శరణాగతి-2
1*
శ్రీలు పొంగు భక్త శ్రేష్ఠ చారిత్రముల్
శ్రేయ నిధులు భారతీయ కథలు!
వేద విధుల దీప్తి వెలయు ధార్మికములు!
స్వామి కొడవటంచవాస శరణు!
2*
సౌష్ఠవాభివృద్ధి సామ్యత సద్భక్తి-
నీతి ధర్మ గతుల నిష్ఠ వెలసె!
పుడమి – మంచి చెడులె పుణ్యపాపములనన్
స్వామి కొడవటంచవాస శరణు!
3*
నీతి లేక జాతి నిర్మాణమే వృధా!
మతపు ధర్మ మార్గ మనుసరించి-
మంచిబెంచు మనిషి మహిలో మహాత్ముడు!
స్వామి కొడవటంచవాస శరణు!
4*
భక్తి నియమ నిష్ఠ భద్రత గౌరవమ్
మూఢ మతియు బ్రహ్మ ముదము గొనదు!
విజ్ఞులందు కపట ప్రజ్ఞ నిరర్థకమ్
స్వామి కొడవటంచవాస శరణు!
5*
నాది – నేను – మరిచి, నయమైన దారిలో
జయముబొందు నరుడు జగతి యందు!
సంఘ జీవి గాన సత్సంగ మేమేలు!
స్వామి కొడవటంచవాస శరణు!
6*
మనము-మనది-యనెడు మానవత్వపు మంచి-
కొంచమైనను చాలు, సంచితార్థ-
పుణ్యనిధులు-ముక్తి పూర్వకంబులుభువిన్
స్వామి కొడవటంచవాస శరణు!
7*
అరయ సైన్సు-జాతియనుభవ జ్ఞానము-
జ్ఞాన మనగ యాత్మ గనెడు దారి-
మాయతెరలు జీల్చు, మార్గమీ ధరలోన!
స్వామి కొడవటంచవాస శరణు!
8*
మంచి నాచరించు, మనిషియాలోచన-
నీతి ధర్మ మార్గ నియతి-భక్తి
సహన బుద్ధి, శాంతి, నిహపర సౌఖ్యముల్
స్వామి కొడవటంచవాస శరణు!
9*
జీవినుద్ధరించు జీవకారుణ్యము
నమ్మకంబు వెంట నలరు వృద్ధి!
ఆత్మ దర్శనంబు నానందదాయకమ్
స్వామి కొడవటంచవాస శరణు!
10*
చేవ గూర్చు నీతి సేవలో నీసేవ!
బలముగూర్చు భక్తి బాట ముక్తి!
సుకృత విత్తగణన సూత్రధారుడ వీవు!
స్వామి కొడవటంచవాస శరణు!
11*
మానవాళి నీదు – మార్గగాములు గాగ
తేజరిల్లు చుంద్రు దేవతలుగ
స్వార్థమార్గ తామసాత్ములు రాక్షసుల్
స్వామి కొడవటంచవాస శరణు!
12*
పేద గొప్ప బేధ ప్రేరణ ధనముదే-
సుకృత ధనపు బుద్ధి సూక్షవృద్ధి!
మానవత్వ విధులు-మంచి తార్కాణముల్
స్వామి కొడవటంచవాస శరణు!
13*
నీపురాణ కథలు నీతి ధర్మ నిధులు
త్రికరణాల శుద్ధి తీరు తెన్ను!
ధన్య కీర్తిదములు – దయయు దాక్షిణ్యముల్
స్వామి కొడవటంచవాస శరణు!
14*
మంచి బెంచి చెడును వంచుట నీపనీ!
పశువు నుండి వేరు పరచి మనిషి-
మానిషిగను మలచు మార్గమే నీభక్తి!
స్వామి కొడవటంచవాస శరణు!
15*
లౌకికంబు భుక్తి లభ్ధితో శక్తియు-
యుక్తియు పెంపొందు నుర్వి వెలయు
భక్తి బాటలెపుడు పారలౌకికములు!
స్వామి కొడవటంచవాస శరణు!
