గీతామధురం-2
(తే.గీ.)
1*
శ్రీశ!శ్రీకృష్ణ!గోవింద!గీతధాత!
నీలజీమూత సన్నిభ! నీరజాక్ష!
నిఖిల భూతహితాత్మక! నిత్యసేవ్య!
సరస సాహిత్య సంపన్న! సకల వినుత!
2*
గీత గురులైరి-ఘన భారతీయ గురులు
బ్రహ్మ విద్య – బ్రహ్మీస్థితి భక్తి బాట!
పరమ పురుషలీలలు భక్తి భజన పాట!
నరుల కేకాగ్ర చిత్తంబు నలర జేసె!
3*
గీత సాహితి గ్రంధముల్ చేతబూని
ఎందరెందరో భక్తి నీ మందిరమున
చేరి పూజింత్రు భజియింత్రు వేయి పేర్ల-
నర్చనలు జేసి పఠియింత్రు చర్చ లందు!
4*
గీత బోధ వివేకంబు-నీతి ధర్మ-
నిష్ఠ నాత్మవిచారంబు నింపు గూర్చ-
బ్రహ్మమోద బ్రాహ్మీ స్థితి బడయు-భక్తి
దీక్ష నిర్వాణమున గల్గు మోక్ష సిద్ధి!
5*
దుష్టులకు దూరముండుటే దురిత హరము
దోషరహిత దృష్టి నరులకు దోవ జూప-
దురిత దూరుని గీతోక్తి దూరదృష్టి!
జన్మ రహిత ముక్తికి బాట జగతి శాంతి!
6*
మాయికుల మార్చి సద్భక్తి మార్గ గతుల-
సంయనముగా నడువగా స్వామి గీత!
ముగ్ధులను జేయు విజ్ఞుల, మూఢ భక్తి-
పరుల నర్హులుగా జేర్చు పరమ పదము!
7*ఆ.వె.
దోష రహిత దృష్టి దోవ నిస్వార్థమే
సేవలందు నరుడె శ్రేష్ఠుడనగ-
దాన ధర్మ కర్మ దారి నిష్కామమే
పుణ్యఫలము వెంట పొందు ముక్తి!
8*
దీని జదివి భారతీయేతరులు కర్మ-
ఫలసమర్పణంపు బాటమెచ్చి
సంపద విడనాడి సర్వము హరియనీ
భక్తి మగ్నులగుచు పరవశింత్రు!
9*
గీత విశ్వసించు ఇతరేతరులు భక్తి
దోవ సాగి పనుల దోషరహిత-
దృష్టివెలయ జన్మ శ్రేష్ఠత్వమొందేరు-
గీత మహిమ నుదుటి గీత దిద్ధు!
10*
పరుల ధర్మమెంచి పయనించు భీతియు
సొంత ధర్మమందె శోభ-శుభము-
పొందు,నందు-మరణ మొందుటయును మేలు-
గల్గు ననెను, గీత-కర్మయోగి!
11*
సూది రంధ్రములను దూరి వెళ్ళును వేగ
సాగు దాని వెంట దారమంత-
నింపు గుట్టునట్టు – విధుల నరుడు దార
మైన మేలు బ్రతుకు మార్గమందు!
12*
ధాత సూది గాక, దారమై జీవింప
లోపములను నింపు లోక సేవ!
భూత హితవె- సూది బొరియలు పూడ్చగా
లోపరహిత కీర్తి లోకమందు!
13*
భక్తి శ్రద్ధనాత్మ ప్రభవించు జన్మలన్
సూక్ష్మ బుద్ధి ధర్మ సూక్ష్మమెరుగు
భువిపరోపకార భూతహితవు గీత
భోగి రోగి గాక యోగియగును!
14*
క్షాత్రధర్మ గతుల ఛాత్రులు పోరాడ-
నుప్పుదిన్న పక్షమొప్ప సాగి-
పోవు ధర్మమయ్యె! పోరుబాట గురుల-
ధర్మమయ్యె ముక్తి దారి సాగ!
15*
కౌరవాళి వినక గాసియయ్యెను పోరు-
నష్టమయ్యె-పొందు నిష్టపడక
సంగరాన గూల-సత్సంగమే తుద-
మిగిలె, నరునికీర్తి మిగుల వెలిగె!
