గాన కృష్ణ శతకము
(తే.గీ.)
1*
శ్రీలు జిందు గుడినివేశ! చిన్మయేశ!
నిన్ను మ్రొక్కి తెలుగుబాష నేర్చుకొంటి
పసిని పండితు జేసితో పరమపురుష!
కమనపుర వేదనిధి! వేణుగాన కృష్ణ!
2*
వాసవుని గర్వమణచియు దేస జనుల
గావ గోవర్ధనమునెత్తి గొడవమాన్పి-
రక్ష జేసిన కన్నయ్య రమ్ము బ్రోవ!
కమనపుర వేదనిధి వేణుగాన కృష్ణ!
3*
వసుధ జీమూత సంభూత వర్ణ దేహ!
ఆర్త జనబృంద ఛత్రమా! ఆదివిష్ణు!
రాక్షస రుజకు వైద్య నారాయణుడవు!
కమనపుర వేదనిధి వేణుగాన కృష్ణ!
4*
రాధ,రుక్మిణీ సమేత-రాజ కృష్ణ!
నయము జయమిచ్చు లక్షీశ! నాద బ్రహ్మ!
రయము మాన్పియు జీవాక్షరంబులిమ్ము!
కమనపుర వేదనిధి వేణుగాన కృష్ణ!
5*
గాసి గావుము క్షుద్రవైరసుమార్పి-
ప్రకృతి వైపరీత్య-కరొన పదటగలుపు!
విశ్వశోక నాశక విధిన్ వివరమొసగు!
కమనపుర వేదనిధి వేణుగాన కృష్ణ?
6*
నాటిదానవ మూకలే-నరులబుట్టి-
దురిత కలినాశ్రయించి దుడుకుగొనిరి!
దుర్గతి ప్రయోగాలలో దూరనీకు!
కమనపుర వేదనిధి! వేణుగాన కృష్ణ!
7*
లోక కంఠకుల్ స్వార్థ విలోల చిత్త
మత్తులై ధర సేమంబు మాటవినరు!
క్రోధ మైయెక్కినకొమ్మ- గొట్టుకొంద్రు!
కమనపుర వేదనిధి! వేణుగాన కృష్ణ!
8*
స్వార్థమున లోకమునుముంచి చక్కిబుగ్గి
విషము జిమ్ముచు నార్జింత్రు విపుల ధనము!
కీర్తి ధనమన్న గిట్టని క్రియల నుంద్రు!
కమనపుర వేదనిధి! వేణుగాన కృష్ణ!
9*
రక్షిత దూర గామి – బతుకు రాహగాగ-
లక్షణము మారె నరజాతి లక్ష్య శోధ
ఠీకుగా టీకగనిపెట్టు తీరు సాగె!
కమనపుర వేదనిధి! వేణుగాన కృష్ణ!
10*
విశ్వ రూప! సుగీతగోవింద శౌరి!
నేర్పు భయభక్తి నయనిష్ఠ నెగ్గు నాత్మ-
ఆత్మలోదీప్తిగొను పరమాత్మ వీవు!
కమనపుర వేదనిధి! వేణుగాన కృష్ణ!
11*
గోప బాలక! గోలోక గోప్యచరిత!
నియమ నిష్ఠ భక్తిని వెల్గు నీరజాక్ష!
శుచియు శుభ్రత – రక్షిత సూత్ర మొసగు!
కమనపుర వేదనిధి! వేణుగాన కృష్ణ!
12*
వాయు శుద్ధి చే వనజంతు వచ్చిపోయె!
కరొన కట్టడినడుగంటె-కలుషచయము!
పంచభూతావళియు కళలు పంచగలిగె!
కమనపుర వేదనిధి! వేణుగాన కృష్ణ!
13*
పిదప మొదలయ్యె వాహన రొదల పొగలు
సాగె జనజీవనము వెర్థ రసాయనాలు –
గుప్పె, తప్పొప్పు బేరీజు నొప్పె బతుకు!
కమనపుర వేదనిధి! వేణుగాన కృష్ణ!
