము విశ్వరూపు!
పాడియయ్యె-నిస్వార్థమై భక్తి సాగు-
వివిధ నిష్కామ కర్మల విశ్వశాంతి-
దాని సాధింపు నాత్మీయ దారి గీత!
17*
ఆత్మ పరమాత్మ సంగమస్థానమైన-
ముక్తి తీరము-రేవుగా భక్తినావ-
నావికుడు పరమాత్మ యే నయ జయంబు
కన్ను గట్టిజూపెడు గీత కాంతి లేఖ!
18*
మననమొనరింప గీతయే మంత్రమగును
గానమొనరింప గీతయే ఘనత గాంచు
మధుర మధురాధిపతి భక్తి మార్గ గతియె-
భక్త జనులకు సులభము ముక్తి పథము!
19*
భక్తి – ముక్తిని సాధించు శక్తి గీత-
ఆత్మ పరమాత్మ వృత్త కేంద్రమ్ము గీత-
బ్రతుకు నైతిక విలువల ప్రగతి గీత-
సత్య మార్గమహింసయే స్వామి గీత!!!
20*
హితవు నాత్మ సంస్కార సాహితియె గీత-
తర్క వారాల గీతదే తగు జవాబు!
సాగు ప్రశ్నోత్తరములందు సమత గూర్చు!
భక్తి యోగాన సమకూర్చు బ్రహ్మముదము!
21*
సుకృత కర్మ ఫలత్యాగ సూచి గీత!
పాపకర్ము శరణుగోర ప్రాపు గీత!
తత్వ సార సదాచార త్రాసు గీత!
దయను గలిగించి దరిజేర్చు దారి గీత!
22*
జీవి జీవినాత్మనుగాంచు దివ్య తత్వ-
సారగతి గుట్టు తెల్లమై సాగు గీత!
ముక్తి, బ్రహ్మ నిర్వాణ పదోక్తి సూక్తి
జన్మ రాహిత్యమును గూర్చు శక్తి గీత!
23*
ధర్మ ధాతల నిష్కామ కర్మ పలము
దాన వీరుల నిస్వార్థ దారి వరము
త్రి కరణవిశుద్ధి త్రిగుణాల తీరుతెన్ను!
తేట తెల్లమైన బ్రతుకు దెరువు గీత!
24*
రాజ ధర్మ పీఠము మెచ్చు రాజనీతి
వివిధ యోగాల ఫలమును విడుచు రీతి
గుట్టుగా రాజు బంటును గోరుముక్తి
ప్రకృతి చేతనాంశను బొందు ప్రతిభ గీత!
25*
జన్మ రాహిత్య సుకృతాత్మ జతన గీత-
భక్తి నిర్ధేశ్య జీవన బాట గీత!
జాతి నేకత్వమునుగూర్చు శాంతి గీత!
విశ్వ కౌటుంబ సంక్షేమ విధియె గీత!
26*
సకల జన్మ సంచిత పుణ్య సత్ఫలంబు
సద్గతిని గూర్చు ననితెల్పు సద్గురుండు!
వివిధ తార్కాణముల గీత విధమె జూపు
గ్రంథ సూచి ప్రామాణిక కథన గతుల!
27*
సకల జీవుల నాత్మయు సాగు, జన్మ
సద్గతినిబొందు పుణ్యమే సత్ఫలముగ
తనువు-తలము-నాత్మయు జన్మ దరలు గతులు
జన్మ జన్మ యాత్రిక దారి సాగు నాత్మ!
28*
ధర్మయుక్తమౌ పురుషార్థ దారి గీత!
సకల శాస్త్ర సారము కర్మ సాక్షి సూక్తి
వివిధ యోగాల బేరీజు వేయు చర్ఛ-
భారతీయ జీవన సౌధ భాగ్య గరిమ!