16*
కౌరవుండు గూలె కౌంతేయులకు జయమ్
కలిగె గీతసూక్తి వెలుగులందె-
యోధ నరుడు నిల్చె-యోగి-గృహస్తుడై
సంసృతి పదమందు సాగి పోయె!
17*
పాత్రధారి నరుడు పాటించె ధర్మమున్
సూత్రధారి గీత సూక్తి సూచి!
పొందు లబ్ధి గాక పోరునష్టము జూపె!
ధర్మజునకె జయము దాపురించె!
18*
పోరు బాట శకుని పోటిజూదరిమాయ
కీడు గూర్చెయుద్ధ క్రీడ సాగె!
సంధిమాట వినక – సాధుహింసయు పాప
మనక, కౌరవాళి మడిసె నంత!
19*
భారతాన భీష్మ పర్వ మధ్యము నందు
మునిపరాశర సుతు మూల ప్రతిగ
వసుధ మ్రోగె మానవాళి జాగృతమయ్యె-
నాడె గీతను గొనియాడె జగతి!
20*
సత్యమెపుడు నీతి సంసృతి పుటదాగు
దేశకాల పాత్ర తేజరిల్లు!
సత్య దీప్తిముందు సర్వంబు లుప్తమే
సత్యమందె దైవ సదనముండు!
21*
గురుల దారి త్రిగుణ కూడలి తామస-
గుణము కీడు, మిగత గుణము మేలు!
రాజసంబు వెంట రాజిల్లు తామస-
పథము నరుని జేర్చు పాద తళము!
22*
ఊర్థ్వ దారి త్రిగుణములను, సత్వము మేలు
చెన్నుమీరు ప్రకృతి చేతనాంశ
నాత్మ వెలుగు బుద్ధి నాణ్యత పరమాత్మ
పదము బొంది భక్తి పరవశించు!
23*
పట్టి విడువరాదు పరమాత్మ పాదము
నడుమ విడువ కొంత నయమె గలుగు-
పుణ్యమునఁబుట్టు – పుణ్యాత్ములింటను
భక్తి జన్మ రహిత ముక్తి బొందు!
24*
బ్రతుకు భక్తియోగ బలముచే నిస్వార్థ-
వ్రతము శరణుజొచ్చు వారికెల్ల-
సత్ఫలంబు గూర్ప సర్వోపగతుడుండు,
సమత బుద్ధి గూర్చి సద్గతొసగు!
25*
కలుగు మార్పు పుడమి కాలానుకూలమై
కష్ట సుఖము లాభ నష్ట-తలపు,
గలుగు-తీర్పు ధర్మగమనానుకూలమై
కలిమి కన్న పుణ్య కలిమి మేలు!
26*
భక్తిమంచిదే – విరక్తి మంచిదే యాసక్తి-
వీడి కర్మఫలము విభుని కొసగ,
పాప పుణ్య గతులు పరిశీలనకు రావు-
చేవ గూర్చి తానె చేదుకొనును!
27*
భక్తియె భవబంధ ముక్తి సోపానము
పుణ్యమనగ మంచి పూర్వకంబు!
మంచియె యుపకారి మార్గదీపము-శక్తి
దోవసాగ హరియె తోడునీడ!
28*
ప్రేమమూర్తులందు పెంపొందు మంచియే
భక్తులందు మంచి భావదీప్తి!
పుణ్యసంచితార్థ పూర్ణ ముముక్షువు!
సాగుచుండు హరియె సర్వమనుచు!
29*
వివిధ ప్రేమలందు విద్యుక్తమగుప్రేమ
నాణ్యమైన సేవ నలరుచుండు!
భూతహితవె నరుల బుద్ధి వెల్గెడు ప్రేమ-
దాని ప్రేరకంబు-దైవప్రేమ!
30*
దైవ గుణము భూత దయయు దాక్షిణ్యమే
దాని వలన పుణ్య ధనము గలుగు!
దైవ గుణము నెంచి ధాతయై జీవింప-
ముదము గలుగు జన్మ ముక్తి గలుగు!
31*
కలుము లందు శాంతి కలిమియే కడుమిన్న
సిరులయందు కీర్తి సిరియె మిన్న
లేములందు హింస లేమియే వెన్నుని-
పరమ ధర్మమంద్రు పరమ గురులు!