16*
భౌతికాల బ్రతుకు భ్రాంతి తాత్కాలికమ్
ఆత్మ-శాశ్వత పరమాత్మ సొమ్ము!
వట్టి నోటి దురద వాద వివాదాలు!
స్వామి కొడవటంచవాస శరణు!
17*
దైవ ప్రేమ దడిసి ధరజీవ తతులెల్ల-
నీతి ధర్మ వృక్ష నిజఫలాలు-
లక్షణాల మంచి లక్ష్యమే సద్భక్తి!
స్వామి కొడవటంచవాస శరణు!
18*
కర్మ ధర్మ సూత్ర గతజీవనము నీవె-
గమ్యముగను సాగు కలియుగాన-
తదితరాలు ధరణి తాత్కాలికంబులు!
స్వామి కొడవటంచవాస శరణు!
19*
నీదు నీతి గీత నియమ సందేశముల్
అవని మ్రోగు-విధుల సవరణలుగ!
నయజయంబులొసగు, నరలోకమును బ్రోచు!
స్వామి కొడవటంచవాస శరణు!
20*
అహము మనసు గాక, ఆత్మయై తాత్విక-
సహనమొంది, శాంతి సంయమనము-
జరుగు పుణ్య దీప్తి, జయమగు, నయమగున్
స్వామి కొడవటంచవాస శరణు!
21*
బ్రతుకు నెల్ల నీదు భారంబుగా జేసి
నిష్ఠలందు పుణ్య వృష్టి గురియ-
ముగ్ధ భక్తి బాట మురిపాల సంద్రమే
స్వామి కొడవటంచవాస శరణు!
22*
జగతి నాటకంబు ప్రగతి ప్రదర్శన-
పాత్రధారి నడుపు సూత్రధారి!
బ్రతుకు దిద్ధు భక్తి నతికించి శాసించు!
స్వామి కొడవటంచవాస శరణు!
23*
భారతీయ వేషబాషలందున, వేల్పు-
భక్తి చదువు సంధ్య యుక్తమైన-
సాంప్రదాయ వెన్న-సంస్కృతి వెన్నెలల్
స్వామి కొడవటంచవాస శరణు!
24*
భయము భక్తి శ్రద్ధ భావగాంభీర్యముల్
పాడి దప్ప నట్టి బ్రతుకు దెరువు
రీతి, పాపభీతి, నిత్య సుకృత ప్రీతి!
స్వామి కొడవటంచవాస శరణు!
25*
పట్టి విడువరాదు పావన వ్రత దీక్ష
పట్టు దలగ భక్తి మట్టుకేసి-
కట్టవలయు మనసు-గుట్టు దెల్యు పిదప!
స్వామి కొడవటంచవాస శరణు!
26*
పుడమి జీవులందు బుద్ధి జీవి నరుడు
పూనుకొన్న భక్తి పూర్ణుడగును!
తుచ్ఛ భోగములను తూర్పార బట్టును!
స్వామి కొడవటంచవాస శరణు!
27*
విశ్వ రూపు- కనులు వేయైన చాలవు
గనగ పొగడ తలలు గలవె వేయి!
శేషశాయి! నీదు సేవజేయగనిమ్ము!
స్వామి కొడవటంచవాస శరణు!
28*
లోక విద్ధె తో వివేక బుద్ధియు శ్రద్ధ-
పార లౌకికమగు భక్తి గలుగ-
బ్రహ్మ మోదమిచ్చి పరమపదము జేర్చు!
స్వామి కొడవటంచవాస శరణు!
29*
చేయు పనులయందు, చెప్పు మాటల యందు శుద్ధి-
యోచనలను శుద్ధి నోచకున్న-
నీతి ధర్మవిధుల రీతి సాగదు కదా!
స్వామి కొడవటంచవాస శరణు!
30*
శెనగలారగించి చేయి గడిగి నట్లు-
పైపటారపు పని ఫలము నిడదు!
చేయి దాచి పరుల సేవ గోరుట
వృధా!
స్వామి కొడవటంచవాస శరణు!
31*
తాత తండ్రినాటి తరతరాల బ్రతుకు-
మార్పు గారడియని, మనుమడింద్ర-
జాలికుడను పేరు చాల గడించేను!