14*
మనసు నిల్పుటే కష్టము మనుగడంత-
తనువు నిల్పుటే, పొత్తము, తరతరాల!
ఇహమె తలపోయ పరమెట్లు హితవొసంగు!
కమనపుర వేదనిధి! వేణుగాన కృష్ణ!
15*
పుట్టితిని పుణ్యసంపాదనుట్టివడగ!
కట్టితిని కంకణపుదీక్ష-కట్టుబడిగ-
లోపమేమయ్యెనో విధికీ లొంగిపోతి!
కమనపుర వేదనిధి! వేణుగాన కృష్ణ!
16*
యుక్కి శాంతిసుఖాలతో యువతనడుపు
నీవె మిన్న కుండగ తావు నేది జగతి!
కనలిపోయినదాధ్యాత్మికాత్మ నాడె!
కమనపుర వేదనిధి! వేణుగాన కృష్ణ!
17*
బతుకు నియమబద్ధము జేసి యతుకమేలు!
పిదప అంటుబాసియు గీత ననుసరించి!
హృదయ దౌర్భల్యముడుగుట హితవు మాకు!
కమనపుర వేదనిధి! వేణుగాన కృష్ణ!
18*
ప్రగతి నైతిక విలువల పసయు దెలిపి
జగతి జణ్మంటు బాయించి జయమొసంగు!
నీదు శరణాగతిని పొంది నెగ్గనిమ్ము!
కమనపుర వేదనిధి! వేణుగాన కృష్ణ!
19*
బతుకు నిల్పనితిండేల? బలమదేల!
స్వస్థతొప్పని నిద్రేల? సంయమనము-
గోలుపోయెడి మానవ గోలలేల?
కమనపుర వేదనిధి! వేణుగాన కృష్ణ!
20*
పోతె పొల్లగు-ఉన్నదే పొసగు తృప్తి!
జన్మలను ఈదు ఇహనావ జాగృతోక్తి!
పారమార్థికమున భక్తి సారపటిమ!
కమనపుర వేదనిధి! వేణుగాన కృష్ణ!
21*
ఆప్త భక్తినియలరించు అయ్యనీవు!
వెలిని వెలిగించు – ఆత్మలో వెలుగు వీవు!
పొసగ మేలుగూర్చగ దైవ పొత్తమీవు!
కమనపుర వేదనిధి! వేణుగాన కృష్ణ!
22*
అలజడిని భక్తి మొలచునా? ఆదివిష్ణు!
తారతమ్యాల తత్వము తళుకుగొనున?
జిలుగుమాసిన మదికెట్లు జిక్కు సూక్తి!
కమనపుర వేదనిధి! వేణుగాన కృష్ణ!
23*
దక్షిణపుగుడికుత్తరపు దిశ దనరు శివుడు!
వెలయ హరిహర క్షేత్రము వెలిగె నాడు!
మంచి మతసమైక్యత వెల్గె మానవాళి!
కమనపుర వేదనిధి! వేణుగాన కృష్ణ!
24*
మనసు కల్మశములు దోయు మార్గభక్తి!
మానవాళియు హర్షించు మధురభక్తి!
వీరమెందుకు? నీలోన చేరుకొనగ!
కమనపుర వేదనిధి! వేణుగాన కృష్ణ!
25*
ఎవరు కనివినిచదివేరు మీరె-కాల
దోషమ్మునంటెను, దురితమెసగె!
మురిసి పోదును నాలోనె మరలచదివి!
కమనపుర వేదనిధి! వేణుగాన కృష్ణ!
26*
అతిథిగవచ్చి నినుగన్న ఆర్తజనుడ!
బతుకు గతిదప్పి వచ్చిన పండితుడను-
అత్తగారింట అర్చింతు చిత్తభక్తి!
కమనపుర వేదనిధి! వేణుగాన కృష్ణ!
27*
బతికి చెడివచ్చి నీదయా భక్తి నెగుల
పరగనన్ను నిందించెడు ప్రశ్న గలద?