32*
కలియుగాన మాయ కలుషమై డాయగా
తనువు తానటన్న తలపు గలుగు~
నపుడు నాత్మ దెలిసి నడుపు జీవన దారి
జాగరూకతొసగు జగతి గీత!
33*
భువి సమస్య గలుగు, బుద్ధి పరిష్కార-
మరయు, దాని మరువ మరొకటుండు!
పూని తానె గట్టె భువిసమస్యల గోడ-
తానె గూల్చు గొప్ప తనమదేమొ?
34*
భువి సమస్య కులము బుణ్యాది మతములన్
సహన మనుచు మరల సహజ గుణము
గోడ గట్టి గూల్చు గొప్పలే దారెంట-
బ్రతుకు నతుకు రిత్త పథక రచన!
35*
గుణము నరుని గుర్తు కులము చిర్నామయే
మత సమూహ గతుల మనుజుడెంచు-
సమ్మతంబె దోచు, నమ్మకంబేదాని-
కేడుగడగ సాగు నేడు రేపు!
36*
మాయికుండు దినము మర్యాద గోల్పోవు
మునుగు దాక పరుల ముంచి పోవు!
గెలుచు గేలి సేయు-కేళినమాయకున్
కష్ట పెట్టు- మాయ కలిని మెచ్చు!
37*
మాయ రహితుడగు నమాయకుండని దెల్సి-
మాయ గొప్పదనమె మాటలందు!
వేయునేల మాయ వెలయాలి సంస్కృతి-
మాయ మనుజు జేర మరల జన్మ!
38*
విజ్ఞ-మూఢ గతుల విషయంబు చర్చింప
మంచి గలుగనన్ని మంచి గతులె!
వివిధ భక్తులందు – విధినిర్ణయము మంచి-
దాని వెంట గొప్పదనము దనరు!
39*
మానవాళి సేవ, మంచిమార్గము గాగ
ధర నహింస పరమ ధర్మ మయ్యె!
దుష్ట దురిత జనుల దుర్మార్గవర్తనల్
ధర్మ రహిత హింస – దనుజ దారి!
40*
ప్రజలె రాజులైన పరగు స్వాతంత్ర్యము
దానియందె భక్తి దనరు చుండు!
పార తంత్ర్యమందు – పరమాత్మ గనుటెట్లు?
దేల్చిచూచి యాత్మ దెలియుటెట్లు!
41*
మాయ మిత్రుకన్న మంచిశత్రువు మేలు
చెడ్డదారి మంచి చేష్ట వృధయె!
ఇంటగెలువ, బయటి తంటగెల్వగవీలు!
మోస మెఱుగ – బ్రతుకు మోదమొందు!
42*
మంచి శత్రు దాడి మార్గంబులో ధర్మ-
మర్మ గతులు సాగు- మంచినెంచు
బలమె గాని శత్రు బలగమ్ము భయమేది?
బాహిరముగ గెలుపు బాట సాగు!
43*
చెడ్డ మిత్రుడింట చేరియోడింపగా
జతన-బుద్ధి కీడు జరుగు చుండు!
తెలియరాదు మొదట, తెలిసినంతనె మోస-
మయ్యె ననుచు-మైత్రి మాయమగును!
44*
జరుగ నున్నదెల్ల జరుగె భారతమందు-
జగతి నున్నదెల్ల జతపడంగ-
వివిధ పాత్రలందు భిన్నవిభిన్నమై-
చిత్త వృత్తులు కడు చిత్ర గతులు!
45*
ఇంటి కన్న గుడియె యిహమందు పదిలమై
తనువు కన్న నాత్మ తళుకులీనె!
ఆత్మ కన్నను పరమాత్మ పదిలమయ్యె-
యచ్యుతుడవినాశి యనగ జెల్లె!
46*
జరుగ నున్నదెల్ల జరుగకమానదు-
జరుగరానిదేది జరుగ బోదు!
తనువు నింట నాత్మ-తగుభద్రతను గనున్
అత్మ గుడిని దైవమలరుచుండు!
47*
చట్ట పరిధి-పేద చుట్టు కంచెను వేసి
గావకున్న రక్ష గలుగునెట్లు?