స్వామి కొడవటంచవాస శరణు!
32*
నాకు సద్ధి నిమ్ము-నీకాకలైనచో
మందుగొనుమటంచు మాత్రజూపు,
మాయికుండు, భువినమాయకు వంచించు
స్వామి కొడవటంచవాస శరణు!
33*
నమ్మియున్న వాని నట్టేట ముంచెడు-
నిపుణుడైన ఖలుడు, నీదు కంట-
వ్రేలు నిడెద, నీదు వ్రేలు నానోటనూ-
స్వామి కొడవటంచవాస శరణు!
34*
సాగినంత సేపు సాగించు సాగని-
నాడు, నాత్మబోధ నాలకించు!
ఆత్మ దెలియగ పరమాత్మ నాలోచించు!
స్వామి కొడవటంచవాస శరణు!
35*
తిరిగి తిరిగి, మిడత దీపంబు దరిజేర,
వేచియున్న నల్లి వెసను మ్రింగె-
ప్రొద్ధు వెలుగు నీడ పొంచుమృత్యువు జాడ!
స్వామి కొడవటంచవాస శరణు!
36*
ఇచ్చి మరచు వాడె యిలవేల్పు సముడనన్
అడుగు వాడు తిరిగి యిడుమలొందు!
పుచ్చుకొన్నవాడె పులియయ్యె! కలిలోన
స్వామి కొడవటంచవాస శరణు!
37*
సాద లేని తల్లి సంతానమును చెత్త
కుండినేయు ప్రాత గొంతు కథయె!
టెస్టు టుయ్బి బేబి హిస్టరీ లేటెస్టు!
స్వామి కొడవటంచవాస శరణు!
38*
మనసు గల్గు వెంట-మార్గంబు గల్గును
మనసులేని తీరు మనిషి రాయి!
అద్దె గర్బ సంచి పద్ధతి తరువాయి!
స్వామి కొడవటంచవాస శరణు!
39*
దెబ్బకు భయపడును దేవుని మన్షియు-
పగను-బట్టుట మది పాము పుట్ట!
కాల్చు నగ్గి పుల్ల కాలిపోవును కదా!
స్వామి కొడవటంచవాస శరణు!
40*
విలువ కట్టలేని, వింతకాలము పెట్టె-
బెట్టి, దాయలేని పెద్ధ నిధియె!
నీతి విలువ కాల రీతిని సవరించు!
స్వామి కొడవటంచవాస శరణు
41*
గుర్తు లేని చరిత, ఎర్తుకేకులపాలు
శిలలు శాసనాలు, శిల్పి, శిల్ప-
కళలు గలియు, కాల గర్భంబు లోపలన్
స్వామి కొడవటంచవాస శరణు!
42*
కాయ గసురు దిన్న కాయంబు బెరుగును
ఊడ్చి పోయ పెంట యునికి బెరుగు
బుద్ధి బెంచు విద్య-సిద్ధించుటే మేలు!
స్వామి కొడవటంచవాస శరణు!
43*
అవని బ్రోవ రాము డాదర్శ మానవు
డగుచు బుట్టి భువిని, తగినయట్టి
కట్టు బాటు సాగె కౌటుంబ జీవనమ్
స్వామి కొడవటంచవాస శరణు!
44*
బిడ్డ యల్లుడట్లు దొడ్డ ప్రేమను, జాన-
పదులు సీత రామ ప్రభువటంచు-
పాటలందు భక్తి భావంబు ప్రకటింత్రు!
స్వామి కొడవటంచవాస శరణు!
45*
విశ్వ జనసుఖార్తి-విశ్వామిత్రుడు యజ్ఞ
దీక్ష నుండి రామ లక్ష్మణులను
రక్షకులుగ నిల్పి రాక్షసాళి నణచె!
స్వామి కొడవటంచవాస శరణు!
46*
శివుని విల్లు నెక్కు పెట్టి నారియు గట్టు
యత్నమందు విరిగె, నంత సంత-
సించె సీత, జనుల చిత్తంబు వికసించె!
స్వామి కొడవటంచవాస శరణు!