29*
సాగు త్రిగుణ శుద్ధిని సాత్వికుండు
మిగత గుణ ప్రకోపమధిగమించి విధుల-
తగిన యోగసాధన ముక్తి దరలిపోవు
తరము గాకున్న-సద్భక్తి శరణు జొచ్చు!
30*
సత్య ధర్మాది పురుషార్థ సాధనముల
ధర్మ రక్షణ కవచంబు – దైవ భక్తి-
దేశ భక్తి బుణ్యాదిగా తేజరిల్లు!
వివిధ దేశ సమైక్యతే విశ్వశాంతి!
31*
దురిత భీతి గల్గిన బుద్ధి పుణ్యప్రీతి
దుష్టులకు దూరముండు నిర్ధిష్ట నీతి
శిష్టులకు సాధ్యమై జీవ శ్రేష్ఠ పదవి
బొందు, దురితాత్మ మరుజన్మ బొందు చుండు!
32*
దైవ గుణమున్న నరజాతి ధన్య మగును
తాను నాత్మగా భావించు తాత్వికుండు
దాన ధర్మ మార్గము సాగు ధార్మికుండు
వెదకుచుందురు పరమాత్మ వెలయు చోటు!
33*
త్యాగి గీత – గీతత్యాగి తారుమారు
చదువు శబ్ధాక్షరము తీరు శాస్త్ర బోధ
సాగె కర్మఫలంబు నాసక్తి వీడి-
సద్గతిని జెందుటకు మ్రోగె శ్రావ్య గీత!
34*
తోటి సాటి పోరాటమే పోటి బ్రతుకు
పుట్టు ప్రతి జీవి సుఖమునే పుడమి గోరు
తాను నాత్మగా నెఱిగిన తక్షణంబె-
పోటి మాని యా త్మీయత పొసగ నడుచు!
35*
మదినియంత్రించి యింద్రియాలధిగమించి
కోర్కె వీడి లౌకికమందు కొంత సాగి
బుద్ధి భక్తి వివేకమ్ము వృద్ధిగాగ
సతత సమదృష్టి సాగిన సత్ఫలంబు!
36*
మతము మానవతను బెంచి మమత గూర్చు
సమతగా మారి యాత్మీయ సద్గతొసగు-
ధర్మ విధులనాకర్శించు దైవ భక్తి!
నరుని-నారాయనాంశలో నలరజేయు!
37*
భక్తి పరలోక సంబంధ ప్రకరణంబు
విహిత కర్మల నిహమందు హితవు గూర్చు
నాత్మ తరియించు మార్గమై నరుడు-తత్వ-
గీత గానాధికములందు కీర్తి గాంచు!
38*
యుక్తి, భుక్తి-యిహలోక శక్తిగాగ
భక్తి, ముక్తికి పరలోక సూక్తి సూచి
భాగవతము సఖ్యతగూడ భక్తి యనగ-
భక్తి నవవిధంబుల సాగె పరమనిష్ఠ!
39*
భక్తి పరలోక చింతనబరగు నాత్మ
బ్రహ్మమెరిగిన, ముక్తిని బడయు దాక!
నియమ నిష్ఠ – నాణెము కటునిటును భక్తి
తనువు-మనసు శుద్ధిని సాగు దారి భక్తి
40*
భక్తి యోగాననుపకార బాట వెలయు
దానిచే దానధర్మంబు ధాత కీర్తి!
తపసి కన్న ధాతయె మిన్న ధరణి నేడు
వీరులకును గొప్పగు దాన వీరనరుడు!
41*
శత్రులార్గురణగ మది చపల మాగి
నిల్చు నేకాగ్ర చిత్తాన నిశ్చలంబు
నాత్మ పరమాత్మ దర్శించు నట్టి దారి
పట్టు వీడక నిర్వాణ బ్రహ్మమొందు!
42*
అంత్య కాలాన సాధకుడైన యోగి
యోగబ్రష్టుడైనను పుణ్యయోగ్యుడగుట
విజ్ఞ వంశోద్భవుడుగాగ విహిత జన్మ
పుణ్య సంచితార్థము వెంట పొందు ముక్తి!