చట్ట రకములందు చుట్టరికములెందు-
గలుగునన్న ప్రశ్న గలుగ మేలు!
48*
తెగువ మీరి బరియు దెగికిల్బిశాత్ములు~
రాకపోక బ్రతుకు రాజి పడరు!
తేజి పాజి జేసి, పేచిగెల్వగజూచు-
తీరు తెన్నులందె తిరుగు చుంద్రు!
49*
జగతి భరత జనులు, జాగరూకత బొంది-
నాగరికపు వెఱ్ఱి సాగరైరి
పరులపీడనంబు-పాపంబుగా కోర్కె
కొంపముంచు-సుఖము, లోకనింద!
50*
గీత భరత జాతి నీతి గీతను గీచె-
బ్రహ్మ గీతలోనె బ్రతుకు యాత్ర!
ప్రాప్త లేశమునకె తృప్తిబొందుట చేత-
గీత నీడ తేగ దీప్తి గొనిరి!
51*
భూత హితులు మునులు, ఉపకార జీవనుల్
సత్య నిర్వచనులు సాత్వికులుగ
పుణ్య సంచితార్థ పూర్వకమగుదారి-
వేసి చనిరి జాతి వెంటరాగ!
52*
జగతి భారతీయ జవసత్వ వీరముల్
దానవీరమనెడు దారి సాగె!
భూతదయను జేసి బుద్ధులై వెల్గిరీ-
రాజు పేద కొక్క రాహ దోచె!
53*
ఏది నిజము, కానిదేది, శాశ్వతమేమి-
వాదుసాగె, నెవరి వాదు గెలిచె?
వేద కల్పవృక్ష వేదిక పైగీత-
మ్రోగె, నాత్మ బ్రహ్మ మోదమయ్యె!
54*
పూర్వ సాహితి ఘన పౌరాణికాదుల-
నుపనిశత్తు శ్రుతుల నుద్భవించె-
వేద నీతి వెన్న-వెన్నుని దయనరున్
తీర్చి దిద్ధె-గీత తీరుతెన్ను!
55*
గీత సుధ పురాణ నీతి జిల్కిన నవ-
నీతమార్ధవంబు-నీతిధర్మ-
దాన తపము పుణ్య ధనమింధనము గాగ
వివిధ యోగగతుల వెలసె ముక్తి!
56*
భక్తి మైత్రి ప్రేమ బహుళార్థ సాధకమ్
దాన ధర్మ పాదు – మానవతయె!
ప్రజలు మానవతకె బ్రహ్మ రథము బట్ట-
సాగె బ్రతుకు, హరియె సారథిగను!
57*
భక్తి మైత్రి-మైత్రి భక్తియు కొనసాగె-
నాత్మయు పరమాత్మ నలరె గీత!
ప్రణయ పుష్టిగూర్చె-ప్రణవనాదమునూదె
కామ్య కర్మ దృష్టి ప్రళయ కాల వృష్టి!
58*
విజ్ఞ మూఢ గతుల విశ్వాసమై భక్తి-
తల్లి దండ్రి గురువు దైవమతిథి-
దేశభక్తి తత్వ తేజంబు త్యాగమై-
వివిధ దేశమైత్రి విస్తరించు!
59*
కల్తి పనుల సాగు కలియుగాలోచనల్
పల్లె పల్లె నిపుడె పల్లవించె-
పట్టణాల సాగు ప్రగతి కాలుష్యముల్
కాలనీలచుట్టు కలియబారె!
60*
వెసన పరిసరాలు వెస గమ్మి వేయగా
జనులు దాటలేరు జగతి మాయ!
విత్తలోభమెసగి – విజ్ఞత గోల్పోక-
ముందె జాగరూకతొంద వలయు!
61*
కల్తి పరిసరాల గలుష సంతలసాగు
క్రయము విక్రయంబు కథల విందు
ప్రాణ హాని, హింస, నారోగ్యలోపముల్
ముందె జాగరూకతొంద మేలు!
62*
మాయదారి మనుజు మరబొమ్మ జీవనమ్
క్షేమమెట్లు? పుడమి చీమ పుట్ట-
పాముకిరవు గాగ – పరపీడనము సాగు
లోకమెల్ల పాప కూపమగును!