47*
కట్టె పయనము, మునికార్యార్థమై
కట్టె తాళి, జనకు పట్టి మెడను-
కట్టె తిరుగు పయనమట్టె తమ్ములు రాగ!
స్వామి కొడవటంచవాస శరణు!
48*
కట్టె తండ్రి యాజ్ఞ కారడవి వెడల-
కట్టడి గొనె, తగు కైక కోర్కె-
కట్టు వడిన జనకు కట్టడి తలదాల్చె!
స్వామి కొడవటంచవాస శరణు!
49*
కట్టె నారచీర-కాంత వెంటయు రాగ
నట్టె లక్ష్మణుండు, ననుసరింప!
కట్టె గుహుడు, పడవ కఱ్ఱకు తెరచాప!
స్వామి కొడవటంచవాస శరణు!
50*
కట్టె పర్ణ శాల, గట్టు మెట్టుల మీద
మజిలి కొక్క సొంపు మనసు కింపు!
కట్టు బాటు, రక్ష గట్టె ముంగిట తోట!
స్వామి కొడవటంచవాస శరణు!
51*
కట్టు బాటు వ్రతము – కంకణమును గట్టె
కాంత చుప్పనాతి కన్నుగుట్టె
కట్టు జేయ ననుజుకప్పగించెను ప్రభు!
స్వామి కొడవటంచవాస శరణు!
52*
కట్టె కక్ష, దనుజకాంత రాముని సీత
కట్టి తేగను సమకట్టె-కథలు-
గట్టి జెప్పె, నాసికా కర్ణగాయముల్
స్వామి కొడవటంచవాస శరణు!
53*
కట్టె వింటినారి, కనకమృగము దేగ
కదలె, సీత కోర్కె కరుణ దీర్ప-
కనక మృగము మాయ కనుకట్టు జేయగా!
స్వామి కొడవటంచవాస శరణు!
54*
కట్టె వేషము యతిగా రావణుడు తన
చేతను బెకలించె సీతబడిన-
మట్టి పెల్లను రథమందుంచి చెఱబట్టె!
స్వామి కొడవటంచవాస శరణు!
55*
కాల్వ గట్టె మాత కన్నీటి చారలున్
సీత గీత దాటి చింత నొందె!
సీత కనుల వెదకె శ్రీరామ చంద్రుని-
స్వామి కొడవటంచవాస శరణు!
56*
కట్టె పయనమంత కదలె దక్షణ దిశన్
వెదకు వేళ హనుమ యెదురు వచ్చె!
ప్రభువు దెలిసి తాను బంటుగా మారెను!
స్వామి కొడవటంచవాస శరణు!
57*
కట్టె మైత్రియు పురి గట్ఠె సుగ్రీవుడు
భక్తుడయ్యె, వాలి బాధ బాసె!
కట్టె రాఘవుండు కడలి పై వారధీ!
స్వామి కొడవటంచవాస శరణు!
58*
స్వామి గొల్చిరంత శబరిజటాయువుల్
వాలి గూలె జాంబవంతుడాది-
రామదండు సాగె రామదూత వెనుక!
స్వామి కొడవటంచవాస శరణు!
59*
బాల్యమందె గొట్టె పాతకిన్ తాటకిన్
గొట్టె చెడుసుబాహు గొట్టె బెదరి
పారిపోయినట్టి మారీచు మరిగొట్టె!
స్వామి కొడవటంచవాస శరణు!
60*
గొట్టెవిద్యుజింహు గొట్టెకబంధాది
నీచ రక్కసాళి పీచమడచె!
నేక శరపువేటు నేడుతాళ్ళనుగొట్టె!
స్వామి కొడవటంచవాస శరణు!
61*
గోట మీటి యెగుర గొట్టె దుందుభిదేహ-
శల్య గిరిని, భూరి శౌర్యమొప్ప!
వాలిగొట్టె నంత వానితమ్ముని గాచె!
స్వామి కొడవటంచవాస శరణు!
62*
లక్ష్మణుండు గొట్టె లంకేశు తనయుని
మేఘనాథు, మట్టువెట్టె రామ-
విభుడు కుంభకర్ణు, వీరుల, మంత్రులన్
స్వామి కొడవటంచవాస శరణు!