43*
తపసి కన్న యోగియె జూడధగిన వాడు
కర్మ నిష్ఠులు-జ్ఞానులు గలుగు చోట
యోగి శ్రేష్ఠుడు – నీవును యోగివగుము!
నరుడ యనిదల్పె – హరిగీత నాడె – జగతి!
44*
సాంఖ్య కర్మాది యోగాల సాగు నియమ-
నిష్ఠ నిష్కామ కర్మయు హితవుగాగ
చేత గాకున్న శరణన్న చెందు ఫలము!
గీత కాలానుగుణమైన క్రియలు దెలిపె!
45*
కర్మ ఫలతేగమై కార్య కర్మ ఫలము
లోకమున మేలు – కర్మఫలోల్భనంబు
సాగు నిష్కామ కర్మగా జనుల సేవ
సాగు శరణాగతిని తాను సద్గతొందు!
46*
పుడమి గుణత్రయాత్మక జీవి పుట్టు గిట్టు
సత్వగుణ ప్రకోపము దాక సాగు జన్మ
తుచ్చ సుఖ సంపదలనాప్తి దుడిచి-భక్తి
యోగి, జన్మరహితముక్తి యోగ్యుడగును!
47*
ప్రకృతి పురుషులీ సృష్టికి పరమ గరులు
కరియు చీమయు సమదృష్టి గాంచినపుడె-
యోగి యొదిగి తాబేలులా సాగిపోవు
ప్రకృతి చేతనాంశను గను-ప్రతిభబొందు!
48*
నరుడు జీవశ్రేష్ఠుడు తానె నయము నెఱిగి
ధర్మయుక్తమౌ పురుషార్థ దారిసాగు
తానె యజమాని – బంటు గా తలపు గొనును!
నీదు కరుణాకటాక్షమై నిజమెఱుంగ!
49*
బ్రహ్మ నిర్ణయమగు తిండి బ్రతుకు దెరువు
వివిధ జీవరాశుల – బ్రహ్మ విధులనెంచి
తిండి తిప్పలు సాగిన తీరు మేలు!
ద్రవ్య దాన్యోల్భనములేని దారులందు!
50*
త్రిగుణముల సత్వగుణ తిండి తీరు వేరు
యోగ సాధనకనుకూల యోగ్యముగను
రాజసమునందు వీర విహారి తిండి
రీతి-తామసాహారివి రిత్త రుచులు!
51*
విధుల వివరించు గీతార్థ విషయ చర్ఛ
విశ్వ సించు సమైక్యత విశ్వ శాంతి
సాంప్రదాయ మీగడ వెన్న సాహితి తగ-
వెలయు ముందు తరాలకు వేడ్క గూర్చు!
52*
ఆత్మ నెఱిగి జీవన భ్రాంతి నధిగమించి
తన్మయత్వంబుచే బ్రహ్మ తత్వమెఱిగి
గీత శోధింప సద్యోగ కీలకంబు-
గాంచి కైవళ్య ప్రాప్తికై కదలునాత్మ!
53*
పుణ్య కర్మ ఫలము చేత పుణ్యు లింట-
పుణ్య జన్మయై నరజన్మ పుడమి గలుగు!
చివరి మజిలి భారతభూమి చిద్విలాసు-
భక్తి జన్మరాహిత్యమై ముక్తి గూర్చు!
54*
బ్రతుకు తోటలో స్వాతంత్ర్య భావగీతి
పిన్న పెద్ధల- సంప్రీతి ప్రేరకంబు!
భక్తి కోటలో స్వాతంత్ర్య భావ మాత్మ-
వేద వేద్యుని దరిజేర్చు వేడ్క సాగు!