63*
మాయ జగతి బ్రతుకు మార్పు తీర్పును లేని
ఆశ పాశ గతుల యాత్ర సాగు-
క్రొత్త వింత పాత రోతగా మదినెంచు
పైపటార దృష్టి బరగుచుండు!
64*
తనువు తానటంచు తపన వెంటను సాగు
నంద చందములను, ఆత్మమరచు!
తనువుకన్న నాత్మ తళుకు సౌందర్యమే-
మిన్న యనుటె గీత మేలు కొలుపు!
65*
దేహ పుష్టి సుఖము – దేహి దృష్టియు సౌఖ్య
మిహపరాల తృప్తి విహితమగును-
లోన, బయట ప్రకృతిలో చేతనాంశ గీ
తార్థ విధుల జన్మ సార్థకంబు!
66*
విద్య-విత్త గడన వీలుగా కొనసాగె
విజ్ఞ శోధమరచె-విశ్వశాంతి-
వేయుమూడడుగులు-వెనకకేడడుగులు
చూపు ప్రగతి శాస్త్ర రూపు రేఖ!
67*
కృత్రిమంబు భూప్రకృతిసహజము మించె
కల్తి సరుకు సంత కలియబారె!
వస్తు సృష్టి బెరిగె-వసుధ రసాయన
కలుష పరిసరాలె-కలియుగాన!
68*
సిరుల నోమునోచి జీనోము గనిపెట్టె-
మనసు శోధ నెంచె మరలమరల-
సాగుచుండె మాప్రయోగశాల దశను-
సవ్యసాచి నేటి శాస్త్ర వేత్త!
69*
సహజ వస్తుపంట సాగెడు వ్యవసాయ
భూరసాయనాలు గూర్చు-ఎరువు-
కృత్రిమములు నిషిద్ధ కృతక విషంబులే
విరుగుడు గనిపెట్టు విధము లేవి?
70*
గీత సమత దృష్టి కీలెరింగిన లబ్ధి
దోషరహిత పుష్టి దూరదృష్టి –
సత్యవ్రతము బోలు శాస్త్ర వేత్తల సృష్టి –
గీత పరిధి సైన్సు కీర్తిగాంచు!
71*
జానపదుల భక్తి జాగరణలు, నప్ర-
మత్తముగను, విజ్ఞమార్గ భక్తి-
గమన గతులు వేరు, గమ్యమొక్కటె, పుణ్య-
ధన సమాంతర రహ దారులయ్యె!
72*
భక్తితోట తేటి పాట సంకీర్తన
క్రీడి ప్రశ్న-సామి గీతసూక్తి!
భక్తజనుల ప్రశ్న-బ్రతుకుదెరువులాట
తెగువ పనియు పాట తగుజవాబు!
73*
బ్రతుకు పంటపొలము – పల్లీయ సంసృతి
బ్రతుకు దెరువు సాగు పనియు పాట
లేని వేళ కలిమి లేముల కావడి-
కుండలయ్యె! హరియె యండదండ!
74*
తెలిసినంత బ్రతుకు తెలివితేటలబాట-
సాగినంత సాగు సాగకున్న-
బ్రతుకు ప్రశ్న జన్మమతుకు ప్రశ్నల మయమ్
స్వల్ప ఫలము కృషియు సల్పు క్రియల!
75*
ఉన్నయంత మేలు నుప్పతిల్లును తృప్తి
తిప్పలైన తనివి దీర్చు భక్తి
జరుగుబాటు వెంట జతపడు పుణ్యమే
ధనముగాగ మోక్ష దారి సాగు!
76*
స్వేచ్ఛ జీవనంబు చేయగోరును పల్లె
జనము తేగ గుణమె జవము గూర్చు-
దారి, ప్రశ్న గీత తగుజవాబొసగంగ-
తెలిసినంత బ్రతుకు తెల్లవారు!
77*
బ్రతుకు దెరువు భక్తి భావన ముడివేసి-
నటన సాగు-దైవ ఘటనసాగు
నేరమొకరి మీద నేరస్తుడొకరను
కొనుటె గాని, ఎదురుకొనగ గాదు!