మంచి వంచించబడె నాడె మదనజనక!
కమనపుర వేదనిధి! వేణుగాన కృష్ణ!
28*
వావిలాలగుడినిబోలు వాస్తవంబు
దోచె నీగుడి సన్ముక్తి దోవలందు!
మరల భక్తి సంధింపగా మార్గమొసగె!
కమనపుర వేదనిధి! వేణుగాన కృష్ణ!
29*
పూనుకొంటిని నవరత్న వరుస శతక-
పుస్తకమునచ్చు నొత్తించి పుణ్యమనుచు-
సప్త సంతాన ఫలముకై సాగు దిశల-
కమనపుర వేదనిధి! వేణుగాన కృష్ణ!
30*
తృప్తి బొందితి బతుకున తిప్పలింత
దీరదాయెను, ఉద్యోగ తీరుబడుల-
శతక శతిజేయ బూనితి శక్తిమేర!
కమనపుర వేదనిధి! వేణుగాన కృష్ణ!
31*
అన్నిముగిసి, జరాభారమధిగమించు!
గతముదవ్విన మానసం-కమిలికుములు!
చిత్తమెటులనీచింతన జెంద నేర్చు!
కమనపుర వేదనిధి! వేణుగాన కృష్ణ!
32*
ఉన్నదెప్పుడు,లేమిడి నుండె సంతు-
కన్నకృషి ఫలితార్థంబు కలిమి వీడి-
తెల్లవస్త్రధారణ నింద దేలి చనియె!
కమనపుర వేదనిధి! వేణుగాన కృష్ణ!
33*
మూగ గామొరబెట్టుకొను భక్తి మానసమ్ము-
దినము శతకాళిలో దాగె! తిరమునొందె!
వెరసి సోదియయ్యెను ఎదరి విసిగె!
కమనపుర వేదనిధి! వేణుగాన కృష్ణ!
34*
కాలమార్పున సమకాల కథనగతుల-
దరసి నరజీవనముసాగె దక్కెయాది!
భావి పౌరులకిదియు నిప్పచ్ఛరంబె!
కమనపుర వేదనిధి! వేణుగాన కృష్ణ!
35*
మౌన రోదన వాస్తవమార్గ మొరలు
ముఖపుటిచ్ఛలు గాకుండ-మూలకముగ
భక్తి బలపడు శతకాళి బాట మేలు!
కమనపుర వేదనిధి! వేణుగాన కృష్ణ!
36*
దారినాగును,శిథిలశరీర బరువు
జవముదగ్గును, భోగముల్ చవులుదప్పు!
రాయి వేసిబురదదాటు సోయి మిగులు!
కమనపుర వేదనిధి! వేణుగాన కృష్ణ!
37*
కుతకమెచ్చిన కనులుండి గుడ్డి బతుకు
కృత్రిమ వస్తువాడకముచే కృంగు, తనువు!
స్వస్థత రహిత వైద్యాన చతుకు జన్మ!
కమనపుర వేదనిధి! వేణుగాన కృష్ణ!
38*
జరుగనున్నదే జరుగును జగతి ప్రగతి
మంచిచెడులుండు నీదయ మంచిగెలుచు!
చెడ్డలనుభవముద్రలై చెన్నుమీరు!
కమనపుర వేదనిధి! వేణుగాన కృష్ణ!
39*
పాతరోతగు,బంగారు సేతయనగ
కొత్తవింతల మరుగున కొంపలందు-
ఇంగు గట్టిన వాసన గుడ్డసంగతిగను!
కమనపుర వేదనిధి! వేణుగాన కృష్ణ!
40*
వాటమగుడబ్బుగబ్బులే-మాట మాయ-
పేటినింపుసంపాద్యమే మేటియగును!
నీతి యడుగంటి,నీభక్తి నిష్ఠ దేల్చు!
కమనపుర వేదనిధి! వేణుగాన కృష్ణ!
41*
ఆర్జనలు లేని శైశవారాటమందు
బహుగ సంతసమున్నను భవిత ఊహ-
గడచుసోమరితనముచే గడబిడగును!