55*
దివ్య హరిగీత – హరగీత దేవి గీత-
వేదవేదాంతముపనిషద్వేత్త లెఱుగు-
గుప్త తత్వార్థ వివరణ గుర్తు ముక్తి
నరుని దేవునిగ మలచు నద్భుతంబు!
56*
గీత విద్యయై బుద్ధి వివేకమొసగు
గీత సుజ్ఞానమై బ్రహ్మ గీత దిద్ధు!
గీత విజ్ఞాన ఖని భక్తి కీర్తనముల
గీత సూక్తి ముక్తావళి చేతనంబు!
57*
చపలబుద్ధి నిశ్చలమగు చర్ఛ గీత-
విధుల సాధన కొనసాగు విధము గీత!
వివిధయోగములొకటైన విషయబోధ-
గీత ప్రామాణిక గ్రంథ కీర్తి గాంచె!
58*
అమృత ఝరి గీత నరులకు నమ్రతొసగు
సరళ బాష సూక్తుల తత్వ సాహితిగను
యోగ సాధన వివరించు యోగ్యుజేయు
తుదకు శరణన్న పరబ్రహ్మ ముదము గూర్చు!
59*
సుధలు గురియు గీతాబోధ సుప్రసన్న-
మూర్తియై స్ఫూర్తినిడు మూడు మూర్తులందు-
వెలయు విధులందు పరమార్థ వేదికగుచు-
వాసుదేవ సర్వస్వమై వసుధ వెలయు!
60*
నరుడు గీతనభ్యాసించి యలరెననగ
బ్రతుకు చిన్నపెద్ధల నీతి బలము గూర్చు!
యోధ నరు యోగి జేసియు మోదమొసగ-
భారతుండు గృహస్తుగా భాగ్యమొందె!
61*
దేహి దేహయాత్రయె పరదేశికైన-
దేశికైనను గీతోపదేశమొకటె!
గీత సందేశమున విశ్వ నీతి రీతి~
దైవ బాటలో జీవాత్మ వైనమొకటె!
62*
సకల దేశ విదేశీయ జనుల సాంప్ర-
దాయ సంసృతి దారిలో దనరు నాత్మ!
దోష రహిత దృష్టిని సాగు దోవ దోచు!
బేధ ఖేదంబు లేనట్టి వేద ఘోష!
63*
మాతగా గీత మాటల మార్థవంబు
శ్రావ్య సకలార్థ సాంద్ర ప్రశాంత శబ్ధ-
భావ గాంభీర్యమున సాగు బ్రహ్మ విద్య!
ప్రజలకును బంచె శ్రీ కృష్ణ ప్రభుడు కృపను!
64*
ధర్మ బద్ధుడై పురుషార్థి ధరణి బ్రతుకు
దాన ధర్మ కర్మ ఫలవిధానమగుచు-
ధాతగా కీర్తి గాంచును దైవసేవ!
పుణ్య ధనవంతుడై ముక్తి బొందుచుండు!
65*
కోర్కె వీడ శోకము వీడు లోకమందు!
శోకరహితమై బ్రతుకు సంతోషమెసగు!
తేగ గుణమొప్ప సత్కర్మ తెగువ మీర-
సాధకుడు సాగు గీతార్థ సాధనముల!
66*
సాధనలు చేతగాకున్న సకల కర్మ-
ఫలసమర్పణ గావించు బాట గలదు!
యోగములు చేతగాకున్ననోర్పు గలిగి
సుళువుగా భక్తి యోగాన సుకృతమెసగు!
67*
గురువులకు గురుడుగ విశ్వ గురుడు వెలసె!
దేవ దేవుడు-శ్రీకృష్ణ దేవు కరుణ
యోగశాస్త్రసారము గీత మ్రోగె భువిని-
విద్యలకు విద్యగా బ్రహ్మ విద్య వెలసె!