78*
గుండె నిబ్బరంబు గుర్తు-పల్లీయుల-
తేగ బుద్ధి భక్తి యోగ సిద్ధి-
నిండు మనసు సేవ-నిస్వార్థ భావనల్
ముగ్ధ భక్తజనుల ముచ్ఛటగును!
79*
భక్తి పల్లె జనుల భావవికాసమై-
ఐకమత్య, బల, సమైక్యమొసగు-
కలుగు, పుణ్యఫలము, కామ నిష్కామముల్
సాగు, కర్మలు శరణాగతిగను!
80*
శిష్ట జానపద-విశిష్ట సాహితి జూడ
భిన్నమైన-దురిత భీతి మరియు-
పుణ్యప్రీతి,గలుగు బుణ్యాది గంధముల్
పరిమళించు భక్తి పాట తోట!
81*
సకల పాఠకులకు శతక సాహితి ప్రీతి-
యగుట-కవిగ బ్రతుకు యాత్రగలిగె!
శతకగీతి-గీత పథకంబు నెరవేరె!
కవినటన్నయూహ కలుగదాయె!
82*
తప్పు లెన్నువారు దారిగాచియు ప్రశ్న-
నొవ్వుగూర్ప – కవిత నోర్పు సాగె!
కలము బట్టు వరకె కాలయాపన గాగ-తప్పు నొప్పుకొనుటె తగుజవాబు!
83*
భక్తి కవిత జేయు భాగ్యంబు గల్గెనా
ప్రస్తుతి కవి యంద్రు పల్లె జనులు!
ప్రస్తుతింత్రు గురుల ప్రస్తావనోచిత-
కవులనైన భక్తి కవితలందు!
84*
భక్త జనులవెంట-పరుగెత్తి వినిపించు
కాలమయ్యె నేడు – కలుగు కవిత,
ప్రతుల నచ్చువేయ-ప్రజలె రాజులుగాన
వారి వలన కీర్తి వరలు భవిత!
85*
తప్పు దిద్ధు పనికి తగు గురువుల జేరి
వేచియుంటి ప్రతుల సూచి వ్రాయ-
జూచి పాత బడగ – తూచియమ్మితిమనన్
వెతను గొంటి, ముతక కథల యాది!
86*
తప్పులు సరిదిద్ధి, తర్కించి, మిత్రులు
ప్రాతదాయె గీత వ్రాతలేల?
అనుచు – ప్రజలె దీనియంతుదేల్చెదరని
ప్రోత్సయింప నింత ప్రొద్ధు గడచె!
87*
భక్తి కృతులు దైవ భారమై-దాసుని-
దోషహరము జేయు దోవ భక్తి-
మ్రొక్కియంకితమిడు మోదంబు గొంటినీ
పాదధూళి దాల్చి పాడుకొంటి!
88*
శతక గీతి నీదు శరణాగతినిబొంది-
నపుడె యంకితంబునయ్యె-నిపుడు
గ్రంధ రూపమొందు కార్యంబు కొనసాగె-
సాయి జోతి ముద్ర శాలయందు!
89*
దేహమందు దేహి తేజరిల్లగ నాశ-
యంబు, భక్తజనులయందు మనుట-
భాగవతులు భక్త పరమాణువుగ నెంచ-
నిన్ను జేర జన్మ నీదు చుంటి!
90*
పుడమి ధర్మ కర్మ భూమి నిస్వార్థమై
వెలయు సేవ-నీతి విలువ వెంట-
కలుగు పుణ్య ఫలము-కర్మ నిష్కామమై
వెలయు గీత గ్రోలు విధము గనుట!
91*
దేహి పాహియనగ దేవదేవుడ రమ్ము!
దీన పోష! జనుల దిక్కు నీవె!
బ్రహ్మమోదమొసగ – భక్తి నావనుజేర్చు
వాసుదేవ! శ్రీనివాస బ్రోవు!
92*
బ్రతుకు బాట గలుగు భావ స్వతంత్ర్యమున్
భక్తి గూర్చు పిదప ముక్తి గూర్చు!
యోగ బాట గీత మ్రోగు నిష్కామమున్
ఫలము నీదె! ముక్తి పదవినీదె!