కమనపుర వేదనిధి! వేణుగాన కృష్ణ!
42*
పిదప నీరసపు నిరుద్యోగ వీథి బతుకు
వైద్యములు రిపేరులు వాడవాడ-
తిరగగా నారు వర్షముల్ తరిగి చనియె!
కమనపుర వేదనిధి! వేణుగాన కృష్ణ!
43*
పని విరామ మైమాతృ బాష చదువు!
ధృవపు పత్రాల వేటలో దీక్ష తెలుగు
గురునియామకమయ్యె, గుర్తు గలిగె!
కమనపుర వేదనిధి! వేణుగాన కృష్ణ!
44*
వేచి చూచుకుటుంబానికి ఏడుగడయె!
తిండి దినవెచ్చముల ఖర్చు దీర్చు తపన!
ఆశ్రితులు ఆశ్రయమునిచ్చు ఆశయమున!
కమనపుర వేదనిధి! వేణుగాన కృష్ణ!
45*
తన్ను మాలిన ధర్మంబు ధరణి గలద?
తెప్పదాటికాల్చెడు లోభగుప్తమతులు-
వీడిపోవగ హృది దొల్చె వివిధయాది!
కమనపుర వేదనిధి! వేణుగాన కృష్ణ!
45*
ముందువెన్కలయలనాటి ముద్ర మలిపి
గతము మరిపించి మురిపించు, కనలు మదికి-
మరుపు వరమంద్రు తుదకిచ్చు మంచిఫలము!
కమనపుర వేదనిధి! వేణుగాన కృష్ణ!
47*
సాగె సంసారవారాశి చౌక బతుకు
వృద్ధి పొందె సత్సంతాన బుద్ధి పటిమ!
మంచి జరిగించు మునుముందు మాట నిలుపు!
కమనపుర వేదనిధి!వేణుగాన కృష్ణ!
48*
అంటుబాయదు ఆత్మీయ తంట గెలుచు
సాంప్రదాయము గుల్లయె సాయమడుగ-
ఆడబిడ్డల సొమ్ములు అరగవంద్రు!
కమనపుర వేదనిధి! వేణుగాన కృష్ణ!
49*
పాదుగొల్పితి గురుకీర్తి పాదపమును-
పూతకాతసత్ఫల పుణ్య పూరకముగ!
చింతనములందు నినుజేరు చింతమిగిలె!
కమనపుర వేదనిధి! వేణుగాన కృష్ణ!
50*
కోర్కె శోకహేతువుకదా? కొంపకొంప
గల్మశాంతి సిరి దట్టిన గలుగు ఈవి!
ఈవితోపుణ్య కార్యముల్ ఇంపుగూర్చు!
కమనపుర వేదనిధి! వేణుగాన కృష్ణ!
51*
తండ్రి పరమపదవి బాట దరలె, నాడె!
తల్లి శతవృద్ధి గుదిబండ దలపజేసె!
అనుజు తోబావల్ భువి లేని మనుజులైరి!
కమనపుర వేదనిధి! వేణుగాన కృష్ణ!
52*
పోగమిగిలిన వారివి హృది పొగులు కథలె!
ఎవరి యాత్రత వారిదై ఎదురు ఈతె!
నీతొ గాకను-నివేదింప నెవరు గలరు!
కమనపుర వేదనిధి! వేణుగాన కృష్ణ!
53*
మేనమామగ నాత్మీయ మేనమోసి
తండ్రి బాధ్యత నడిపించి దండి కార్య-
ఖర్చు గుప్పించగా పనులుచేకూర్చె కీర్తి!
కమనపుర వేదనిధి! వేణుగాన కృష్ణ!
54*
అమ్మ పనిసేవనాశించి అదనుదప్పి
అద్దెదొరకక నిర్మాణ పద్దు వృధగ
మరలమొదటికి వచ్చితి, మాథవుండ!
కమనపుర వేదనిధి! వేణుగాన కృష్ణ!