63*
కొట్టె రామదండు కొదమసింగములట్లు
దనుజ గుంపునెల్ల దునిమె నంత!
మారుతాత్మజుండు మైరావణుని గొట్టె!
స్వామి కొడవటంచవాస శరణు!
64*
కొట్టె రాముడు, పడగొట్టె రావణుతలల్
ఇంటి గుట్టు దెల్పె వెంట నున్న-
రావణానుజుండు రణవిభీషణుడంత!
స్వామి కొడవటంచవాస శరణు!
65*
రామ బాణఘాతి రావణుండును గూలె
లంక బుట్టి నట్టి రాక్షసులను-
పోగ మిగిలియున్న యోధులు శరణనన్
స్వామి కొడవటంచవాస శరణు!
66*
కొట్టె మనసు విరగ గొట్టె నంతట నగ్ని
నికష బెట్టె, సీత నిగ్గుదేల్చి-
జనకరాజు పట్టి జననింద బోగొట్టె
స్వామి కొడవటంచవాస శరణు!
67*
బాణమొకటె గొట్టి బ్రహ్మాండమును గాచె
పరగ నొక్కమాట పాటిగాగ-
నేక పత్ని వ్రతము నేర్పడ సాగించె
స్వామి కొడవటంచవాస శరణు!
68*
కొట్టె బాణమెపుడు కోదండ రాముడు?
ధరణి మానవతను ధరణి నడుప-
ధర్మ సుస్థిరతకె-ధనువెక్కు పెట్టెను!
స్వామి కొడవటంచవాస శరణు!
69*
కలుగు,గర్వమంత ఖర్వంబు జేయగా
భక్తులైన, తనదు బంటులైన,
తనయులైన మాట తప్పడు రామయ్య!
స్వామి కొడవటంచవాస శరణు!
70*
జగతి నవతరించి జనులకు మోదంబు
దెచ్చె, దాశరథి యెదేచ్ఛ బ్రతుకు-
నిచ్చె, నీతి విలువ హెచ్చెను నరులందు!
స్వామి కొడవటంచవాస శరణు!
71*
తెచ్చె చిత్తమునకు ఏకపత్నీ వ్రతమ్
వంశమునకు కీర్తి వన్నె వాసి-
నిచ్చె నీతి విలువ హెచ్చెను నరులందు!
స్వామి కొడవటంచవాస శరణు!
72*
తెచ్చె శాంతి సుఖము నిచ్చె సుభిక్షమున్
త్రికరణాల శుద్ధి తేట పడగ!
హెచ్చె సాంప్రదాయ, తేజంబు జగతిలో
స్వామి కొడవటంచవాస శరణు!
73*
తెచ్చె నొక్కమాట దెల్పి చేతలజూపు
బ్రతుకు బాట పుడమి ప్రజలు మెచ్చు-
సీత దెచ్చె, ప్రభువు శ్రీరామచంద్రుడు!
స్వామి కొడవటంచవాస శరణు!
74*
తెచ్చె రాఘవుండు, తెచ్చె నీతి విలువ-
మేలు నొక్క బాణ మేయు విద్య!
తెచ్ఛె, మానవత్వ తేజంబు హెచ్చించె!
స్వామి కొడవటంచవాస శరణు!
75*
సీత రామ విభుడు నేతెంచె పుష్ఫక
మందు, రామదండు ముందు హనుమ!
తెచ్చె రామవార్త, తేలియాడె నయోధ్య!
స్వామి కొడవటంచవాస శరణు!
76*
వచ్చె భరతుడంత తెచ్చెపాదుకలన్న-
పాదములకు దొడిగె, పడియు మ్రొక్కె!
భక్తి యనుజు మెచ్చె ప్రభువు దీవించెను!
స్వామి కొడవటంచవాస శరణు!
77*
పుణ్యమూర్తి!ప్రభువు పుడమి ధీరోదాత్తు
డయ్యె! లోకులు పొగడంగ సీత-
ధీర నాయికగను, దెచ్చె సాహితి శోభ!
స్వామి కొడవటంచవాస శరణు!