93*
భారతాన గీత భావవికాసమున్
సకల జీవ సేవ సాగు విధుల-
వెలుగు భాగవతమె-విశ్వతార్కాణము
సర్వజీవరక్ష సాగు గతుల!
94*
ధరణి నితర బాధ తనబాధగా దల్చు-
నరుడె, ధర్మ గతుల నడువనోపు!
తాను బాధకోర్చి-తత్వంబు దరచగా
దెలియు ధర్మజోక్తి దేల్చు నిజము!
95*
వేదమార్గమంత వెలసె పురాణమై
భారతాననదియె భద్రమయ్యె!
విధిగ గీత-సమత వెల్లడించిన నాడె
రాహ గల్గె-జన్మ రహిత ముక్తి!
96*
పూర్వ కవులచేత పూర్ణసాహితి నిండె
గీతపాటవంబు-నీతిధర్మ
మార్గమయ్యె, నీవె మార్గ దర్శివి గాగ
వివిధ ధర్మగతుల వీక్ష సాగె!
97*
దండి సూక్తులుండు – పండితోక్తులుగల్గ
దేశి చందమందు తేటగీతి-
నాటవెలదిసాగె, నాత్మతత్వము దెల్పు-
జానపదము సాగె-జానుతెలుగు!
98*
శతక పాఠకులిక సతతకాలక్షేప-
ముగను, జదువ పుణ్యముగను దలప-
నెచట జూడవారె నెదురు పడిరి నేడు
గలుమ గలుమను తెలఁగాణ జనులు!
99*
తరగనట్టి పుణ్య ధనము గీతోక్తమై
కృతిని వెలయ శతక కృతులు జేసి
వెరవకుండ నచ్చు వెలయింపజేసితి-
కృపను జూచి శతక కృతిని గొనుము!
100*
క్రీడి వరద! తోడునీడ నీవెకదా!
భక్త జనుల దాపు ప్రాపు నీవె!
పెంచి శిథిల ప్రకృతి త్రుంచి-సృష్టించేవు
పూర్వ పరము నీవె! సూర్య నేత్ర!
101*
అవని భక్తజనులు అన్య వేల్పులగొల్చు
పథములందు పుణ్యఫలము గొనుచు
పరమ పదమము జేర్చు పరమాత్ముడవు నీవె!
జీవి జీవి నాత్మ దీప్తి నీవె!
102*
గీత ధాత! సృష్టి క్రీడసాగించేవు
సుస్థితిలయ ధర్మ సూత్రధారి!
భూత హితవుజేయు బుద్ధి ప్రసాధించు
విధుల పాదుకొల్పు-విశ్వశాంతి!
103*
కుబ్జ వరద నీ పదాబ్జంబు నమ్మితీ
దేశి పద్య శతక గీతి సాగె!
గీత బోధ గురుల చేతబొందిన ఫలమ్
నాట వెలది తేట గీతి పాట!
104*
మునిపురాణ కథలు ముక్తి మార్గ గతులు
కర్మ పక్వతగను ధర్మ నిధులు!
దారి సూచి, గీత-ధర్మార్థ నిష్కామ
ఫలసమర్పణంబు – పరమ పదము!
105*
దివ్వె క్రింద మరొక దివ్వె వెల్గిన చోట
నీడ దొల్గి నట్లు-పీడ దొలగు-
పుణ్య గీత దోవ బూనిసాగిన వారి-
జీవితంబు వెలుగు దీవెనొసగు!
106*
నరుల యాత్మ గుడిని యజ్ఞాత శక్తివై
వెల్గు చున్న నిన్ను దెలియు దాక
గీతమాత భక్తి గీటురాయి నికష-
మరలమరల బోధ మార్గ గెలుపు!
107*
విశ్వ నరున కాత్మ విశ్వాసముదయించు
పుణ్య సంచితార్థ పూరకముగ-
సాగు జన్మ, దైవ సాయుజ్యమును గాంచు!
తీరు తెన్ను గీత తీర్పు నొసగు!
108*
శుభము – గీత గాన ఝరియు సుకృత లబ్ధి!
శుభము-గీతామనన దీక్ష సుఖము శాంతి!
శుభము-గీతార్థ మాధురి సుధను గురియు
శుభము-శ్రోత- పాఠకులకు, శుభయశంబు!