55*
పెద్ధ రికమంద్రు, వృద్ధుల పేరుకీర్తి
తనయు భుజమెక్కినదటంచు-తాతలనగ-
రుద్ధితిని సంతుపై బరువు రూఢిపనుల!
కమనపుర వేదనిధి! వేణుగాన కృష్ణ!
56*
మంచి చెడుగు పరస్పర మారువేష
దారులనువచ్చె, వైరుద్ధ్య దాడినణగి
సంఘనికష భరించితి, చతికియుంటి!
కమనపుర వేదనిధి! వేణుగాన కృష్ణ!
57*
ఇతరు నమ్మి భావనసేసి పలుకరించి-
నిన్ను నమ్మి కీర్తన సల్పు-నన్ను విడక-
మంచి ప్రాతిపదిక నిల్పు మనుగడంత!
కమనపుర వేదనిధి! వేణుగాన కృష్ణ!
58*
పోయినది పొల్లు ఉన్నదే పొసగ- గట్టి
మేలు, ఊడిన వెంట్రుక బోలు మేటియాస్తి!
నీదు ప్రేమ శక్తియె నన్ను నెగ్గ జేసె!
కమనపుర వేదనిధి! వేణుగాన కృష్ణ!
59*
మరుపుగొనుట సులభంపు మాటగాదు!
మరుగు జొచ్చినీవాడించు మర్మకేళి-
బ్రహ్మ మోదానుభవమిచ్చి భద్రతొసగు!
కమనపుర వేదనిధి! వేణుగాన కృష్ణ!
60*
మనుజు వెన్నంటి చిటికెడు మట్టి జనదు!
వట్టిచేత జనిరి చక్రవర్తులెల్ల-
అంటు బాసిన జన్మల వెంటనీవె!
కమనపుర వేదనిధి! వేణుగాన కృష్ణ!
61*
ముదము హృదిమూల కొదిగెను,
ముదిమిజడుపు
భక్తి పారవశ్యముడిగె-గీతభావఝరుల-
ప్రేమశక్తికి-మరికొంత ప్రేరణొసగు!
కమనపుర వేదనిధి! వేణు గాన కృష్ణ!
62*
ఇతరజోలిమానితి,మెప్పు హితవటంచు
మేలు బాషించి పొగడితి ప్రేమ శక్తి-
గీతగోవింద హరిహర! కీశగమన!
కమనపుర వేదనిధి! వేణుగాన కృష్ణ!
63*
త్యాగమూర్తులెవ్వరపేక్షలు సాగు బతుకు!
దీక్ష సత్సంగ సేవల దిద్దు దీవె!
వర్తనము వర్తమానమై వరల నిమ్ము!
కమనపుర వేదనిధి! వేణుగాన కృష్ణ!
64*
చేతనము గూర్చు నీదివ్య చైత్రరథము!
సృష్టి సాగు వసంతముల్ పుష్టిగూర్చు!
స్థితిలయంబుల హరిహర! చిత్ర సింహ!
కమనపుర వేదనిధి! వేణుగాన కృష్ణ!
65*
మంచి జీవన సమరాన పెంచకున్న-
చెడుగు పాపమ్ము పేరున చెలగి పుణ్య
గతి మరిదప్పు-నరజాతి కాటగలియు!
కమనపుర వేదనిధి! వేణుగాన కృష్ణ!
66*
డబ్బునగొనెడు,ఆరోగ్య డంబ మణిగె!
ప్రకృతి వైద్యమె పడగెత్తె ప్రస్తుతంబు!
అందుబాటు చేయూతల నడిగి నిలిచె!
కమనపుర వేదనిధి! వేణుగాన కృష్ణ!
67*
అలసి పోలేము నీయాజ్ఞలధిగమించి!
ఆరిపోదు లీనముదాక అంతరాత్మ!
తనువు మనససు తానుగాదనను తరచు!
కమనపుర వేదనిధి! వేణుగాన కృష్ణ!
68*
శాతిరహితజీవనకేళి భ్రాంతి గూలు!