78*
తెచ్చె సంస్కరణలు, హెచ్చె సంస్కృతి శోభ
పుట్టి నింట మరియు మెట్టి నింట-
ధర్మనిరతి మెచ్చు దాంపత్య బంధము!
స్వామి కొడవటంచవాస శరణు!
79*
అవతరించె హరియెఆదర్శ మానవ –
మూర్తిమత్వమొప్ప, ముదము గూర్చె!
మానవాళి చరిత మార్గదర్శిగ నిల్చె!
స్వామి కొడవటంచవాస శరణు!
80*
చీకు చింత మాన్పి చిత్తంబు దోచిన-
రామచంద్రమూర్తి, రక్షయనగ-
అన్నపూర్ణయయ్యె పున్నెభారతభూమి!
స్వామి కొడవటంచవాస శరణు!
81*
శ్రీలుజిందు తార చిత్త చంద్రుని జేర
చైత్రమాసమనిరి, జనులు చైత్ర-
చేతనంబె ప్రకృతి చేతనాంశను దెల్పు!
స్వామి కొడవటంచవాస శరణు!
82*
క్రొత్త కోర్కె కీర్తి విత్త తాత్విక సంత
సంబు గూర్చు, పుడమి సాగు బ్రతుకు!
మొత్తమునకు బ్రహ్మ మోదమీ యుగాది
స్వామి కొడవటంచవాస శరణు!
83*
క్రొత్త చింతపండు క్రొత్త బెల్లపు ముద్ద
లేతమావికాయ, వేపపువ్వు!
పచ్చి కొబ్బరి ఘన పచ్చడి రుచి వృద్ధి!
స్వామి కొడవటంచవాస శరణు!
84*
లేత వేపపువ్వు రేకులౌషదమగు
భూతహితవు గూర్చు, పుడమి పంచ-
భూత సహిత తనువు, బుద్ధి నాత్మయు దోచు!
స్వామి కొడవటంచవాస శరణు!
85*
తరచి చూడనైదు తత్వరుచులు నొక్క
పచ్చడైన విధము సచ్చరిత్ర!
శుచియు, శుభ్రత నాల్క రుచి మొగ్గలకు నిగ్గు!
స్వామి కొడవటంచవాస శరణు!
86*
బ్రతుకు నైదురుచుల, యతుకు జీవనకేళి
నాత్మ జన్మజన్మ యాత్ర సాగు!
పుణ్యరుచికి, నివియె బుణ్యాది మూలముల్
స్వామి కొడవటంచవాస శరణు!
87*
మంచి చెడుల దెల్పు పంచాంగ పఠనముల్
దనరు జాతకాల ధైర్య మొసగు!
పరమ పురుషు కథలు, పరమార్థ పటిమలున్
స్వామి కొడవటంచవాస శరణు!
88*
చేదు కష్టములను, చెలగు తీపి సుఖము
పులుపు తీరు కోర్కె వలపులూరు!
తీపి వగరు బ్రతుకు తీరు తెన్నులు జూపు!
స్వామి కొడవటంచ వాస శరణు!
89*
ఐదు రుచులు, ప్రజకు నైకమత్యము నేర్పు
బ్రమయు దొలగు, బుద్ధి బలము గలుగు!
బాహిరంతరగత భావసౌందర్యమున్
స్వామి కొడవటంచవాస శరణు!
90*
పల్లె, పట్న వృక్ష పల్లవంబులు మెక్కి
కోకిలమ్మ పాడు- సోకుమూక-
లవని కందము నిడు శ్రవణ పేయము గాను!
స్వామి కొడవటంచవాస శరణు!
91*
కామదహనమాయె, కన్నీట దడసిన
రతియు పతిని గోరె రాగమొప్ప!
కరుణజూపి శివుడు కాముని బ్రతికించె!
స్వామి కొడవటంచవాస శరణు!
92*
కామియైన, ధర్మగామియై సాగిన
కట్టుబాటు జెల్ల-గలుగు శుభము!
ధర్మ రహిత కామ్య కర్మదుష్ఫలహేతు!
స్వామి కొడవటంచవాస శరణు!
93*
ధర్మ, అర్థ, కామ్య కర్మలు ధర్మమై-
మోక్ష మిచ్చు, విడిగ మూఢగతులు!