68*
దేశ వాస ప్రవాసులు తేజమొంది-
దేశ దేశాల విహరించి దేవునాజ్ఞ
కృష్ణ చైతన్య సంఘముల్ కృషినిజేయ
జాగృతము జేసె, గీతోక్తి-జగతి కీర్తి!
69*
పదుగురేకమై యొక్కని బట్టిజంపు-
పదవి మోహలోభములెల్ల-పదట గలిసె!
మోసమున పెక్కురను జంపునొక్కడైన-
అర్థ రహితమీయాపేక్ష నణచె గీత!
70*
శత్రు మన్నించి శత్రుత్వ చర్యలణచు-
రాజనీతి శ్రీకృష్ణుని రాహ గీత!
మైత్రి దీపింపగా గీత మార్గమందె-
యోధ నరుయోగిగా జేయు బోధ గీత!
71*
సుజన మైత్రి చేకూర్చెను సుకృత ఫలము
చెన్నుమీరెనానాడె- కుచేలమైత్రి
కుబ్జ తరియించె కంసుండు గూలె నవని
యందరికి దిక్కు మ్రొక్కు గోవింద విభుడె!
72*
వెలయు సద్గ్రంధ పఠనగా వెలసె గీత-
దెలియ గోరిన వారికే దెలుపు విద్య-
మోక్షదారి వాహకమైన యోగ సమత-
భావ సంయమన విధుల బ్రహ్మ విద్య!
73*
కీర్తి గాంచెను గీతోక్తి క్రీడి నాడె-
విశ్వరూపంబు దర్శించె – విశ్వసించె
భావి నరజాతి ప్రతినిధి భారతుండు!
యోగ శాస్త్ర సాగరమీద-యోగ్యుడయ్యె!
74*
భక్తి యోగంబుచే భవబంధ ముక్తి!
భక్తి యోగి శ్రేష్ఠత దెల్పె బ్రహ్మ విద్య-
భక్తి సామ్రాజ్యమేకాత్మ భావ గరిమ!
విశ్వ శాంతికి బీజమ్ము వేసె గీత
75*
గీత సంగీత గానముల్-కీర్తనములు
వేదనలు బాపి నరజాతి సేద దీర్చు!
దినదినాభ్యాస యోగముల్ దీక్షగొన్న-
సేవ-పరమాత్మ దరిజేరు – పావనాత్మ!
76*
గతము వర్తమానము సాగు కాల గతిని-
భవిత నెఱుగు సర్వజ్ఞుని భావగీత!
దోష రహిత దృష్టిని సాగు దోవ జూపె!
చెడును త్రుంచి మంచిని బెంచు చేష్ట సాగె!
77*
చేరి మూర్ఖుని మనసు రంజింప లేము!
దురభిమాని క్రూరుండైన దురితమెసగు!
దుష్టులకు దూరముండుటే దురిత హరము!
దురిత దూరుని గీతోక్తి దూర దృష్టి!
78*
మూఢ మతి కర్మ తత్కాల ముదము గూర్చు!
మాయికుడు దెప్పు-తోటి యమాయకులను!
లోభమున తనతోడిదే లోకమనుచు-
మోక్షమును బాసి జన్మించు మోహ బుద్ధి!
79*
ప్రకృతి జడ-చేతనాంశలు బరగుచుండు!
చేతనాంశలో దైవంబు తేజరిల్లు!
చేరువగు భక్తి యోగాన చెందు ముక్తి!
చేత గాకున్న శరణన్న – చేదుకొనును!
80*
గ్రామ దేవతార్చన సాలగ్రామ పూజ-
తనకె, చెందునటంచు గీతార్థ బోధ-
దాని ననుసరించెను పల్లె-దనరె భక్తి!
పట్టణాల విజ్ఞుల భక్తి పరిఢవిల్లె!