వినదు మదిపోవు పోకల-విశ్వరూప!
భోగరుచిదేలు కుతుకమై పొద్దు మాపు!
కమనపుర వేదనిధి! వేణుగాన కృష్ణ!
69*
దాన తపసిద్ధిని, కలిని -తపసి నరుడు-
పూర్ణుడైపొందు తత్ఫల పుణ్యఫలము!
ముక్తికింధనమదియగు ముందు ముందు!
కమనపుర వేదనిధి! వేణుగాన కృష్ణ!
80*
ఏది గాంచన కొంగ్రొత్త- ఎదురు బెదురె!
మిగుల పక్షదోష కారియె! మ్రింగుమందు-
త్వరిత గుణకారిగా విషతత్వమణచు!
కమనపుర వేదనిధి! వేణుగాన కృష్ణ!
***
71*
శ్రీద!శ్రీశ!సీతామనోహర!చేతనాంశ!
వరద!వరవెంకటాద్రీశ!పరమ పురుష!
విశ్వ శ్రీకృష్ణ చైతన్య! విజయమిత్ర!
కమనపుర వేదనిధి! వేణుగాన కృష్ణ!
72*
ఆత్మ దర్శింప లేదింక ఆదరించు!
అందు నిను గాంచు సత్చిత్త చందమొసగు!
తనువు మనసు మరచు తత్వమొసగు!
కమనపుర వేదనిధి! వేణుగాన కృష్ణ!
73*
ఆత్మనేనైతె గతమేల ఆత్రమేల?
నీదు భాగమైతేయూహ నికరమేల!
వర్తమానమీక్షణ సుఖ వరమునొసగు!
కమనపుర వేదనిధి! వేణుగాన కృష్ణ!
74*
సంతసమునుండి యానందసదన వార్థి
మొదటి మునకేసి సంసారి మోదమొందు!
వెన్నుడా! మరిపడ నీకు వెనకటడుగు!
కమనపుర వేదనిధి! వేణుగాన కృష్ణ!
75*
శోకమేనరక ప్రాయ లోక చరిత-
సుఖమె సొరగము, నీతత్వ శోధలెరుగ-
తుచ్ఛములుబాయు బతుకున స్వేచ్ఛ వెలయు!
కమనపుర వేదనిధి! వేణుగాన కృష్ణ!
76*
మహిని కలిమాయలోబుట్టి మాయజీల్చు
భక్తియోగమ్ము నటియించి శక్తిమేర
మరల మాయార్థికము గూర్చు మనగడేల!
కమనపుర వేదనిధి! వేణుగాన కృష్ణ!
77*
వివిధమార్గాల సత్యంబు విస్తరించి
తరచు తలబొప్పికట్టించె తాత్వికాలు!
భక్త సులభనిన్ ప్రకటించె భాగవతము!
కమనపుర వేదనిధి! వేణుగాన కృష్ణ!
78*
కొండ గోరంత దీపాన కొసరివెలుగు!
తోట చిగురించు చైతన్య కోటనీవె!
గుండె వెలిగించి నరజాతి గూర్చు శాంతి!
కమనపుర వేదనిధి! వేణుగాన కృష్ణ!
79*
బాదలన్ ద్రోతు బంగాల ఖాతమందు!
మోదమునుగొందు హిందూసముద్రమందు!
జాగృతిన్ పొందుదరెబియా జలధి గాంచి!
కమనపుర వేదనిధి! వేణుగాన కృష్ణ!
80*
మరుపు సాధించు గతచెత్త మాయబతుకు!
మనిషిగానుందు నీనిష్ఠ మరలనతుకు!
నీదు సేవమానవసేవ నియతి నడుపు!
కమనపుర వేదనిధి! వేణుగాన కృష్ణ!
81*
యుక్తి యిహసుఖార్తి పాలి యున్నతంబు!
భక్తి పరలోక సుఖతత్వ ముక్తిదంబు!
ప్రేమశక్తిగ ప్రేరణాసక్తి నీది!