పుడమి వెలసె నాల్గు పురుషార్థ సాధనల్
స్వామి కొడవటంచవాస శరణు!
94*
పల్లె పత్తనాల, పల్లవించెడు హోలి-
సుతియు మించకున్న సుఖము గూర్చు!
మోదమెసగ, మనసుమోడు పచ్చని చెట్టు!
స్వామి కొడవటంచవాస శరణు!
95*
కల్తి రంగు, కృత్రిమ కలుషపదార్థముల్,
గాక సహజ రంగు గలుగ, కులము
మతములట్లు నేక మైన యధార్థముల్
స్వామి కొడవటంచవాస శరణు!
96*
భక్తి రాగమొప్ప బ్రతుకమ్మ పండుగల్
సద్ధుల బ్రతుకమ్మ సత్తు పిండ్లు!
పలురకాలు ప్రజలు, పౌష్టికాహారముల్
స్వామి కొడవటంచవాస శరణు!
97*
ఓలి పండుగట్లె నొనరు రంగులచేత-
సద్ధుల బ్రతుకమ్మ-సంకురాత్రి-
పండుగలను, ముగ్గు నిండు రంగోలియున్
స్వామి కొడవటంచవాస శరణు!
98*
తేజ మొప్పు దసర, దేవిపూజలు, నవ-
రాత్రియుత్సవాలు-రంగులీను!
వస్త్రశోభదనరు, వరుసదీపావళుల్
స్వామి కొడవటంచవాస శరణు!
99*
సర్వ జనుల సుఖమె, పర్వప్రయోజనమ్
అందరొక్కటియగు, ఇంద్ర ధనుసు!
నిండు మనసు తృప్తి, పండుగు పబ్బముల్
స్వామి కొడవటంచవాస శరణు!
100*
రంగురంగు గలుపు రంగోలి పండుగల్
వరుస రుచుల గలుపు వత్సరాది!
వయసు మరచి, జనుల మనసు పరిమళించు!
స్వామి కొడవటంచవాస శరణు!
101*
సాగె రచ్చబండ, చదువుల సంక్రాంతి
అక్షరాల చకినమచ్చు దిద్ధ-
సాగు చదువు సంధ్య – సత్కార సంస్కృతుల్
స్వామి కొడవటంచవాస శరణు!
102*
ఊరడిల్లు బ్రతుకునున్నంతలో తృప్తి
పల్లె పత్తనాల ప్రజలు గుండె-
నుప్పతిల్లు ప్రేమలుపకార పుణ్యముల్
స్వామి కొడవటంచవాస శరణు!
103*
బయటి దేశములకు బ్రహ్మవిద్యను నేర్పి
విజ్ఞ విద్య దిగుమతింపు గూర్ప-
నేర్చె భారతీయ నేర్పరి నేటికిన్
స్వామి కొడవటంచవాస శరణు!
104*
భోగి మంటల చలి పొలిమేర దాటించు-
భారతీయులెరుగు బాటలందె-
రోగ దారి క్రిమి నిరోధించు కట్టడి!
స్వామి కొడవటంచవాస శరణు!
105*
వెసన సప్తకంబు వెస నణచు విధులెల్ల
బహుపురాణ నీతి భక్తి రీతి!
మొదలు బెట్ట కున్న మోసమీ కలిలోన
స్వామి కొడవటంచవాస శరణు!
106*
పల్లె మోకరిల్లె పట్నంపు మోజుకై
పట్టణంబు మెచ్చె పల్లె సరుకు!
పట్నసౌధ శోభ పల్లె కొంప డిజైను
స్వామి కొడవటంచవాస శరణు!
107*
భారతీయ నీతి బహుళార్థ సంస్కృతీ
తరచి చూడ మేలు తగిన రీతి-
చేతనత్వ శాస్త్ర చేయూత మంచిదీ!
స్వామి కొడవటంచవాస శరణు!
108*
జగతి భారతీయ జాతీయతకు శుభమ్
నాకు నేను గాక- నీకు నేను-
బ్రతికియుంటి ననెడు భావశుద్ధికి శుభమ్
స్వామి కొడవటంచవాస శరణు!