81*
కర్త- కర్తృత్వ భావన కడకు ద్రోచి
కర్త పరమాత్మ యనిదెల్సి గర్వముడిగి
కర్మ ఫలమిచ్చి-బ్రతుకును గడపవలయు
స్వామి శరణాగతినిబొంద సకలమొసగు
82*
సకల సుఖవాంఛలనువీడి సాత్వికముగ
సమత సమబుద్ధి సమదృష్టి సాగు భక్తి
యోగమున శరణాగతిఁ యోగ్యుడగును
సేదదీర్చియు హరియె తాచేదుకొనును!
83*
కోర్కె వీడిన శోకము- క్రోధమణగు
బుద్ధి వికసించు జన్మయే బుద్బుదముగ
జరుగు నది జర్గు సంతృప్త జతన ఫలము
దైవ ఇచ్ఛాను సారము దనరుచుండు!
84*
సంయమనము నిశ్చయబుద్ధి సాత్వికముగ
సాగు కర్తవ్యమున గల్గు శాంతి సుఖము!
పరులమేలును పాటించి బ్రతుకు గడుప-
కలుగు మదిప్రసన్నత కడుయశంబు!
85*
పడవ నడిపించు గాలియే పరగ ముంచు
చందమున భోగి తత్సుఖమందు సమయు!
సంగమించు నదులతో సంద్రమట్లు
సంయమియుబోలు శాంతికి సదనమగును!
86*
అహము మదికామమై జడమందు నిండు
ఆత్మ తోచేతనాంశగా నలరుచుండు!
ఆత్మ బలమొందు విధముగా నవని నరులు
తత్వ జిజ్ఞాస-ప్రేమల దనర వలయు!
87*
ధ్యాన భక్తి యోగములను దాన తపము
లందు పరమాత్మయేభోక్త-లబ్ధఫలము
ప్రాణి సుహృదుని సొమ్ముగా పదిలపరచి
స్వామి కర్పించువారిదే శాంతి సుఖము!
88*
దు:ఖ సంయోగమే భోగిదూరు గృహము
యోగి శోకవియోగమై సాగు చుండు
ధైర్యముత్సాహమున సాగు దారియందె
సగుణ నిర్గుణో పాసనల్ సత్ఫలములు!
89*
వేద యజ్ఞ తపోదాన వేదికలను
పూను పుణ్యధనార్జన పూర్వకములు
మోహ హరముల్సనాతన బ్రహ్మ మోద-
మొందు దారులు యిహజన్మ ముక్తిదములు!
90*
గోపనీయమీ గీతార్థ మొప్పు ప్రకృతి
జీవజాలము ప్రళయాన జేరు నన్ను!
భక్తి గనకున్న వినకున్న పాపులకును
ఎన్నడును దెల్ప వలదనె వెన్నుడంత!
91*
తన పరాభక్తి సంపన్న తాత్వికుండు
గీత మాధుర్యమునదేలు ప్రీతి బొందు-
నతడె తనకిష్టుడనె భక్తి నలరు, గీత
అధ్యయనశీలి ననుబొందు ననియె హరియు!
92*
మోహమునశింప,గీతార్థ మోదమలరు
స్మృతియు లభియించు జీవన భీతి దొలగు
గీత మననంబుచే దీరు నిత్యశంక-
దైవ సందేశమిది జన్మ ధన్యతొంద!
93*
క్రీడి నిల్పె శ్రీకృష్ణ యోగీశ్వరుండు
విశ్వరూపంబు జూపించి విశద పరచె!
వ్యాస కృప సంజయుడు విని వినుమటంచు-
గ్రుడ్డిరాజుకు వివరించె గురుతరోక్తి!
94*
గీత మాధుర్యమును గ్రోలి క్రీడి-దైవ
మహిమ గనివిని తరియించె విహిత-నియత
కర్మలనుదెల్సి తత్ఫల కాన్క జేసి
తానిమిత్త మాతృడుగాగ-తరలిపోయె!
95*
కర్మ మర్మ ప్రకాశిని ధర్మ నిధిగ-
కాముకులవంచె కలికాల కలుష హరణి!