కమనపుర వేదనిధి! వేణుగాన కృష్ణ?
82*
బట్ట తలనుమోకాలికి గట్టు వాదు
తలకు బొప్పిగట్టించెడు తళుకు బెళుకు!
స్పష్టమగు బోధ పరతత్వసారమదియె!
కమనపుర వేదనిధి! వేణుగాన కృష్ణ!
83*
తెలియకున్నవాదించేటి తీరుతెన్ను
అర్థమేగాదు, వేదపురాణ దోవ
ఉపనిషత్తు సారముగీత ఉర్వి మోగె!
కమనపుర వేదనిధి! వేణుగాన కృష్ణ!
84*
నరుని ప్రశ్న – సమాధాన నాణ్యతొసగె
సమతయోగంబు భాసించె సామి సూక్తి!
నీదు శరణాగతిబొందు నిష్ఠ వెలసె!
కమనపుర వేదనిధి! వేణుగాన కృష్ణ!
85*
నేటి జన్మకర్తవ్యంబు నెఱిగి నరుడు
త్రికరణవిశుద్ధి మెదులుచు తినుచు తిరిగి-
మంచిచెడు విభజించి మనుట గలిగె!
కమనపుర వేదనిధి! వేణుగాన కృష్ణ!
86*
మాటచేతల మంచియే మూటగాగ
భువిపరోపకారపు పుణ్య భూమికగుచు
ఆచి తూచిసాగిన నీతియధిగమించు!
కమనపుర వేదనిధి! వేణుగాన కృష్ణ!
87*
యోచనలు సాగె నీగీత యోగ్యగతుల
సూచనలుసాగె పండిత సూక్తి వెడలె!
సమయమును లేదు! బతుకుకై సాగె మనిషి!
కమనపుర వేదనిధి! వేణుగాన కృష్ణ!
88*
భక్తి యోగాన దానంబు బలమొసంగు!
దానమె తపము తపసిగా దనరు నరుడు!
దానికై ధ్యాని గావలె- దక్కు సిరులు!
కమనపుర వేదనిధి! వేణుగాన కృష్ణ!
89*
భక్తియోగియై కలిమాయ శక్తిగెలిచి
భక్తి దాన నిధానంపు బాటనడిచి-
పుణ్యమనుమంచి బెంచగా బూనవలయు!
కమనపుర వేదనిధి! వేణుగాన కృష్ణ!
90*
దండిమిడుకుడే పరకూటి తిండిపోటి-
వెసన సంతులనాథలే! వెసగవారి-
యుద్ధ ప్రాతిపదికముగాగనుద్ధరించు!
కమనపుర వేదనిధి! వేణుగాన కృష్ణ!
91*
భక్తి నవరీతులను దెల్పె భాగవతము!
కీర్తనాభక్తి వైశిష్ట్య క్రియలు నెఱపె!
హితవు సామాజికముగ సాహితియు వెలసె!
కమనపుర వేదనిధి! వేణుగాన కృష్ణ!
92*
పద్య పఠనకీర్తన సాగె – ప్రముఖకవులు
రామవారథులై పాడి రాణకెక్క-
భక్తి వికసన బ్రహ్మమై భవిత మురిసె!
కమనపుర వేదనిధి! వేణుగాన కృష్ణ!
93*
గలుమ గలుమన వినిపించె గానఝరులె!
తనువు పరవశించియునాడె! దాసజగతి-
రాజు పేద సత్సంగ విరాజులైరి!
కమనపుర వేదనిధి! వేణుగాన కృష్ణ!
94*
శైవ సాహితి వెలయించె సజ్జనాళి-
వైష్ణ వాఙ్మయముప్పొంగె వరుససాగె!
బ్రహ్మ భావనలొక్కటై ప్రజల బ్రోచె!
కమనపుర వేదనిధి! వేణుగాన కృష్ణ!
95*
అవనిగావలె నన్నియు అవసరముగ-
ఎట్లు తరియింత్రు కోటాను కోట్ల జనులు!
ఒక్క మాటయే చొక్కమై నొక్కదెందు!
కమనపుర వేదనిధి! వేణుగాన కృష్ణ!
96*
మౌన శాంతిసుఖము భక్తి మార్గమయ్యె!
సమ్మతియె మతమార్గాన సాగిపోయె-
భక్తి వెక్తిగతముగాగ ముక్తినొసగె!
కమనపుర వేదనిధి! వేణుగాన కృష్ణ!
97*
అభయ హస్తమై తృప్తియే శుభమొసంగు!
శక్తి సానుకూల ప్రేమ సాగుచుండు!
ప్రేమ శక్త్యాత్మలో నీవు ప్రేరణొసగు!
కమనపుర వేదనిధి! వేణుగాన కృష్ణ!
98*
శుభము విజ్ఞనూతన పరిశోధనలకు!
పాతకొత్తల కలయిక పాటవంబు-
శుభము, సుఖశాంతి కరమగు-సూక్తి నడుపు!
కమనపుర వేదనిధి! వేణుగాన కృష్ణ!
99*
జరిగె హరెరామ కీర్తనల్ పరమనిష్ఠ
జగతి నీసేవ చైతన్య నివహమెగిసె!
ఆత్మదృష్టిని ఊర్థ్వమై అధిగమించె!
కమనపుర వేదనిధి వేణు గాన కృష్ణ!
100*
త్రికరణపు శుద్ధి తిరుగాడె తీపి చేదు
మంచిచెడులను మరినీదు మార్గమందె!
భక్తి యోగిగా కలిమాయలధిగమించె!
కమనపుర వేదనిధి వేణు గాన కృష్ణ!
101*(సంపూర్ణం)
భక్తి నవరీతులను దెల్పె భాగవతము!
కీర్తనాభక్తి జగమందు కీర్తిగాంచె!
హితవు సామాజికముగ సాహితియు వెలసె!
కమనపుర వేదనిధి వేణు గాన కృష్ణ!
102*
పద్య పఠనకీర్తన సాగె వాద్యఝరులు-
వారదులుగాగ వసుధపై వాసిగాంచె!
భక్తి వికసన మధురమై బ్రహ్మ మురిసె!
కమనపుర వేదనిధి వేణు గాన కృష్ణ!
103*
పద్యమో పాటయో గాన భజనసాగె
తనువు పరవశించగనాడె దాసజగతి
రాజుపేద సత్సంగవిరాజులైరి!
కమనపుర వేదనిధి వేణు గాన కృష్ణ!
104*
విష్ణు, శైవసాహితి పొంగె విస్తృతముగ
బ్రహ్మ మతమయ్యె నేకాత్మ భావపటిమ!
మానవత్వపునాదుల మంచివెలసె!
కమనపుర వేదనిధి వేణు గాన కృష్ణ!
105*
అవనిగావలె నన్నియు అందరెట్లు-
ఎట్లు తరియింత్రు కోటాను కోట్ల మంది
ఒక్కమాటయే చొక్కమై నొక్కదెందు!
కమనపుర వేదనిధి వేణు గాన కృష్ణ!
106*
మౌన శాంతి సుఖము భక్తమదినికోర్కె
సమ్మతిగ మతముగ దారిసాగె! భక్తి-
వ్యక్తి గతమయ్యె తత్ఫలాసక్తి-ముక్తి!
కమనపుర వేదనిధి వేణు గాన కృష్ణ!
107*
భక్తిలోసొంతయత్నమే బలమొసంగు-
ప్రేమశక్తి సామిగ గల్గి ప్రీతిగొల్పు!
జగతిగావలె మానవ జతనదీక్ష!
కమనపుర వేదనిధి వేణు గాన కృష్ణ!
108*
శుభము-కొత్తపాతలగల్పు సూత్రతతికి-
శుభము నూత్ననాగరికత-శోధనలకు-
శుభము-సకలజనాళికి-శుభము శుభము!
కమనపుర వేదనిధి వేణు గాన కృష్ణ!