బ్రహ్మ విద్య తత్వజ్ఞాన భాసురముగ
శరణు-గుప్త ప్రదాయిణి- సమత వాణి!
96*
గంగ గోవింద గాయత్రి గౌసమూహ
నామ పంచగ కారాలన్ నయమొసంగు!
వాస్తవాలవాలమగు సంవాద పటిమ-
వాసుదేవ సర్వస్వమై వసుధ వెలసె!
97*
విధిగ గీత గానము జేయ విష్ణు పదము!
గీత మననంబుచేదొల్గు కిల్బిషంబు!
గీత మాధుర్యమున నాత్మ చేతనంబు!
ప్రజకు భవబంధ ముక్తి సోపానమయ్యె!
98*
రాగ విద్వేష హరణి వైరాగ్య దాయి!
బ్రహ్మమోద సంధాయినీ భగవదోక్తి!
అసుర భావవినాశిని – యమలచరిత!
సకల సద్గుణ దాయినీ శాంతి ధాత!
99*
తామస నిశి వినాశిని దైవ సూక్తి!
సమత-సకలశాస్త్రవిచార సంచితంబు-
భువిదయాభక్తి పరిపూర్ణ పుణ్య ఫలద!
మంచికే దర్పణము బట్టు మహిత చరిత!
100*
గాన గీతాంభువులయందు తానమాడి~
మననమొనరింప గల్గును మనసు శుద్ధి!
సమత పాటింప దొల్గు సంసారమలము!
చేత గాకున్న శరణన్న గీత బ్రోచు!!!
101*
మూఢ విజ్ఞ నమ్మకముల ముందు వెనక-
మంచి కొనసాగ సద్భక్తి మార్గముండు
నాగరికమైన మంచియే సాగవలయు
జానపదమైన మంచియే జరుగవలయు!
102*
మంచియాచారముల వెంట మనుజు ప్రగతి
భారమై దురాచారముల్ ప్రతిభ కొలది
సుళువుగా సాగు తత్కాల సుఖములివియు
పేక మేడలే – గీత వివేక దీప్తి!
103*
నేడు తనదన్న మరునాటి కెవరిసొమ్ము
ఎవరి దైయుండె నిన్న నేడెవరి దనెడు-
ప్రశ్న నాత్మీయ శోధన ప్రతిఫలించు!
విశ్వ జీవుల నేకాత్మ విధము దోచు!
104*
భువి సహస్రనామార్చన పుణ్య ప్రదము
నిత్య పారాయణము గీత నిచ్చు శుభము
భక్తి విశ్వాస సమదృష్టి భద్రమగుచు
కీర్తి యాదర్శమానవ స్ఫూర్తి మెరయు!
105*
కల్మశోల్భనమై భీతి గలుగు నూష్ణ-
వృద్ధినోజోను చిధ్రమై యుద్ధ ఫలము!
విశ్వ రూపు భీకరమగు విశ్వ నరుల-
ప్రశ్న గీత సమాధాన బ్రతుకు నిచ్చు!
106*
విష్ణు కరుణాకటాక్షమే విశ్వరూపు!
జాతియదృష్టమే దివ్య గీత సుధయు!
గ్రోలు వారికి సద్భక్తి గోప్య మక్తి!
చదివి చర్ఛింప కొంగ్రొత్త చరిత
వెలయు!
107*
విశ్వ విజ్ఞాన సంపద వివిధ కళలు
శాంతి భారతి స్వాతంత్ర్య శ్రమఫలంబు!
సమత సమదృష్టి గీతార్థ సార వృష్టి!
నాత్మ- పరమాత్మ సంధింప నయజయంబు!
108*
శుభము-నీగీత గానము నభయ ప్రదము!
శుభము-నీతత్వమననము సుకృతధనము!
శుభము-నీనామ కీర్తన సుమధురంబు!
శుభము నీయాది సర్వంబు- శుభయశంబు!